Matiɔ̌n 15 - Nyesoaa Kuo Win Jajle

Bòliboo Blětà Teteǎ Teea

¹ È Fɛlesǐi wǎn klee teteǎ tee nyoo tìe sɔnaě Jlǔsnɛ mǒ ǔ diaě Jùsu mɔ̀ ǔ gbàla Ɔ wan u je,

² “Mɛ kɔɔ̌n tè Nè mɔ̀ cheěn nyoà uǔ tùǔ kɛǒ ämo bòliboo blětà teteǎ bo uu nyu bɔ̌ keě dɛ di ɔɔ̌ jlaǎ chìa keǒ teteǎ dǎa?”

³ È Jùsu gbɛ̀a u wan Ɔ je, “È mɛ kɔɔ̌n tè aǎ tùǔ kɛǒ Nyesoaa teteǎ keǒ aa blětà teteǎa tè mɔ̀?

⁴ Nyesoa je, ‘Tùǒ nàǎ klee gbèǐ,’ (Ex 20.12, Deut 5.16) è ‘Nyu wùɛ ɔ̈ mi ɔɔ naǎ klee gbeǐ win kukwǐ jleě mǒ boɔba ba dbǎ lɔ.’ (Ex 21.17)

⁵ Kɛɛ kě aa blětà teteǎ dɛ̌, i je dɛǒ aa nyu kɔnʼɔ bɔ sɛ̀ɛ ɔɔ naǎ klee gbeǐ mǒ kě bɔ dǎ u je ɛɛ tè ɛ̈ moo, ‘Ě nye ɛ Nyesoa ɛ̌ wɛ̀ mɔ̀le.’

⁶ Ii tè ɔ se kɔn bɔ sɛ̀ɛ u mǒ. Tèǒ nì kɔn tè aa blětà teteǎǒ nì a ni ǎ sɛ̀ǒ Nyesoaa win snǔ mɔ̀.

⁷ Amo ä jěè kɛn ä daà kàan chènyɔ Nyesoa nyoà, ɛ wɛɛnʼaǒ le keǒ Aesaeǎ bɔ sàla wan keǒ a jleě mǒ bɔ dǎla bò ɛ̈ moo,

⁸ ‘Nyopòà uu wun sosǒ nɛ̀ u ni ǔ tùiǒ Mǒ Nyesoa bo, kɛɛ uu wlè tmɔɔ noǒ mɔ̀.

⁹ U tee uu blětà teteǎ, ii tè uu wɛ̀ sèsa keàǎ mɔ̀ ɛ se dɛ kɛn bo nyna.’ ” (Is 29.13)

¹⁰ È Jùsu dala diblɛ̌ǒ kě ɔ dɛ̌a Ɔ je, “Ba poǒ nɔkǔ jebo a mǐ tè le jbo.

¹¹ Ɛ se dɛà beěe tùonyugbe wan ɛɛ̌ nu ɔ se sìnɛ wɛ̀ nyu mǒ, kɛɛ dɛà sonwɛ lěe tùonyugbe wan mǒ nɛ̀ ni ɔ se sìnɛ wɛ̀ nyu mǒ.”

¹² Tà tǐ gbei sìnʼaa, Ɔɔ mɔ̀ cheěn nyo diaě Ɔ mɔ̀ ǔ gbàla Ɔ wan u je, “Dɛǒ bòɔɔ Nè wlò je ɛ se kɛ Fɛlesǐi wǎn mǒ bo sǐe?”

¹³ È Jùsu tùa u kɛ̀ɛn Ɔ je, “Dodɔ̌ dɛ wùɛà Ně Gbeǐǒ neěe jɔkɛn Ɔ see dɔ̌, Ɔ mi ɛ be ngmɛ̀ɛ bo mǎma Ɔ mǐ ɛ wlò sà.

¹⁴ Tèǒ nì kɔn tè uu dɛ bɛ bɔ̌ a kèjle tùtuɛ, u moo nyopò nae nyo ü dɔɔ. È bo dodɔ nyu bɔ̌ kme ɔɔ bě dodɔ nyu son jleě bǔ ke mi, uu sɔ̌n wùɛǒ u miě bǐtìe wan beba.”

