Matiɔ̌n 4 - Nyesoaa Kuo Win Jajle

Kǔ Tɛ̀naě Jùsu Měne

¹ Tà tǐ gbei sìnʼaa, è Ngmà Je Ne Sùsu kpala lě Jùsu kpatekpǎ blǒ kɛn ɛ̈ di ɛɛ numa kǔ mǐa lɛ mǒ tɛ̀n keǒ bɔ tɛ̀na lě Ɔ měne.

² Tà Jùsu chìnʼaa keǒ Nyesoa mɔ̀ boɔboɔ mɔ̀ klě chnɛ̀ jlǒ wěe wlèe sɔ̌n klee tǒn jlǒ wěe wlèe sɔ̌n wlòmo, è sàno niaa kɛ̀ Ɔlo.

³ È kǔà mia lě Ɔɔ měne tɛ̀nma ɔ̀ diaě Ɔ mɔ̀, kě ɔ dɛ̌a Ɔ je ɔ je, “Bɛ̌ nu sɛjesɛ Bò moo Nyesoaa Jǔ, è Bò tmɔɔ̌ seɛ̌à i mǐ flɔ̌ɔ ponpnɔ no Mì di.”

⁴ Kɛɛ Jùsu tùa ɔ kɛ̀ɛn Ɔ je, “Ɛ chleě le klě Nyesoaa win wlòmo i je, ‘Tùonyugbe bɔɔ̌ nee didi dɛɛ do kmɔ̌, kɛɛ win wùɛà ï sonwɛ lěe Nyesoa wan mǒ nì bɔ nee kmɔ̌.’ ” (Deut 8.3)

⁵ È kǔ dǔa Lɔ mǒ de ɔ̌ kpalaě Ɔ Jlǔsnɛ ɛ̈ moo ngmà je ne dě fòɛ ɔ̌ jaěa lě Ɔ Nyesoaa kǎ fòɛɛ kǎ gbèe mǒ ɛ̈ tmɔaa ja chɔɔ.

⁶ È kě kǔ dɛ̌a Lɔ je ɔ je, “Bɛ̌ nu sɛjesɛ Bò moo Nyesoaa Jǔ, wan nɔ koǔɔ dlǒ be wɔ̀ɔn. Mɛ kɔɔ̌n tèǒ joo nɛ̀ moo ɛ chleě le klě Nyesoaa win wlòmo ɛ̈ moo, ‘Ɔ mi Ɔɔ najiǒpò dboba u mǐì jǐ mɔ̀ tù tɛɛ tɛɛ u miěè jɔ mǒ saǎ le ɛ̈ di ɛɛ numa Nè bo ně di seɔ̌ je gbèe chɛ̀.’ ” (Ps 91.11,12)

⁷ Kɛɛ kě Ɔ dɛ̌a kǔ je Ɔ je, “Ɛ chleě le de klě Ɔɔ Win wlòmo Ɔ je, ‘Nè tɛ̀nʼě nè Koɔn měne Ɔ̈ moo nèe Nyesoa.’ ” (Deut 6.16)

⁸ Ii tè kǔ dǔa Ɔ mǒ de ɔ̌ kpalaě Ɔ togbee fòɛ dlǒ ɔ̌ tea Lɔ kmɔ̌ɔ deplě wùɛɛ win kwa konkɔn je le klee ii pònpan noǎ klee kpě.

⁹ È kě kǔ dɛ̌a Lɔ je ɔ je, “Bɛ̌ nu Bò kɔ kwne bo Bò sà ně wɛ̀, deplě wùɛà nì Ě miì nyema mì win kwa kɔn.”

¹⁰ È kě Jùsu dɛ̌a kǔ je Ɔ je, “Setɛ̀n, ɛ chleě le klě Nyesoaa win wlòmo ɛ̈ moo, ‘Koɔn Nyesoaa doǒ Nɔ̀ kɔn wɛ̀ nyu wùɛ bɔ sà plě Nɔ̀ kɔn konkwa nyu bɔ nu. Sìn mù.’ ” (Deut 6.13)

¹¹ Ii tè kě kǔ nuaǒ Ɔ mɔ̀ mǒ sonsɔn, è najiǒpò nù dia lě ü sɛ̀ɛa Jùsu mǒ.

Jùsu Tùa Ɔɔ Nyesoaa Konkwa Wlò

¹² Tà Jùsu wɔ̌na nii ɛ̈ moo, “U poa Jɔ̀ɔ̌n wùloò,” è Nɔ̀ǒ muaě klě Jàlalǐi wakǎ kɛn.

