Buka Linge 99 - Na Rongorongo Uto nina Jesus Christ

¹ A Lord na vunaghi haba, mana mavitu te mataghunia nia na tatata, te sopou ta nina malei sopou i vuvungadira na lei angel ghatagha, me anuanu na pari.

² A Lord te vunaghi pungisia Jerusalem, gaia te haba vulera na lei kema.

³ Na lei vure soko kara holohabaa na ahana te tabu, maia ghua te sule me mataghugha.

⁴ Ighoe na vunaghi haba, to laga mo liona na hava te utuni, to talua na utuni Israel, mo lavia mai na vola maemane to kaekage.

⁵ Holoutoa a Lord dida God, holohaba gaia te tabu ta nina malei sopou ni haba.

⁶ Moses ma Aaron ra nina mane sukaghi ma Samuel te kokoeliulivuti va i tatana. Gaira tara holoa Lord, me tala vanira.

⁷ Gaia te kokoe vanira mai lokana na ghobaghuli, mara taonighi na lei nina vetena ma na lei nina bosa ni keikeri.

⁸ Lord, Ighoe nimami God, to bosa tughu vanira tua kulamu na vure. To tatea vanira Ighoe a God, to talu keha palu, sakai vamua to torora nia tua na lei paludira.

⁹ Holoutoa a Lord, dida God, nia kau holohabaa ta nina ghotu tabu! gaia dida God te tabu.