YAKOBUS 1 - ALLAH WENE FANO WENE

¹ Nori, nerekwi. An Yakobus en hit Yahudi henenggul unuk nesanggoen on, di o su o buhuldil lauhup anyo, nenakni Allah Tuhan Yesus Kristus inim enemingming angge wereg lit, dang-henepuk kahi.

Demdoho boruk ale inim, enenda wereg ale inim fahet hweag-esebag wene

² Nori, nerekwi. Anggin-fanggin henobam atuk halug, henahayeg boruk kamek.

³ Hit demdoho boruk kahep ma, di ale su ale fam henebut bal-henepuk mu, anggin-fanggin henobam atuk kweleg, henenda hwerieg lit wauk kwit, “Nenenda hambugap nenebikoho duruk hihi,” ulug, henahayeg boruk kamek o.

⁴ Hit henenda mun wirik-ap henebuhu en, anggin-fanggin henobam atuk mu, henenda hambukdeg lit wauk kamek.

⁵ Hiren eke duruk ale henapeleg halug, Allah hweag-emek. Hweag-utuk halug, at enda kibureg eleg angge abut fano fam di ap homi su ap homi abirangge kabogdoho og-hesauk on anyo en dukwag ulug, henenda wereg apdoho henobahaku.

⁶ Hit Allah hweag-utuk kwit, henenda biren-baren uk fug angge mun demdoho boruk kwit, hweag-utuk kamek. Ap eke enda biren-baren uruk kwit, Allah hweag-utuk halug de, o hol firil waharuk kwit, ik funag-lenggag angge duruk hag ap ai enda airoho wereg.

^7-8 Ap ai enda biren wereg lit, di duruk su duruk wenggeldil lauk mu, enda nong-hongdeg welaruhu. Enda biren wereg lit, Allah hweag-utuk mu, “Og-nuruhu fug hihi,” ulug, boruk kamag.

Enenggik eleg mel, enenggik wereg mel, wene

^9-11 Mo wilibik waharuk kwit, mo olok en enggelangge sawet atlug, lol-heg wamburuk kwit, orohole siag atuk hag, it ap enenggik wereg amuhuk ulug dil noruk anyo, enebe airoho eleg amuhup mu, hit nori, nerekwi Allah omaliki foma henenggik eleg ma, henenuk sebeleg welahep anyo, henenggik wereg atuk kwit, henenuk leg atuk halug, “Allah en at nenepuk,” ulug, henenda sebeleg wereg lit, henahayeg beheg, ne, hit foma henenggik wereg deg ma, henenuk leho welahep anyo, henangge eleg atuk kwit, henenuk sebel atuk halug, “Enggelangge eleg atuk hag, nenenuk airoho eleg atuk mu, fano neg,” ulug, henenda fano wereg lit, henahayeg beheg, duruk kamek.

Nenenda kahaleheg, nenebut baleheg, duruk halug, duruk kamuhuk wene

¹² It ap homi enebut balduk kweleg, bok wereg esalug, enahayeg at boruk kamag. It ap homi enebut balduk kweleg, bok wereg anyo, fano duruk esalug, Allah en, “Hit an henenda hundig boruk kahep on, fano duruk mu hesalug, onggo henoluk mundoho welamuhup,” ulug, abug hweag-nesasi anyo fano onggo higitdoho og-esahu.

¹³ At Allah siag dukwag ulug, siag on en enda kahaleheg, ne, ap homi siag dukwag ulug, Allah en enenda kahal-enebeheg, duruk eleg ma, ap misig eke en anggin-fanggin hauk men, enda kahalduk halug, “Su Allah en nenda kahal-napuk,” ulug, uhu ai re mun siag.

¹⁴ Nit nenenda kahalduk ai, ap eke siag dukwag ulug, ele ahalue dep-dep lit-halug lauk anyo hag, nit nenenda duruk ale nenambono bolug duruk kahe.

¹⁵ Hwe eke omalik fou ahummu atlug, ondoho folug, ai en, omalik anyo waratuk ai hag, nit nenendan siag duruk ale nenambono bolug, ebe dil lauk kwit, ai en, fobik nenebe waratuk kahe.

¹⁶ Nori, nerekwi. Hit an nenda hundig deg ma, hit henenda kwani-da fug o.

¹⁷ Nenelaheg en fanoap nenobaharuk mel, og-nesowag boruk on anyo mun higitdoho og-nesauk on mel, abirangge boholman belap-nesa waharuk. Di o su o seleg duruk indip at nenakni Allah eke aham-duk fug angge wereg lit, mumap deberuk mun eleg on anyo en belap-nesa waharuk.

¹⁸ At Allah en di angge su angge wal-debag on anyo sebeleg hag wereg kweleg, “An nomaliki neg leho welamag,” ulug, at onggwareg enda bebag ale higitdoho, awene ebe wene fene en at omaliki apdoho nenobahasi.

Henesanggo neg holduk kahep a, ebe at duruk kahep a? hweag-esebag wene

^19-20 Nori, nerekwi. Hit an nenda hundig deg ma, wene su fureberuk kamek. Nit ebe wenggeleg neg duruk kamag ulug, Allah en bebag anyo re, nenolok fam duhuk fug mu, hit abirangge wene folo-folo holduk kamuhup fano famen, ukoho lit neg de, furebelug eheg, henolok folo-folo wilibuk fug angge furoho deheg, duruk kamek.

²¹ Duk ale eleg on me wirig hag on deg kweleg, hesangge deheg, ne, di siag su siag deheg, duruk kahep anyo fotog-esalug, henenda sebe ulug wereg lit, wene nenahap wendaruhu wene Allah en nenendama a yaho nenobaharuk wene anyo neg furoho wauk kamek.

²² Allah wene henesanggo neg holduk kahep ai fam hit lal-dauk kahep ma, henesanggo neg holeheg duruk kamuhup ai ousa. Ite, hole folug ebe at duruk kamek o.

²³ Hit Allah wene furebelug, duk fug angge henesanggo neg holduk halug ai re, ap eke enapumag fam orohole kumu-dauk anyo hag hit.

²⁴ Orohole kumu-dalug lauk kwit, “Norohole airoho hihi,” ulug, ebet-atuk eleg, folo-folo apeleg atuk famen,

²⁵ Allah en wene melaloho lik-loukdoho hweag-nesasi anyo fam feiyaloho wundetdoho nenobaharuk wene anyo, hit fi-furoho kumu-dahupdeg, henepeleg am fug angge, furoho oho folug duruk kamuhup halug, henahayeg humon hahup.

²⁶ Hit eke en, “An Allah wene furebelug duruk kahi o,” uruk kahep famen, henembilik atogma seiale wene hesangge il noruk kahep anyo, wam kuda ambilik het-duruk hag, hit airoho henambilik furoho hwalduk kahep fug halug, hit henonggwareg lal-dauk kahep, ne, “An Allah wene furebelug duruk kahi,” uruk kahep anyo re, alemaroho at deheg, duruk kahep ma, hisihi.

²⁷ Henakni Allah il hanim at ele furebelug, mun demdoho duruk kamuhup ai, it omalik on hwelani on enakni enesinga waratuk mu wetien on mel, homi sohwe on mel, enenda anggin wereg ale furebeselug, enelaheg en let-enebil laheg, it ap homi enenda siag on en siag dukwag ulug, henenda kahalik waharuk kam no, henonggwareg kahal-dalug laheg, duruk kamek.