Jɔ̀ɔ̌n 6 - Nyesoaa Kuo Win Jajle

Jùsu Nyea Jbɛjluu Taslěwɛɛ M̀m Didi Dɛ

¹ Tà dɛǒ ɛ sìnʼaa, è Jùsu bɛ̌a Jàlalǐi jbǒ tìe ɛ̈ u dɛɛ Tabawlìa jbǒ ke.

² Nyopò fòfoa jěa wlòlekaen noǎ Ɔ niaa keǒ kmakma nyo jleě mǒ no, ii tè u nɛa Ɔ de.

³ È Jùsu klee Ɔɔ mɔ̀ cheěn nyo jǎlaě togbee dlǒ ǔ nea bo.

⁴ È Jùwɛ nyoo Dlǒ Mǒ Sìin Didi Dɛɛ de ngmnengmnɛ̌ɛ tǐ mǎna bo je.

⁵ Tà Jùsu tanaa le, è Ɔ jěa nyopò fòfoa ǔ diaě Ɔ mɔ̀. È Ɔ gbàla Felɔ̌ wan Ɔ je, “Tà ä wɔ̀le je bä tɔ̀ɔ̌n kɛ flɔ̌ɔ keǒ nyopòǒ mɔ̀ u miǐ di?”

⁶ Jùsu jia dɛ Ɔ wɛ̀aa mɔ̀ Bɔ nuaa ne, tèǒ nì kɔn tè Ɔ gbàla dɛǒ wan keǒ Bɔ tbalaě Felɔ̌ bo.

⁷ Felɔ̌ tùa Ɔ kɛ̀ɛn ɔ je, “Baǎje nyuu sòbaii nnyɛɛ̀ snǒ sàe dɛɛ chɛ̀ bä plo ɛ bäǎ tɔ̀n flɔ̌ɔ bǔ plo ɛ kɔflee chɛ̀ kě ɛ̌ se tba.”

⁸ È Jùsuu mɔ̀ cheěn nyu tɔ̀ɔ ɔ̈ moo Saemɔ̌ Pitɛ̌ɛ mamǔ jbɛju Andlǔ, kě ɔ dɛ̌a ɔ je,

⁹ “Jbɛju bɔlo gbe tɔ̀ɔà nynaà tàa bo, ɔ blě flɔ̌ɔ kwlee m̀m klee smì klɔkwlěe sɔ̌n, kɛɛ bo jě kàan dɛ tae i mi kɛɛ numa keǒ nyopòà tìn bòo kɛn le mɔ̀?”

¹⁰ È Jùsu tùa u kɛ̀ɛn Ɔ je, “A nu ɛ bu ne ble.” Nenanyo fòfoa neaǒ ɛmo togbeeǒ dlǒ keǒ bu nea kɛn ble. È uu wùɛ nùǒ nea ble, jà jbɛjlu ü blɛɛa taslěwɛɛ m̀m mɔ̀.

¹¹ È Jùsu dǔa flɔ̌ɔǒ mǒ Ɔ̌ pea Ɔɔ Gbeǐ tàto keǒ ɛ mɔ̀ Ɔ̌ plooa nyopòǒ neaa ble měne ke u nia nɛɛ jlajlǎ, dɛɛ doǒ nɛ̀ Ɔ nua smìǒ mǒ ke.

¹² Tà nyopò wùɛ u diaa dɛ u jǐaa kwliǎ le, è Jùsu tmɔɔ̌a Ɔɔ mɔ̀ cheěn nyo Ɔ je, “Noǎ wùɛ u seae lee a bò i le, ii dɛ ɛɛ̌ wlɛ bo.”

¹³ Ii tè ǔ bòa flɔ̌ɔ peěnʼǒ u seaea le ï sɔnaěe flɔ̌ɔ kwlee m̀mǒ mǒ. È i jiěaě plɛǎa pù tùo sɔ̌n.

¹⁴ Tà nyopòǒ u jěaa wlòlekaen dɛǒ Ɔ nuaa, è dɛà nɛ̀ u tùngmaea boboɛ u je, “Nyuà tàà Ɔ wɔ̀le je Bɔ moo Nyesoaa Wnɔsàɔ Ɔ̈ kɔn Bɔ dia lɔɔ kmɔ̌ mɔ̀.”

¹⁵ Jùsu jia ɛle ɛ̈ moo u jlɛ̌ bu dia lě u mǐa Ɔ kbě kpae le u mǐa Lɔ uu Klɔ̀ba dɛ mǒ po, ii tè Ɔ sɔnaě tàě mǒ Ɔ̌ muaě togbei blěǒ kɛn Ɔɔ do.

