Jùsuu Tuposà Kpa Nyoo Nunu Noǎa Chněedɛ̌ U Dɛɛ Ǎkè 15 - Nyesoaa Kuo Win Jajle

Tè Wlò Popoɛ Nɛ̀ Gblɛ̀ Nyu Ɛ̈ See Foeě Bebɛ̌

¹ Ɛ kɔna tǐ tìi tà nyopò tùu nù sɔnaě Jùdǐa wakǎ kɛn mǒ ü tèea je ü mua Ɛntìa, nù teea Tentǎn Jǔu wǎnʼǒ nea lěe, kě u dɛ̌a u je, “Bɛ̌ nu bǎ se foeě bɛ̌ wòje keà Mɔ̀sěe tetě nu ɛɛ ble popoɛ, è a se wowa dɛ kɔn.”

² Ɛ mooa wan le jejǎea klee chɛtlǐia fòɛ ɛ̌ neaǒ u klee Pɔ̀ɔ̌ klee Banàbɔ slè. Tèǒ nì kɔn tè u sàla Pɔ̀ɔ̌ klee Banàbɔ klee Tentǎn Jǔu wǎnʼa tìe ǔ dǔa tèǒ mǒ ǔ kpala i Jlǔsnɛ klě Jùsuu tuposà kpa nyo klee Tentǎn Jǔu wǎnʼa bòlibo mɔ̀ u mǐaě i ù jemǒ bo po.

³ Tà u dboa luu, u nana blǒ wakěǒ kɛn le ï moo Fonisìa klee Sìmɛ̌lia ǔ tmɛɛ̌a Tentǎn Jǔu wǎn wùɛ ke kuodakwɛ̌ nua nɔɔ Nyesoa mɔ̀ diia. Tà Tentǎn Jǔu wǎnʼǒ neaa blěǒ kɛn le u wɔ̌na imoo tèǒ, uu plɛ bloa chɔɔ.

⁴ Tà umoǒ u nynia lěe Jlǔsnɛ, Tentǎn Jǔu wǎnʼǒ nea lěe, jà Jùsuu tuposà kpa nyo klee bòlibo, u pea u tàto. È Pɔ̀ɔ̌ klee Banàbɔ tmɔɔ̌a u noǎ wùɛ Nyesoa niaa klě u mǒ.

⁵ Kɛɛ Jùsuu kàan tè po nyoo tìe ü mooa Fɛlesǐi wǎn nù nynana bo, kě u dɛ̌a u je, “Kuodakwɛ̌ kɔn bu bɛ̌ foeě, è u kɔn bu tùǒ teteǎà Nyesoa nyeaa Mɔ̀sě bo!”

⁶ Ii tè Jùsuu tuposà kpa nyo klee Tentǎn Jǔu wǎnʼa bòlibo nea bo u mǐaě imo tèǒ le po.

⁷ Tà u popooaě i měne klě tǐ pɛ̀ti wlòmo, è Pitɛ̌ nynana bo, kě ɔ dɛ̌a ɔ je, “Ně bǐì Tentǎn Jǔu wǎn ane, aa chɛ̀ɛ a ji ɛle seela tǐ jleě tǐà sìin Nyesoa sàla mǒ kělɔ a slè bo mua Ɔɔ kàan winʼà boɔ klě kuodakwɛ̌ slè ɛ̈ di ɛɛ numa u mǐa i wɔ̌n ke u mǐa ii tè kàan tè po.

⁸ Nyesoaà jii tùonyopo wùɛɛ wlè, Ɔ nye u Ɔɔ Ngmà Je Ne Sùsu wòje ke Ɔ nua Ɛ ämoo Jùwɛ nyo nyenyeɛ, dɛǒ nɛ̀ tee ɛ ɛ̈ moo Ɔ poo u kɛn kòo.

⁹ Nyesoa nu ɛ ɛ se dɔ̌ ne keǒ u klee ämoo sɔ̌n slè, ke kɔn do Ɔ nuě ämoo mɔ̀le snasnǎ keǒ äa tè wlò popoɛ kɛn, kě kɔn do Ɔ nuě u mɔ̀le snasnǎ klě uu tè wlò popoɛ mǒ.

¹⁰ Ii tè mɛ kɔɔ̌n tè a kɔn ba tɛ̀ɛ̌n kɛě Nyesoa měne keǒ ba tè gbɛ̀ɛ fòɛ ba mǎǒ ɛ Tentǎn Jǔu mɔ̀ na nyo dlǒ bo ɛ̈à äa chɛ̀ ä slěe bleblɛ̌ wɔ̀ plě äa gbeǐpòo chɛ̀ sea lěe bleblɛ̌ wɔ̀?

¹¹ Ä po i kàan tè ke kɔn doǒ ä nuu wowa konkɔn kě umoǒ u nu wowa konkɔn ɛ̈ diiěe Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ.”

