Matiɔ̌n 20 - Nyesoaa Kuo Win Jajle

¹ Nyesoaa win kwa konkɔn wǒ je keà chè kɔn nyu duǐi jemǒ kènta gbìi ɔ miěe pɛlě plooa mǒ ɔ mii chènyo le pɔ̀nma u mǐ ɔɔ konkwa nu klě chè mǒ.

² Nyane nyo ɔ jěaa dɛ u klee ɔ̀ wɔɔnʼaa kɛn nɛ̀ mooa chnɛ̀ jlǒ waě gblèe snǒ sàe dɛ, è nùǒ ɔ dboa klě ɔɔ chè mǒ.

³ È klě kènta àwɛɛ siědo nenɛ wlòmo ɔ mua de ɔ̀ jěa nyopò tùu ü nynanaǒo noǎ plooa mǒ bo ü seaa konkwa kɔn.

⁴ È kě ɔ dɛ̌a u je ɔ je, ‘A muě ně chè mǒ a mǐ konkwa nu, è dɛǒ wɛɛnʼǒo le nɛ̀ Ě mi a snǒ sàeba.’

⁵ Ii tè ǔ muaě ɔɔ chè mǒ. È ɔ bɔɔ̌a demǒ de ɔ̌ bea plomǒ klě wɛnʼɛ blǒ mǒ wulee tǐ wlòmo klee klě àwɛɛ tan nenɛ wlòmo ɛ̈ moo wìtika, ɔ̀ jěa nyopò tùu ɔ̌ dboa u klě ɔɔ chè mǒ u mǐa konkwa nu ke.

⁶ È klě àwɛɛ m̀m nenɛ wlòmo tǐà wɛn beě jbǒ kɛn, ɔ̀ bea plomǒ de ɔ̌ muaě tàa doǒ ɔ̌ jěa nyopò tùu ǔ nynana ble, è ɔ gbàla u wan ɔ je, ‘Mɛ kɔɔ̌n tè a nyenynɛɛ neě kɛ ble chnɛ̀ jlǒ waě gblèeà mɔ̀ a seě dɛ kɔn ba nuǔ?’

⁷ È u tùa lɔ kɛ̀ɛn u je, ‘Ä se nyu jě ɔ̈ mǐ ämoo konkwa nye.’ Ii tè ɔ̌ tmɔɔ̌a u ɔ je, ‘A muě ně chè mǒ a mǐ konkwa nu,’ è nùǒ mua.

⁸ Tà ɛ nuaa wìtika, è ɔ dala chènyoǒ uu je siɔ ɔ je, ‘Da konkwa nu nyoǒ mì u snǒ sà. Sɔɔnʼǒ demǒ bɔɔ̌ nyo mɔ̀ mǒ mì nyane nyo kɛn jɛɛ le.’

⁹ È tà nyopòǒ ü bɔɔ̌aa demǒ u dia lěe keǒ bu kmea uu snǒ sàe dɛ bo, ɔ nyea u chnɛ̀ jlǒ waě gblèe snǒ sàe dɛ.

¹⁰ Ii tè tà nyopòǒ ü kɛnaa nya u jěaa nyopòǒ bɔɔ̌a lěe demǒ uu snǒ sàe dɛ, è dɛ u sìɛnʼaa dlǒ mɔ̀le nɛ̀ moo uu dɛ kɔn bɛ sìnʼaǒ u mǒ, kɛɛ chnɛ̀ jlǒ waě gblèe snǒ sàe dɛɛ doǒ nɛ̀ u jěa ke.

¹¹ Tèǒ nì kɔn tè tà u jěa uu snǒ sàe dɛǒ, è nùǒ boboɛɛa wan le keǒ chè kɔn nyuǒ mɔ̀

¹² u je, ‘Nyopòà ü bɔɔ̌ěe demǒ ü nuu tǐ gbeii konkwa, snǒ sàe dɛɛ doǒ nyè nuu nɛ̀ nyè ämo. Kɛɛ ä nu chnɛ̀ jlǒ waě gblèe konkwa wɛn sǐ ä mǒ bo.’

