Wlǔmɔ 1 - Nyesoaa Kuo Win Jajle

Win Kwlǎ Mǒ Sèsa

¹ Mǒ Pɔ̀ɔ̌à chlě chněedɛ̌à ɔ̈ moo Tentǎn Jǔ Jùsuu nyebajlo. Nyesoaa chɛ̀ Nɔ̀ da mǒ bo moo Ɔɔ tuposà kpa nyu Ɔ̌ sà mǒ keǒ bo po Ɔɔ kàan tuposà

² ɛ̈ klě Ɔɔ ngmà je ne winʼǒ wlòmo Ɔ peea lěe seela tǐ jleě klě Ɔɔ wnɔsàɔpo mǒ.

³ Nyesoaa tuposà kwɛɛǒ Ɔɔ Jǔ jleě mǒ bo Ɔ̈ bea lěe tùonyuu tǔn wlòmo Ɔ̈ diia lěe klɔ̀ba Dèběsee tùgba slè.

⁴ Kɛɛ klě Ɔɔ sùsu mǒ ɛ tee ɛ sɛje ɛ̈ moo Nɔ̀ moo Nyesoaa Jǔ klě kpě kɛne tǔn wlòmo Ɔ̌ dǔa Ɔ jemǒ Ɔ̌ sàlaě Ɔ kǒla mǒ. Nɔ̀ moo Jùsu Tentǎn Jǔ Ɔ̈ moo äa Koɔn

⁵ Ɔ̈ kɔnʼɔ wlòo jlajlǎ dɛ ɛ̈ɛ̌ sà Lɔɔ wlò kǔ mǒ keǒǒ mɔ̀ plě Ɔ̈ nu mǒo Ɔɔ tuposà kpa nyu mǒ keǒ kuodakwɛ̌ wùɛ mɔ̀, u mǐ ɛ ji ke bu nuu tè wlò popoɛ konkɔn klě Ɔ mǒ plě u miǒ Ɔ bo tù ɛ̈ di ɛɛ numa Ɔɔ nynɛ̌ mǐ le poo lo.

⁶ Amo kuodakwɛ̌ a moo ii dɛɛ do, Jùsu Tentǎn Jǔ da amo Ɔ mǐ a kɔn.

⁷ Ě chlě chněedɛ̌à keǒ nyu wùɛ mɔ̀ ɔ̈ neěe dě fòɛǒ moo Wlùun wlòmo ɔ̈à Nyesoa noɛɛ mǒ plě Ɔ daa bɔ̈ moo Ɔɔ nyu. Nɛ äa Gbeǐ Nyesoa klee äa Koɔn Jùsu Tentǎn Jǔ Uu wlòo jlajlǎ dɛ ɛ̈ɛ̌ sà Uu wlò kǔ mǒ klee ně bo wnawna U kɔnʼɔ keǒ a mɔ̀ bi muu nya.

Pɔ̀ɔ̌ Jlɛ̌ Bɔ Mua Wlùun

⁸ È ke Ě jlɛ̌ boǒ nuu chněedɛ̌à wlò tùtuɛ nɛ̀ moo Ě pe ně Nyesoa tàto klě Jùsu Tentǎn Jǔ mǒ keǒ aa wùɛ mɔ̀. Mɛ̌oǒ joo nɛ̀ moo aa tè wlò popoɛà a kɔnʼɔ klě Tentǎn Jǔ Jùsu mǒ ɛɛ tè wɔ̀ kmɔ̌ wùɛà dlǒ lo.

⁹ Ně Nyesoaà Ɔ̈ kɔn konkwa Ě nii keǒ ně wlò wùɛ mɔ̀ keǒ bo po Ɔɔ kàan tuposàà ɛ̈ kwɛɛǒ Ɔɔ Jǔ jleě mǒ bo, Nɔ̀ moo ně Sàse ɛ̈ moo tǐ wùɛ mɔ̀ Ě sìɛn aa tè dlǒ mɔ̀le.

¹⁰ Klě ně Nyesoa mɔ̀ boɔboɔ wùɛ wlòmo, Ě gbɛ̀ ɛ wan ɛ̈ moo klě tǐà ä neěe wlòmo Bɔ̌ wɔɔn ɛ kɛn, è Bɔ sà ɛɛ snǔ Ě miě ɛ wɔ̀ keǒ bo diě a mɔ̀, ɛ̈ kɔn ämo bɔ̌aa jejěe tè seela.

