1 Timɛtě 5 - Nyesoaa Kuo Win Jajle

Teea Kwɛɛǒo Kunkunyo Klee Kotia Nynoo Tè Jleě Mǒ Bo

¹ Nè pnɛɛ̌ kunkunyo dlǒ le, kɛɛ boɔě u mɔ̀ wòje keà u nu wiěn gbèǐǒò. Nu nyengmè wòje keà u nu wiěn nè mamǔ jbɛjluǒò.

² Nu nynekpaklě wòje keà nàǎ, è nynengmèǒ nù bò nu dɛ mǒ ɛ̈ snǎ lěe mɔ̀le wòje keà màmǔ nynejlu.

³ Kɔn wlèe sɔ̌n keǒ kotia nyno mɔ̀ ü sɛjesɛ ü moo kotia nyno.

⁴ Bɛ̌ nu bo koti nynɔ bɔ̌ kɔn jlǔ klee duojlu, ɛ̈ kɔn nɔ̀ kɔnʼě uu koǔ bo kwɛɛn slè, jlǔǒ u blɛɛ je bu chěn ke bu nuu kàan dɛ nunuɛ keǒ ɔ mɔ̀ klekle. Dɛǒ nɛ̀ bǔ nu, è u sɛ̀ uu naǎ klee gbeǐpò klee dǎfɔ̀po snǒ. Dɛǒ nɛ̀ blee Nyesoaa plɔ.

⁵ Nynɔǒ sɛjesɛ ɔ̈ moo koti nynɔ ɔ̈ see nyu kɔn ɔ̈ mǐ ɔɔ mǒ sɛ̀ɛ le, ɔ mi Nyesoa wlò kpaeba Ɔ mǐ ɔ jǐ mɔ̀ tù plě ɔ mǐ dlǒ mɔ̀ mu ɔ mǐ Nyesoa bàte keǒ mǒ sèsɛ mɔ̀ tǒn klee chnɛ̀.

⁶ Kɛɛ koti nynɔà nee kmɔ̌ sosǒ keǒ bɔ̈ bloo ɔɔ chɛ̀ɛ plɔ, kàan tè ɔɔ chɛ̀ neě jè kmɔ̌, kɛɛ ɔɔ Nyesoa dɛɛ kmɔ̌ neneɛ kǒ lo.

⁷ Ii tè pooě i ù wlòmo uǔ di ɛmo kmɔ̌ taeǒ ne ɛ̈ di ɛɛ numa nyu wùɛ ɔɔ̌ diǒ u tè jleě mǒ jě.

⁸ Nyu wùɛ ɔ̈ slě ɔɔ kmɔ̌ wǒ nyoo tè mɔ̀ kɔn, sɛjesɛ ɔɔ chɛ̀ɛ koǔ bo kwɛɛn, è Nyesoaa tè wlò popoɛà nɛ̀ǒ ɔ sà jleě mɔ̀. Ɔɔ kmɔ̌ nymi le jǐ ɛ̌ sìnʼǒ se kàan tè po nyo mǒ.

⁹ Nè pe koti nynɔɔ nynɛ̌ klě Tentǎn Jǔu wǎnʼa kotia nyno slè ü kɔn tè wǎnʼǒ u kɔn lěe mɔ̀, ɛ̀ sìnʼǒ bɔ̌ sìn jlě wlèe tan kɛn klee bɔ̌ kɔna jbee do sosǒ plě.

¹⁰ Bo nyopò bu ji ɛ ke ɛ̈ moo koti nynɔǒ ɔ ni le kàan noǎ ï monoo ɔɔ jlǔ le sèsa klee bɔ kme nyopò jebo ü miě ɔɔ tà diba klee bɔ jla ɔɔ bǐì Tentǎn Jǔu wǎn be le klee bɔ sɛ̀ɛ nyopò mǒ ü neěe tǐ jakě slè plě klee bɔ nu jǐ měne keǒ kàan noǎ wùɛ ii nunu tè mɔ̀.

¹¹ Tògba nynoà ü peeěe dɛ keǒ Nyesoa mɔ̀ keǒ bü moo kotia nyno ɛ̈ di ɛɛ numa tǐ wùɛ mɔ̀ u mǐ Ɔɔ konkwa nu, bɛ̌ nu jbɛjlu tǒn bɛ̌ ke u ni bɛ̌ sàǒ u uu pee dɛǒ jleě mǒ, ù sòɛ bu pa tǐn koǔ bo de. Ii tè nè pe uu nyneǎ klě nyneǎǒ slè.

¹² Nɛ̀ bɛ̌ se nu bǔ sàǒ pee dɛǒ snǔ mɔ̀ keǒ bu mooaa kotia nyno, uu plɔ kɔn bɛ maěǒ tu kɛn bo.

