ESTER 1 - ALLAH WENE FANO WENE

Hun raja ohwe ratu Wasti anyo en at Raja Ahasyweros en wene melaloho wilipfag on sahalfag wene

^1-2 O Susan aire it ap homi Persia enap enobam bumbuk lohon kota wereg ma at Ahasyweros ebe raja unduhuk wereg lit melal-enepuk katfag. Ne, aren melal-enepuk katfag ma etma o sili propinsi anyo re ebe 127 en deg ma, o ebe o India huli en de o Sudan huli etma deg latfag.

³ Airoho deg ma re at raja Ahasyweros anyo raja weregman neg de tahun henahaneg on fam deg kweleg de, aren soni pesta humon, it autsi pegawai mel, it enowesi yaindeg-kaindeg mel, enobahet esetfag. Airoho esetfag ma re it ap o Persia mel Media mel fam etma tentara enowesi panglima mel, gubernur mel, o propinsi domog etmano en ap yabuk lehoma duruk enap mel, oho kabog-dik watfag.

⁴ Airoho kabog-dik watfag ma re bigalem folfalik en hunduko etma fam at raja en de angge di angge su angge obam olma wereg on mel, obam etma habug alereg on mel, aren melal-enepukmu etma amil-mil deg ale mel, mundoho unug esebag.

⁵ Anyo airoho debagdeg de raja en de ap homi we on o Susan fam etma wereg on, it enenggik wereg on mel, enenggik eleg on mel, fahet soni pesta nikangge esetfag. Pesta aire at raja ebe wereg ma o silimu etmano esetuk men neg de minggu misig hunduko esetfag.

⁶ Airoho esetuk kwit de hun raja obam bumbukmu etmano re sum kain hulireg on ebe lenan on, il hwesik on mel, kuron mel, sabu lenan il sako on fam het-debebagdeg de sum ilanggen fololeg angge sabu kwelabe foruk on no perak on fam hilinggigmu kwelabe febagdeg de helep unduhuk on de unuk pualam on fam unduhukmu borebebag. Airoho debelug sum ai apma re hweriatuk angge emas on mel perak on mel hweniema re helep unuk pualam il kuron mel, nohoruk angge il mebon mel, wirili mutiara amumulit deg on mel helep pirus il hwesik on mel, doale febag.

⁷ Airoho debebagdeg at raja en de anggur ikwag emas on il amu-amu on fam hwenang-heg hum-hamdoho fouk debebag.

⁸ Airoho debebagdeg de ik ap bog omano fahet de baloho og-esa fug angge ne enele en nakiek ulug mel og-esa fug angge we og-esauk kwit neg welatfag. Ai fahet de at raja en ap homi at onggwareg obam yabuk duruk on omano fam uruk kwit de, ap bog etma re it enonggwareg domog en nauk ale enenda aleroho neg og-esakiyug ebag.

⁹ Ne, it anyo airoho duruk kweleg de raja ohwe Wasti anyo en oho re it homi at onggwareg obam olma wereg on etmano enobahet soni pesta esetfag.

¹⁰ Airoho esetfagdeg nukoho sabit on fam de, at raja anyo ik nebagdeg de mundoho ahayeg neg atfag. Ai fam de aren ap at onggwareg obahet duruk on ulug eneyabuk eneko wereg on enebe sabiren etano wol-enepfag. It eta enebe re: Hun Mehuman ha, Bizta ha, Harbona ha, Bigta ha, Abagta ha, Zetar ha, Karkas ha eta.

¹¹ Airoho wol-enepfagdeg watfag ma aren de at ohwe Wasti aire mun il aluli buhun on deg ma, at hwe ai ebe deg ale anyo it ap bohon mel, ap yain-kain etmano fam mel unug esaroho re, it hweag-esauk kwit de, “Hwe Wasti ai unggulmu mahkota ap raja en bug deg angge ai bug debelug an nolohotma walug feik manik,” ulug hweag-esebag.

¹² Airoho hweag-esebag famen de it ap yabuk duruk enap etano en wene at raja en mingming-enepfag ale anyo raja ohwe Wasti anyo fam hweag-etfag man de, hwe anyo en nerim ebag ma re, raja anyo olok hum atfag.