¹¹ È tè kɔn tè Ě jlɛ̌ bo diěe nɛ̀ moo dɛà Nyesoaa Sùsu nye mǒo nɛ̀ Ě jlɛ̌ boǒ nye amo ke ɛ̈ di ɛɛ numa aa tè wlò popoɛ mǐ kbě ja le be.

¹² È dɛ Ě sɛ̀nʼɛ nynɛ̌ nɛ̀ moo a klee mǒ ä mǐ kbě ja le popoo lo klě äa do doo tè wlò popoɛ mǒ.

¹³ Ně bǐì Tentǎn Jǔu wǎn ane, Ě jlɛ̌ ba ji ɛ ɛ̈ moo klě tǐ fòfoa wlòmo Ě dǔa ɛ ble popoɛ mǒ keǒ bo diě a mɔ̀ Ě mǐɔ nyopò Nyesoa mɔ̀ jae le klě a slè wòje ke Ě nuu klě kuodakwɛ̌ tùu mɔ̀, kɛɛ tǐ wùɛ mɔ̀ ɛ kɔn dɛ kɛn mǒo je.

¹⁴ Ě kɔn boǒ sɛ̀ɛ nyopòà ü jii le mǒ plě klee ü see le ji plě nyopòà kɔnʼɔ tɔ̀n klee ü see tɔ̀n kɔn.

¹⁵ Tèǒ nì kɔn tè ně fǒ nymɛ̌ keǒ bo jaě ɛmo kàan tuposàà klě a mɔ̀ ke klě dě fòɛǒ moo Wlùun wlòmo.

¹⁶ Nyesoaa kàan tuposà moo Ɔɔ kpě ï wɛɛ nyu wùɛ ɔ̈ po ii tè kàan tè, tèǒ nì kɔn tè ně pe ɛ popoɛɛ tònwe. Klekle ɛmo tuposàǒ ɛ poo lo klě Jùwɛ nyo mɔ̀ plě ɛ̌ poo lo klě kuodakwɛ̌ mɔ̀.

¹⁷ Nyesoaa tuposàǒ nɛ̀ tee ɛ ämo ke Ɔ nii tùonyugbe jebo siǐn nyu mǒ nunuɛ. Ɛ tùu ɛ tè wlò popoɛ wlò ɛ̌ chlàa ɛ tè wlò popoɛ dlǒ wòje ke Nyesoaa win dɛ̌ɛ ɛ̈ moo, “Nyuà Nyesoa nuu jebo siǐn nyu mǒ nɔ̀ kɔn tè wlò popoɛ, dɛǒ nɛ̀ kɔn tè ɔ mi kmɔ̌ sie fònfno kɔnma.” (Hab 2.4)

Nyesoa Pee Nyu Wùɛà Kpni Kukwǐ Jǐi Je Jlo

¹⁸ Nyesoaǒ neěe jɔkɛn Ɔɔ jlo be pepě mǒ keǒ nyopò wùɛ mɔ̀ ü se Ɔɔ ji klee üà dɛ kukǔ jǐi je plě ü nii dɛ knǎ ɛ̈ kenkɛɛ nee Nyesoaa kàan dɛ jele.

¹⁹ Ɔ mɛɛ̌ǒ uu plɔ tu kɛn bo. Ɔ nye u tè le jbojbɛ Ɔ̌ po Ɔɔ chɛ̀ pepě mǒ keǒ u mɔ̀. Tèǒ nì kɔn tè u ji Ɔ lo tɛɛ.

²⁰ Sɔɔnʼaě tǐǒ jleě mǒ Nyesoa nuaa kmɔ̌à, nɛ̀ u jii noǎ keǒ Ɔ jleě mǒ. Bǔ tanʼǒ noǎ Ɔ nuu mɔ̀le, nì pe ɛ pepě mǒ ɛ̈ moo Ɔmoà Ɔ blě kmɔ̌ sie kpě plě è Nɔ̀ moo Nyesoa. Tèǒ nì kɔn tè uu dɛ kukǔǒ u nii kanfinǎ seǒ ɛ kɛn ne.

