YUDAS 1 - ALLAH WENE FANO WENE

¹ Hit nenakni Allah yonggo henobahasi hinim hundig at Yesus Kristus fahat-henesug anyo, an Yudas at Yakobus are Yesus Kristus amingming angge anyo en dang-henepuk kahi.

² At Allah henelaheg en fanoap henobahakeg, henenda habukdoho fano welamuhup ulug, henebeheg, enda hundig henebeheg, duruk anyo re, hundig hundig henebeheg neg duruk kamag.

Seiale wene hweag-esauk ale

^3-4 Nori, nerekwi o. Hit nenda hundig on welahep ma, wene eke hweag-hesa. Hit we henapeleg kweleg, it ap foma henenggelegma kwik wahausa. It ap kwik wahausa ai enenda fureg eleg angge, Hesangge hesangge dil noruk kamul, ulug, Allah en henelaheg boruk kwit, fanoap henepuk wene anyo, ahamdoho, “Allah nenelaheg boruk mu, nit siag duruk nesalug, siag nenobam nenobahaku fug,” ulug, uruk. Ne, nit nenowe unuk bogdeg amu eke eleg, at Tuhan Yesus Kristus amu neg, famen, iren, “Nit nenowe fug o,” uruk mu, Allah en it siag duruk onggo mun enobam fesehuk ulug, melaloho febag angge fahet, we wongdoho hesangge wereg lit, il noruk. Airoho il noruk mu, nit nenahap wendatsi wene higitdoho wauhuk anyo, bilinggoho hweag-hesamin berihik famen, it airoho il noruk en, demdoho boruk wene misig at Allah en o endam nit at omaliki neg akni apdoho nenobahasi anyo, sahaloho fotog-esehep ha no, “Su Allah wene deg ma, sahaluhup fug,” ulug, mun henolokdoho wereg lit, foroho lamuhup ulug, hweag-hisihi.

⁵ Nenakni Allah en it ap homi Israel on o Mesir en enahap wendaroho wilibi feseik watfagdeg, it foma demdoho boruk eleg on halug, Tuhan en enowatuk kwit, elehapdoho fesebag wene anyo re, hit endam henesanggo holduhup famen, ebereg welamuhup ulug, ekenim hweag-hisihi.

⁶ At Allah en it yonggo boholma noruk on malaikat foma, “Diroho duruk kamek,” ulug, o hwalduk kamag ulug fesebag famen, “O su neg hwalduk kamul nenerim o,” ulug, fotog-hebag ma, at Allah en, “O ahae fotog fam enewene bilingge folug, siag duruk onggo enobam fesehuk,” ulug, enebe mundoho bosie sabu fam hetdoho o mumdegma kwelabe fesebag ma, wereg anyo, henenda ebetuk kamek.

⁷ At Allah en it yonggo boholma noruk on malaikat debesebag anyo hag, it ap homi o Sodom inim, Gomora inim, alukwe fil ambol fil wereg on omano en mene hag, homi hesangge enebeheg, enenda ahanhan enepuk en duruk eleg ale famen, hesangge dil laheg, duruk katfag ma, “It ap homi siag duruk halug, Allah en indok ambulbulmu mundoho mon-enebuhu,” ulug, neneluk atuk kamuhuk en, ulug, indok fam enowatfag anyo ebetuk kamek.

⁸ It ap homi hesangge henenggelegma kwik wahausa ai re, ap homi o Sodom mel, Gomora mel, duruk katfag anyo hag dil lauk kwit, “Na fam airoho duhuk fano hihi,” ulug, enenda ahanhan enepuk halug, enonggwareg enebe dauk eleg on famen, hesangge dil laheg, Allah wene holduk ale nenerim ulug, sahaloho embeseheg, ne, it enalong wereg on malaikat boholma on omano siahapdoho feseheg, dil noruk.

⁹ Musa waratfag ma, at yonggo boholma noruk on enowe Mikhael at Iblis inim, “Ebe an hwelamin, hat hwelamihin,” ulug, nili-hili ulug suahal uruk kwit, at Mikhael en, “Hat mun siag neg deg ma, waramin,” ulug, Iblis hweag-om ale fano famen, akol en, “Nenakni en neg bet-habuhu,” ulug, hweag-etfag.

¹⁰ Ai famen, it ap henenggelegma kwik wahausareg wereg ai neg de, wene indip enapelegdeg kweleg, siahap-biahapdoho foruk kwit, olomene enda eleg hesangge dil noruk hag, it airoho enenda ahanhan enepuk halug, dil noruk anyo neg, enelukdeg lit dil noruk mu, enebe at elehapdoho fahat-dil noruk.

¹¹ It anyo en at Kain debag anyo hag dil noruk kaheg, ap Bileam siag debag anyo hag, it airoho enenda eleg hag uang hwelahuk ulug, neg enenda ebereg lit mutlug laheg, ne, ap Korah autsi nim Musa wene sahaloho embesebag ma, Allah en elehapdoho fesebag anyo hag, it higitdoho enebe elehapdoho fesoukwag ulug dauk mu, enelaheg e!