Jùsu Nana Ně Kɛn

¹⁶ È klě wìtika wlòmo Jùsuu mɔ̀ cheěn nyo nùǒ tèea je ü muaě jbǒ wien.

¹⁷ È tà kwijlě keaa be plě Jùsu sěɛɛ̌la jèe de di kělɔ u mɔ̀, è nùǒ beaě blǎgbè chěnchaě wan ü tùngmaea ně tìe bebɛ̌ ü miiaě Kapanìa dǐa.

¹⁸ È pìpia nɛ̀ tùngmaea le didiɛ, è něǒ ɛ nymiaě le kɛn.

¹⁹ Tà u bliaa bli u nynia lěe tà pɛ̀tu klě ně slè, è u jěa Jùsu Ɔ̌ nɛa ně kɛn Ɔ̌ diaě blǎgbèǒ jǐ mǒ, è uu wùɛ nùǒ kètekee bea wan bo.

²⁰ Kɛɛ kě Jùsu dɛ̌a u je Ɔ je, “Mǒà, a bɔ̌ fano pepeɛ!”

²¹ Uu wùɛ u wɔɔnʼa ɛ kɛn keǒ Bɔ diaě u mɔ̀ blǎgbè wlòmo. Tǐi doo tǐ jleě tà ɛmo dɛǒ ɛ sìnʼaa, è blǎgbè nɛ̀ǒ nyniaǒ kponkpǒ klě tà u mia lěe.

Jùsu Wǒ Je Kou

²² Tà chnɛ̀ tɛ̀ɛ gbàlaa le, diblɛ̌ǒ u sia lěe klě jbǒǒ ɛɛ wakǎ tɛ̀ɛǒ mɔ̀ u jěa lɛ ɛ̈ moo blǎgbèe do nɛ̀ neaǒ tàǒ, è Jùsu klee Ɔɔ mɔ̀ cheěn nyo seaě ɛ wan be, kɛɛ uu do nù mua, Ɔ seaě u mɔ̀ ne.

²³ È blǎgbèa tìi sɔna diěǒ moo Tabawlìa mǒ nì bea kpǒ je keǒ tàǒ Jùsu peeaě Nyesoa tàto keǒ flɔ̌ɔ mɔ̀ Ɔ̌ nyea nɛɛ nyopò ǔ dia lɛɛ.

²⁴ Ii tè tà diblɛ̌ǒ u jěa lɛɛ ɛ̈ moo, “Jùsu klee Ɔɔ mɔ̀ cheěn nyo mu nuò,” è nùǒ beaě blǎgbèaǒ wlòmo ǔ muaě diěǒ moo Kapanìa kɛn ǔ pɛ̀na Ɔ le.

²⁵ Tà u jɛɛaě Ɔɔ klě jbǒǒ ɛɛ wakǎ tɛ̀ɛǒ mɔ̀, è u gbàla Ɔ wan u je, “Tee Nyu, è tǐ tae nynì niǐ kɛà tàà mǒ?”

²⁶ Jùsu tùa u kɛ̀ɛn Ɔ je, “Kàan tèà Ě boɛ a je, dɛ kɔn tè a pɛ̀n Mǒo le nɛ̀ moo a di flɔ̌ɔ fòfoa ǎ jǐ kwlě, nɛ̀ se wlòlekaen dɛà a jěe ɛɛ tè.

²⁷ Aǎ ni didi dɛà ɛ̈ mii jǐ le nymima ɛɛ konkwa, kɛɛ a nu Didi Dɛà nyee nyu kmɔ̌ sie fònfnoo konkwa, nɛ̀ Jbɛjuu Jǔà Ɔ mi a nyema. Mɛ̌oǒ joo nɛ̀ moo Ɔɔ Gbeǐ Nyesoa poo ɛ kɛn kòo keǒ Ɔ mɔ̀.”

²⁸ Ii tè u gbàla Ɔ wan u je, “Mɛ bä nuǔ kɛ ɛ̈ monoǒ Nyesoaa konkwa?”

²⁹ È Jùsu tùa u kɛ̀ɛn Ɔ je, “Nyesoaa konkwa Ɔ jlɛ̌ ba nuu nɛ̀ moo ba po Nyuà Ɔ dboo kělɔ a mɔ̀ Ɔɔ tè kàan tè.”

³⁰ Ii tè u gbɛ̀a Ɔ wan u je, “Bä jě wlòlekaen dɛ tae mì kɛɛ numa ɛ̈ bä jěe ä mǐ Nèe tè kàan tè po? Mɛ mìǐ kɛ numa?

