Lǔkù 1 - Nyesoaa Kuo Win Jajle

Win Kwlǎ Mǒ Sèsa

¹ Ně nenawai Tiɔfèlɔ, nyopò fòfoa nù tɛ̀n ɛ mǒ keǒ bü chlě noǎ wùɛà kpaa tùɔn kělɔ ä slè.

² U chlě noǎ ï ä wɔ̌nʼɔ ï sɔn lěe nyopò tùu mɔ̀ mǒ ü kɔn chɛ̀ kpaǒ ii jleě mɔ̀ sɔɔnʼě ɛɛ wlò tùla mǒ plě ü mooa Nyesoaa win boɔ nyo.

³ Kàan selǐju Tiɔfèlɔ, ke ɛ toon jleě mǒ bo Ě sloěe jǐ bo Ě chěn imoo noǎǒ sɔɔnʼě ɛɛ wlò tùla mǒ, Ě po ɛ ble keǒ bo chlě li tɛɛ tɛɛ keǒò mɔ̀ ke i nuaa tùɔn kpokpa

⁴ ɛ̈ di ɛɛ numa mì ɛ ji bɛ̌ nu noǎǒ kɔn tè u tmɔɔ̌ mòo bǐ moo kàan tè.

Najiǒpòi Poa Ně Dlǒ Po Jɔ̀ɔ̌nʼɔ Konkɔn Sàe

⁵ Klě tǐǒ kɔn wlòmo Hɛwlǒ kɔnaa Jùdǐa wakǎ win kwa, ɛ kɔna Nyesoaa kpatòa tɔ̀ɔ ɔ̈ kɔn nynɛ̌ mooa Sɛkɛwlaeɔ̌, ɔ kɔnaě kpatòapoo konwǎǒ ü moo Abajà slè. Ɔɔ nynɔ Lesebɛ̌ kɔnaě Ewnɔ̀ ɔ̈ mooa kpatòa ɔɔ jlǔu jlǔ slè ke.

⁶ Uu sɔ̌nʼǒ u mooa jebo siǐn nyo klě Nyesoa jǐ kɛn ǔ tùiaǒ Nyesoaa teteǎ wùɛ ble klee dɛ Ɔ tmɛɛ̌a nuu klě Ɔɔ win wlòmo.

⁷ Lesebɛ̌ kǒaě měne wlò plě uu sɔ̌nʼǒ u wɛ̀aě le, ii tè u sea jlǔ kɔn.

⁸ Chnɛ̀ jlǒ waěe tɛ̀ɛ mɔ̀ Sɛkɛwlaeɔ̌ klee ɔɔ bǐì Nyesoaa kpatòapoo nia uu Nyesoaa konkwa klě Nyesoaa kǎ fòɛ bo keǒ Nyesoa jemǒ.

⁹ È u nua uu blětà dɛ ǔ poa nòkpo, è nòkpo joɛ̌ɛ sàlaě Sɛkɛwlaeɔ̌ keǒ bɔ mua lě Koɔnʼɔ kǎ fòɛǒ bo bɔ mua sonsnǒ noǎa tǎn le po.

¹⁰ È klě tǐǒ kɔn wlòmo ɔ peaa noǎǒ tǎn le, è diblɛ̌ fòfoa ü mooa Jùwɛ nyo nù nynanaǒ plomǒ bo ü boɛaě Nyesoa mɔ̀.

¹¹ È Koɔnʼɔ najiǒpòi nɔ̀ wǒaǒ ɔ mɔ̀ Ɔ̈ nynanaǒ sonsnǒ noǎa kǒngmàǒ ɛɛ dilǎ wakǎ mɔ̀ bo.

¹² Tà ɔ jěa lɔɔ, ɛ̀ kèteeaě ɔ mǒ no fano jǐa ɔ je.

¹³ Kɛɛ kě najiǒpòiǒ ɔ dɛ̌a ɔ je ɔ je, “Sɛkɛwlaeɔ̌, bɔ̌ fano pepeɛ, Nyesoa kme nè bàteaǒ bo je, nè nynɔ Lesebɛ̌ mi jbɛjuju kɔnma, è bò dae ɔɔ nynɛ̌ Jɔ̀ɔ̌n.