¹² È uu wùɛ ù nua kpee ǔ pea Banàbɔ klee Pɔ̀ɔ̌ɔ win nɔkǔ jebo ǔ tmɛɛ̌a u wlòlekaen noǎ klee wan bo kàe noǎa Nyesoa niaa klě kuodakwɛ̌ slè klě u mǒ.

¹³ Tà u wɔ̀laa boɔboɔ mɔ̀, è kě Jìmǐse dɛ̌a ɔ je, “Ně bǐì Tentǎn Jǔu wǎn ane, a poǒ nɔkǔ jebo,

¹⁴ kèkeà Saemɔ̌ Pitɛ̌ sèsae ä wlòmo ke Nyesoa nua lěe kuodakwɛ̌ slè didiɛ Ɔ̌ sàla lěe nyopò keǒ bu nu Ɔɔ konkwa.

¹⁵ Nyesoaa wnɔsàɔpoo win wɔɔnʼa ɛ kɛn seela tǐ jleě ï u chlěaa ï dɛ̌a bòo ɛ̈ moo,

¹⁶ ‘Bɛ̌ nu dɛǒ bɛ̌ sìn, Mǒ Nyesoa Ě mi je tbaeba klě Dèběsee koǔǒ bloo bobo, Ě mi ɛ poba de, ɛɛ noǎ wùɛǒ wlɛ̀ɛ blǒ mǒ Ě mi i bo nynaema de, Ě mǐ i nu i mǐ le jakǎ.

¹⁷ Klě ɛmo dɛǒ mǒ nyopò wùɛà see Dèběsee jlǔu jlǔ ü monoo kuodakwɛ̌ ü kɔnʼǒ Mǒo mɔ̀ u mi Mǒ Koɔn le pɔ̀nma.’ (Amos 9.11-12) Dɛǒ nɛ̀ Koɔn Nyesoa boɛ Ɔ̈ nua imoo noǎǒ

¹⁸ ǐ jiia seela tǐ jleě.

¹⁹ Tèǒ nì kɔn tè dɛà nɛ̀ ně dlǒ sɛ̀ kwlǎ mǒ, bäǎ ni wan jakǎ dɛ keǒ kuodakwɛ̌ mɔ̀ ü diiɔ Nyesoa mɔ̀.

²⁰ Kɛɛ bä chleě u chněedɛ̌ mɔ̀ ɛ̈ mi nuu tmɔɔ̌ma buǔ dii didi noǎà u pie lee nǔkpuǐ je klee nmià u cheanʼa doe le ɔ̈ kǒo klee nymɔ, è buǔ ne gblà kmɔ̌.

²¹ Imo noǎǒ nì moo kpě ï kɔn tè Mɔ̀sě chleěa kɛn plě è nì kɔn tè boɛɛ le klě diě wùɛ wlòmo plě ï slèe le klě Nyesoaa defɛ chnɛ̀ jlǒ waě wùɛ wlòmo klě Jùwɛ nyoo Nyesoa keǐ bo ble le sɔɔnʼě seela tǐ jleě mǒ.”

Chněedɛ̌ Mua Lěe Kuodakwɛ̌ Mɔ̀ Ü Moo Tentǎn Jǔu Wǎn

²² È tuposà kpa nyo klee Tentǎn Jǔu wǎnʼa bòlibo plě Tentǎn Jǔu wǎn wùɛ u sàla tàii sɔ̌n ü mooa nyefòapo keǒ bu nana Pɔ̀ɔ̌ klee Banàbɔ de bu muaě Ɛntìa diě kɛn. Doo nynɛ̌ mooa Jùdǎse ɔ̈ u dɛɛa Basèba, è do tɔ̀ɔ nynɛ̌ mooa Salě.

²³ U chlěa chněedɛ̌ nɛ̀ u nyea nu, kě ɛɛ win dɛ̌a i je, “Ämoà moo tuposà kpa nyo klee Tentǎn Jǔu wǎnʼa bòlibo plě Tentǎn Jǔu wǎn wùɛ ä dbo wan le gbògba klě amo kuodakwɛ̌ mɔ̀ ü neěe Ɛntìa diě wlòmo klee Siwlìa klee Selesìa wakě kɛn ü monoo Tentǎn Jǔu wǎn.

²⁴ Ä wɔ̌n dɛ ɛ̈ moo nyopò tùu nù sɔn nɔ ä mɔ̀ mǒ u muě a mɔ̀ ü ä see kbě nye, nù jaě jale jejǎea klě a slè ɛ̈ po aa wlè wɔ̀ɔn, kě u dɛ̌ ɛ̈ moo, ‘A blɛɛ je ba bɛ̌ foeě ba tùǒ Nyesoaa tetě bo plě a mǐ wa.’

²⁵ Ii tè ämo bòlibo ä ne bo, ä poě ɛ le, äa wùɛ ä wɔɔn ɛ kɛn keǒ bä sà jbɛjluu sɔ̌n bä dbo lu klě a mɔ̀, u miě a mɔ̀ diba u klee äa bǐì nenawa Banàbɔ klee Pɔ̀ɔ̌

²⁶ ü poǒ uu chɛ̀ɛ fònfno blǒ mɔ̀ bo keǒ bu nuu konkwa keǒ äa Koɔn Jùsu Tentǎn Jǔu nynɛ̌ mɔ̀.

