AMOS 1 - ALLAH WENE FANO WENE

¹ Hun Amos aire ebe domba hwalduk on obam kota Tekoa ai on. At ebere it Yehuda fam etma hun Uzia raja wereg lit melal-enebeheg, ne it Israel fam de Raja Yerobeam hun Yoahas amloho anyo wereg lit melal-enebeheg, duruk li em nabi inatfag. Tahun biren welatlug o meik eke duk fug li em de Allah en de Amos fam ap homi Israel on enobahet wene hweag-etfag.

² Airoho hweag-etfag ma, at Amos en ebag on de su, “Tuhan de Duk Sion fam en hum duruk, ne o Yerusalem en ele kululuk duruk. Airoho durukmu re enggelangge lei mundoho lei neg atuk, ne Dom Karmel fam enggelangge wilibig on mun bug-liog uruk” ulug ebag.

Allah en it ap homi Israel enap enori o amu on enobam unggum fesehu ale ulug ebag on Siria enap fahet ebag on

³ Tuhan en uruk kwit de, “Ap homi o Damsyik wereg on en de hundig-handig siag neg duruk en de, demdoho An den unggum og-esahuk. Iren de ap homi Gilead on enobabut mun enolok fam debeseruk,

⁴ ai fam de An den Raja Hazael ebe wereg ma etma indok mondorik waheg, ne Raja Benhadad en hembirangge wirig on etma han yaleheg, duhuk.

⁵ O Damsyik etma fam fak lehet fam sokole humon etmano An den siahap eseheg, ne ap homi o Awen Donggo kwe wereg on de it enebe wereg ma etman fun-fandoho debeseheg, duhuk. Ne, at o Bet-Eden fam along wereg ahun aire at ebe hwerieg wereg ma etman An den belabe feik waheg, ne ap homi Siria wereg on de sabu hetdoho og-eneplug o Kir kwenang fam etma lowag ulug debeseheg, duhuk” isi ebag.

Filistin enap fahet ebag on

⁶ Tuhan en uruk kwit de, “Ap homi o Gaza wereg on en de hundig-handig siag neg duruk en de demdoho An den unggum og-esahuk. Iren de ap homi enunggul unuk misig on eke og-eneplug lausareg de enamingming angge on hagdoho ap homi Edom on fam onggo bal dausa.

⁷ Ai fam de An den indok o Gaza fak lehet oho on fene mondorik waheg, ne hembirangge wirig on han yaleheg, duhuk.

⁸ Ap homi o kota Asdod on mel enowe along wereg on mel ne Askelon on mel de An den hihiloho amumu fesehuk. Ne, kota Ekron de An den unggum fesehuk, ne it Filistin enap ando wereg on de An den mun elehapdoho fesehuk,” isi ebag.

Tirus enap fahet ebag on

⁹ Tuhan en uruk kwit de, “Ap homi Tirus enap de hundig-handig siag neg duruk en de demdoho An den unggum og-esahuk. Iren de ap homi enunggul unuk misig on eke sabu hetdoho og-eneplug laswareg de Edom enap fam og-esausa; iren de enele sali seberoho matswa on anyo dahan debeswa.

¹⁰ Ai fam de An den o Tirus fak lehet oho on fene indok mondorik waheg, ne iren hembirangge wirig on han yaleheg, duhuk” isi ebag.

Edom enap fahet ebag on

¹¹ Airoho ebagdeg Tuhan en uruk kwit de, “Ap homi Edom enap de hundig-handig siag neg duruk en de, demdoho An den unggum og-esahuk. Iren enenda esa fug angge it enori Israel on anyo enowarik kuswa. Airoho duswareg en iren enolok enepuk kwit enendama sebeleg wereg.

¹² Ai fam de An den indok o Teman fam mondorik waheg, ne o Bozra fam hembirangge wirig on mundoho han yalik waheg duhuk” isi ebag.

Amon enap fahet ebag on

¹³ Tuhan en uruk kwit de, “It enunggul unuk Amon on de hundig-handig siag neg duruk en de, demdoho An den unggum og-esahuk. Iren it enobam wilayah omano hum amag ulug duruk kwit, iren homi Gilead on enomalik enahummu wereg on enahum belang heheg enowatswa.

¹⁴ Ai fam de An den o Raba fam etma fak lehet oho on fene indok mondorik waheg, iren hembirangge wirig on etma mundoho han yaleheg, duhuk. Eta li em de weim yapuk en enele sahal-ngai uruk ale holeheg, weim de ik fu waharuk hagdoho waharukmu heheg, duhup.

¹⁵ Raja ebe mel autsi apma yabuk duruk on mel de og eneplug de sabu hetdoho hwik-enebik lahup, ulug An Tuhan en nele mundoho ihi” isi ebag.