Yohane 8 - Bulu Ntam Pɔpwɛ mʋ́a Israel Ɩlʋ

Ɔtsɩ Ɔkʋ Mbʋatɔ Pʋ́ Mʋ Kɩta

¹ Brɛá aha amʋ bɛdasaɩn a, Yesu lɔdʋ yɔ Olif ɩbʋ amʋsʋ.

² Mʋ́ ɔyɩkɛhɛ bakɛ a, oleyinki ba Bulu ɔtswɛkpa wunsɩnɛsʋ ɩnʋ. Aha amʋ fɛ́ɛ́ bɛba mʋ wa. Mʋ́ sʋ oletsia asɩ, olefi asɩ ɔdɛ amʋ́ atɔ suna.

³ Brɛá ɔdɛtɔɩ a, Farisifɔ pʋ́ Mose mbla asunapʋ amʋ bɛkpa ɔtsɩ ɔkʋá bakɩta mʋ, ɔdɛ mbʋa tɔ ba bɛlɩɩ amʋ́ ansɩtɔ.

⁴ Mʋʋ bɛbla Yesu bɛɛ, “Osunapʋ, bakɩta ɔtsɩ anfɩ mbʋa ɔtɔkpa.

⁵ Mose Mbla amʋ lɛblɩ ɔbɛɛ, ada atsɩ anfɩ odu abwi mɔ. Nkalɩ fʋdɛblɩ tsu asʋn anfɩ ɩwɩ?”

⁶ Asʋnkle sʋ bɛfɩtɛ mʋ asʋn anfɩ, abʋyɛtɔ mʋ ha ahandɛ. Ɩnʋ Yesu lobun, pʋ osrebi ɔdɛ atɔ wanlɩn ɔsʋlʋtɔ.

⁷ Brɛá bʋtra bʋdɛ asʋn amʋ fɩtɛ pla a, olobwii tsia, bla amʋ́ ɔbɛɛ, “Mlɩtɔ ɔha ánɩ́ ɔmɔkʋbwɛ lakpan kɩ ogyankpa da ɔtsɩ anfɩ ibwi.”

⁸ Ɔlɛblɩ mʋ́ alɩ a, oleyinki bun ɔdɛ mʋ atɔ wanlɩn ɔsʋlʋtɔ.

⁹ Brɛá aha amʋ bonu mʋ asʋn anfɩ a, bɔwa natɩ ɩkʋlɛ-kʋlɛ bɩ, tsu ahandɛsʋ bɔtʋ nyebisʋ. Ilebesi Yesu mʋa ɔtsɩ amʋ nkʋlɛ ɔbʋn nsɩnɛ ɩnʋ.

¹⁰ Yesu lobwii tsia, ɔlɛfɩtɛ ɔtsɩ amʋ ɔbɛɛ, “Ɔtsɩ, nkɩ aha amʋ mɛ? Ɔkʋkʋ mesian ánɩ́ ɔbɛ́ha fʋ ɩpɔn?”

¹¹ Ɔtsɩ amʋ lɛlɛ mʋ́ ɔnɔ ɔbɛɛ, “Owie! Ɔkʋkʋ mɛha mɩ ɩpɔn o!” Mʋʋ Yesu lɛbla mʋ ɔbɛɛ, “Ɩbʋ alɛ! Mɩ ɛ mmɛ́ɛha fʋ ɩpɔn! Natɩ, mátra bwɛ lakpan.”]

Ɔyɩtɔ Wankɩ

¹² Ɩnɩ ɔma a, Yesu leyinki bla Farisifɔ amʋ ɔbɛɛ, “Mɩgyi ɔyɩtɔ wankɩ nɩ. Ɔhagyiɔha ánɩ́ obuo mɩ obénya wankɩá ɩbɛ́ha mʋ nkpa, oméesin okluntɔ ɛkɛkɛɛkɛ.”

¹³ Ɩnʋ a, Farisifɔ amʋ bɛbla mʋ bɛɛ, “Nfɔlɩ tamakanfʋ mʋ ɩwɩ. Fʋmɔkʋblɩ tɔtɔ.”

¹⁴ Yesu lɛbla amʋ́ ɔbɛɛ, “Nɩ mɩ onuto ndɛ mɩ ɩwɩ adansɩɛ gyi o a, ɔnɔkwalɩ igyi. Tsufɛ mɩ mʋ́ nyin ɔtɩnɛá notsu pʋ́ ɔtɩnɛá nɔyɔ. Tamɛ mlɩmeyin ɔtɩnɛá notsu pʋ́ ɔtɩnɛá nɔyɔ.