²⁷ Ii tè ä dbe Jùdǎse klee Salě u mǐ chněedɛ̌à ä dbee ɛɛ win kɛne bɛ̌ klě a mɔ̀.

²⁸ Ngmà Je Ne Sùsu klee ämo ä wɔɔn ɛ kɛn ɛ̈ moo ä se a wlò le popaba mu keǒ dɛ wùɛɛ tè mɔ̀, ɛ̀ sìnʼǒ noǎa doà ï monoo

²⁹ aǎ di nmià u sàe lee nǔkpuɔ̌ bɔ̀ je klee nymɔ klee nmià u cheanʼa doe le ɔ̈ kǒo. È aǎ ne gblà kmɔ̌. Bɛ̌ nu noǎ wùɛà ä sèsle wan le bǎ tùǒ i bo, è a mi kàan dɛ numa, ii tè ä kpa a wluò.”

³⁰ Ii tè nyopòǒ kpɛa luu tuposàǒ ǔ tèea je ǔ muaě Ɛntìa diě kɛn klě u wɔ̀ɔaě kuodakwɛ̌ de ü mooa Tentǎn Jǔu wǎn ǔ sàla uu chněedɛ̌ǒ kwlǎ mǒ klě u mɔ̀.

³¹ Tà kuodakwɛ̌ǒ u slèaa chněedɛ̌ǒ, uu plɛ wɔ̌na bloblo tè ɛ̌ tùaě u wlò wlòmo ble.

³² È Jùdǎse klee Salě ü mooa Nyesoaa wnɔsàɔpo u tùiaě u wlò wlòmo ble ǔ pea u kbě ja le klě tǐ pɛ̀ti wlòmo.

³³ Tà u sìnʼaě uu mɔ̀ mòngmɛ chnɛ̀ jlǒ wě, è kuodakwɛ̌ dboa u de klě plɔɔ bloo tǔn wlòmo klě nyopòǒ dboa luu mɔ̀,

³⁴ kɛɛ Salě poa ɛ ble keǒ bɔ sia bo klě u mɔ̀. Ii tè Jùdǎsee do nɔ̀ tbaea je klě Jlǔsnɛ.

³⁵ Pɔ̀ɔ̌ klee Banàbɔ nù neaě Ɛntìa u klee uu nyopò fòfoa tùu ǔ teea win ï kwɛɛǒo Koɔn jleě mǒ bo plě ǔ boɛa li.

Pɔ̀ɔ̌ Klee Banàbɔɔ Jele Sèsaea

³⁶ Tà tǐ pɛ̀ti sìnʼaa, è chnɛ̀ jlǒ waě tɛ̀ɛ mɔ̀ kě Pɔ̀ɔ̌ dǎla Banàbɔ je ɔ je, “Sɔn mǒ, bä mu de bä mu äa bǐì Tentǎn Jǔu wǎnʼà neěe deě fòeà kɛn le jebo chè ü kɔn mɔ̀ ä boɔlaěe Nyesoaa winʼà ɛ̈ di ɛɛ numa ä mǐ u jě ke u nii dlǒ mɔ̀le mumuɛ.”

³⁷ È Banàbɔ jlɛ̌ bɔ kpala Jɔ̀ɔ̌n ɔ̈ kɔn nynɛ̌ tɛ̀ɛ u dɛɛa Mǎkè keǒ bɔ nana u de,

³⁸ kɛɛ Pɔ̀ɔ̌ je ɔ sea ɛ jě tè kɔn tè ɔ mǐa uu de na. Mɛ̌oǒ joo nɛ̀ moo ɔ seaǒ u mɔ̀ siǐ li ǔ chlàla uu demǒ bɔɔ̌ konkwa u niaa dlǒ, ɔ siaě u Panfelìa wakǎ kɛn ɔ̌ mua de.

³⁹ Ɛ mooa chɛtlǐia fòɛ keǒ Banàbɔ klee Pɔ̀ɔ̌ slè, dɛǒ nɛ̀ sèsaea uu sɔ̌n wùɛǒ jele, Banàbɔ kpala Mǎkè ǔ beaě měe wan ǔ mua lě blǒ tìeǒ ně poěe gbàe mǒ kɛn ɛ̈ u dɛɛ Saeplɔ̀.

⁴⁰ È Pɔ̀ɔ̌ tbala Salě ke, tà Tentǎn Jǔu wǎnʼǒ neaǒo u wɔ̀laě uu Nyesoa kwete mǒ tùtuɛ mɔ̀, è nùǒ mua

⁴¹ ǔ nɛa Siwlìa klee Selesìa wakě kɛne ǔ pea Tentǎn Jǔu wǎnʼǒ nea lěe kbě ja le.