KOLOSE 1 - ALLAH WENE FANO WENE

¹ Allah enda bebag anyo fam an Paulus Yesus Kristus wene hweag-isil noruk kamag ulug, mon-enepuk on rasul unduhuk nobahasi on naut Timotius nambieg etano en,

² hit demdoho boruhup on Yesus omaliki o Kolose welahep etma, Kristus hinim hundig lit hindik-hundig, awene mutlug lauk kahep ma, nit wene eke hweag-hesakohon. Nenakni Allah enda hundig en og-heseheg, ne, henenda we fano welamuhup en, henobahakeg, duruk karuhu.

It fano duruk esalug, Paulus en dang-enepfag wene

^3-5 Allah en uruk wene Fano Wene hweag-hesauk kwit, “Hit demdoho boruk hesalug, henobahet deg angge boholma wereg,” ulug, atam hweag-hesausa anyo, hole folug, mundoho hwelak lahup en henenda ebereg lit, hit Kristus Yesus demdoho bolug, henenda at obam dip-deberuk kaheg, ne it Allah omaliki demdoho bousa on mundoho hinim henenda hundig enebeheg, duruk kahep anyo hundig-hundig henebug nenesanggo holduk kahe ma, henobahet somban uruk kwit, Tuhan Yesus Kristus akni Allah dang-duruk kahe.

⁶ Fano Wene Allah demdoho henelaheg henepuk wene anyo, henesanggo holduhup deg, demdoho bolug wauhup huli en, ketia owan henenggelegman saharil lauk kwit, e anggen yihil lauk hag, di o su o saharil lauk kwit, anggen mun nikdoho yihil lauk.

⁷ Fano Wene ai, at ninim nenenda misig hundig Allah amingming angge wereg lit, higitdoho duruk kahe on, Epafras anyo en hweag-hesasi. At Kristus amingming angge wereg lit, nit henobahet duk fug alereg en bok wereg kweleg, nenobalma aren hundig-hundig duruk mu,

⁸ Allah Aheime en henepuk kweleg, nelaheg helaheg boruk kahep anyo, aren hweag-nesa wahasi mu holduhukdeg, Allah mun dang-duruk kahe.

^9-10 Hit airoho duruk nenesanggo holduhuk huli en, bok am fug angge hundig-hundig somban uruk kwit, Allah en duhuk boruk anyo, Allah Aheime en di angge su angge indip abirangge henelugap henepuk kweleg, henenda wereg atlug, Tuhan ahayeg deboukwag ulug, higitdoho dil lauk kwit, e anggen ebe yihil lauk hag, fano dil laheg, ne, Allah en duruk ale heneluk amuhupdeg, henenda wirik aheg, duhup ulug, henobahet somban uruk kahe.

^11-12 It demdoho bousa on Yesus omaliki anyo, Allah apma selegdeg ma wereg lit, fik-foukdoho fesesi on hwelowag ulug wenggelsi anyo, nit ninim higitdoho hwelowag ulug, nenenda wenggeloho nenobahasi mu, anggin-fanggin henobam atuk halug, henakol eleg angge henenda hambukdoho hwerieg lit, henenda henahayeg fam, henakni Allah dang-dulug, wauk kamuhup ulug somban uruk kahe. Hit henenda hwerieg wereg lit wauk kweleg, at mun leho wereg lit, omamne fam di angge su angge duruk on anyo en, hit higitdoho omamne henepuk kamag ulug, henobahet somban uruk kahe.

^13-14 Nit de Iblis hwaldukmu o mumdegma sabu hetdeg hag welatuhuk mu, Allah en nenahap wendaroho at amloho enda hundig anyo apma nenobahaik lasi mu, nit wundetdoho noruk kamag ulug, amloho anyo en nenesiag elehapdoho nenobahasi.

Kristus mun leho wereg wene

¹⁵ Allah orohole ninil hauk kahe fug famen, at orohole higitdeg ai re, Kristus deg ma fureberuk kahe. Allah amloho ondoho Kristus at deg ma, di angge su angge wal-debag anyo sebeleg kweleg, at amloho wandeba on neg leho wereg.

¹⁶ Allah en duruk ale hweag-utuk kweleg, boholma on nim, kwenangma on nim, ninil hauk on nim, ninil hauk eleg on nim, di angge su angge mundoho amloho en neg wal-debag. Wal-duruk kwit, mungguat kwenang apma on nim, enggelama on nim, bohol apma on nim, di mungguat su mungguat, di angge su angge abirangge, at unuk leho foruk kamag ulug, waldoho fesebag.

