1 Kwnɛtiɛ̌ 2 - Nyesoaa Kuo Win Jajle

Ngmà Je Ne Sùsu Nye Ä Tɔ̀n

¹ Ně bǐì Tentǎn Jǔu wǎn ane, tà Ě dia lě amoo mɔ̀, Ě tmɔɔ̌a a Nyesoaa je wɛ̌ kàan dɛà ɛɛ tè, Ě seaě wan le dɛkɛa ja plě Ě seaě de jijiɛ fòfoa ja.

² Tà Ě neaě amoo slè, dɛɛ do Ě boɛɛaa kɛn sosǒ nɛ̀ mooa Jùsu Tentǎn Jǔu tè Ɔ̈ a kɔaǒo pète bɛ̌ tu jleě.

³ Tà Ě diaě amoo mɔ̀, ně kbě wɛ̀aě le ně fě sènʼa le keǒ fano mɔ̀.

⁴ Klě ně Nyesoaa win boɔboɔ klee ii teea wlòmo, ně boɔa li klě de jijiɛ wlòmo klee klě chɛtlǐia wlòmo, kɛɛ ɛ mooa Ngmà Je Ne Sùsu kpě nì teea a kàan dɛǒ.

⁵ Ii tè aa tè wlò popoɛ se tùonyugbee tɔ̀n kɛn tee le, kɛɛ ɛ moo Nyesoaa kpě.

⁶ Ä boɛɛě tɔ̀n wlòmo klě nyopòà mɔ̀ ü wɛ̀ lee jele keǒ bu wɔ̌n nii, ɛmo tɔ̀n winʼà i seɔ kmɔ̌ɔ wlòmo sɔn plě i seě kmɔ̌ɔ je si nyo ja mǒ sɔn ü kɔn dɛ kɔnʼɔ sìnsiɛn,

⁷ kɛɛ ä boɛ Nyesoaa je wɛ̌ tɔ̀n win ï Ɔ wɛɛ̌ lee tùonyopo jǐ mǒ plě Ɔ poaa ble Bɔ nyea ämoo keǒ äa tè jǐ boaboǎ mɔ̀. Ɔ nua ɛmo dɛǒ plě kmɔ̌à ɛ̌ tùua wlò.

⁸ Kmɔ̌à ɛɛ win kwa kɔn nyoo nyuu doo chɛ̀ sea Ɔɔ je wɛ̌ tɔ̀n winʼǒ de jbojbɛ kɔn. Bɛ̌ nu bǔ kɔɔnʼa de jbojbɛ, è u seeaǒ äa tè jǐ boǎ Koɔnʼà pète bɛ̌ tu jleě kɔ.

⁹ Tɔ̀nʼà nɛ̀ kɔn tè ä boɛ wòje ke ɛ nuu chleěa klě Nyesoaa win wlòmo ɛ̈ moo, “Noǎà Nyesoa wɔ̀ɔ mɔ̀ keǒ nyopòà noɛɛ Ɔɔ mǒ mɔ̀, jleě sěɛlǎ i jě plě nɔkǔ sěɛlǎ i wɛ̌n plě dlǒ le sìɛnsiɛn sěɛlǎ i kwlǎ mǒ sɛ̀.” (Is 64.4)

¹⁰ Nyesoa po Ɔɔ tɔ̀nʼà pepě mǒ keǒ ä mɔ̀ klě Ɔɔ Ngmà Je Ne Sùsu mǒ. Sùsu Nɛ̀ chechlɛ̌ ɛ̈ sɛ̀ noǎ wùɛ tà měne, jà Nyesoaa je wɛ̌ noǎa fòee chɛ̀.

¹¹ Tùonyugbee chɛ̀ nɔ̀ ji dɛ ɔ sìɛn dlǒ mɔ̀le, nyu tɔ̀ɔ nɔ seǒ ɛ dɛ kɛn ji, Dɛɛ doǒ nɛ̀ ɛ mono, Nyesoaa Sùsuu doǒ Nɛ̀ ji dɛ Nyesoa sìɛn dlǒ mɔ̀le.

¹² Nyesoa se ä sùsu nye ɛ̈ kɔn nɔɔ kmɔ̌ɔ wlòmo, kɛɛ Ɔ nye ä Sùsuà Ɛ̈ sɔnʼě Ɔɔ chɛ̀ mɔ̀ mǒ. Dɛǒ nɛ̀ nu ɛ ä ji Sùsuu kàan nyee noǎ ï neɔ ämoo slè ï Nyesoa nye ämoo.

¹³ Tèǒ nì kɔn tè ä tee li ɛ̈ slěe kmɔ̌ ne tùonyugbee tɔ̀n win wlòmo, kɛɛ Nyesoaa Sùsu Nɛ̀ tee ämo ä sèsɛɛ Sùsuu tè kɛn le klě nyopòà mɔ̀ ü blěe Nyesoaa Sùsu.

¹⁴ Nyuà Nyesoaa Sùsu slěe ja ne ɔɔ̌ po noǎǒ Sùsuǒ Ɛ tee lee ii tè kàan tè. I moo plɔɔ kokǒ noǎ keǒ ɔ mɔ̀ plě ɔ slě wɔ̀ bɔ jbo i le. Mɛ̌oǒ joo nɛ̀ moo nyu kɔn bɔ blě Nyesoaa Sùsu plě ɔ miě ɛ wɔ̀ keǒ bɔ jbo i le.

¹⁵ Nyuà Nyesoaa Sùsu neěe ja nɔ̀ ji ii wùɛǒ kɛn le sèsaea, kɛɛ nyuà Nyesoaa Sùsu slěe ja ne ɔ slě wɔ̀ bɔ ji noǎǒ nyuǒ Nyesoaa Sùsu neěe ja ɔ sèsɛɛ lee kɛne

¹⁶ wòje ke ɛ nuu chleěa klě Nyesoaa win wlòmo ï dɛ̌ bòo ɛ̈ moo, “Mɔ wɔ̀le je bɔ̈ jiǐ kɛ Nyesoaa dlǒ mɔ̀le sìɛnʼɛ dɛ? Mɔ wɔ̀le je bɔ̈ tee leě kɛ Lɔ?” (Is 40.13) Nyu wùɛ nɔ̀ slě ɛ wɔ̀ keǒ ɔɔ chɛ̀ mɔ̀, kɛɛ Nyesoaa Sùsu neě ä ja, tèǒ nì kɔn tè ä kɔn dlǒ le sìɛnsiɛnʼɛ doǒ Tentǎn Jǔ kɔnʼɔ klee ä ji dɛ Nyesoa sìɛn nee dlǒ mɔ̀le.