HOSEA 1 - ALLAH WENE FANO WENE

¹ Wene sure Tuhan en Hosea hun Beeri amloho anyo fam, kerajaan Yehuda fam de hun Uzia mel, Yotam mel, Ahas mel, Hizkia mel raja eke dam eke fobik deg wereg lit, melal-enepuk kweleg, ne kerajaan Israel fam de hun Yerobeam hun Yoas amloho anyo en melal-enepuk wereg kweleg diroho hweag-esakiyug ulug ebag.

Hosea ohwe mel omaliki mel etano

² Keram Tuhan en enunggul unuk Israel on fam ele an fene en hweag-esauk kwit, Tuhan en diroho isi, “Hosea, hat de hohwe hwe uang heraruruk kwit hambena duruk on nim hwelahun, ne hat homaliki oho airoho duruk kamuhup. An nomaliki re hat hohwe ai hag deg lit; iren An nobam dipdoho duk fug angge An nobahalug neg lauk” isi.

³ Airoho isimu an den hwe unuk Gomer hun Diblaim ahaloho ai hwelauihik. Aren nenomalik wandeba on ap angge eke endag dasimu,

⁴ Tuhan en an nobam uruk kwit, “Hat homalik aire unuk Yizreel soalin. Aire An den hun Yehu ambiangma en melal-enepuk kwit wereg on ai mundoho fotog debehuk, ne An den Israel on enowe raja Yehu it enomba ai en o Yizreel ap watfag ale ai fahet unggum og-uruhuk anggere.

⁵ Eta li em o Yizreel Donggoma etman An den tentara Israel on enomamne wereg on ai luluhun esahuk,” ulug hweag-nitsi.

⁶ Ai en an nohwe anyo en nenomalik bireneg angge omalik hwelani angge endag dasi. Endag dasimu Tuhan en an nobam uruk kwit, “Hosea ao, hat hahaloho aire unuk ‘Enda hundig nesauk fug on ulug soalin’ Aire An den unggul unuk Israel on ai nenda hundig enebuhuk fugdeg, it enesiag oho An den mun elehap debesehuk fug anggere.

⁷ Ai famen unggul unuk Yehuda on de An den nenda hundig duhuk. An enakni Tuhan Allah en del enebuhuk, famen weim yaboho fug, ne karog mel, sehen mel ite kuda ap ambolowag fam lahalug lauk on en mel de fug,” isi.

⁸ Nit nenomalik bireneg on anyo ag monde folug, an nohwe anyo nikangge omalik ahummu atsireg nenomalik ap angge endag dasi.

⁹ Endag dasimu Tuhan en an nobam uruk kwit, “Ap homi Israel on etma An nomaliki on fug, ne An de it enakni Allah fug. Anggere omalik aire unuk, ‘An nomaliki on fug’ ulug soalin.” Ebag.

Israel on fam deg ale fobik nikangge buhundoho hwale fesehuk ebag on

¹⁰ Unggul unuk Israel on enebe re ik inggi laut elan kwe wereg etma hag amuhupmu re anggin wal heheg, wenahakeg duk fug alereg laruhu. Ketia Allah en it fam uruk kwit, “Hit de An nomaliki on fug” uruk famen li aik waruhu on fam etma Aren it fam uruk kwit, “An de Allah noluk mundoho neg welahi on, ne hit de An nomaliki welahep!” uhu.

¹¹ Unggul unuk Yehuda on mel Israel on mel misig seberebesehu, mu re iren ap melal-enepuk on we misig neg unduhuk folug, it enebe saha uruk kwit it enobam etma enangge sigdoho fahat dalug lamuhup. Demdoho, nukoho Yizreel aire nukoho mun lohon aruhu!