NEHEMIA 1 - ALLAH WENE FANO WENE

¹ Hun Hakhalya amloho Nehemia anyo en di ale su ale diroho dirihik ulug lisu baloho febag on de ebe diroho. Hun Artahsasta re ap homi Persia on enobahet raja weregman neg de tahun 20 on wereg kweleg bigalem unuk Kislew fam, an o hun Artahsasta en melal-enepuk wereg ma o kota unuk Susan etma welatihik.

Nehemia en de ap homi Yerusalem on fahet ebetuk kwit somban ebag wene

² Eta li em de an nare Hanani o Yehuda en de ap eke biren henahan inim lausa. Lausama re an den hein-og-esauk kwit de, ‘Ap homi Yahudi on ap Babel on en o Babel og-eneplug wahausaman nin sombandoho lausa on etmano o Yerusalem wereg lit de nangginoho duruk?’ ulug hein-og-esauihik.

³ Hein og-esauihikmen de iren uruk kwit de, “Ap homi nit Yahudi on o Babel suma og-neneplug wahausaman nin sombandoho nenobam indipmu nenebe endag-atuhukmu lauhuk on etmano re, ketia ap homi enunggul unuk amu on nit nenaluluk kwe walinggoho etma wereg on en di anggin su anggin nenobam feheg, ne iren mabenapdoho nenobahakeg, durukmu siagmiroho welahe. Ne, endam o kota Yerusalem elehet fak lehet oho latsi on anyo meiyaloho hwik-eseheg, kobokwe fak lehet oho on anyo fam humon yendeg on etmano re indok en han nebag huli anyo en angge re obalma buhun-duk fug angge mun meiyaloho neg wereg,” ulug hweag-nutswa.

⁴ Wene airoho hweag-nutswa ma nesanggo holdihik deg de, nebe hweriatlug oba yatihik. Airoho oba yatihikdeg de nukoho hundig-hundig nendama hesiloho neg wereg lit siburu na fug angge wereg lit somban fam Allah hweag-utuk kwit welatihik.

⁵ An den somban uruk kwit de diroho hweag-utuk katihik: “Nakni Tuhan Allah boholma hunuk bogdeg welahen on nakni. Hat hebe mun humon wereg lahenma re niren Hat hobam halong bolug hapma welahe. Haren de nit henda hundigdoho wereg lit, wene melaleg hweag-nesauihin on anyo holoho duruk kahe on fahet de, Haren hit An nomaliki ulug wene sali waroho og-nenepihin on ai fahet de henda hundig nenebeheg, ne hebe nininim dipdoho welaheg, duruk kahen, nakni.

⁶ An den homaliki Israel on enobahet o nukoho nim hupanggo nim hundig-hundig nele hobam monde feik waharuk kahi on ai hil nealug de nele hesanggo holin. Nit ap homi Israel on en siag duruhuk on aire, an nebe en mel, nombasi en mel, en neg siag duruhuk, nakni.

⁷ Wene melaleg Haren hweag-nesauk kwit diroho diyug suroho diyug ulug hamingming angge Musa en hweag-nesowag ulug hweag-itihin mu hweag-nesasi on aire niren holoho duk fug angge sahaloho mun siag duruhuk.

⁸ Haren de wene diroho ulug hamingming angge Musa hweag-itihin mu hweag-nesasi on ai hendama ebet hakin nakni. Haren de, ‘Hit An nomaliki Israel on en wene melaleg An den hweag-hesauihik on ai holoho nobam dipdoho welamuhup fug halug de ap homi enunggul unuk amu on enobam sili kwe etma buhul-bahal hesahuk.

⁹ Famen de fobik en henape hebel atlug sombandoho nakit watlug nobam dipdoho wereg lit, nele holoho neg duruk kamuhup halug de, henebe buhuloho o unggut-unggut etma monde henohakukdeg fobik andogdoho o An nobahet duruk kamuhupmu ulug nonggwareg en momaloho fahat dauihik mu etma henobahaik waruhuk’ ulug irihin anyo henda wenggel-hakin, nakni.

¹⁰ Tuhan nenakni, nit su re hat honggwareg homaliki, hamingming angge welamag ulug homamne mun along on fam del-nenepihin on.

¹¹ An den mel ne it hamingming angge fomane en mel, Hat halong bolug mot-hapuk kamuhuk en de an den somban uruk kahi on su nenele holin. Ketia re an nebe hun raja wereg ma akit laminmu re enda neowag ulug endama kahalin, nakni,” ulug somban irihik. Eta li em de an nebe at raja ahaik anggur ahaik nauk on fahet diroho duluhup ulug wut duruk on wereg lit dirihik ai.