³¹ Äa gbeǐpò dia digbaǐ klě kpatekpǎ blǒ kɛn wòje ke u nu ɛɛ chlechlɛ̌ klě Nyesoaa win wlòmo ɛ̈ moo, ‘Nyesoa nyea u digbaǐ ï sonwɛa lěe jɔkɛn mǒ.’ ” (Ps 78.24)

³² È kě Jùsu dɛ̌a u je Ɔ je, “Kàan tèà Ě boɛ a je, Mɔ̀sě sea aa gbeǐpò kàan digbaǐ nye ï sɔna lěe jɔkɛn mǒ, kɛɛ Ně Gbeǐ Nɔ̀ nye a kàan Kouà Ɛ̈ sɔn lěe jɔkɛn mǒ.

³³ Nyesoaa Kou Nɛ̀ moo Nyuà Ɔ̈ sɔn lěe jɔkɛn mǒ Ɔ̈ nye nee kmɔ̌ sie fònfno keǒ nyopò wùɛ mɔ̀.”

³⁴ È kě u dɛ̌a Ɔ je u je, “Koɔn, nye ä Kouǒ tǐ wùɛ mɔ̀ Ɛ̈ kɔn tè bòɔɔ.”

³⁵ È kě Jùsu dɛ̌a u je Ɔ je, “Mǒà Mǒ moo Kou Ɛ̈ nyee nyopò kmɔ̌ sie fònfno, nyu wùɛ ɔ̈ miɔ Mǒo mɔ̀ diba ɔ̈ mi Něe tè kàan tè poba, sàno klee nenǎ to se ɔ numa mu de.

³⁶ Kɛɛ kě Ě dǎa amo je de ɛ̈ moo, a jěě le, kɛɛ aǎ poǒ jè Ně tè kàan tè.

³⁷ Nyu wùɛ Ně Gbeǐ mi Mǒo nyema ɔ miɔɔ̌ mɔ̀ diba. È Ě seǎ nyu wùɛ mɔ̀le plù kpe ɔ̈ miɔ Mǒo mɔ̀ diba.

³⁸ Mɛ̌oǒ joo nɛ̀ moo Ě slě jɔkɛn mǒ sɔn keǒ Bo nu Ně chɛ̀ɛ kɛn wɔɔn dɛ, kɛɛ keǒ Bo nu Nyesoaà dbo Mǒo Ɔɔ dɛ Ɔ jlɛ̌.

³⁹ Nyesoaà dbo Mǒo Ɔ se jlǎ Bo mǎ nyu wùɛ Ɔ nye Mǒo, kɛɛ klě demǒ bɔɔ̌ chnɛ̀ jlǒ waě wlòmo Ɔ jlɛ̌ Bo dǔǎ u jemǒ Bo nyeǎ u kmɔ̌ sie fònfno.

⁴⁰ Kòo, Ně Gbeǐ jlɛ̌ nyu wùɛ bɔ kɔn kmɔ̌ sie fònfno ɔ̈ jěe Jbɛjuu Jǔà plě ɔ̈ po Ɔɔ tè kàan tè, è klě demǒ bɔɔ̌ chnɛ̀ jlǒ waěǒ wlòmo Ɔ jlɛ̌ Mǒà Bo dǔǎ u jemǒ Bo sàlaě u kǒla mǒ.”

⁴¹ Tà Jùwɛ nyo wɔ̌naa tèǒ, è nùǒ boboɛɛa wan le. Mɛ̌oǒ joo nɛ̀ moo Jùsu je Ɔ moo Kou Ɛ̈ sɔnaě jɔkɛn mǒ.

⁴² Ii tè u gbògbɛɛa wan le u je, “Ɛ se kɛ Jùsuà Ɔ̈ moo Jòsɛ̌foo Jǔ le? Ä se kɛ Ɔɔ naǎ klee gbeǐ ji le? È ke Ɔ wɔ̀ je Bɔ nuǔ kɛ ämo tmɔɔ̌a ɛ̈ moo Ɔ sɔnʼě mǒ jɔkɛn?”

⁴³ È kě Jùsu dɛ̌a u je Ɔ je, “A bɔ̌ wan le boboɔɔa klě aa chɛ̀ slè.

⁴⁴ Nyu wùɛ nɔ̀ slě wɔ̀ bɔ diɔɔ̌ mɔ̀ ɛ̀ sìnʼǒ Ně Gbeǐà dbo Mǒo Nɔ̀ miě ɔɔ̌ mɔ̀ jaba, è klě demǒ bɔɔ̌ chnɛ̀ jlǒ waěǒ wlòmo Ě miǎ ɔmo nyuǒ jemǒ dǔba ɔ miǎě kǒla mǒ sɔn.

