1 कुरिंथीयो 10 - नाहाली

इस्राएलान एतिहासा से चेतावणी

¹ हे बायहो, मारी ईच्छा नाह कि तुमु वातू पुर रीन बिगर ओतील रेणेन जुवी कि आमरा आखा पूर्वज वादुद बुंदे एता, आखान आखाज समुद्रामायरीन ता पुरलेउखीर निकलीन गीया;

² एने आखाच वादलामाय एने समुद्रा माय, मुसान बाप्तिस्मा लियेल;

³ एने आखाच एकुच आत्मिक जेवण किरील;

⁴ एने आखाच एकुच आत्मिक पाणी पियील, कारण ता आत्मिक देगडामायरीन पिताला जाता हेऱ्या चालताला, एने तो दिगुड यीशु मसीह इतू.

⁵ पुण बोगवान तामायरीन मोक्तास जाणा आनंद एनो नाहं, तामुळे ते जेंगलामाय ढिंग एय गीया.

⁶ आवो वातू आमरे केरता उदाहरण ठेरील, हेते कि जोहलो तास लोभ किरील, तोहोलो आपु वाईट वस्तून लोभ केरूह नाहा;

⁷ एने तुमूह मूर्ती पूजा केरणारा एहू नाह एता, कोलाक जान बुणील एता, जोहलो लिखील हि, “माणहे खाणेन पिईल बोह्ना एने खेलने कुदणे उठना हि.

⁸ एने आमु व्यभिचार केरणू, जोहलो तामाय केताहा किरील” एने एक दिहामाय तेवीस हजार मोरीन गीया.

⁹ एने आमु प्रभु नाह परिक्षा काडनु, जोहलो तामायरीन केताहा किरील एने गेयळेक द्वारे नाश किरील गीया.

¹⁰ एने तुमूह बोडबोड केरूह, मा ता प्रकारे तामायरीन केताहा बोडबोड केरील एने नाश केरणारान द्वारे नाश किरील गीया.

¹¹ पुण आवो आखा वातू, ज्या तां पोर आवीन उदाहरण सारख्या एता; एने ते आमरा चेतांवणीसाठी जगाच्या शेवटेस वेलाम आवीन रेणे हे आपणो बोधासाठी लिखील गीया हि.

¹² तामुळे ज्याह लागीह, “मी स्थिर हि” तान होमंबालीन रिजी कि कां पोडीन जाहू नाहा.

¹³ तुमूह कायताहा ओहला परिक्षा माय पोडील नाहं, जे माणहान सहन करीन पुरलेउखीर हि. बोगवान विश्वास योग्य हि एने तो तुमूह शक्तीचे बाहेर परिक्षा माय पोडहुं आपण्यू नाहं, पुण परिक्षा बरोबर उपाय पुण केरुहू कि तुमूह सहन केरूह शकणार.

मूर्ती पूजान विरुद्ध चेतावणी

¹⁴ “ज्यानकेरता हे, मारो प्रियांनो, मूर्ती पूजा से सेटो रीवू.”

¹⁵ मी बुद्धिमान होमजाडीन तुमूह किथे: जे मी किथी हि, ताह तुमूह पारखत्लू.

¹⁶ तो आशीर्वादान प्याला, ज्याह आमु धन्यवाद आपथु; काय मसीहान रक्तान भागीदार नाहं? ती रूटू जीह आमु मुडनू, काय ती मसीहान शरीरान भागीदार नाहं?

¹⁷ तामुळे एकुच शरीर रूटू हि तर आमु पुण जे जुलुम जन हि, एकुच शरीर हि; कारण आमु आखा ता एकुच रोटामाय भागीदार एतो.

¹⁸ शरीरान संबधामाय जां इस्राएली हेते, जो अर्पण किरील भी खातेह ता वेदीन भागीदार हेते नाह काय?

¹⁹ ओवतो ती काय किथी हि? काय हे कि मूर्तीही चेढाविल अर्पण काही हि, ज्याह मूर्ती काय हेते?

²⁰ नाहं, पुण हे कि दिहरी जाती अर्पण केरतीन रेणू; ते बोगवानान केरता नाहं पुण दुष्ट आत्मासाठी अर्पण केरणू एने मारी ईच्छा नाहं कि तुमूह दुष्ट आत्मान भागीदार एने जुवी.

²¹ तुमूह प्रभुन प्याला दुष्ट आत्मान प्याला बेनजामायरीन पिहु शकत नाहं. तुमूह प्रभुन मेजाचे एने दुष्ट आत्मान मेजाचे दुयुन भेलाय शकत नाहं.

²² काय आमु प्रभुह रागाम करने? काय आमु तापुरीन शक्तीमान हेते?

सोब बोगवानन महिमान केरता

²³ आखा वस्तु मारकेरीन योग्य तर हि पुण आखा पायदा नाहं: आखा वस्तु मारकेरीन योग्य तर हि, पुण आखा वस्तु ने विकास एता नाहं.

²⁴ कूण आपणाच हाजो ला देखहुं नाहा, तर दिहरान हाजो ला होदणे.

²⁵ जे काही खाटिक बाजारामारीन वेचने जातेह, ते शंका केरीन खा एने विवेक बुद्धी कारण से कायीच फुसहु मा?

²⁶ “कारण पृथ्वी एने तान भरपूरही प्रभुन हि.”

²⁷ जर अविश्वासी माणहामाय तुमूह कूण तुमूह नेवतो आपण्यू, एने तुमरी जाणेन ईच्छा हि, तर जे काही तुम्राओगाण मिलील जाय ते खा; एने विवेक बुद्धी मुळे कायीच फुसहु मा.

²⁸ पुण जर कूण तुमूह केनार, “हे तर मूर्तीही चेढाविल वस्तु हि” तेवी ता केनारान केरता एने विवेक बुद्धी कारणाने खाहू मा.

²⁹ मारा केणेन अर्थ ओहलो नाहं, कि तारी विवेक बुद्धी, पुण ता दिहीराआ. हाजो, मारी स्वतंत्रता दिहरान फुसणे काहा पारखिल जाणेन जुवी?

³⁰ जर मी धन्यवाद आपील, रोटामाय भेलाईल एतो तर ज्याह मी धन्यवाद आपथु तान मुळे मारी बदनामी काहा एता?

³¹ तान्केरता जर तुमूह खाण्यू, जर पिनार, जे काही केरुहू, आखा काही बोगवानान महिमासाठी केरू.

³² तुमूह यहूद्यांसाठी नाहं, यूनानी, केरता नाहं एने बोगवानान कलीसियान केरता पुण पेलरीन पोचाडनेन कारण बोणावूहु मा.

³³ जोहलो मी आखा आखा वातून आनंद मेली, एने आपणा नाहं पुण मोक्ताजानाह फायदाकेरता होदथू कि तान उद्धार एने जुवी.