¹³ Ɔ bɛɛ̌aě Nǎsòwɛ̌ diě wlòmo tìe Ɔ̌ mua lě Kapanìa dǐa klě Ɔ nea lě. Kapanìa neaǒ Jàlalǐi jbǒ wien keǒ dakwɛ̌ dlěǒ moo Sɛbìlɔn klee Nɛfetelà uu blǒo tnòa kɛn.

¹⁴ Dɛǒ nɛ̀ kpala tùɔn ɛ̈ di ɛɛ numa winʼǒ Koɔn Nyesoa poa Ɔɔ wnɔsàɔ Aesaeǎ wan seela tǐ jleě i mǐaǒ jaě le ï dɛ̌a bòo,

¹⁵ “Nyopòà ü neěe Sɛbìlɔn klee Nɛfetelà nyoo blě kɛn ï konwaě něe Jàlalǐi jbǒ le klě něǒ moo Jɔ̀ɔ̌dɛn demǒ, ɛmo Jàlalǐi wakǎǒ ɛ̈ǒ kuodakwɛ̌ tǐnʼi kɛn

¹⁶ ü neěe kwijlě slè u miǎ Pepě Fòɛǒ jěba. Pepěǒ Ɛ mǐǎ fɔnma keǒ nyopòǒ mɔ̀ ü neěe kokoɛ̌ɛ kwijlě blǒǒ kɛn.” (Is 9.1-2)

¹⁷ Klě tǐǒ wlòmo Jùsu tùa Nyesoaa win boɔboɔ wlò, kě Ɔ dɛ̌a Ɔ je, “Ba bitǐ aa wlè bo, Nyesoa diě le Ɔ mǐ a win kwa kɔn.”

Jùsu Dala Ɔɔ Mɔ̀ Cheěn Nyoo Hɛ̀n

¹⁸ Chnɛ̀ jlǒ waě tɛ̀ɛ mɔ̀ Jùsu nɛna Jàlalǐi jbǒ wien, Ɔ jěa popǎ nyoo sɔ̌n ǔ pea tata ně měne. U mooa mamǔ jbɛjujluu sɔ̌n, u nyuu doo nynɛ̌ mooa Saemɔ̌ ɔ̈ u dɛɛa Pitɛ̌ ke, è ɔɔ mamǔ tɔ̀ɔ nɔ̀ mooa Andlǔ.

¹⁹ È kě Jùsu dɛ̌a u je Ɔ je, “A naǎ de, Ě mǐ a tee le ke ba nuěe tùonyopo jeja kělɔɔ̌ mɔ̀ wòje keǒ a nii ǎ kmee smì.”

²⁰ Tǐi doo tǐ jleě u siaǒ uu tataǒ bo ǔ nana Ɔ de.

²¹ È Ɔ nɛɛ̌a jè jbǒǒ wien Ɔ̌ jěa mamǔ jbɛjujluu sɔ̌n tùu u klee uu gbeǐ Sɛbɛ̀di ǔ nea bo klě uu blǎgbè chěnchaě wan ǔ pɛ̌a tata. Uu nyneǎ nìà, Jìmǐse klee Jɔ̀ɔ̌n. È Jùsu dala u Ɔ je, “A naǎ de.”

²² Tǐi doo tǐ jleě ǔ siaǒ uu gbeǐ klě blǎgbè wan ǔ nana Ɔ de.

Jùsu Teea Diblɛ̌

²³ Tà dɛǒ ɛ sìnʼaa, è Jùsu nɛna Jàlalǐi wakǎ wùɛǒ kɛn le Ɔ̌ teea nyopò klě Jùwɛ nyoo Nyesoa keǐ bo ble le Ɔ̌ pea u Nyesoaa kàan tuposà je ɛ̈ kwɛɛǒo Nyesoa Bɔ kɔn uu kmɔ̌ neneɛ win kwa jleě mǒ bo. Ɔ peana nyopò wùɛɛ kmakma klee kweǎa doědoe.

²⁴ È Ɔɔ tè gbɛ̀tɛɛa blǒǒ moo Siwlìa kɛne, ii tè nyopò jɛa lě kmakma nyo klee nyopò kweǎa doědoe niaa plě ü kɔnaa chnechně noǎa, jà nyopòà kǔ sìsi nea lěe ja klee klè kwɛ̌ plě bo klɔ̀ɔ kwɛ̌ Ɔ̌ peana uu wùɛǒ.

²⁵ Diblɛ̌ fòfoa nù nɛna Ɔ de. U sonwɛa mǒ Jàlalǐi wakǎ kɛn, tìe sonwɛa Dikaplà wakǎ kɛn mǒ klee klě diěǒ moo Jlǔsnɛ wlòmo, tìe sonwɛa Jùdǐa wakǎ kɛn mǒ plě klě něǒ moo Jɔ̀ɔ̌dɛn demǒ.