⁴⁵ Nyesoaa wnɔsàɔpo chlěa ɛle seea tǐ jleě u je, ‘Nyesoa Nɔ̀ mi nyopò wùɛ teeba.’ (Is 54.13) Ii tè nyu wùɛ ɔ̈ mii Gbeǐi win wɔ̌nma ɔ̈ mi Ɔ mɔ̀ cheěnma ɔ miɔɔ̌ mɔ̀ diba.

⁴⁶ Ɛmoǒ ɛ se ɛ nynɛ̌ sɛ̀n ɛ̈ moo nyu wùɛ nɔ̀ jě Ně Gbeǐ, ɛ̀ sìnʼǒ Mǒà sɔnʼě Ɔɔ mɔ̀ mǒ Mǒ jě Lɔ.

⁴⁷ È kàan tè nìà Ě boɛ a je, nyu wùɛ ɔ̈ po Něe tè kàan tè ɔ kɔn kmɔ̌ sie fònfno.

⁴⁸ Mǒà Mǒ moo Kou Ɛ̈ nyee nyu kmɔ̌ sie fònfno.

⁴⁹ Aa gbeǐpò dia digbaǐ klě kpatekpǎ blǒ kɛn, kɛɛ u kǒa le kaǒ.

⁵⁰ Kɛɛ Mǒ moo Kou Ɛ̈ sɔn lěe jɔkɛn mǒ Mǒà ɛ̈ di ɛɛ numa nyu wùɛ ɔ̈ wɔ̀le je bɔ di Ɛɛ ɔɔ̌ di kǒ.

⁵¹ Mǒ moo Kou Ɛ̈ sɔn lěe jɔkɛn mǒ Ɛ̈ nyee nyopò fònfno. Nyu wùɛ ɔ̈ mi Ɛɛ diba ɔ mi kmɔ̌ nema tǐ wùɛ mɔ̀. Ně fǒà nɛ̀ moo kou Ě mi nyema ɛ̈ di ɛɛ numa nyopòà neɔ kmɔ̌ɔ mɔ̀ u mǐ kmɔ̌ sie fònfno kɔn.”

Nyopò Fòfoa Sɔnaě Jùsu Demǒ

⁵² Jùwɛ nyoo je si nyo chɛtlǐia klě uu chɛ̀ slè, kě u dɛ̌a u je, “Ke Jùsu wɔ̀ je Bɔ nuǔ kɛ Ɔɔ fǒ ämo nyenyeɛ ä miǐ ɛ di?”

⁵³ È kě Jùsu dɛ̌a u je Ɔ je, “Kàan tèà Ě boɛ a je, ɛ̀ sìnʼǒ ba di Jbɛjuu Jǔà Ɔɔ fǒ ba nǎ Ɔɔ nymɔ, nɛ̀ bɛ̌ se, a se fònfno kɔnma mu klě aa chɛ̀ mǒ.

⁵⁴ Kɛɛ nyu wùɛ ɔ̈ mi Něe fǒ diba plě ɔ̈ mi Něe nymɔ nǎma ɔ kɔn kmɔ̌ siee fònfno plě klě demǒ bɔɔ̌ chnɛ̀ jlǒ waěǒ wlòmo Ě miǎ ɔ jemǒ dǔba ɔ miǎě kǒla mǒ sɔn.

⁵⁵ Ke ɛ mii jleě mǒ bo tonma Ně fǒà nɛ̀ moo kàan didi dɛ plě Ně nymɔà nɛ̀ moo kàan nenǎ dɛ,

⁵⁶ nyu wùɛ ɔ̈ mi Něe fǒ diba plě ɔ̈ mi Něe nymɔ nǎma ɔ miěě mǒ nema plě Ě miě ɔ mǒ ne.

⁵⁷ Keà ɛ nuu Ně Kmɔ̌ Ne Gbeǐ dbo Mǒo plě Ě nee kmɔ̌ keǒ Ɔɔ tè mɔ̀, dɛɛ doǒ nɛ̀ ɛ mono, nyu wùɛ ɔ̈ mi Mǒo diba ɔ mi kmɔ̌ nema keǒ Ně tè mɔ̀.

⁵⁸ Ɛmo Kouà Ɛ̈ sɔn lěe jɔkɛn mǒ Nɛ̀à. Ɛ se digbaǐ taeǒ aa gbeǐpò diaa ǔ kǒaa, kɛɛ nyu wùɛ ɔ̈ mi Ɛmoo Kouà diba ɔ mi kmɔ̌ nema tǐ wùɛ mɔ̀.”