¹⁴ Jɔ̀ɔ̌n miì numa nè plɔ mǐ blo mì chǒn le nu, è nyopò fòfoaa plɔ mi bloba keǒ ɔɔ naǎ bɔ kɔn nɔ mɔ̀.

¹⁵ Ɔ miǎ nyefòɛ mooma klě Nyesoa jǐ kɛn. Bɔɔ̌ nɛ̌ nmɔ jakě klee nenǎ noǎa jakě tìi. Tǐǒ jleě ɔ miě ɔɔ naǎ wlòmo bo kɛ̀nma, Ngmà Je Ne Sùsu mi ɔ je jǐba.

¹⁶ Ǐsòwɛ̌ kwɛɛn dɛ fòfoa nù ɔ mi de jaba kělɔ uu Koɔn Nyesoa mɔ̀.

¹⁷ È nɔ̀ miě Koɔn nya kɛnma klě kpě kɛne sùsu mǒ wòje Ilaejɔ̀ ɛ̈ di ɛɛ numa ɔ miǒ jlǔ klee gbeǐpò tàa do po, è nɔ̀ mi seǒ nyu bo tùtuɛ kɔn nyopò tɔ̀n teeba wòje ɛ̈ǒ jebo siǐn nyo kɔnʼɔ, dɛǒ nɛ̀ ɔ mi numa ɔ mǐ u mɔ̀le wɔ̀ keǒ Koɔnʼɔ didiɛ mɔ̀.”

¹⁸ È Sɛkɛwlaeɔ̌ gbàla najiǒpòiǒ wan ɔ je, “È ke Ě miǐ kɛ ɛmo dɛǒ jijiɛ numa ɛ̈ǒ jè mii tùɔn kpaba? Ě wɛ̀ě le plě ně nynɔ wɛ̀ě le ke.”

¹⁹ È najiǒpòiǒ ɔ̀ tùa ɔ kɛ̀ɛn ɔ je, “Mǒà mǒ moo Keblɛ̀, Ě nynaǒ Nyesoa jemǒ bo Ɔ̌ dbo mǒ keǒ kàan tuposàà bo po ɛɛ̀ je.

²⁰ Kɛɛ dɛǒ Ě boɔɔ bo ɛɛ tɛɛ tǐ bǐ nyniǒ ɛ mi tùɔn kpaba kaǒ, ke ɛ toon jleě mǒ bo è see tuposàà Ě ja lěe ɛɛ tè kàan tè po, slè wɔ̀ bò boɔ wien ɛ mǐ ɛ kpa kpa noǎ wùɛ i miǎ tùɔn kpa.”

²¹ È klě tǐǒ wlòmo nyopòǒ nea lěe plomǒ ü feaa Sɛkɛwlaeɔ̌ ì kɛɛnʼa u le wlò keǒ bɔ dia lě tǐ pɛ̀ti taeǒ klě Nyesoaa kǎ fòɛǒ bo sìn.

²² Tà ɔ pěa lɔɔ plomǒ, ɔ slě wɔ̀ bɔ boɔlaě u mɔ̀. Tèǒ nì kɔn tè u jia lɛ ɛ̈ moo ɔ jěa Nyesoaa slèe klě kǎ fòɛǒ bo. Ii tè ɔɔ̌ boɔa tè, kɛɛ ɔ pea kwete le keǒ bɔ tmɔɔ̌a nu.

²³ Tà ɔɔ konkwa ɔ kɔnaa nunuɛ klě kǎ fòɛǒ bo ɛ wɛ̀aa mɔ̀, è nɔ̀ǒ muaě koǔ bo.

²⁴ Tà dɛǒ ɛ sìnʼaa, ɔɔ nynɔ Lesebɛ̌ nea kwlě mǒ ɔ̌ wɛ̌a ɔɔ chɛ̀ klě sòbaii m̀m wlòmo, è kě ɔ dɛ̌a ɔ je,

²⁵ “Klě demǒ bɔɔ̌ tǐ wlòmo ně Koɔn Nɔ̀ nu dɛà keǒǒ mɔ̀. Nɔ̀ mǎǒǒ mɔ̀ Ɔ̈ sà lěě kmɔ̌ɔ tònwe slè.”