¹⁷ Munangge manangge owan wal-duruk eleg kweleg, at atam welatfag. Aren neg wal-debagdeg hwalduk kwit wereg ma, at ele neg holduk kwit wereg.

¹⁸ Yesus omaliki di obam su obam wereg on seberoho Kristus ebe hag nit deg ma, nenenggul hag de, at neg. Ne, di duruk su duruk indip onggwareg de, at neg deg ma, di angge su angge abirangge sebeleg kweleg, at neg leho welamag ulug, waratlug laukmen, atam oluk apdoho unduhuk fesi.

¹⁹ At Allah en, “An nebe neitog welahi hag, namloho mun airoho welamag,” ulug, ahayeg boruk kwit,

²⁰ “Namloho e salib fam waratuk kwit, di angge su angge mundoho an ninim minggirig wereg anyo, amep fam enonggo bale folug, an ninim seberik wamuhup,” ulug, wenggelfag ma, boholma on nim, kwenangma on nim, mundoho at amep fam nenonggo bale folug, Allah ninim sebe-nenepsi.

²¹ Hit atam siag duk ale neg henenda wenggele folug, dil noruk kwit, Allah hinim minggirig yatma hag welatuhup famen,

²² Kristus en og-heneplug Allah il hanim kwik lahu mu, Allah en, “Hit an nomaliki nobahet eneg on wereg lit, siag duk fug angge fano neg welahep ma, an nele henobam henobahamin fug,” ulug, hweag-hesowag ulug, at ebe ap at endag-atsireg, nenobahet waratsi anyo fam, seberoho nenobahasi mu, ketia sebereg welahe.

²³ Kristus ai disi anyo fam, Allah ninim sebe-nenepsi mu, Fano Wene hit holduk katuhupdeg, demdoho boruk kwit, “Allah en airoho nenobahaku hihi,” ulug, henenda fenggegdeg wereg lahep anyo fotog-esa fug. Ite, o anduli belabeg hag, Kristus fam henenda dip-debelug, wene demdoho boruhup anyo, henenda hambukdoho wereg lit, mutlug lauk kamek. Ne, Fano Wene di o su o saha il lauk anyo re, an Paulus ninim hweag-esauk kamag ulug, Allah amingming angge apdoho nobahasi.

Ouk bouk deberuk kweleg, Yesus omaliki enobahet duruk katfag wene

²⁴ Ouk bouk nobaharuk anyo re, “Hit henobahet nobaharuk,” bolug, nenda nahayeg boruk kahi o. Ne, Yesus omaliki di o su o wereg on seberoho ai re Kristus ebe deg ma, enenda hambukdoho welamag ulug, Kristus watuk kwit, “It foman waruk fug angge embeseswa anyo, Yesus omaliki enobahet an nebe fam nobaharuk fano,” bolug, nenda nahayeg boruk kahi.

^25-26 Wene o endam huli en ketia huli heraho wereg anyo, henombasi ondoho on en furebouk fug angge welatswa famen, we ketia dia neg, it Yesus omaliki enobahet ename fesesi. Ename fesesi on Allah wene anyo hweag-hesauk kamag ulug, unduhuk nobahasi anyo, higitdoho it Yesus omaliki di o su o abirangge wereg anyo enobahet duruk kamag ulug, enamingming angge apdoho nobahasi.

²⁷ Di ap homi su ap homi abirangge enenda enahayeg boukwag ulug, wene nikdoho mun along on neg, nabikoho angge fahet heraho welatsi anyo, “Fobik ap homi dagma holduk eleg on nim, eneluge fesehuk o,” besi anyo, ketia neg, eneluge fesesi. Wene enenda ahayeg bouk alereg kweleg, heraho welatsi anyo re, ebe Kristus nim hundig welahe. Ne, ninim hundig deg ma, fobik at ninim higitdoho welamag ulug, nenebuhu nenenda ebereg welahe anyo, demdoho hwelag lahuk neneluk nenepuk, nenendama wereg anyo, Kristus neg.

²⁸ Aireg ma, nori, nerekwi. Hit nenomaliki abirangge Kristus hinim hundig lit, henenda mun wirik atsi halug, Allah akit og-heneplug henobahaik lahu bolug, Kristus duruk katsi wene hweag-hesauk kwit, komo-henebeheg, henenda mun hambuk debelug hweag-heseheg, dil lauk kahe.

²⁹ Henenda mun wirik atuk mu hesamin ulug, Kristus omamne mun amuroho napuk kweleg, an bok am fug angge henobahet hundig-hundig namurururoho duruk kahi.