Flepiɛ̌n 1 - Nyesoaa Kuo Win Jajle

Win Kwlǎ Mǒ Sèsa

¹ Mǒ Pɔ̀ɔ̌ klee Timɛtěà chlě chněedɛ̌à ü moo Tentǎn Jǔ Jùsuu nyebajle, ä chleě amo Nyesoa nyo wùɛ mɔ̀ ü klee Tentǎn Jǔ Jùsu monoo dɛɛ do ü neěe dě fòɛǒ monoo Flepà wlòmo, jà uu Nyesoaa tè boɔ nyo klee nyopò mǎ uu dbo.

² Nɛ bo Nyesoa Ɔ̈ moo äle Gbeǐ klee Jùsu Tentǎn Jǔ Ɔ̈ moo äle Koɔn Uu wlòo jlajlǎ dɛ ɛ̈ɛ̌ sà Uu wlò kǔ mǒ klee ně bo wnawna keǒ a mɔ̀ bi muu nya.

Ě Bɛ̀teeǒ Aa Tà

³ Tǐ wùɛ mɔ̀ aa tè bǐ beeě wlòmo, Ě pe ně Nyesoa tàto.

⁴ È tǐ wùɛ mɔ̀ bo keǒ aa tà bɛ̀tee le, ɛ jɛ lěě chǒn wlò jleě.

⁵ Mɛ kɔɔ̌n tèǒ joo nɛ̀ moo sɔɔnʼě chnɛ̀ jlǒ waěǒ a mooa Tentǎn Jǔu wǎn jleě mǒ bò jɛ tǐà, amoà amo mɛ̌ǒǒ mɔ̀ ü pe Nyesoaa kàan tuposàà nyopò tùu je.

⁶ Ii tè Ě kuun ɛ je wlò ɛ̈ moo Nyesoaǒ Ɔ̈ tùaa kàan konkwaǒ wlò klě a slè Nɔ̀ mi ɛ nya kpaeba ɛ mǐ ɛ kpa kpa ɛ miǎ mɔ̀ wɛ̀ keǒ chnɛ̀ jlǒ waěǒ Tentǎn Jǔ Jùsu miǎa de jaba mɔ̀.

⁷ Baǎje mǒ poo wùlo ɔ̀ɔ̌ mǒ se wùlo poo lo, Ě wɛ̀ɛn kàan tuposàà ɛɛ tè kɛn klee Ě pee ɛ kòo kɛn keǒ nyopò tùu mɔ̀, ɛ wɛɛnʼǒ le keǒ bo nu chǒn keǒ aa tè mɔ̀. Mɛ̌oǒ joo nɛ̀ moo Ě jě ɛ ɛ̈ moo aa wùɛà a klee mǒo sɔ̌n ä moo mɔ̀niapo keǒ konkwa taeà Nyesoa nye mǒo ɛɛ nunuɛ mɔ̀.

⁸ Nyesoa ji ɛle ɛ̈ moo dɛà Ě boɛɛ ɛ moo kàan tè keǒ bo dǎ bò ɛ̈ moo aa pnǒ niǐ ni plě keǒ Tentǎn Jǔ Jùsu nu amoo mǒ noɛɛa kě Ě nu a mǒ noɛɛa.

⁹ Ě bɛ̀te Nyesoa a mǐ měne nonoɛɛ ne ɛ mǐ kɛn le bebee le klee a mǐ dɛǒ monoo kàan dɛ ji plě klee a mǐ tè tù klě mǒ slɛɛ̌ tǔn wlòmo kpǎkpǎ.

