Wlɛ̀velesɔ̌n 1 - Nyesoaa Kuo Win Jajle

Win Kwlǎ Mǒ Sèsa

¹ Chněedɛ̌à ɛ boɛɛ kɛn noǎ Nyesoa nyeaa Jùsu Tentǎn Jǔ Bɔ teeaa Nyesoaa na wien po nyebajle klee nynejlu ï kɔn bi kpalaa tùɔn ï kɔn tǐ seaǒo mɔ̀ tmɔ. Tentǎn Jǔ dboa Ɔɔ najiǒpòi kělɔ mǒ Jɔ̀ɔ̌n mɔ̀ ɔ̈ moo Ɔɔ na wien po nyebajlo Ɔ̌ teeaǎ noǎǒ.

² Kělɔ chněedɛ̌ɔ wlòmo Ě sèsae ii tè kɛn le ɛ̈ kwɛɛǒo noǎ wùɛ Ě jěaa jleě mǒ bo. Winʼà i moo Nyesoaa tuposà klee dɛ Tentǎn Jǔ Jùsu tmɔɔ̌a mǒo.

³ Nyuà mii Nyesoaa wnɔsà winʼà slèba ɔ kɔn ngmna, dɛɛ doǒ nɛ̀ ɛ mono keǒ nyopòà mi nii wɔ̌nma plě ü mi nii kàan tè poba mɔ̀ ï kɔn tè chleě lee kělɔ chněedɛ̌ɔ wlòmo. Mɛ̌oǒ joo nɛ̀ moo tǐ mǎ bo je keǒ noǎ wùɛà bi kpa tùɔn.

⁴ Mǒ Jɔ̀ɔ̌nʼà chlě chněedɛ̌à klě Tentǎn Jǔu wǎnʼa tàkpɛ̌ɛ nyiɛtaà mɔ̀ ü neěe Esìa wakǎ kɛn. Wlòo jlajlǎ dɛ ɛ̈ɛ̌ sàa wlò kǔ mǒ klee ně bo wnawna bi neeǒ a mɔ̀ ï sɔn lěe Nyesoa mɔ̀ mǒ Ɔ̈ ɛ tùu klee ɛ tùaa plě Ɔ̈ miěe diba klee ï sɔn lěe sìsii nyiɛtaǒ mɔ̀ mǒ ï nynaǒ Ɔɔ klɔ̀ba gbèsɛɛ jemǒ bo

⁵ klee klě Jùsu Tentǎn Jǔ mɔ̀ Ɔ̈ moo wlò kpae Sàse klee klekle Nyu Ɔ̈ sàeěe kǒla mǒ plě Ɔ̈ kɔnʼɔ klɔ̀bapoo wùɛ win kwa ü neɔɔ blǒɔ mɔ̀. Bìsea keǒ Jùsu mɔ̀ keǒ Bɔ di ä mǒ noɛɛ ne Bɔ di ä kpni kukwǐi plɔ tu kɛn bo maěe dbǔ mɔ̀ bɛ̌ ɛ̈ Ɔɔ kokoɛ̌ nuu.

⁶ Ɔ nu ä mǒ klɔ̀bapoo klee bodiɔpò ä mǐ Ɔɔ Nyesoa Ɔ̈ moo Ɔɔ Gbeǐ Ɔɔ konkwa nu. Nɛ bo Tentǎn Jǔ Bɔ kɔn tè jǐ boaboǎ klee kpě ke ɛ mii jleě mǒ bo tonma, kě bɛ ne!

⁷ A tanà le, Tentǎn Jǔ miǎě nukpě kɛn diiba! Nyopò wùɛ miǎǒ Ɔ jleě mɔ̀ kpaba, jà nyopòo chɛ̀ǒ dbǎla Ɔɔ. Dakwɛ̌ wùɛà neɔɔ kmɔ̌ɔ mɔ̀ u mi Ɔɔ sònwɛ chìnma. Imo tèà nì moo kàan tè, kě bɛ ne.

⁸ Kpě kɛne Koɔn Nyesoa Ɔ̈ ɛ tùaa klee ɛ tùu plě Ɔ̈ miěe diba, kě Ɔ dɛ̌ Ɔ je, “Mǒà Mǒ moo Ɛɛ Wlò Tùla Mǒ klee Ɛɛ Dlǒ Chlɛ̀ɛa.”