¹⁵ È kě Pitɛ̌ nia Ɔ wan gbògba ɔ je, “Sèsae a wlòmo dɛ dǎtèkpaǒ pòo Fɛlesǐi wǎn je ɛ sɛ̀nʼɛ nynɛ̌.”

¹⁶ È Jùsu tùa u kɛ̀ɛn Ɔ je, “Aa chɛ̀ a sěɛ kɛ tèà Ě boɛɛ le jbe le?

¹⁷ A se kɛ i ji ɛ̈ moo dɛà tùonyugbe dii bɛ̌ beě ɔ wlòmo ɛ nymɛɛ ɔ mǒ ɔ̌ mi ɛ bo poba klě chònu le?

¹⁸ Kɛɛ noǎà ï sonwɛ lěe tùonyugbe wan mǒ, i sonwɛě mǒ ɔɔ wlò jleě, noǎǒ nì ni ɔ se sìnɛ wɛ̀ nyu mǒ klě Nyesoa jǐ kɛn.

¹⁹ Ii tè dɛ kukǔ dlǒ le sìɛnsiɛn klee mnùngma popoɛ klee wlawle nunuɛ klee gblà popoɛ klee jlijlɛ̌ klee sen le tmɔtmɔ̌ plě klee nyu mǒ feflea ii wùɛà i sonwɛě mǒ wlò jleě.

²⁰ Noǎǒ nì ni tùonyugbe ɔ̌ moo se sìnɛ wɛ̀ nyu, kɛɛ ɛ se nyu bɔ se chìa jla bɔ di dɛ keǒ u je ba nuu.”

Kuadakɔ̌ Nynɔɔ Tè Wlò Popoɛ

²¹ Tà Jùsu sɔnaǒo tàǒ mǒ, Ɔ̀ mua lě tùɔn tɛ̀ɛ kɛn ɛ̈ tbɛɛaa deěǒ monoo Taè klee Saedɛ̀n dǐ.

²² È dakɔ̌ǒ moo Kenɛ̀ nù kɔn nynɔ neaě tùɔnʼǒ kɛn, nɔ̀ diaě Ɔ mɔ̀ ɔ̈ pnaěaě jɔ mǒ ɔ je, “Koɔn, klɔ̀ba Dèběsee jlǔu Jǔ, jboǒ wɔle je! Ně nynejuju kǔ sùsu neě ɔ ja, ɛ tùi ɔ sònwɛ chɔɔ!”

²³ Kɛɛ Jùsu seaǒ ɔ wun mɔ̀ kpa ɛ̌ kpala ɛ kpa Ɔɔ mɔ̀ cheěn nyo diaě Ɔ mɔ̀ u je, “Nu nynɔà bɔ sɔnʼǒ ä demǒ ɔ bɔ̌ ä slɛ̀ de naea.”

²⁴ Ii tè kě Jùsu nia nynɔǒ tmɔɔ̌a Ɔ je, “Nyesoa dboǒ lo kělɔ Ǐsòwɛ̌ kwɛɛnʼɛ nyopòà mɔ̀ ü mǎa klě uu kpni kukwǐ slè wòje keà blableǎ mǎa.”

²⁵ È nynɔǒ ɔ diaǒ Ɔ gbàa ɔ̌ kɔlaǒ Ɔ kwne jemǒ bo, kě ɔ dɛ̌a Ɔ je ɔ je, “Koɔnʼò, sɛ̀ɛ leě mǒ!”

²⁶ Kɛɛ Jùsu tùa lɔ kɛ̀ɛn Ɔ je, “Ɛ seǒ le wɛɛn ne keǒ Bo dǔ Ně nyopò ü moo Ǐsòwɛ̌ kwɛɛn uu didi dɛ mǒ Bo tuǔnʼǒ ɛ gbùo jemǒ ü moo kuodakwɛ̌.”

²⁷ È kě nynɔǒ ɔ dɛ̌a Ɔ je ɔ je, “Koɔn, ii teěn nìǒ bòɔ, kɛɛ gbùoǒ jèe i pɛnʼǒ ngmà fuo wɔ̀ɔn bo ǐ di noǎ pɛpleǒ blee chì kpa ämo kwa le.”