¹⁰ È ba wɔ̀ě ɛ keǒ ba tba kàan noǎǒ a miǒ jleě měne nunuuma. Dɛǒ nɛ̀ mi a mǒ sɛ̀ɛba a miě mɔ̀le snǎ klee aǎ di tè jɛɛa kɔn keǒ chnɛ̀ jlǒ waěǒ Tentǎn Jǔ miǎa de diba mɔ̀

¹¹ klee a mǐ mǒ slɛɛ̌ dɛ nu ɛ̈à Tentǎn Jǔ Jùsu nu amoo a wɔ̀le ba nuu ɛ̈ di ɛɛ numa Nyesoa mǐ de bìsee le klee Ɔɔ tè mǒ jǐ boaě le.

Pɔ̀ɔ̌ Boɛɛa Tentǎn Jǔu Tè Kɛn

¹² Ně bǐì Tentǎn Jǔu wǎn ane, Ě jlɛ̌ ba ji ɛ ɛ̈ moo noǎ kukwǐà kpaa tùɔn kěàǎ jleě mǒ sɛjesɛ nì mǎǒ keǒ bï gbɛ̀tɛɛ kàan tuposàà le,

¹³ dɛǒ nɛ̀ nu ɛ nyopò wùɛ ü neɔɔ klɔ̀ba kǎ fòɛ bo klee nyopò tùu ǔ ji ɛ ɛ̈ moo Ě poo wùlo keǒ tà Ě pee tuposàà ɛ̈ kwɛɛǒo Tentǎn Jǔ jleě mǒ bo.

¹⁴ È de äa bǐì Tentǎn Jǔu wǎn fòfoa ü jě mǒo Ě neɔɔ wùlo u kɔn wlò kpaea klě Koɔn mǒ, bǔ ke Nyesoaa win boɛ u kɔn kpenkpɛ uǔ pe fano.

¹⁵ I moo kàan tè, tèà kɔn tè nyopòo tìe pee tuposàà kwɛɛǒo Tentǎn Jǔ jleě mǒ bo nɛ̀ moo u ni chea plě u klee nyopò tùu kpɛǒ ɛ le u mi blala mǒ, kɛɛ ɛ kɔn nyopò tùu pee tuposàǒ keǒ uu kàan wlò jleě.

¹⁶ Nyopòǒ noɛɛ nee Nyesoa mǒ u ji ɛle ɛ̈ moo tèà kɔn tè Ě neɔɔ wùloɔ nɛ̀ moo keǒ bo wɔ̀ɔn tuposàà ɛɛ tè kɛn.

¹⁷ Nyopòǒ ü see Tentǎn Jǔu wǎn sɛjesɛ plě ü pee tuposàǒ kwɛɛǒo Tentǎn Jǔ jleě mǒ bo keǒ uu chɛ̀ɛ mǒ nymi wlògbaee tè mɔ̀, u jě ɛ ɛ̈ moo tà Ě neɔɔ wùlo u wɔ̀le je bu poěě feanfeǒ fòfoa slè le.

¹⁸ Ɛ se dɛ mono, baǎje nù ke tuposàǒ pe klě mǒ nymi tǔn wlòmo klee klě kàan tǔn wlòmo, ke ɛ toon jleě mǒ bo nyopò boɛɛ lee Tentǎn Jǔu tè kɛn klě wakě wùɛ wlòmo ke ɛ nuě ɛɛ wòwɔ, ɛ nii niǐ chǒn. È dɛ tɛ̀ɛ kɔn tè Ě miǐ jèe chǒn le numa nɛ̀ moo

Dɛ Wùɛ A Mii Numa A Nyeǒ Nyesoa Tè Jǐ Boaboǎ

¹⁹ Ě ji ɛle ɛ̈ moo aa bàtea klee Jùsu Tentǎn Jǔu Sùsuu mǒ sèsɛ nì mi ɛ numa Ě mǐ bo tɛɛ le kělɔ tàɔ.