¹³ È kě ɔ dɛ̌a u nyuu do je ɔ je, ‘Ně mɔ̀nai, Ě se dɛ kukǔ nu keǒò mɔ̀. Ɛ se dɛ mǒ klee mò ä wɔɔn kɛɛ kɛn ɛ̈ moo Ě miì chnɛ̀ jlǒ waě gblèe snǒ sàe dɛ nyemaǒ le?

¹⁴ Dǔ ɛ mǒ, mu. Ɛ moo ně wlòo kɛn wɔɔn dɛ keǒ nyopòà bɔɔ̌ěe demǒ klee amoà kɛɛn nya boǒ sàe a dɛɛ doǒ snǒ.

¹⁵ Aa wlò je ɛ se kɛǒ le wɛɛn ne keǒ dɛà ně wlò poo ble boǒ nu něe wlě mǒ boǒ nu ɛɛ ì mǒ le? A ni kɛ chea keǒ ně kwa nmɔnmɔɔ tè mɔ̀le?’ ”

¹⁶ È kě Jùsu dɛ̌a Ɔ je, “Dɛɛ doǒ nɛ̀ ɛ mono, nyopòà monoo demǒ bɔɔ̌ nyo nù miǎ nyane nyo tùba, è nyane nyo nù miǎ demǒ bɔɔ̌ nyo tùba.”

Jùsu Sàla Ɔɔ Kokǒ Tè Wan Ɛɛ Wěe Tan Nenɛ

¹⁷ Tà Jùsu klee Ɔɔ mɔ̀ cheěn nyoo pù tùo sɔ̌n u jɛɛ̌aa je u miaa Jlǔsnɛ, Ɔ kpaeaǒ u wakǎ mǒ u klee Ɔɔ sɔ̌n sosǒ ǔ kpleaǒ je Ɔ̌ tmɛɛ̌a nu Ɔ je,

¹⁸ “A tanàle, ä jɛɛ̌ je ä mi Jlǔsnɛ, è Mǒ Jbɛjuu Jǔà Ě miě bo demǒ sàeba klě Nyesoaa kpatòapoo fòe klee teteǎ tee nyo kwete mǒ, u miǐ kokǒ wun kɛn bɛ̌.

¹⁹ U miěě kuodakwɛ̌ kwete mǒ poba u miǐ pà kɛn po, u miǐ fǎe kɛn sà, u miǒǒ pète bɛ̌ tu jleě kɔba, kɛɛ bɛ̌ sìn, klě chnɛ̀ jlǒ wěe tan nenɛ wlòmo Nyesoa miǐ jemǒ dǔba de.”

Uu Naǎa Wan Gbà Dɛ

²⁰ È Sɛbɛ̀dii jlǔu naǎ klee ɔɔ jbɛjluu sɔ̌n nù diaě Jùsu mɔ̀. Nynɔǒ ɔ kɔla kwne bo keǒ Ɔ jemǒ ɔ̌ gbàla Ɔ wan Bɔ nua ɔ kàan dɛ mǒ.

²¹ È Jùsu gbàla ɔ wan Ɔ je, “Mɛ jlɛ̀ Bo nuǔ kɛ?” È kě ɔ dɛ̌a ɔ je, “Ě jlɛ̌ Bò pooě ɛ mǒ ɛ̈ moo ně jlǔu sɔ̌nʼà uu nyuu do miǎě Nè dilǎ son mɔ̀ bo neema, do mǐǎě Nè gbàpe son mɔ̀ bo nee ne tǐǒ jleě mìǎ diblɛ̌ win kwa kɔnma.”

²² Kɛɛ kě Jùsu dɛ̌a u je Ɔ je, “A se dɛ ji ba gbàa wan. A wɔ̀le je ba naǎ kɛ sònwɛ jejeɛ̌ɛ kàeà Ě mi mǒo naěma ne pase le?” È u tùa Ɔ kɛ̀ɛn u je, “Uuǔn, ä wɔ̀ě ɛle.”