Najiǒpòi Dia Lě Mɛwlě Mɔ̀

²⁶ Tà Lesebɛ̌ɛ kwlě kɔnaa sòbaii m̀mɔdo, Nyesoa dboa najiǒpòi Keblɛ̀ɛ doǒ klě diěǒ moo Nǎsòwɛ̌ kɛn ɛ̈ neěe Jàlalǐi wakǎ kɛn.

²⁷ Ɔ dboa lɔ klě nynejuǒ seea jbɛju tè ji mɔ̀ ɔ̈ kɔn jbee nynɛ̌ mooa Jòsɛ̌fo ɔ̈ kɔna lěe klɔ̀ba Dèběsee tùgba slè ɔ kmeaa je. Nynejuǒ ɔɔ nynɛ̌ mooa Mɛwlě.

²⁸ Tà Nyesoaa najiǒpòiǒ ɔ palaě ɔɔ mɔ̀ koǔ bo, kě ɔ dɛ̌a ɔ je, “Ě jɛɛ leè kɛn, Koɔn jěè mǒ nyu chɔɔ, Ɔ neeǒò mɔ̀.”

²⁹ Tà Mɛwlě wɔ̌naa winʼǒ, ɔ̀ɔ wlò sakaea měne jǐ ǐ kɛɛnʼa ɔ wlò le tè kɔn tè ɔ nia bo ɔɔ kɛn jɛɛa.

³⁰ Kɛɛ kě najiǒpòiǒ ɔ dɛ̌a lɔ je ɔ je, “Mɛwlě, bɔ̌ fano pepeɛ, Nyesoaa plɔ bloo loò kɛn.

³¹ Tanàle, mì kwlě mǒ nema mì Jbɛjuju kɔn, è bò tùe Ɔ nynɛ̌ ɛ̈ moo Jùsu.

³² Ɔ miǎ Nyefòɛ mooma, u miǎ Ɔ Ja Tmɔ Nyesoaa Jǔ daeba, Koɔn Nyesoa mi Ɔ Ɔ̀ɔ gbeǐ klɔ̀ba Dèběsee gbèsɛɛ nyema.

³³ Nɔ̀ miǎ Jèkɔ̌poo jlǔu jlǔ win kwa kɔnma tǐ wùɛ mɔ̀, è Ɔɔ deplěe win kwa konkɔn se dlǒ chlɛ̀chlɛ kɔn.”

³⁴ Mɛwlě gbàla najiǒpòiǒ wan ɔ je, “Tà Ě monoǒ jèe nyneju Ě sěɛ jbɛju tè ji, è ke ɛmo dɛ taeà ɛ miǐ kɛ tùɔn kpokpa numa?”

³⁵ È najiǒpòiǒ ɔ tùa ɔ kɛ̀ɛn ɔ je, “Ngmà Je Ne Sùsu Nɛ̀ miěè mǒ diba, Ja Tmɔ Nyesoaa kbě miěè mǒ be. Tèǒ nì kɔn tè ngmà je ne Jijlǎeǒ mìi kɔnma u mi Ɔ Nyesoaa Jǔ daeba.

³⁶ Tanàle, nè kmɔ̌ wǒ nyuà ɔ̈ moo Lesebɛ̌ ɔ mi jbɛjuju kɔnma ke klě ɔɔ dě wɛ̀ tǐ wlòmo. Kàan tè u dɛɛ pnɔ ɔ se jǔ kɔn nynɔ, kɛɛ kwlěǒ ɔ ne mǒo ɛ nu sòbaii m̀mɔdo klě tǐà wlòmo.

³⁷ Tè kɔn tè ɔɔ kwlě mǒ neneɛǒ ɛ wɔ̀le ɛɛ nɛ̀ moo ɛ se dɛ kɔn ɛ̈ Nyesoa slě wɔ̀ Bɔ nuu.”

