Buka Linge 142 - Na Rongorongo Uto nina Jesus Christ

Na maskil nina David, tana bona te kabu tana vatuluma. Na kokoeliulivuti.

¹ Inau tu tangitangi vania Lord, mu nongia Lord nina veiarovi.

² Inau tu bosa tatei vania nigua na lei vahola, mu kokoe hughuhughu kolua tana matana.

³ Na pukuna te au vuleu tua, mi ghoe vamua to ghilala na halautugu ku va iga, ivei tua ku vaa na ghagua na levunimate tana liona na tari pitiagu.,

⁴ Inau tu kene siki sakai ge ke mai hangau, me taho tua ahei ke vaheu siki pile ghanaghana, taho tua ahei ke niu ghaghua, tana ghanaghana te kaleu eni.

⁵ Mi nau tu kokoeliulivuti vania Lord, mu bosa vania, “ighoe na puipungisi, ighoe vamua tu puku ni liomu tana volagu.

⁶ Ko rongovighi mai nigua na kokoeliulivuti, na pukuna tu kabu sasara ngangata. Ko volau mai itadira tara vahaghitailiu, na pukuna tara laga vule ngangatau tua.

⁷ Ko hola horu lokana na vale pipiti ge ku holoutogho, na lei nina vure God, tara talighutiu, na pukuna to pabe utuniu.