¹² Hit henenda hundig fam siburu nakoho kabog-duruk mu, it ap ai enengge ebe on hwelalug watlug, it foma we wereg kweleg, enambilik enenggali eleg angge enemu neg nauk enap deg ma, sum mun kuron famen, bul singdeg hag wereg lit, duruk. Osit hena fam hetdeg fug mu, o hol waharuk kwit, osit na fug angge walug laheg, e anggen fano yihukwag ulug, a yatuk famen, saro atuk halug, heneko foruk mu, bug aheg,

¹³ ik funag-lenggag angge duruk kwit, wasulahap lingginggiroho lahabik waharuk hag, it ap ai duk fug on famen, hesangge deheg, ne, sohwalanggen enobalma domog wereg kweleg, misig eke lisoho deg-deg longgo ik lauk hag, dil laheg, duruk mu, at Allah en o mumdegma mundoho mundoho welamag ulug, enobahet buhundoho fesebag ma, wereg. enenda fureg eleg angge hesangge hesangge dil noruk kwit,

^14-15 Adam ombasi ombolim ombolim endag-ail wilipuk kwit, hwili sabit on fam Henokh endag-atfag anyo en, Allah hweag-utuk kweleg, ap homi hweag-esauk kwit, “It ap homi Allah wene wauk nenerim, ulug, Allah siahap-biahapdoho feheg, ele sahaloho folug, enenda fureg eleg angge siag hesangge dil laheg, duruk anyo nenowe unuk bogdeg en, eneko siag onggo enobam femin ulug, it Tuhan ayonggo malaikat siag duk fug angge fano neg duruk on enebe abirangge at inim, waharuk mu esauihik o,” ulug, ebag ai re, it ap enenggelegma wereg lit, “It duruk ai at,” ulug, ebag.

¹⁶ It ap ai en enerim enelitno eheg, enori siag beheg, duruk ale enenda nauk halug deheg, “An ap humon,” ulug, leho fahat-dil laheg, enengge hwelaul ulug, enele ahalue dep-dep eheg, duruk.

Ebereg wereg lit, duruk kamag ulug, melal-enepfag wene

^17-18 Nori, nerekwi o. Hit nenda hundig welahep ma, wene eke hweag-hesa o. At Tuhan Yesus Kristus en it mon-enepsi on rasul anyo en, wene atam hweag-hesauk kwit, “O ahae fotog famen it ap homi enenda nauk anyo neg dil lauk kwit, hit siahap biahapdoho henobahaik waharuk kamuhup,” ulug, hweag-hesauk katswa anyo dip-atuk angge ebetuk kamek.

¹⁹ It ap ai Allah Aheime enendama eleg ma, kwenangma on neg enenda nauk mu, mutlug lauk kwit, Allah omaliki minggiroho feseil lauk famen,

²⁰ nori nenda hundig hit neg de, airoho duk fug. Hit henenda wirik amag ulug, wene mun fano hit demdoho boruhup wene anyo neg dil lauk kamek.

²¹ Tuhan Yesus Kristus nenelaheg bolug, nenesiag elehapdoho folug, mundoho nenelugap nenebuhu anyo, “Folo-folo nenobahalep aho,” ulug, nangno-hauk kwit, Allah henelaheg en furoho fahat-henesug lamag ulug, Allah Aheime hweag-hesauk kweleg, somban uruk kamek.

^22-23 It foma enenda biren-baren uruk anyo enelaheg boruk kwit, sakoroho hweag-eseheg, ne, it foman indok ambulbulmu la no, henakol bouk fug angge enahap wendaroho wilibi feseik waheg, ne, it foma neg de, enenda nauk on mutlug lauk kwit, enesum wan-dauk on ebe kuron fam sing dag uruk hag, siag duruk ai, heimaldoreg ma, ninim sebe dehe ha no, “Nenakol o,” boruk kahe famen, deg kweleg, enelaheg boruk kwit, hweag-esauk kamek.

Ambiangma Allah dang-debag wene

^24-25 Tuhan Yesus Kristus disi fam nenahap wendatsi at Allah anyo en, nit demdoho boruhuk anyo fotog-hesalug, amu on dil noruk kahe ha no, furoho fahat-nenesug laruhureg, “Hit siag henendama wereg eleg angge mun fano deg ma, nakit inaik manik o,” ulug, hweag-hesauk halug, nenenda nenahayeg beil at mun leho wereg on il hanim, inaik lahuk en, og-neneplug nenobahaik lahu fug behep? Eleg o. Og-neneplug nenobahaik lahu mu, di ap homi su ap homi atam endag-atswa on nim, ketia ondoho on inim, fobik endag-amuhup on inim, “Nit abirangge nenakni misig hat neg deg ma, hat ap humon homamne wereg hunuk bogdeg di ap homi su ap homi abirangge hapma wereg lit, hat hele neg holeheg, ne, hunuk leho hobahakeg, duruk kamuhuk o. Amin,” ulug, uruk kamuhuk, ulug, mundoho hweag-hisihi, nori, nerekwi.