Hiblǔ 5 - Nyesoaa Kuo Win Jajle

¹ Nyesoaa bodiɔ wùɛ klě ɔɔ bǐì slè klě u tɛnʼě le ǔ tbɛ ɔ keǒ bɔ nynaǒ ɔɔ nyopò pènmo bo keǒ Nyesoa jemǒ klee bɔ nye nyenye noǎ klee bɔ pie chɔ̀no keǒ uu kpni kukwǐ mɔ̀.

² Ɔ wɔ̀le ɛle keǒ bɔ jě nyopò wɔle je ü seǒo Nyesoaa tè dɛ kɛn ji klee nyopòǒ ü sonwɛǒ ɔɔ demǒ ü bee kenkan snǔ wan. Dɛ ɛ nuu nɛ̀ moo ɔɔ chɛ̀ǒ ɔ mɛ̌ kàan dɛɛ snǔ nu.

³ Dɛǒ nɛ̀ kɔn tè ɔ pie chɔ̀no keǒ Nyesoa jemǒ keǒ ɔɔ nyopòo tè mɔ̀ klee ɔɔ chɛ̀ɛ tè.

⁴ Nyuu chɛ̀ ɔɔ̌ tba bo tùtuɛɛ klàǒ keǒ bɔ moo bodiɔ, kɛɛ Nyesoa Nɔ̀ dɛ lɔ wòje keǒ Ɔ nuaa Ewnɔ̀ deda seela tǐ jleě.

⁵ Dɛɛ doǒ nɛ̀ ɛ mono, Tentǎn Jǔu chɛ̀ se bo tùtuɛ klàǒ tba keǒ Bɔ moo Bodiɔ, kɛɛ Nyesoa Nɔ̀ dǎla bò Ɔ je, “Mò moo Ně Jǔ, Mǒ moo Gbèǐ kekɛɛà.” (Ps 2.7)

⁶ Kě Nyesoa dǎla Jùsu je ke klě Ɔɔ winʼi wakǎ tɛ̀ɛ mɔ̀ ɛ̈ moo, “Mò moo Bodiɔ ke ɛ mii jleě mǒ bo tonma wòje Mɛchesèda.” (Ps 110.4)

⁷ Klě Jùsuu kmɔ̌ ne tǐ wlòmo Ɔ jɛɛ̌aě win Ɔ̌ pnɛ̌a le Ɔ̌ boɛaě Nyesoa mɔ̀ Ɔ̌ gbɛ̀ɛa Ɔ dɛ wan Ɔ̈ wɔ̀laěe je Bɔ̈ gblàla Ɔɔ klě kokoɛ̌ kwete mǒ. Ɔ tùiaǒ Nyesoa bo, ii tè Nyesoa wɔ̌na Ɔɔ win ni.

⁸ Kàan tè Ɔ moo Nyesoaa Jǔ, noǎǒ Ɔ jěa lěe sònwɛ kwete mǒ nì nua nɛ Ɔ̌ chěnʼa lɛ keǒ Bɔ tùaǒ Nyesoa bo.

⁹ È ke ɛ toon jleě mǒ bo Jùsu snǎna lěe mɔ̀le kpǎkpǎ, Nɔ̀ moo kmɔ̌ sie wowa dɛɛ Mǎ keǒ nyu wùɛ mɔ̀ ɔ̈ tùiǒo Nyesoa bo.

¹⁰ Nyesoa Nɔ̀ tbala Jùsu keǒ Bɔ mooa Bodiɔ wòje keǒ Mɛchesèdaa ka neaa je.

Aa Nyesoaa Tè Le Jbojbɛ Bɛ Bebee Kɛn Le

¹¹ Ä kɔn dɛ fòfoa bä boɔǒ ɛmo dɛà kɛn, kɛɛ ɛ moo wan jakǎ dɛ keǒ nyu bɔ sèsae ɛ kɛn le. Mɛ̌oǒ joo nɛ̀ moo a se le wlewlě keǒ ba jbo tè le.

¹² Klě tǐà ä neěe wlòmoo chɛ̀ a blɛɛ je ba monoo tee nyo keǒ Nyesoaa winʼà mɔ̀, kɛɛ a sòɛɛ̌ jè nyu bɔ tee a kàan dɛà ɛ̈ sonwɛ lěe Nyesoaa win wlòmo ɛ̈ see mǒ kma. A blɛɛ je ba kun klě winʼǒ mǒ wòje nyefòapo ü dii digbaǐ jakě, kɛɛ a wǒ je jijlǎi ü sòɛɛ̌ jè uu naǎpòo nyia ně.

¹³ Nyu wùɛ ɔ̈ nyɛɛ̌ jèe nyii ɔ moo jǔ, ii tè ɔɔ̌ jbo kenkan dɛ klee mǒ slɛɛ̌ dɛ le.

¹⁴ Digbaǐ jakě kɔnʼǒ kunkun nyo mɔ̀ ü u tee lee bü jii dɛ neǒo kàan klee kukǔ slè.