¹³ È dɛ tɛ̀ɛ neǒo de u nii nɛ̀ moo uǔ nu dɛ wùɛ, ɛ̀ sìnʼǒ u nɛ keǐ jele ǔ boɛ uu bǐì klee ǔ ni kpasùjasu dɛ ǔ boɛ noǎà u see je blɛɛ le bu boɔɔ.

¹⁴ Ně wlò jě ɛ ɛ̈ moo tògba nynɔ bɔ pa tǐn koǔ bo de ɔ mǐ jlǔ kɔn klee ɔ miě ɔɔ koǔu tè mɔ̀ kɔn. Ɔɔ̌ nye äa jlae nyo fɔ̌ keǒ bu kɔn dɛ kukǔ bu boɔɔ keǒ ä jleě mǒ.

¹⁵ È tè kɔn tè Ě boɛɛ tèà nɛ̀ moo tògba nynoo tìeǒ see tǐn de u sɔnʼǒ Tentǎn Jǔ demǒ no ɛ̌ wɛ̀ mɔ̀le ǔ beǒ Setɛ̀n demǒ ɔ̈ moo kǔ sìsii klɔ̀ba.

¹⁶ Bɛ̌ nu Nyesoa jbɛju ɔ̀ɔ̌ nynɔ bɔ̌ kɔn koti nynɔ klě ɔɔ koǔ bo kwɛɛn slè, bɔ mǎǒ koti nynɔǒ mɔ̀, bɔɔ̌ peǒ ɔɔ tè Tentǎn Jǔu wǎn dlǒ. Dɛǒ nɛ̀ bɛ̌ nu, è Tentǎn Jǔu wǎn kɔn fɔ̌ keǒ bu mǎǒ kotia nyno tùuǒ mɔ̀ ü kɔn do nɛɛ.

Noǎ Tìi Bu Tee Lee Tentǎn Jǔu Wǎn

¹⁷ Tentǎn Jǔu wǎnʼa bòliboà ü nii kàan konkwa u blɛɛ je bu popoo uu snǒ sàe dɛ kɛn le, sɛjesɛ nyopòà ü peěe kbě le ü boɛɛ Nyesoaa win klee ü tee ii,

¹⁸ kě Nyesoaa win dɛ̌ i je, “Blǐà sosoɛ nèe kpasǔ nè pìin ɔ wien ɛ̈ di ɛɛ numa ɔɔ konkwaǒ ɔ nii ɔ mǐ ɛɛ dɛ di,” (Deut 25.4) klee kě Tentǎn Jǔ dǎla Ɔ je, “Konkwa nuɔ blɛɛ je snǒ sèsa.” (Lk 19.7)

¹⁹ Bǔ wǒ bòlibopoi le, nè pe nyopòǒ wǒ ɔɔ le uu win nɔkǔ jebo, ɛ̀ sìnʼǒ bɛ̌ kɔn sàsepoo sɔ̌n ɔ̀ɔ̌ tan ɛ̈ moo ɔ nu kenkan dɛǒ lo plě.

²⁰ Nyopòǒ nii kpni kukwǐ a kpaǒ u klɔ̀ slè, a mǐ u jǐ měne pnaě ne ɛ̈ di ɛɛ numa uu nyopò tùu mǐ fano pe keǒ dɛkukǔ nunuɛ mɔ̀.

²¹ Ě nyeè snǒ keǒ Nyesoa klee Tentǎn Jǔ Jùsu klee najiǒpò Ɔ sàa jemǒ keǒ bò tùǒ noǎ wùɛà Ě te mòo kwete mǒ ble, nè ni nyuà ɔɔ tè se bò wan ne keǒ nyu wùɛ mɔ̀.

²² Tùě jǐ bo keǒ bò tùe nyu kpǎta wan bo keǒ Nyesoaa konkwa nunuɛ mɔ̀. Jě lɛ ɛ̈ moo ɔmo nyuǒ ɔ wɔ̀ě ɛ nunuɛ ne. Nè be nyopò tùu kɛn keǒ kpni kukwǐi nunuɛ mɔ̀, kɛɛ snǎě mɔ̀le.

²³ Bɔ̌ ně sosǒ nenǎ, kɛɛ nǎ nmɔɔ chěnchaǐ gbei keǒ nè kwlěǒ ɛɛ tè mɔ̀ ɛ mǐì mǒ sɛ̀ɛ le keǒ nè fǒǒ mɔ̀ ɛ̈ nii neǒ bo ne smuunu.

²⁴ Nyopòo tìee kpni kukwǐ be pepě mǒ ɛ̌ kpɛ dɛ pɛ̀tu plě ǔ tùi u tè mɔ̀, kɛɛ u tùi nyopòo tìe tè mɔ̀ plě uu kpni kukwǐ be pepě mǒ.

²⁵ Dɛɛ doǒ nɛ̀ ɛ mono, bɛ̌ nu bò ke kàan dɛ ni, nyopò tùu mi ɛ jěba. Bɛ̌ nu bǔ se ɛ jěe chɛ̀, ɛ slě kwijlě mǒ siba mu.