³⁸ È kě Mɛwlě dɛ̌a ɔ je, “Mǒà Ě moo Koɔn na wien po nyneju, ii tè Ě wɔɔn ɛ kɛn, dɛǒ kɔn tè bòɔ mǒo je bɛ kpa tùɔn kěàǎ jleě mǒ.” È najiǒpòi nɔ̀ǒ sɔnaǒ ɔ mɔ̀ mǒ.

Mɛwlě Mua Lesebɛ̌ Jebo Chèba

³⁹ Tà dɛǒ ɛ sìnʼaa, tǐi doo tǐ jleě Mɛwlě tɛ̌nʼa le ɔ̌ nua jǐ měne ɔ̌ muaě togbei diěǒ wlòmo ɛ̈ nea lěe Jùdǎ dakɔ̌ɔ blǒ wakǎ kɛn.

⁴⁰ Tà ɔ nyniaa, ɔ palaě Sɛkɛwlaeɔ̌ɔ koǔ bo ɔ̌ jɛɛa Lesebɛ̌ kɛn.

⁴¹ Tà Lesebɛ̌ wɔɔ̌na bòo kɛn jɛɛaǒ sosǒ, è jijlǎeǒ neaě ɔɔ wlòmo è nɔ̀ǒ ngmìa le, è Ngmà Je Ne Sùsu jǐa Lesebɛ̌ je,

⁴² è nɔ̀ǒ pnɛ̌a dɛ jleě le ɔ je, “Mɛwlě, Nyesoa poò mɔ̀ ngmna ɛ̌ sìnʼǒ nyno wùɛ mǒ, Jǔǒ mìi kɔnma Nyesoa po Ɔ mɔ̀ ngmna.

⁴³ Mɛ kɔɔ̌n tè ɛmo dɛà ɛ kpɛɛ̌ kɛ tùɔn kěàǎ mɔ̀ ně Koɔnʼɔ naǎ ɔ̌ di mǒo jebo chèba?

⁴⁴ Tǐi doo tǐ jleě tà Ě wɔɔ̌n bò nèe kɛn jɛɛaǒ, è jijlǎeà neɔ mǒo wlòmo è nɔ̀ǒ ngmì le keǒ chǒn sosǒ mɔ̀.

⁴⁵ È ɛ moo plɔɔ bloo dɛ keǒ mò Mɛwlě mɔ̀ keǒ dɛà Nyesoa peeě mòo bò di ɛɛ tè kàan tè po.”

Mɛwlěe Bleble Wlɛ̌

⁴⁶ È kě Mɛwlě dɛ̌a ɔ je,

⁴⁷ “Ně wlò wùɛ bìse le Nyesoa, Ě ni chǒn le. Mɛ̌oǒ joo nɛ̀ moo Nyesoa moo ně Wowa Nyu

⁴⁸ plě Nɔ̀ kɔnʼě ně tè mɔ̀, mǒà moo Ɔɔ na wien po nyneju ɔ̈ɔ̌ jaeě něe chɛ̀ le, è tèe jleě nìà Ě tmɛɛ̌ amo, sɔɔnʼà tǐà jleě mǒ bò muu nya nyopò wùɛ miǐ ngmna kɔn nynɔ daeba.

⁴⁹ Mɛ kɔɔ̌n tèǒ joo nɛ̀ moo kpě kɛne Nyesoa nu noǎ fòe keǒǒ mɔ̀, Ɔɔ nynɛ̌ moo Ngmà Je Neɔ.

⁵⁰ È Ɔ kɔn wɔle je jbojbɛ keǒ nyopòà mɔ̀ ü tùiǒ Ɔɔ bo.