¹⁵ Anyankpʋsa asʋngyi ɔkpasʋ mlɩtegyi asʋn tsʋn, tamɛ mɩ mʋ́ ntamagyi ɔhaa asʋn.

¹⁶ Nɩ negyi asʋn o a, ɔnɔkwalɩ ɔkpasʋ negyi mʋ́ tsʋn. Tsufɛ megyi mɩ nkʋlɛ tegyi mʋ́. Mɩa mɩ Sɩ amʋʋ ɔlɔwa mɩ sɩsɩ amʋ nyɔ tegyi mʋ́.

¹⁷ Bɔwanlɩn wa mlɩ onuto Mbla amʋtɔ bɛɛ, ‘Nɩ adansɩfɔ abanyɔ bɛblɩ asʋn kuakʋlɛ a, amʋ́ asʋn ɩbʋ mʋ́tɔ.>

¹⁸ Mɩ onuto ntegyi mɩ ɩwɩ adansɩɛ. Mɩ Sɩ lɔwa mɩ sɩsɩ. Mʋ ɛ otegyi mɩ ɩwɩ adansɩɛ.”

¹⁹ Bɛfɩtɛ mʋ bɛɛ, “Nkʋnʋ fʋ sɩ bʋ?” Yesu lɛlɛ mʋ́ ɔnɔ ɔbɛɛ, “Mlɩmeyin mɩ wanklaan, mlɩmeyin mɩ Sɩ amʋ ɛ. Nɩ mlɩyin mɩ wanklaan a, tɛkɩ mlɛ́bɩ mɩ Sɩ amʋ ɛ.”

²⁰ Yesu lɛblɩ asʋn anfɩ brɛá ɔdɛ atɔ suna Bulu ɔtswɛkpa tswɩtswɩ-adaka otsiakpa. Tamɛ ɔhaa mɛkɩta mʋ, tsufɛ mʋ brɛ mɔkʋnya fʋn.

Yesu Ɔsʋsʋyɔ

²¹ Yesu lɛtra bla amʋ́ ɔbɛɛ, “Mɩ mʋ́ nɔyɔ. Mlódunka mɩ. Mlówu wa mlɩ lakpantɔ. Mlɩmɛ́ɛtalɩ ba ɔtɩnɛá nɔyɔ.”

²² Yudafɔ ahandɛ amʋ bɛfɩtɛ bɛɛ, “Mɔ ɔbɔ́mɔ mʋ ɩwɩ, sʋ ɔdɛblɩ ɔbɛɛ, mlɩmɛ́ɛtalɩ ba ɔtɩnɛá nɔyɔ?”

²³ Yesu lɛlɛ mʋ́ ɔnɔ ɔbɛɛ, “Mlɩ mʋ́ mlotsu ɔyɩ anfɩtɔ, tamɛ mɩ mʋ́ notsu ɔsʋsʋ. Ɔyɩ anfɩtɔfɔ mlɩgyi. Mmegyi ɔyɩ anfɩtɔyin mɩ mʋ́ ngyi.

²⁴ Mʋ́ sʋ ndɛ mlɩ bla mbɛɛ, mlówu wa mlɩ lakpantɔ nɩ. Mlówu wa mlɩ lakpantɔ, nɩ mlɩmohogyi ánɩ́ ‘Mɩgyi ɔha amʋʋ mbɛɛ ngyi amʋ.> ”

²⁵ Bɛfɩtɛ mʋ bɛɛ, “Fʋgyi ma?” Yesu lɛbla amʋ́ ɔbɛɛ, “Ɔha amʋʋ ntɛbla mlɩ yaɩ mbɛɛ, ngyi amʋ kɛn ntra ndɛ mlɩ bla a.

²⁶ Mbʋ asʋn tsɔtsɔɔtsɔá nɛblɩ tsu mlɩ ɩwɩ pʋha mlɩ pɔn. Tamɛ ɔnɔkwalɩpʋ ɔha amʋʋ ɔlɔwa mɩ sɩsɩ amʋ gyi. Asʋn ánɩ́ nonu tsu mʋ wa ndɛ mlɩ ɔyɩtɔfɔ bla.”

²⁷ Ɩmɔwankɩ amʋ́á mʋ Sɩ amʋʋ ɔbʋ ɔsʋsʋ amʋ ɩwɩ asʋn ɔdɛ amʋ́ bla.