Jɔ̀ɔ̌n Jěa Jùsu Klě Slèe Mǒ

⁹ Mǒ Jɔ̀ɔ̌nʼà ɔ̈ moo aa bě Tentǎn Jǔu wǎnpòi, Ě moo aa nenatùmo klě sònwɛ jejeɛ̌ slè klee Nyesoaa deplě klee tǐ jakě jebo nynanyna ï ä klee Jùsu ä jeěǒo tàa do. Ě boɛa Nyesoaa win plě Ě nia Jùsuu sàse dɛ, tèǒ nì kɔn tè Wlǔmɔ nyoo kòngmna kpala lěě blǒ tìeǒ kɛn ɛ̈ ně poěe gbàe mǒ u dɛɛ Pamǒ.

¹⁰ Koɔnʼɔ defɛ chnɛ̀ jlǒ waě tɛ̀ɛ mɔ̀ ɛ̈ moo Sɛ̌ɛ̀de, Nyesoaa Sùsu Nɛ̀ bea lěě ja. È Ě wɔ̌na win ï pnɛ̌aa le klěě demǒ wòje keà nokpa boɛaa,

¹¹ kě i dɛ̌a i je, “Chlě dɛǒ jèe klě chněedɛ̌ wlòmo mì ɛ dbo klě Tentǎn Jǔu wǎnʼa tàkpɛ̌ɛ nyiɛtaǒ mɔ̀ ü neěe deě fòeà monoo Ɛfèse kɛn klee Smanà klee Pɔkemɔ̀ klee Taetawlà klee Sɔdè klee Feledɛfìa plě klee Lodisìa!”

¹² Ě bitǐa bo Ě mǐa nyuǒ boɛaě mǒo mɔ̀ jě. Tà Ě bitǐaa bo, Ě jěa klò nǎpea ti fòee nyiɛta.

¹³ Klě klò nǎpea tiǒ slè Nyu tɔ̀ɔ nynanaě bo Ɔ̈ wǒaa Nyuà u dɛɛ Jbɛjuu Jǔ. Ɔ pea wlawlǒ pɛ̀tu ɛ̈ jɛa Lɔɔ bopla plě klò papɔ̌ sìinʼaǒ Ɔ kekeě jleě.

¹⁴ Ɔɔ dlǒ klee dujɔ̌ plɛ̌a pɔpɔ wòje jeseě ɔ̀ɔ̌ fankpɛ̌ plě Ɔɔ jǐ wnea wòje napèpɛlo.

¹⁵ Ɔɔ boplɛ wnea ǐ nea wlekě wlekě wòje keà u nii na u siɛn kanwɛɛ ɛ̌ wnee plě u sonwɛ nɛɛ fǒ měne. Ɔɔ win jɛ̌a lě wòje keà něe klè kwlii.

¹⁶ Ɔ blěa kwa jɔtnèe nyiɛta klě Ɔɔ dilǎ son mɔ̀ plě panʼà wɛ̌nʼɛ ɛ̈ kɔnʼɔ jǐi sɔ̌n ɛ̌ sonwɛaě Ɔ wan mǒ. Ɔɔ jigbà wnea wòje keà wɛn wulee blǒ mǒ ɛ fɛnʼɛ.

¹⁷ Tà Ě jěa Lɔɔ, Ě pɛnaǒ Ɔ be wɔ̀ɔn bo keà nyu kǒo. È Ɔɔ dilǎ son nɛ̀ Ɔ mǎnaǎ kɛn bo, kě Ɔ dɛ̌a Ɔ je, “Fano bɛ bɔ̌ɔ̀ nunuɛ, Mǒ moo Klekle Nyu klee Demǒ Bɔɔ̌ Nyu

¹⁸ plě Ɔ̈ moo Kmɔ̌ Ne Nyu. Ě kǒa le, kɛɛ tanàle, Ě ne kmɔ̌ ke ɛ mii jleě mǒ bo tonma plě Mǒ kɔn kokoɛ̌ klee na slè mumuɛ win kwa.

¹⁹ Tèǒ nì kɔn tè chlě noǎà jèe ii tè, jà noǎà jèe klě tǐà wlòmo klee noǎ tìi mìǎa jěba.

²⁰ Jɔtnèe nyiɛtaǒ jèe ï neɔ Mǒo dilǎ son mǒ klee nǎpea tii nyiɛtaǒ, dɛ i sɛ̀nʼɛ nynɛ̌ nɛ̀ moo jɔtnèe nyiɛtaǒ nì nynaǒ pènmo bo najiǒpòo nyiɛta ü nynaǒo Tentǎn Jǔu wǎn kpɛɛ nyiɛta pènmo bo. È nǎpea tii nyiɛtaǒ nì nynaǒ pènmo bo Tentǎn Jǔu wǎn kpɛɛ nyiɛtaǒ.”