Kalesiɛ̌n 6 - Nyesoaa Kuo Win Jajle

Nu Dɛà Monoo Kàan Keǒ Nyopò Wùɛ Mɔ̀

¹ Ně bǐì Tentǎn Jǔu wǎn ane, bɛ̌ nu bo nyu bɔ̌ ke dɛ kukǔ ni bǎ kme ɔ, è amoǒ Nyesoaa Sùsu neěe ja, a poě nyuǒ snǔ mɔ̀le klě ja tìe tǔn mǒ, è ba gbɛ̀ɛ aa chɛ̀ ke aǎ slě měne tèntɛn slè be.

² A sèsɛɛ měne keǒ aa dɛɛ wan le popa slè, dɛǒ nɛ̀ bǎ ke ni, è Tentǎn Jǔu tetěǒ moo ba nonoɛɛ měne nɛ̀ǒ a tùiǒ bo.

³ Bɛ̌ nu nyuà kɔn tè see kun bɔ̌ jě ɛ ɛ̈ moo ɔɔ tè kun nu, ɔ gbee ɔɔ chɛ̀ mǒ no.

⁴ Aa do do a chechlǎ aa chɛ̀ɛ de nu kmɔ̌. Bɛ̌ nu nyu bɔ̌ ke kàan dɛ ni, è ɔ kɔn tè kɔn tè bɔ kunʼu kɛn le, kɛɛ ɔɔ̌ pe ɔɔ chɛ̀ nyu tɔ̀ɔ je.

⁵ Nyu wùɛ kɔnʼě ɔɔ chɛ̀ɛ de nu kmɔ̌ɔ tè mɔ̀ keǒ Nyesoa jemǒ.

⁶ Nyopòà u tee lee Nyesoaa win, bu mǎǒ nyopòǒ tee uu mɔ̀, bu kɔnʼǒ uu konkɔn noǎ wakǎ jleě mǒ.

⁷ Nè gbee dìe mǒ, nyu slě wɔ̀ bɔ boo Nyesoa mǒ. Dɛǒ tùonyu mii dɔ̌ba nɛ̀ ɔ mi chɛ̌nma.

⁸ Bɛ̌ nu bo nyu bɔ̌ ke ɛ le pɛ̀n keǒ bɔ bloo ɔɔ chɛ̀ɛ kpni kukwǐ kmɔ̌ɔ plɔ, è kmɔ̌ sie kokoɛ̌ nɛ̀ ɔ mi jěba. Kɛɛ bɛ̌ nu bɔ̌ ke ɛ le pɛ̀n keǒ bɔ bloo Nyesoaa Sùsuu plɔ, ɔ mi kmɔ̌ sie fònfno jěba ɛ̈ sonwɛ lěe Sùsuǒ Ɛɛ chɛ̀ mɔ̀ mǒ.

⁹ Ii tè a nɛ äa kbě biǐ wɛ̀ le keǒ kàan dɛ nunuɛ mɔ̀. Bɛ̌ nu bä se sea, klě kàan tǐ wlòmo ä mi snǒ sàe dɛ jěba.

¹⁰ Tèǒ nì kɔn tè tǐ wùɛ mɔ̀ bɛ̌ nu bä kɔn fɔ̌, è bä nu kàan dɛ keǒ nyu wùɛ mɔ̀, sɛjesɛ keǒ äa bǐì Tentǎn Jǔu wǎn mɔ̀.

Win Wɔ̀ɔn Popoɛ

¹¹ Ba jě ke ně chlechlě kwetee jlǐ wlě boɛɛ le. Ně chɛ̀à chlě win beà klě a mɔ̀ klě tǐà wlòmo, ɛ sɛ̀n nynɛ̌ tèǒ Ě poěe chněedɛ̌ǒ wlòmo i kma chɔɔ.

¹² Nyopòǒ ü tɛ̀n nɛɛ mǒ keǒ bü kpae amoo kbě ba bɛ̌ɛ foeě, nù moo nyopò ü tee ɛɛ keǒ imo noǎǒ neǒo fǒ kɛn ii tè mɔ̀. È dɛ kɔn tè u ni ɛɛ nɛ̀ moo keǒ buǔ di uu tè mɔ̀ tè keǒ bu po Tentǎn Jǔu kokǒ tè kàan tè keǒ pète bɛ̌ tu jleě.

¹³ Nyopòà bɛ̌ɛ foeǐi chɛ̀ u seǒ Nyesoaa teteǎǒ bo tù kpǎkpǎ, kɛɛ u sòɛ ba bɛ̌ foeǐ ɛ̈ di ɛɛ numa u mǐ wun fòɛ le po ɛ̈ moo nù nu ɛ ǎ nu ɛ.

¹⁴ Kɛɛ dɛɛ do kɔn tè Ě mii wun fòɛ le poba nɛ̀ moo äa Koɔn Jùsu Tentǎn Jǔu kokǒ tè. Nɔ̀ nu ɛ kmɔ̌ɔ noǎ see kɛ̀ǒ ně tè mɔ̀ kɔn plě Ě see kɛ̀ǒ ii tè mɔ̀ kɔn.

¹⁵ Ɛ slě ɛ mɔ̀ kɔn bo bɛ̌ foeě ɔ̀ɔ̌ bo se foeě bɛ̌, kɛɛ sɛje dɛ kɔn tè kmaa nɛ̀ moo Ě moo nyejajlo.

¹⁶ Nyesoa nyopò wùɛ ü sìɛn ɛmoo dɛǒ dlǒ mɔ̀le nɛ bo Nyesoaa ně bo wnawna klee wɔle je jbojbɛ bi muu nya keǒ u mɔ̀.

¹⁷ Ě blě pǎ keàǎ jleě mǒ ɛ̈ tee ɛ ɛ̈ moo Ě nii Jùsu mɔ̀ konkwa, ii tè Ě se sòa nyu wùɛ bɔ tùu kɛ̀ɛ̌ feanfeǒ.

¹⁸ Ně bǐì Tentǎn Jǔu wǎn ane, nɛ äa Koɔn Jùsu Tentǎn Jǔu wlòo jlajlǎ dɛ ɛ̈ɛ̌ sà Ɔɔ wlò kǔ mǒ bɛ muu nya keǒ a mɔ̀, kě bɛ ne.