1 कुरिंथीयो 12 - नाहाली

आत्मिक दान

¹ हे बायहो, मारी ईच्छा नाह कि तुमु आत्मिक वरदाना विषयी मालूम एनजांण्या रेऊ.

² तुमूह मालूम हि, का जेवी तुमु अन्य जातीन एता, तेवी मुक्यू मूर्तीन पासाण जीही चालाडने माय आवतालो तीही चालताला.

³ तामुळे मी तुमूह चेतावणी आपथु कि जो कूण बोगवानान आत्मान मार्गदर्शनाने बोलेहे, तो इही किथी नाहं कि यीशु शापित हि, एने कूण पवित्र आत्मा बोलणार केय शकणार नाहं का यीशु ज्योस प्रभु हि.

⁴ आखाह आत्मान आलेग आलेग वरदान जुडील हि, पुण हे आखा वरदान आपणार आत्मा हा एकुच हि.

⁵ सेवांहा प्रकार जुदाजुदा प्रकारे ठेराव्यू गीया हि, पुण आमु ज्यान सेवा करने तो प्रभु तर एकुच हि.

⁶ काम तर जुलुम कियील गीया हि, पुण आखामाय आखा काम केरणार तो बोगवान एकुच हि.

⁷ आखामाय आत्मा कायताहा कायताहा प्ररकारान प्रकट एतो जे प्रत्येकान हाजा केरीन एता.

⁸ कोणीही आत्मान द्वारे बोगवानान ज्ञानासे जुलुम एईन बोलणेन हाजू आपील गीयी हि, तर कोणीही तान आत्म्याच्याद्वारे विद्येचे वचन जोदेत.

⁹ एने कोणीही तान आत्मा द्वारे विश्वासाचे वरदान आपील गीया, हि तर कोणीही हजो केरणेन क्षमता आपील गीयी हि तान आत्मा द्वारे.

¹⁰ एने कूण दिहीरा माणहा आश्चर्यपुरो शक्ती; आपील गीया हेते, तर कोणीही दिहीराह परमेश्वारा फायरीन बोलणेन शक्ती आपील गीयी हि; एने कोणीही हजो आत्मा पारखणे शक्ती आपील हि, कोणीही जुदाजुदा भाषा बोलणेन शेक्ती आपील हि तर कोणीही भाषातर अर्थ केयीन व्याख्या काडणेन शेक्ती आपील हि.

¹¹ पुण हा तो एकुच आत्मा हि जो ज्याह योग्य होमजथी, आपतेन येतो आवो आखा वातूह पुरो करने.

एक शरीर एक अंग

¹² जाणू आमरीफायरीन आखाज शरीर तर एक हि, पुण तामाय आलेग हि, एने जर अवयव मोकता एतालून पुण तामायरीन शरीर एकुच बोणावली, तोहोलोच मसीह हि.

¹³ कारण जर आमु यहूदी रेणा हि जर यूनानी, दास रेणा रेंय केव्ही हाजो एकुच शरीरान आलेग आलेग अवयव, बोणावणे केरता आपु आखाआ एकुच आत्मा द्वारे बाप्तिस्मा आपील गीयो हि, एने तीह भागवण्याकेरता आमु आखा एकुच आत्मा आपील गीयो हि.

¹⁴ ऐवी देखू, माणुह शरीर काल्लोबी एकुच अवयवांनी बण्याल्ये नसतू पुण तामाय जादा अवयव रेणू.

¹⁵ जर पाय केनार मी, “आथ नाहं तेभी, तामुळे मारो शरीरोरी काय भी संबध नाहं” तर काय तो शरीरान अवयव रेहू नाहं?

¹⁶ याच प्रकारे जर कान केनार, “मी डोलो नाहं, तामुळे मी शरीरान नाहं” तर काय ज्यानकेरता तो शरीरान नाहं?

¹⁷ जर एक देह आखा शरीर रेणा हि तर कारीन होमलील हि? जर कान जोस आखा शरीर रेणा हि तर कारीन हांह लियेल येतो?

¹⁸ केरीन खेरीते बोगवानान जोहलो योग्य समजील तोहोलो प्रत्येक अवयवाह शरीराम तोहलीच जागो आपील.

¹⁹ जर शरीरामरीन आखा अवयव एक हारकाज एय गीयो हि, शरीर का रेणा हि?

²⁰ पुण परिस्थिती ओहलो हि कि अवयव आलेग आलेग रेणू, पुण शरीर एकुच हि.

²¹ डोलो आथाह हे केहू शकत नाहं कि, “माहु डोला गिरीज नाहं” केव्ही ओहलाच मुंडे पायांना हे केहू शकत नाहं कि, “माहु तुमरी गिरीज नाहं.”

²² याच्यावेगळे शरीरान ज्या अवयवान आपु दुर्बळ होमजथी ते, जादा गर्जेन रेणू;

²³ एने शरीरान ज्या अवयवांना आपु थोडो मानपानाचे होमजथी ताफाय आपु जुलुम लक्ष्य आपथु; एने आपणा लिकाडील अवयव जादा शालीनता मेलावीन लेनो.

²⁴ केरीन आमरा प्रर्दशनीय अवयवांना आवो प्रकारान उपचाराची गिरीज रेथे नाहं. पुण बोगवानान आमरा शरीरान रचना इही केरीन केरील हि ज्यान मुळे ता अवयवांना जे थोडो हाजी हेते ते जादा मानपान मेलविल.

²⁵ म्हणजे शरीरामरीन कां काय भी थोडो हुदवळीत मां, पुण शरीरान अवयव परस्पर एकमेकान हारका रुपान लक्ष्य मेलणेन जुवी.

²⁶ जर शरीरान एक अवयवाह दुख एता, तर ताहेऱ्यो शरीरान दिहरा अवयव पुण दुखी ऐतेह; तर काल्लोबी एक अवयवा मानपान बोडाई तर तान आनंदमाय आखा अवयव आनंद केरणू.

²⁷ इही केरीन तुमूह आखा माणहे मसीहान शरीर हेते, एने जुदाजुदा रुपान तान अवयव हि;

²⁸ ओलख नाहं तर बोगवानान कलीसिया माय आलेग-आलेग माणहा मेलील हि: पेल्ला प्रेरिताना, दिहरा भविष्यवक्ता, तिसरे मास्तर, ओवतो आश्चर्य काम केरणारा ओवतो हजो केरणारा एने आभार माननारा ओवतो व्यवस्था केरणाहारा एने जुदाजुदा भाषा बोलणारा.

²⁹ काय आखा प्रेरित हि? काय आखा भविष्यवक्ता हि? काय आखा शिक्षक हेते? काय आखा सामर्थ्यान काम केरणारा हेते?

³⁰ काय आखा हजो केरणारा वरदान जुडील हि? काय आखा आखा प्रकारची भाषा केतेह?

³¹ काय आखा भाषातर केरणू? तुमूह वोडावीत मोठला वरदानान इच्छेमाय रीवू. पुण मी तुमूह उंजू पुण आखा पेक्षा हाजो सिडिक किथे.