²⁰ Ɛ moo ně wlòo jlajlǎ dɛ chɔɔ klee wlò je kuun dɛ ɛ̈ moo Ě seǎ dɛ wùɛ Ě mii numa ɛɛ tònwe pe kpe keǒ Nyesoa jemǒ, kɛɛ baǎje Ě ne kmɔ̌ ɔ̀ɔ̌ Ě kǒ, Ě miě kpenkpɛ poba Ě miě ně kmɔ̌ wùɛ sà tǐ wùɛ mɔ̀ klee klě tǐà wlòmo Ě mǐ Nyesoaa tè jǐ boaboǎ nye.

²¹ Keǒǒ mɔ̀ dɛ ně kmɔ̌ neneɛ monoo nɛ̀ moo bo nu Tentǎn Jǔu konkwa. Tèǒ nì kɔn tè bɛ̌ nu bo kǒo, ɛ miiǒ mǒ dɛ bo poba. Mɛ̌oǒ joo nɛ̀ moo Ě miiě Tentǎn Jǔ mɔ̀.

²² Kɛɛ bɛ̌ nu ně kmɔ̌ neneɛ bɛ̌ sɛ̀n nynɛ̌ bo nu kàan dɛ keǒ Tentǎn Jǔ mɔ̀, è Ě se dɛ tae boǒ sàǒo ji keǒ ii sɔ̌nʼǒ slè.

²³ Ɛ kma wan keǒ boǒ sàǒ dɛɛ do. Klě ii sɔ̌nʼǒ slè kàan dɛ Ě jěě nɛ̀ moo bo kǒ bo muě Tentǎn Jǔ mɔ̀.

²⁴ Kɛɛ ɛ wɛɛnʼǒ le keǒ bo neě jè kmɔ̌ keǒ aa tè mɔ̀.

²⁵ Ě kuun ɛmoǒ je wlò, ii tè Ě ji ɛle ɛ̈ moo Ě mi kmɔ̌ nema Ě mǐ a mǒ sɛ̀ɛ le a mǐ plɔɔ bloblɛ kɔn klee aa tè wlò popoɛ mǐ nya muu nu.

²⁶ Klě ɛmo tǔnʼǒ wlòmo a klee mǒo sɔ̌n bä neǒ tàa do, a mi tè tìi kɔnma ï kɔn tè ba poo Nyesoaa nynɛ̌ le keǒ dɛ Ɔ nuu keǒǒ mɔ̀.

²⁷ Dɛ bɛ̈ jě bɛ̈ kpa tùɔn, aa kmɔ̌ neneɛ bɛ tee ɛ wòje nyopò ü blɛɛǒ je bü kɔnʼɔ kàan tuposàǒ kwɛɛǒo Tentǎn Jǔu tè jleě mǒ bo. Bǎ ke ɛmoǒ ni, baǎje Ě diě ä mǐ jejěe le ɔ̀ɔ̌ Ě kɛ̀nʼě nya bo Ě wɔ̌n aa tè, Ě mi ɛ jiba ɛ̈ moo kɛn kenkmeea neǒ a slè plě klee a niǒ tàa do konkwa tǐ wùɛ mɔ̀ keǒ ba gbɛ̀tɛɛ tuposàǒ le.

²⁸ Aǎ pe aa jlae nyoo fano keǒ dɛ wùɛɛ tè mɔ̀. Dɛǒ nɛ̀ mi ɛɛ jboo dɛ tùba keǒ u mɔ̀ ɛ̈ moo Nyesoa mi u gbè sùeba, è amo mi gblàeba. Ɛ mooa Nyesoaa kɛn wɔɔn dɛ

²⁹ tà Ɔ nyea amoo Tentǎn Jǔu konkwaǒ, ɛ̈ sea ba po Ɔɔ tè kàan tèe do, kɛɛ a mǐ Ɔ sònwɛ mɔ̀ jěe le ke.

³⁰ A klee mǒo sɔ̌n ä wɛ̀n je dɛɛ doǒ a jěa mǒo Ě wɛ̀nʼaa je plě ɛ̈ kɔn tè a wɔ̌nʼɔ Ě wɛ̀ɛ̌n jèe je.