1 Timɛtě 2 - Nyesoaa Kuo Win Jajle

A Bàteeǒ Nyopò Wùɛɛ Tèe Tà

¹ Klekle dɛ kɔn tè kmaa ɛ̈ sìnʼǒo dɛ wùɛ mǒ nɛ̀ moo Ě tmɛɛ̌ Tentǎn Jǔu wǎn bu bàteeǒ nyopò wùɛ pènmo klee bu gbà Nyesoa wan keǒ dɛ u sòɛɛ mɔ̀ plě bu pe Ɔ tàto keǒ dɛ Ɔ nuu mɔ̀ keǒ u mɔ̀.

² Sɛjesɛ bu bàteeǒ klɔ̀bapoo tà klee nyu wùɛà kòngmna kpě neěe kwete mǒ ɛ̈ di ɛɛ numa ä mǐ kmɔ̌ ne klě ně bo wnawna mǒ, fano ɛɛ̌ di ä nu ä mǐ Nyesoaa konkwa nu klee ä mǐ mǒ slɛɛ̌ dɛ nu.

³ Ɛ nu tɛɛ bä bàteeǒ nyu wùɛɛ tà, dɛǒ nɛ̀ blee Nyesoaa plɔ Ɔ̈ wa ämoo Ɔ̈ sàě ämoo kpni kukwǐi plɔɔ tu kɛn bo maěa bobo.

⁴ Nyesoa jlɛ̌ nyopò wùɛ bu kɔn wowa u mǐ kàan dɛ ji ɛ̈ kwɛɛǒ Ɔɔ jleě mǒ bo

⁵ ɛ̈ moo Nyesoa ne do sosǒ plě Nyuu do sosǒ Nɔ̀ jaě tùonyopo klee Nyesoaa sɔ̌n tàa do, Ɔmo Nyuǒ Nɔ̀ moo Tentǎn Jǔ Jùsu

⁶ Ɔ̈ nyea Ɔɔ chɛ̀ wòje chɔ̀no keǒ Bɔ gblàla nyopò wùɛ. Dɛǒ Ɔ nuaa nɛ̀ tee ɛ ɛ̈ moo Nyesoa jlɛ̌ nyopò wùɛ bu kɔn wowa dɛ klě ɛɛ tɛɛ tǐ wlòmo.

⁷ Winʼǒ nì kɔn tè Nyesoa tba mǒ boǒ boɔ plě nì kɔn tè Ɔ dbo mǒ bo moo tuposà kpa nyu boǒ tee kuodakwɛ̌ ɛ̈ kwɛɛǒo tè wlò popoɛ jleě mǒ bo klě Tentǎn Jǔ mǒ klee kàan tè ï kwɛɛǒ Ɔɔ jleě mǒ bo. Ě se sen le tmɔ̌, dɛà monoo kàan tè nìà Ě tmɛɛ̌ amo!

⁸ Tèǒ nì kɔn tè Ě jlɛ̌ nyopò wùɛ ü nee tà wùɛ bu bàte Nyesoa, bu moo kàan Tentǎn Jǔu wǎn plě bǔ ke bɛ̀te bu po uu sonwe jɔ mǒ, uǔ kwɛnʼě jlo wlò jleě keǒ nyu tɔ̀ɔ mɔ̀ plě uǔ pe kplɛ ɛ̈ moo Nyesoa se uu bàteaǒ kɛ̀ɛn tùba mu.

Ngmè Keǒ Nyno Mɔ̀

⁹ Ě jlɛ̌ nyno bu pe dale měne ke klě tɔ̀n tǔn wlòmo klee klě tɛɛ tǔn mǒ. Uǔ kpně uu moamoa dlǒ ɛɛ doědoe klee uǔ pe klò tìan fòfoa sonwe le klee uǔ pe nèmnejɔ dɔ le plě uǔ pe daleà pee wlě fòfoa měne,

¹⁰ kɛɛ bu nu kàan noǎ wòje nyno ü monoo Nyesoaa konkwa nu nyo.

¹¹ Nyno bu nu kpee u mǐ teeaǒ u tee uu chěn klee bu tìeǒ uu chɛ̀ ja keǒ nyopòǒ neǒ uu dlǒ mǒ mɔ̀.

¹² Ně sɔnʼǒ nyno mɔ̀ mǒ uǔ tee jbɛjlu plě uǔ kɔn jbɛjlu win kwa. U kɔn bu nu kpee klě Nyesoaa wɛ̀ sàla mǒ.

¹³ Mɛ̌oǒ joo nɛ̀ moo plě Nyesoa mǐa Ǐfi nu, Ɛdɛ̌mo nɔ̀ mooa klekle nyu Ɔ nua.

¹⁴ Ɛ se Ɛdɛ̌mo kǔ sea ɔ mǒ boo lo, nynɔǒ nɔ̀ kǔ booa mǒ ɔ̈ wlǎla tè klekle.

¹⁵ Kɛɛ bɛ̌ nu nynoo tè wlò popoɛ u kɔnʼɔ klě Tentǎn Jǔ mǒ bɛ̌ ke nya mii ni klee bǔ ke nyopò tùu mǒ noɛɛ ne klee bǔ ke ngmà je ne kmɔ̌ ne plě klee bǔ ne kàan kmɔ̌, Nyesoa mi u gblàba klě uu kmàe tǐ wlòmo.