²⁸ Mʋ́ sʋ Yesu lɛbla amʋ́ ɔbɛɛ, “Nɩ mlɛda Nyankpʋsa-Mʋ-Bi amʋ manta oyikpalihɛsʋ, tsu mʋ lɩɩ a, mlówun ánɩ́ ‘Mɩgyi ɔha amʋʋ mbɛɛ ngyi> amʋ. Mlɛ́bɩá ntamabwɛ tɔtɔɔtɔ mɩ onuto tumitɔ. Mʋ́á mɩ Sɩ lɔpʋwa mɩ ɔnɔ ntɛblɩ.

²⁹ Ɔha amʋʋ ɔlɔwa mɩ sɩsɩ amʋ buo mɩ. Ɔmɔkʋyinki mɩ ɔma, tsufɛ tɔá itegyi mʋ ansɩ ntɔbwɛ bregyibrɛ.”

³⁰ Ɩnʋ aha amʋʋ bonu mʋ asʋn anfɩtɔ tsɔtsɔɔtsɔ bɔhɔ mʋ gyi.

Abraham Abi-aná

³¹ Yesu lɛbla Yudafɔ amʋʋ bɔhɔ mʋ gyi amʋ ɔbɛɛ, “Nɩ mlobuo mɩ atosunahɛ a, mlɩgyi mɩ akasɩpʋ lɛlɛ.

³² Mlɛ́bɩ ɔnɔkwalɩ amʋ. Ɔnɔkwalɩ amʋ ɩbɛ́ha mlégyi ɩwɩ.”

³³ Bɛblɩ bɛɛ, “Abraham abi-aná anɩgyi. Anɩmɔkʋbwɛ ɔhaa nkpábi kɩ. Mʋ́ ntogyi sʋ fʋdɛ anɩ bla fɛɛ, ‘Mlégyi ɩwɩ?> ”

³⁴ Yesu lɛlɛ mʋ́ ɔnɔ ɔbɛɛ, “Ɔnɔkwalɩ ndɛ mlɩ bla. Ɔhagyiɔha ánɩ́ ɔtɔbwɛ lakpan a, ogyi lakpan ɔkpábi.

³⁵ Ɔkpábi tamatsia mʋ wie woyitɔ yɔ, obi tetsia mʋ sɩ woyitɔ yɔ.

³⁶ Mʋ́ sʋ nɩ Bulu mʋ Bi amʋ ɔha mlegyi ɩwɩ a, mʋmʋ mlɩlagyi ɩwɩ fɛ́ɛ́.

³⁷ Nyin ánɩ́ Abraham abi-aná mlɩgyi, tamɛ mlɩdekleá mlɔ́mɔ mɩ, tsufɛ mlɩmɔhɔ mɩ atosunahɛ.

³⁸ Tɔá nowun tsu mɩ Sɩ wa ndɛblɩ. Mlɩ ɛ asʋn ánɩ́ mlɩlonu tsu mlɩ sɩ wasʋ mlɩdegyi.”

³⁹ Bɛbla mʋ bɛɛ, “Anɩ sɩ gyi Abraham.” Yesu lɛbla amʋ́ ɔbɛɛ, “Nɩ Abraham abi mlɩgyi a, tɛkɩ mlɩ bwɛhɛ lɛlɩan Abraham.

⁴⁰ Mlɩdekleá mlɔ́mɔ mɩ, tsufɛ ndɛ mlɩ ɔnɔkwalɩá nonu tsu Bulu wa bla. Abraham mɔbwɛ alɩ!

⁴¹ Mlɩ sɩ bwɛhɛ mlɩdɛbwɛ.” Bɛbla Yesu bɛɛ, “Megyi mbʋa bɔtɔ kwɩɩ anɩ. Bulu onuto gyi anɩ Sɩ. Anɩmá ɔsɩ ɔkʋkʋ tsɩa mʋtɔ.”

⁴² Yesu lɛbla amʋ́ ɔbɛɛ, “Nɩ mlɩ Sɩ gyi Bulu a, tɛkɩ mlɩtɔdwɛ mɩ, tsufɛ mʋ wa notsu ba. Mʋlɔwa mɩ sɩsɩ. Megyi mɩ onuto tumitɔ nɛba.

⁴³ Ntogyi sʋ mlɩmɛdɛ mɩ asʋn blɩhɛ asɩ nu? Mlɩmɛdɛ mʋ́ asɩ nu, tsufɛ mɩ asʋn dɛ mlɩ asʋtɔ wɔ.

⁴⁴ Ɔbʋnsam gyi mlɩ sɩ. Mʋ́ sʋ mlɩtekleá mlɔ́bwɛ tɔá mlɩ sɩ tekle. Aha ɔmɔpʋ ogyi tsu nfiasɩ. Ɔtamabuo ɔnɔkwalɩ. Mʋ́ sʋ ɔnɔkwalɩ kʋkʋ ɩma mʋtɔ. Nɩ ɔwa afunu a, mʋ tsiatɔ ɔwan ɔdɛlɛ, tsufɛ ofunupʋ ogyi. Mʋgyi afunupʋ fɛ́ɛ́ ɔsɩ nɩ.

