Buka Linge 82 - Na Rongorongo Uto nina Jesus Christ

Nina linge Asaph

¹ God te sopoulia na dete i kokou: me nia hevei horu mai nina bosa ni dete te detera, rana ovu ni dete i kokou:

² “Ighau rana dete, kau sania na dete sorisori? Ma kau bei nira pala rana dika, tau nighi hevei horu nimiu na bosa ni dete!

³ Kau na barebare na uto vanira rana bona, ma tara mua tinagha ma ra tamagha: kau kage utoa vanira te manadira na hahanga, ma gaira te taho siki sakai ke hangara.

⁴ Kau volara raini: tana limadira na vure dika.

⁵ Gaira kiri tara mua manahagha, mana vahaghitailira na tinoni, na pukuna tara sakutua tana pungi. Keri ge taho siki totobo uto pe ke utuni lokana na maramana.

⁶ Inau tu bosa, “Ighau ke na lei god, tau tabe tughua God tana dete ni maramana. Ighau udolu dalena na Haba i kokou.

⁷ Kau mate udolu vaghara na lei tinoni soko, ma kau tumu vaghaa so siki dale vunaghi.”

⁸ God, ko mai, mo ko detea na maramana: a nimua udolu ighoe na lei kema soko.