YOEL 1 - ALLAH WENE FANO WENE

¹ At Yoel hun Petuel amloho anyo fam wene diroho hweag-esakiyug ulug Tuhan en hweag-etfag on anyo su.

Ap homi Israel on eneyabukmu di angge su angge yaho on bulue en mundoho nebag ma enendama mun siag atfag wene

² Yoho hit ap log-log henap en henesanggo holiek; hit ap homi o Yehuda fam welahep on furebeiyek. Hit wereg li re diroho eke atsi ale wereg a, ite hit henambu-henombasi wereg li airoho eke atsi a?

³ Wene atuk ale ai fahet de hit henomaliki fam dindil esakiek, Iren oho it enomaliki fam dindil esauk kamuhup en, it au enombolim endag-amuhup on enesanggo holuhup deg de, iren it enombolim endag-amuhup on fam dindilduk kamuhup.

⁴ Bulue enebe elang wenahauk fugdoho, Yabuk yaho kwe huratlug de yaho angge omano mun duswa, Elang atam on en nalug lin hausa on de, elang ombolim on en elehap duswa.

⁵ Yaho hit ap siomo neg duruk kahep on henoluk atlug oba yatuk kamek! Hit ik ahalue siomo enepuk on neg nauk kahep on oba yag-dauk kamek. Anggur anggen keron de Hit henambilik mu en daluk dehesama.

⁶ Bulue elang-elang on de nit nenobam kwik wahausa ma, it enebe nim hum-hamdoho deg lit enomamne nim mun along deg. Enaeg de singa yohombuk on aeg hag deg, enaeg dum de singa hwe on aeg dum hagdoho wereleg.

⁷ Iren de nit nenangge anggur unggul watuk mu re iren de e ebe owag fene ahap ibildukmu re ne nit nenahan ara re we erat neg wereg, enggik sele fene ahap ili reg.

⁸ Yaho hit ap homi suma re hwele duhum on en, ahun hwelahuk ulug enda hundigdoho momaleg on waratukmu oba yako wereg hag oba yatuk kamek.

⁹ O Tuhan Obam en gandum mel anggur mel Tuhan obahet feik wam on mun eleg atsi mu, it ap imam Tuhan obahet duruk-wauk kwit neg wereg on omano oba yako wereg.

¹⁰ Gandum mundoho omano mun eleg aha ma, ne anggur ahaik mun firog aha ma, ne zaitun ahalue mun eleg aha ma, yabuk de mun nong-hong eheik, kwenang de fong watuk.

¹¹ Gandum mel jelai mel yabukmu yaho on omano abirangge anggen baluk fug ale neg aha ai en de, Yaho hit ap homi yabuk wutuk kahep on fong watuk kamek, Yaho hit anggur yabukmu helangge wauk kahep on oba yatuk kamek.

¹² Niren on anggur mel, apel anggen mel, ara mel, kurma mel delima mel, ne e o leimu yaho on mel mundoho sawet eheg, bug aheg, deheikma, ap homi mundoho re enendama healuk eleg angge mundoho siag neg aha.

¹³ Hit ap imam wereg lit mezbah fam etmano yabuk duruk kahep on, henasum karung on langguk dalug de henoba yag-dauk kamek. Hit henakni Allah obahet foruk on anggur mel, gandum folug og-utuk on mun eleg anggere, o hup hundig etma oba yatuk kamluhup en o Tuhan Obam wirigmu etma kwiek.

¹⁴ Ap homi abirangge enayonggo feselug de siburu hweang wereg lamek hweag-esakiyug, Enayonggo feselug de it ap log-lohon mel, it melal-enepuk on mel, ne ap homi Yehuda on abirangge mel, wene humon kabog-dul en ulug wene unduhuk folug Tuhan en let-nenebukwagdoho ulug heng dukoho re, Allah Obam wirigmu etma kuruk kamek.

¹⁵ Nenakni Tuhan en anukoho mun namelmel deg ale neg duhu salim anyo, ne At Mun along wereg on en di angge su angge mun naleg-haleg esahu li em anyo mun horog aik waha.

¹⁶ Nit ninil hanim de nenengge nauk angge mundoho eleg aheg, Nit nenakni Tuhan Allah obam wirigmu, re enahayegdoho enanggiluk deheg duruk ale mun eleg aruhu.

¹⁷ Di anggen su anggen de kwenang iringgig kwe en waratuk karuhu, gandum ebe baloho foruk on omano mun eleg atuk mu re obale mun siag atuk karuhu.

¹⁸ Di wam su wam enahummu mun siag atlug ele ngweruruk, O leimu enggelangge na on mun eleg ahama, domba oho enebe danaleg atuk karuhu. Ulug hweag-esebag.

¹⁹ Airoho hweag-esebagdeg Tuhan fam uruk kwit de, “Tuhan nakni, o lek en naukmu enggelangge mun eleg atuk ai hag, o lei kwe enggelangge mun bug aheg, di ahan su ahan de indok en harep nauk on hag, mun bug atlug waraheg, duruk ai en de nele hum fam let-nabin e, uruk kahi.

²⁰ Ne, maro on mel, bak mel, mene olomene mel, enggelama wereg on en ohore, Haren let-nesowag ulug hayonggo hobaharuk, nakni. Ik mundoho firog aheg, o leimu enggelangge mundoho bug aheg, disi ai en de hayonggo foruk,” ulug hweag-etfag.