²¹ I moo kàan tè u ji Nyesoa, kɛɛ uǔ tùǒ Ɔ wòje Nyesoa klee uǔ pe Ɔ tàto keǒ noǎ wùɛ mɔ̀ ï Ɔ ni uu mǒ, kɛɛ uu dlě le sìɛnsiɛn neǒ noǎà kɛn ï see dɛ wlòmo ne, è uu plɔ kokoɛ̌ wlògbaeǒ kwijlě neě ɛ kɛn.

²² U je u kɔn tɔ̀n, kɛɛ u bo lo.

²³ È tè jǐ boǎ Nyesoaà Ɔ̈ɔ̌ kǒo Nɔ̀ u peǒ nǔkpuǐà see dɛ mǒ ne pènmo ï wǒo je tùonyugbe ɔ̈ kɔnʼɔ kokoɛ̌ klee ï wǒo je noe klee soa ï nee bee hɛ̀n hɛ̀n jele plě de chlì noǎ, ï kɔn wùɛ kɔnʼɔ kokoɛ̌.

²⁴ Tèǒ nì kɔn tè Nyesoa tbɛ u kɛn u mǐ uu chɛ̀ɛ dɛ kukǔ ble po u mǐ gblà kmɔ̌ ne ɛ̈ see mnǒ wɛ̀ uǔ di uu fǒ ngmà je tù.

²⁵ Nyesoaa kàan dɛà nɛ̀ u sìnsiɛɛ mɔ̀ u poǒ sen dɛ pènmo. Noǎǒ Nyesoa nuu nì kɔn konkwa u ni plě nì kɔn wɛ̀ u sɛ̀, ɛ̀ sìnʼǒ bu sà Ɔmoǒ nuu noǎǒ Ɔɔ wɛ̀ Ɔ̈ blɛɛ je Bɔ̈ kɔnʼɔ de bìsea tǐ wùɛ mɔ̀.

²⁶ Tèǒ nì kɔn tè Nyesoa sɔnʼǒ u mɔ̀ mǒ bu neě tònwe kmɔ̌ǒ slè bo. È dɛ uu nyno nii nɛ̀à, u tbɛ u klee jbɛjlu bu sɔn pɛna mǒ kɛn ǔ chè uu bǐì nyno ja.

²⁷ È uu jbɛjlu tbɛ u klee nyno bu sɔn pɛna mǒ kɛn ǔ chè uu bǐì jbɛjlu ja. Tònwe dɛǒ nɛ̀ jbɛjlu ni uu bǐì jbɛjlu mǒ, è ɛɛ plɔɔ tu kɛn bo maěaǒ blɛɛ ɛɛ je nɛ̀ u jě.

²⁸ Ke ɛ toon jleě mǒ bo tùonyopo je ǔ see wɔn bu sìɛn nee Nyesoaa kɛn wɔɔn dɛɛ tè dlǒ mɔ̀le, Nyesoa tɛ u bo bu neě uu dlǒ le sìɛnsiɛn kukǔǒ slè ɛ̈ di ɛɛ numa u mǐ noǎ nu ï u see je blɛɛ le bu nuu.

²⁹ Uu kmɔ̌ neneɛ jǐ jele noǎ kukwǐi doědoe, kàwloo wlògbae klee wnɔwnǔ klee chnɛ̌ wlògbae klee chea nì jiě u měne plě mnùngma popoɛ klee wònwɔn klee nyopò mǒ booa plě klee nyu kàgba mǒ popoɛ. U boɛɛ nyopò de měne

³⁰ ǔ boɛ nyopò tè kukwǐ fǒ měne ǔ faen Nyesoa plě ǔ blě dlě jakě klee de jaě sùsu plě ǔ pe wun fòɛ le. U sɛ̀ noǎ kukwǐ jajle tà měne bu nuu, uǔ tùǒ uu naǎpò klee gbeǐpòo win bo.

³¹ Uu plɔ kǒ lo plě uǔ nyna uu pee dɛ kɛn bo, u se mǒ noɛnoɛ kɔn keǒ nyopò tùu mɔ̀ plě uǔ jbo nyu wùɛ wɔle je.

³² Kàan tè u ji ke Nyesoaa teteǎ dɛ̌ɛ le ɛ̈ moo nyopòǒ ni imoo noǎǒ, kmɔ̌ sie kokoɛ̌ nɛ̀ blɛɛ u je plě ɛ se bu nu imo noǎǒ ɛ doo tè, kɛɛ imo noǎa doǒ nì u pe nyopò tùu kbě ja le keǒ bu nu ke.