⁵¹ Ɔɔ kpě nì Ɔ̌ ni Ɔ̌ ni noǎ fòe le Ɛɛ jboo noǎ nì moo Ɔ gbɛ̀ nyopòà ja ü jɛɛ̌ě uu chɛ̀ le ü jě lɛɛ ɛ̈ moo uu tè boǎ jǐ

⁵² klee Ɔ flɛ̌ kbě kɛne win kwa kɔn nyo gbèsɛɛ bobo, kɛɛ Ɔ duǐ nyopòà tìeǒ uu chɛ̀ ja jemǒ

⁵³ klee nyopòà sàno nii Ɔ blee uu plɛ keǒ kàan noǎ mɔ̀, kɛɛ nyopòà moo pònpan nyo Ɔ gbɛ̀po u chìa le plě Ɔ̌ tɛ u bo

⁵⁴ plě Ɔ diě Ɔ mǐ Ɔɔ na wien po nyebajle Ǐsòwɛ̌ kwɛɛn mǒ sɛ̀. Tǐ wùɛ mɔ̀ Ɔɔ wɔle je jbojbɛɛ tè beě Ɔ wlò jleě

⁵⁵ keǒ Eblɛ̌hɛ̀mo klee ɔɔ jlǔu jlǔ mɔ̀ wòje ke Ɔ nuaě ɛɛ peea keǒ äa gbeǐpò mɔ̀.”

⁵⁶ È Mɛwlě sìnʼaě Lesebɛ̌ mɔ̀ sòbaii tan plě ɔ̌ mua de klě ɔɔ chɛ̀ɛ tà.

Ně Dlǒ Po Jɔ̀ɔ̌nʼɔ Konkɔn

⁵⁷ Tà tǐ nyniaǒo keǒ Lesebɛ̌ bɔ kmàeaa, ɔ kɔna jbɛjuju.

⁵⁸ Nyopòǒ klee ɔɔ sɔ̌n neaǒo tàa do klee ɔɔ kmɔ̌ wǒ nyo u wɔ̌na ni ɛ̈ moo Nyesoa kɔna wɔle je jbojbɛ keǒ ɔ mɔ̀, è u bea ɔ kɛn u klee ɔ ǔ nia chǒn le.

⁵⁹ Tà jijlǎeǒ ɔ kɔnaa chnɛ̀ jlǒ wěe nnyɛɛ̀, u diaě u mǐa ɔ foeě bɛ̌, è ɔɔ gbeǐ Sɛkɛwlaeɔ̌ɔ nynɛ̌ nɛ̀ u jlɛ̌ bu tùea lɔ.

⁶⁰ Kɛɛ ɔɔ naǎ je, “Òooǒn, ɔɔ nynɛ̌ moo Jɔ̀ɔ̌n.”

⁶¹ È kě u dɛ̌a ɔ je u je, “Kɛɛ ɛmo nynɛ̌ taeǒ ɛ seɔ äa tùgba slè neò.”

⁶² Tà ɔɔ gbeǐ kanaa wan plě ɔ sǔnʼaa, ii tè u pea kwete le ǔ nia jboo dɛ ǔ gbɛ̀a ɔ wan u je, “À nynɛ̌ tae bä dae leě kɛ nè jǔà?”

⁶³ È Sɛkɛwlaeɔ̌ nia kwete ɔ̌ tmɛɛ̌a u bu nyea ɔ kɛn chleě dɛ, è kě ɔ nia ɛ chlechlɛ̌ ɔ je, “Ɔɔ nynɛ̌ moo Jɔ̀ɔ̌n.” Tà nyopò wùɛ jěaa dɛǒ ɔ chlěaa, ì kaenʼa u le wlò.

⁶⁴ Tǐi doo tǐ jleě è Sɛkɛwlaeɔ̌ɔ mɛɛ tùn jlea bo ɔ̌ boɛa wien le de ɔ̌ tùngmaea Nyesoaa nynɛ̌ le popoɛ.

⁶⁵ È nyopò wùɛ klee ɔɔ sɔ̌n neaǒo tàa do è fano beaě u mǒ no, nyopò wùɛǒ ü nea lěe togbei blě kɛn klě Jùdǐa wakǎ kɛn è nì mooa kɛ̀ uu mǒ tmɔ̌ tè.

⁶⁶ Nyu wùɛ jia ɛle ɛ̈ moo Koɔnʼɔ kpě nì neeaǒ jǔǒ mɔ̀, ii tè uu wùɛǒ ü wɔ̌na nii u nɛɛa i wlò kɛne bɛ̌ nu bɔ̌ kunʼa nyu tae ɔ miaa mooma.