²³ È Ɔ tùa u kɛ̀ɛn Ɔ je, “Kàan tè, a mi ɛ mǒ naema, kɛɛ ɛ se Mǒà ně tba nyu tae ɔ̈ miǎě Něe dilǎ son mɔ̀ bo neema klee nyu tae ɔ̈ miǎě Něe gbàpe son mɔ̀ bo neema. Imo tùnwɛǒ Ně Gbeǐ wɔ̀ i mɔ̀le ǐ neǒ keǒ nyopòǒ ü kɔnʼǒ ii kɛn mɔ̀.”

²⁴ Tà Ɔɔ mɔ̀ cheěn nyoo pù tùuǒ u wɔ̌naa dɛǒ, ù bea měne jlo.

²⁵ È Jùsu dala Ɔɔ mɔ̀ cheěn nyoǒ Ɔ̌ poaǒ u tàa do Ɔ je, “Aa chɛ̀ a ji ɛle kuodakwɛ̌ɛ win kwa kɔn nyo ke u ni uu nyopò le cheanchean ǔ sɛ̀ uu noǎ měne plě ǎ ji ke uu kòngmna nyefòapo ni uu teteǎ kɛn kpokpa ɛ mǐ ɛ tee le ɛ̈ moo u moo nyefòapo.

²⁶ Kɛɛ aa ka ɛɛ̌ ne bò je. Aa nyu bɔ̌ jlɛ̌ ɔɔ tè bi kma chɔɔ klě Nyesoa jǐ kɛn, nɔ̀ bɔ̈ moo mɔ̀le nae nyu keǒ nyopò tùu mɔ̀.

²⁷ È bɛ̌ nu aa nyu bɔ̌ jlɛ̌ bɔ neě ɔɔ bǐì dlǒ jleě, nɔ̀ bɔ̈ moo kèi keǒ a mɔ̀.

²⁸ Dɛɛ doǒ nɛ̀ ɛ mono, Mǒ Jbɛjuu Jǔà Ě slě di nyopò mi Ně konkwa nu, kɛɛ Ě diě keǒ Bo mǐ nyopòo konkwa nu plě Ě mǐ kǒ, dɛǒ nɛ̀ mi tùonyopo fòfoa gblàba klě uu kpni kukwǐi plɔɔ tu kɛn bo maěa slè.”

Jùsu Peana Dodɔ Jbɛjluu Sɔ̌n

²⁹ Tà Jùsu klee Ɔɔ mɔ̀ cheěn nyo sonwɛa lěe diěǒ moo Jɛ̀lekǒ kɛn mǒ, è diblɛ̌ fòfoa nɛa Ɔ de.

³⁰ È dodɔ jbɛjluu sɔ̌n nù neaǒ snǔ wakǎ mǒ bo. Tà u wɔ̌na nii ɛ̈ moo, “Jùsuǒ diěò,” è nùǒ pnɛ̌a le u je, “Koɔn, klɔ̀ba Dèběsee jlǔu Jǔ, jbo ä wɔle je!”

³¹ È diblɛ̌ǒ u pnɛɛ̌a jbɛjluǒ jǐ měne ǔ tmɛɛ̌a nu bu poa kpee, kɛɛ u jɛɛ̌aě win ǔ pnɛ̌a lě u je, “Koɔn, klɔ̀ba Dèběsee jlǔu Jǔ, jbo ä wɔle je!”

³² È Jùsu Nɔ̀ǒ nynana bo Ɔ̌ dala u Ɔ̌ gbàla u wan Ɔ je, “Mɛ a jlɛ̌ Bo nuǔ kɛ a mǒ?”

³³ È u tùia Lɔ kɛ̀ɛn u je, “Koɔnʼò, nu äa jǐ bi kna.”

³⁴ È tà Ɔ jěa luu, ùu wɔle beaě Ɔ mǒ no, ii tè Ɔ gbèa uu jǐǒ mɔ̀, tǐi doo tǐ jleě è nùǒ jěa le ǔ dǔa jemǒ ǔ nana Ɔ de.