¹³ Airoho debagdeg de at raja eitogdoho wene it ap homi etman duruk kamag ulug melaleg on dahandoho duruk halug it ap wene mulik eneluk enap fam keroho ulug hein og-enepuk katfag ma atlug de, wene hwe anyo en debag ale anyo fahet keroho dimin ulug wene komo hweag-nomag ulug ap wene komo hweag-esauk on wol-enepfag.

¹⁴ Hun aren it ap wene komo uruk enap nin salim oho wol-neg enepuk katfag on de, hun Karsena ha, Setar ha, Admata ha, Tarsis ha, Meres ha, Marsena ha, Memukan ha. It ap etare o Media nim Persia nim etman eneyabuk ap raja en melal-enepuk katfag ma etman yabuk lehoma duruk katfag enap.

¹⁵ It ap etano watfag ma raja en ap sabiren etano fam uruk kwit de, “An den it namingming angge fam uruk kwit de hwe Wasti ai an nakit wamagdoho hondog-nirik lakiek ulug mingming-enebihi. Famen de at waharuk ale nerim ulug bok aha. Ma re wene melaleg wereg ale fam de at aire niren keroho debehe ha alereg no?” ulug hweag-esebag.

¹⁶ Airoho ebag ma at Memukan en raja nim it ap yain-kain etmano nim fam uruk kwit de, “Hwe ai en airoho deheik on aire we nakni hat neg at Ratu Wasti en sebeloho hobahakeik fug, ite nakni hautsi pegawai abirangge nim, ai en ap on neg mundoho nakni haren melal-enepuk kahenma oma wereg on nim sebeloho nenobahasi!

¹⁷ Aire at ratu ai en disi on ai it homi abirangge en enoluk amuhup deg de it enahunsi domog-etmano mabenap debeseruk kamuhup. Iren uruk kwit de, Nakni haren de hwe Wasti ai an nakit wamag ulug hweag-erehen famen de hwe ebe waha fug.

¹⁸ Anggere, it ap yain-kain enohwesi o Media fam nim Persia fam nim wereg on etmano enohwesi en wene ai fahet enesanggo holdil lauk kwit de, iren enahunsi domog fam yoho hweag-esalusa lit deg. Iren airoho duhup on ai fam ambiangma re it enohwesi en de enahunsi en hweag-esauk on anyo enele sahaloho embeseheg, ne it enahunsi en enohwesi bet-enebeheg, duruk kamuhup.

¹⁹ Airoho deg anggere, nenakni haren ratu Wasti aire, An nakit waruhu hayog, ulug wene kong-dimihin en niren heng hapuk kahe. Ne, wene hun haren kong dimihin on aire wene indip melaleg o Persia mel Media mel, fam wereg ma ap en og-ha fug alereg on welaruhu. Airoho dulug de Hwe wasti obalma aire homi amu on at hwe aire maben hag famen de it mun fano on eke fesehun.

²⁰ Ne, wene hun haren kong-duhun on ai o kwenang yatdoho wiriligmu suma abirangge fam saha uhumu re, it homi enemu domog en de it enenggik wereg on famen oho eleg on famen oho re it enahunsi enalong bolug sebe ulug welamuhup,” ulug hweag-etfag.

²¹ Airoho ebag ma re at Memukan en wene hweag-etfag on anyo re at raja nim it ap yain-kain etmano en nim fano bebag ma re at raja en de wene hweag-etfag ale anyo higitdoho debag.

²² Airoho duruk kwit, raja en de o propinsi fam mel, kerajaan fam mel, ele fam inim lisu baloho nim, ne it propinsi domog en enele uruk katfag aleroho baloho mondotfag. Wene melaleg mondotfag on aire ele diroho mondotfag, “It ap misig eke ahain elekwe fam etman de we it ap enahunsi neg enunggul hagdoho welamuhup, ne it airoho wereg lit iren neg wene diroho dul ulug kong-duruk kamuhup,” ulug mondotfag.