⁵⁹ Tà Jùsu keaa nyopò tee le klě diěǒ moo Kapanìa kɛn klě Jùwɛ nyoo Nyesoa koǔ bo, kě Ɔ boɛa imo tè wùɛǒ.

⁶⁰ Tà Ɔɔ mɔ̀ na nyo fòfoa wɔ̌na imoo tèǒ Ɔ boɔlaa, kě u dɛ̌a u je, “Teea taeà ɛ jakǎ wan! È mɔ wɔ̀le je bɔ poǒ kɛ dɛǒ nɔkǔ jebo?”

⁶¹ Tà Jùsu jia lɛɛ ɛ̈ moo ɛmo dɛǒ ɛ nia Ɔɔ mɔ̀ na nyo ǔ boboɛɛa wan leò, è kě Ɔ dɛ̌a u je Ɔ je, “Imo winʼà i snǎ kɛ a lee?

⁶² È bɛ̌ nu bǎ jě Jbɛjuu Jǔà Bɔ̌ mu kɛ jɔkɛn de klě tà Ɔ ne pnɔ lěe lèe? Deě plě a mǐ Ně tè kàan tè po?

⁶³ È Nyuà Ɔ̈ nyee tùonyopo kmɔ̌ sie fònfno Nɔ̀ moo Nyesoaa Ngmà Je Ne Sùsu, kɛɛ tùonyugbe kbě se dɛ kɔn bi nuu keǒ ɛ jleě mǒ. Winʼà Ě tmɛɛ̌ amoo nì Sùsu ni Ɛ̌ nye nyopò fònfno.

⁶⁴ È aa tìe tùu aǎ po Ně tè kàan tè kaǒ.” È tè kɔn tè Jùsu boɛaa tèà nɛ̀ moo Ɔ jia ɛle ɛ̈ moo sɔɔnʼě ɛɛ wlò tùla mǒ nyopò tùu sea Ɔɔ tè kàan tè poba mu plě nyu tɔ̀ɔ miaě Ɔ bo demǒ sàba.

⁶⁵ È Jùsu kpɛɛa Ɔɔ win nya Ɔ je, “Ě tmɔɔ̌a a ne nyane tà tè kɔn tè nyopò tùu se Něe tè kàan tè poba mu. Nyu wùɛ slě wɔ̀ bɔ diɔɔ̌ mɔ̀, ɛ̀ sìnʼǒ Ně Gbeǐ Bɔ̌ nye ɔ kpě plě.”

⁶⁶ Keǒ dɛǒ u klee Ɔ̀ɔ sɔ̌n popooaě le ɛɛ tè mɔ̀, Ɔɔ mɔ̀ na nyo fòfoa muua de klě uu kmɔ̌ dakǎ u neea pnɔɔ kmɔ̌ slè, u sea kɛ̀ de mu klě Ɔ mɔ̀.

⁶⁷ È Jùsu gbàla Ɔɔ mɔ̀ cheěn nyoo pù tùo sɔ̌nʼǒ wan Ɔ je, “Deě ke tae ɛ nuǔ keǒ a mɔ̀? Deě a jlɛ̌ ba mu ke?”

⁶⁸ È Saemɔ̌ Pitɛ̌ tùa Ɔ kɛ̀ɛn ɔ je, “Koɔn, mɔ ä kɔɔ̌n kɛ ä miě mɔ̀ muma? Nè winʼà nì blě kmɔ̌ sie fònfno.

⁶⁹ Tèǒ nì kɔn tè ä po Nè tè kàan tè plě ä ji ɛ ɛ̈ moo Mò moo Ngmà Je Ne Nyu Ɔ̈ sɔnʼěe Nyesoa mɔ̀ mǒ.”

⁷⁰ È kě Jùsu dɛ̌a u je Ɔ je, “Dɛ̌ɛ̀ Mǒà Mǒ sàǒ aa tàii pù tùo sɔ̌nʼàò? Aa nyuu do moo kǔ.”

⁷¹ Ɛ mooa Jùdǎse Ɔ̌ sɛ̀nʼa ɔ nynɛ̌ ɔ̈ mooaa Saemɔ̌ Esekalìaa jbɛjuju. Kàan tè ɔ mooa tàii pù tùo sɔ̌nʼǒ u nyuu do, kɛɛ ɛɛ tǐ konwaěa le keǒ bɔ sàlaě Jùsu bo demǒ.