²⁸ È kě Jùsu dɛ̌a ɔ kɛ̀ɛn tùtuɛ Ɔ je, “Nynɔ, nè tè wlò popoɛ kun dɔ̌, ii tè keǒ ni ɛɛ jlajlǎ nɛ̀ bɛ moo no keǒò mɔ̀.” Sɔɔnʼaǒ tǐǒ jleě mǒ è nynɔǒ ɔɔ nynejuju nɔ̀ǒ kɔn kwɛ̌ bɔ̌a dɛ.

Jùsu Peana Nyopò Fòfoa

²⁹ Tà Jùsu sɔnaǒo tùɔnʼǒ kɛn mǒ, Ɔ nɛna Jàlalǐi jbǒ wien, Ɔ jǎlaě togbee dlǒ, è Nɔ̀ǒ nea bo.

³⁰ È nyopò fòfoa jalaě Ɔ mɔ̀ bo klɔ̀ɔ nyo klee dodɔ nyo klee kokɔ̌ nyo klee nyopòà see wien boɔboɔ ji plě nyopò fòfoa tùu nù u peana ble keǒ Ɔ be wɔ̀ɔn Ɔ̌ peana u.

³¹ Tà diblɛ̌ǒ u jěaa nyopòà seaa wien boɔboɔ ji u keaa wien le boɛ plě nyopòà mooa kokɔ̌ nyo uu kweǎ bɔ̌aa dɛ klee nyopòà klɔ̀ɔaa bo u keaa nɛ plě nyopòà ü mooa dodɔ nyo u keaa le jě, è i kàea u le wan, è nùǒ pea Ǐsòwɛ̌ kwɛɛnʼɛ Nyesoaa nynɛ̌ le.

Jùsu Nyea Jbɛjluu Taslěwɛɛ Hɛ̀n Didi Dɛ

³² È Jùsu dala Ɔɔ mɔ̀ cheěn nyo Ɔ̌ tmɔɔ̌a nu Ɔ je, “Diblɛ̌à uu wɔle beěě mǒ no, chnɛ̀ jlǒ wěe tanʼà nì u sìnʼàǎ demǒ plě u se dɛ kɔn u mǐi di, Ně jlǎ Bo sàno bɛ ke u ni Bo dbo u de ɛ̈ di ɛɛ numa chlùgbla ɛɛ̌ se u kme keǒ snǔ mɔ̀.”

³³ È kě Ɔɔ mɔ̀ cheěn nyo nia Ɔ wan gbògba u je, “Tà ä wɔ̀le je bä sàǎ kɛ flɔ̌ɔ fòfoa ä miǐ ɛ nyopò wùɛà nye u miǐ di kělɔ tàɔ dě ton bò lɔɔ?”

³⁴ È Ɔ gbàla u wan Ɔ je, “È flɔ̌ɔ kwle tìen tae a blěeě kɛ?” U tùa Lɔ kɛ̀ɛn u je, “Ä blě flɔ̌ɔ kwlee nyiɛta klee mòngmɛ smì klɔkwlě.”

³⁵ Ii tè Ɔ tmɔɔ̌a diblɛ̌ǒ bu nea ble keǒ blǒ mɔ̀

³⁶ Ɔ̌ dǔa flɔ̌ɔ kwlee nyiɛta klee smìǒ mǒ Ɔ̌ pea Ɔɔ Gbeǐ tàto Ɔ̌ klǎla i wan le Ɔ̌ nyea i Ɔɔ mɔ̀ cheěn nyo ǔ plooa i diblɛ̌ǒ měne.

³⁷ Tà nyopò wùɛǒ u diaa dɛ uu kwliǎ jǐaě le, è ɛɛ dɛǒ u seaea Ɔɔ mɔ̀ cheěn nyo bòa ɛ le ɛ̌ jieěaě plɛǎa nyiɛta.

³⁸ È jbɛjluǒ diaa didi dɛǒ u nua taslěwɛɛ hɛ̀n, u sea nyno klee jlǔ slè.

³⁹ Tà Jùsu dboaa diblɛ̌ǒ de, è Ɔ klee Ɔɔ mɔ̀ cheěn nyo beaě blǎgbè wan ǔ mua lě diěǒ moo Mɛdelà jleě mǒ.