Sɛkɛwlaeɔ̌ɔ Bleble Wlɛ̌

⁶⁷ È Jɔ̀ɔ̌nʼɔ gbeǐ Sɛkɛwlaeɔ̌ Ngmà Je Ne Sùsu jǐa lɔ je ɔ̌ sɛ̀a Nyesoaa win wan, kě ɔ dɛ̌a ɔ je,

⁶⁸ “Bìsea keǒ Koɔnʼɔ nynɛ̌ mɔ̀ Ɔ̈ moo Ǐsòwɛ̌ kwɛɛn Nyesoa. Mɛ̌oǒ joo nɛ̀ moo Ɔ diě Ɔɔ nyopò mɔ̀ ɛ̈ di ɛɛ numa Ɔ mǐ u gblǎ.

⁶⁹ Klě Ɔɔ nyebajlo klɔ̀ba Dèběsee tùgba slè klě Ɔ dǔě kbě kɛne Wowa Nyu jemǒ keǒ ä mɔ̀

⁷⁰ wòje ke Ɔ nuaě ɛɛ peea ɛ̈ Ɔ poa Ɔɔ wnɔsàɔpo wan seeaa tǐ jleě

⁷¹ ɛ̈ moo nyopòà ü faen ämoo plě ü jlae ämoo Ɔ mi ä gblàba klě u kwete mǒ.

⁷² È Ɔ peeaě ɛ äa gbeǐpò ke ɛ̈ moo Ɔ mia wɔle je jbojbɛ kɔnma keǒ u mɔ̀, è Ɔɔ ngmà je ne kuo win Ɔ peeaě uu Ɔ sea ii tè snùma mu.

⁷³ Ii tè Ɔ̌ poa Ɔɔ chɛ̀ win kɛne keǒ äa gbeǐ Eblɛ̌hɛ̀mo jemǒ ɛ̈ moo

⁷⁴ Ɔ mi ä gblàba klě äa jlae nyo kwete mǒ ɛ̈ di ɛɛ numa äǎ di fano pe ä mǐ Ɔɔ konkwa nu,

⁷⁵ ä mǐ ngmà je ne, äa kmɔ̌ mǐ mǒ slɛɛ̌ le klě Ɔ jǐ kɛn ke ɛ mii jleě mǒ bo tonma ä mǐi kmɔ̌ ne.

⁷⁶ È keǒ mòà moo něe jǔ mɔ̀, u miì Ja Tmɔ Nyesoaa wnɔsàɔ daeba. Mɛ kɔɔ̌n tèǒ joo nɛ̀ moo mòà mò miě Koɔn nya kɛnma ɔ̈ mi nyopò mɔ̀le wɔ̀ba keǒ Ɔ mɔ̀.

⁷⁷ Mò miǎ Ɔɔ nyopò tmɔɔ̌ma bǔ poǎ Ɔɔ tè kàan tè, uu kpni kukwǐi tè miǎ wlò le poo lo, u miǎ gblàe le klě plɔɔ tu kɛn bo maěa bobo.

⁷⁸ Äa Nyesoa moo Wɔle Je Jbo Nyu Ɔ̌ nu kàan. Tèǒ nì kɔn tè Ɔ nu wowa dɛ ɛ̌ wɔ̀le ɛ keǒ tùonyugbe mɔ̀ Ɔ̌ nu Pepě Bɛ sɔn lě jɔkɛn mǒ Bɛ diɔ ä mɔ̀

⁷⁹ Bɛ fɔɔn nyopòà dlǒ ü neěe kwijlě slè plě ü neěe kokoɛ̌ɛ sùsu bobo. Pepěǒ nɛ̀ mi ä fɛ snǔǒ mɔ̀ naama ɛ̈ miěe ně bo wnawnaa tùɔn kɛn.”

⁸⁰ Tà jǔǒ ɔ keaa kwin, ɔɔ sùsu nea kɛn kbě, ɔ tǐnʼaě kpatekpǎ blǒ kɛn ɛ̌ kpala ɛ kpa ɔ̌ tùngmaea Nyesoaa win boɔboɔ klě klɔ̀ slè klě Ǐsòwɛ̌ kwɛɛn mɔ̀.