⁴⁵ Tamɛ ntɛblɩ ɔnɔkwalɩ. Mʋ́ sʋ mlɩtamahɔ mɩ asʋnsʋ gyi nɩ.

⁴⁶ Mlɩtɔ ma ɔbɛ́talɩ suna ánɩ́ lakpan ɔbwɛpʋ ngyi? Nɩ ndɛ ɔnɔkwalɩ blɩ a, mʋ́ ntogyi mlɩmɔ́ɔhɔ mɩ gyi?

⁴⁷ Ɔha ánɩ́ otsu Bulu wa tɛyaa asʋ nu mʋ asʋn. Mlɩ mʋ́ mlɩmotsu mʋ wa. Mʋ́ sʋ mlɩtamayaa asʋ nu mʋ asʋn nɩ.”

Yesu Mʋa Nanain Abraham

⁴⁸ Yudafɔ amʋ bɛbla mʋ bɛɛ, “Nɩ ablɩ anɩaa, Samariayin fʋgyi, ɔŋɛ lalahɛ bʋ fʋtɔ a, anɩlawa afunu?”

⁴⁹ Yesu lɛbla amʋ́ ɔbɛɛ, “Ɔŋɛ lalahɛ ma mɩtɔ. Ntobu mɩ Sɩ, tamɛ mlɩ mʋ́ mlɩtamabu mɩ.

⁵⁰ Mmɛdɛ mɩ ɩwɩ numnyam wa. Ɔha ɔkʋ bʋ ɩnʋá ɔdɛ mʋ́ dunka ha mɩ. Mʋgyi asʋn ogyipʋ wanklaan amʋ nɩ.

⁵¹ Ɔnɔkwalɩ ndɛ mlɩ bla. Ɔhagyiɔha ánɩ́ otegyi mɩ atosunahɛsʋ omóowu ɛkɛkɛɛkɛ.”

⁵² Ɩnʋ Yudafɔ amʋ bɛbla mʋ bɛɛ, “Sei anfɩ mʋ́ a, anɩlawun ánɩ́ lɛlɛ ɔŋɛ lalahɛ bʋ fʋtɔ! Abraham mʋa Bulu ɔnɔsʋ atɔɩpʋ amʋ bawu. Tamɛ fʋ mʋ́ fʋdɛblɩ fɛɛ, ɔhagyiɔha ánɩ́ otegyi fʋ atosunahɛsʋ omóowu ɛkɛkɛɛkɛ.

⁵³ Anɩ nain Abraham lowu. Fʋkɩ fɛɛ fʋdʋn mʋ? Bulu ɔnɔsʋ atɔɩpʋ amʋ ɛ bowu. Nkalɩ fʋdɛ fʋ ɩwɩ kɩ?”

⁵⁴ Yesu lɛlɛ mʋ́ ɔnɔ ɔbɛɛ, “Nɩ nɔwa mɩ ɩwɩ numnyam a, kpaalɩ igyi. Mɩ Sɩ gyi ɔha ánɩ́ ɔtɔwa mɩ numnyam. Mʋ mlɩdɛblɩ mlɩaa, ogyi mlɩ Bulu nɩ.

⁵⁵ Ɩbʋ mʋ́tɔá mlɩmeyin mʋ, tamɛ mɩ mʋ́ nyin mʋ. Nɩ nɛblɩ mbɛɛ mmeyin mʋ a, nabwɛ ofunupʋ fɛ mlɩ. Mɩ mʋ́ nyin mʋ, ntegyi mʋ asʋnsʋ.

⁵⁶ Mlɩ nain Abraham lenya ansigyi ánɩ́ mówun mɩ babɩ. Olowun mʋ́ ɛ, ansɩ legyi mʋ.”

⁵⁷ Yudafɔ amʋ bɛbla mʋ bɛɛ, “Fʋmɔkʋhɔ nfi aduenu (50) kʋraa, mʋ́ fɛɛ fɔtʋ Abraham?”

⁵⁸ Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Mbʋ ɩnʋ asa bɔkwɩɩ Abraham.”

⁵⁹ Yesu lenya blɩ alɩ pɛ, aha amʋ bɔkʋla abwi bɛɛ abʋtswɩ da mʋ mɔ. Tamɛ Yesu lɔbwɛ hɩɛɛ, dalɩ Bulu ɔtswɛkpa wunsɩnɛsʋ ɩnʋ.