Yohane 7 - Bulu Ntam Pɔpwɛ mʋ́a Israel Ɩlʋ

Yesu Mʋa Mʋ Apio Yinhɛ

¹ Mʋ́ ɔma a, Yesu letsia ki Galilea ɔmátɔ. Omekleá ɔbɔ́yɔ Yudea ɔmátɔ, tsufɛ Yudafɔ ahandɛ amʋ bʋdɛ mʋ tɛ abʋmɔ mʋ.

² Tamɛ Yudafɔ Kantankpatɔtsia Nkegyi lafʋn.

³ Mʋ́ sʋ mʋ apio yinhɛ bɛbla mʋ bɛɛ, “Natɩ yɔ Yudea nkɛ amʋ ogyikpa, mɛnɩ fʋ abuopʋ amʋʋ bʋbʋ ɩnʋ amʋ ɛ bówun ofula ánɩ́ fʋdɛbwɛ.

⁴ Ɔha ánɩ́ odekleá aha bʋbɩ mʋ gyumagyihɛ tamaŋain ɩwɩ. Ɩnɩá fʋdɛ ntobiá igyi alɩ bwɛ a, wuna lɛ mʋ́ suna, ɔyɩ fɛ́ɛ́ abʋwun.”

⁵ (Mʋ apio amʋ kʋraa bʋmɔhɔ mʋ gyi. Mʋ́ sʋ bɛbla mʋ alɩ nɩ.)

⁶ Ɩnɩ sʋ Yesu lɛbla amʋ́ ɔbɛɛ, “Brɛá nɔ́yɔ ɩnʋ mɔkʋnya fʋn. Mlɩ mʋ́ mlɛ́talɩ yɔ ɩnʋ bregyibrɛ.

⁷ Ɔyɩtɔfɔ bʋmɛ́ɛtalɩ lu mlɩ, tamɛ mɩ mʋ́ bʋdɛ mɩ lu, tsufɛ ndɛ amʋ́ ɩla lɛ.

⁸ Mlɩyɔ nkɛ amʋtɔ. Mɩ mʋ́ mmɔkʋnya yɔ, tsufɛ mɩ brɛ mɔkʋfʋn.”

⁹ Yesu lɛblɩ asʋn anfɩ ta a, olesi tsia Galilea ɔmátɔ.

Yesu Kantankpatɔtsia Nkɛ Amʋ Ogyikpa Yɔ

¹⁰ Tamɛ brɛá Yesu apio amʋ bɛnatɩ yɔ nkɛ amʋ ogyikpa a, mʋ ɛ oleŋain ɩwɩ yɔ ɩnʋ.

¹¹ Yudafɔ ahandɛ amʋ bodunka mʋ nkɛ amʋ ogyikpa, bʋdɛ aha fɩtɛ bɛɛ, “Oyin amʋ mɛ?”

¹² Ɔdɔm amʋ bɛblɩ asʋn tsɔtsɔɔtsɔ nklobitɔ tsu Yesu ɩwɩ. Akʋ bɛɛ, “Ɔha wanklaan ogyi.” Akʋ ɛ bɛɛ, “Ɛkɛkɛɛkɛ, ɔdɛ aha mlɛ.”

¹³ Tamɛ amʋ́tɔ ɔhaa mɛtalɩ blɩ mʋ ɩwɩ asʋn kʋklʋ aha abʋnu, tsufɛ bʋdɛ Yudafɔ ahandɛ amʋ ifu nya.

¹⁴ Brɛá bowie nkɛ amʋ nsɩnɛ a, Yesu lɔdʋ wie Bulu ɔtswɛkpa wunsɩnɛsʋ ɩnʋ yefi atɔ suna asɩ.

¹⁵ Mʋ atosunahɛ lobwie Yudafɔ ahandɛ amʋ ɔnɔ. Mʋ́ sʋ bɛfɩtɛ aba bɛɛ, “Oyin anfɩ mɔkʋkasɩ ɔwʋlʋ yɔ nkpa. Nkalɩ ɩlɔbwɛ asa ɔlɛbɩ ɔwʋlʋ alɩ?”

¹⁶ Yesu lɛlɛ mʋ́ ɔnɔ ɔbɛɛ, “Megyi mɩ wa atosunahɛ anfɩ itsu. Itsu Bulu wa. Mʋlɔwa mɩ sɩsɩ.

¹⁷ Nɩ ɔkʋ dekleá ɔbɔ́bwɛ Bulu apɛ a, obówun nɩ atosunahɛ anfɩ itsu mɩ wa ntɛ Bulu wa.

¹⁸ Ɔha ánɩ́ ɔdɛ mʋ onuto asʋn blɩ dɛ mʋ numnyam dunka. Tamɛ nɩ ɔkʋ todunka numnyam ha ɔha ánɩ́ ɔlɔwa mʋ sɩsɩ a, ɔnɔkwalɩpʋ ɔha amʋ gyi. Ɔtamawa afunu.

¹⁹ Yɛ Mose lɔpʋ mbla amʋ ba mlɩ a? Tamɛ mlɩtɔ ɔkʋkʋ mɛdɛ mʋ́sʋ gyi. Ntogyi sʋ mlɩdekleá mlɔ́mɔ mɩ?”

²⁰ Ɩnʋ ɔdɔm amʋ bɛbla mʋ bɛɛ, “Ɔŋɛ lalahɛ bʋ fʋtɔ! Ma dekleá ɔbɔ́mɔ fʋ?”

²¹ Yesu lɛbla amʋ́ ɔbɛɛ, “Ofula kʋlɛ pɛ nɔbwɛ ɔkpʋnʋ ɔdakɛ, mlɩ fɛ́ɛ́ ɔnɔ lobwie mlɩ.

²² Mose lɔwa mbla ha mlɩ ɔbɛɛ, mlɩtɩn kete. (Ɩbʋ mʋ́tɔá megyi Mose lɔtsɔ kete tɩn, mlɩ anain lefi mʋ́ asɩ.) Yɛ mʋ́ sʋ mlɩtɛtɩn aha kete ɔkpʋnʋ ɔdakɛ nɩ a?

²³ Nɩ mlɩdɛ kete tɩn ɔkpʋnʋ ɔdakɛ, mɛnɩ mlɩmɔ́ɔkʋsʋ lɩɩ Mose mbla amʋsʋ a, ntogyi sʋ mlɩlanya ɔblɔ mɩsʋ mlɩaa, natsa nyankpʋsa kɛɩn ɔkpʋnʋ ɔdakɛ?

²⁴ Mlɩyɔ asʋntɔ wanklaan, asa amlɩha ɩpɔn. Mlɩpʋ ɔnɔkwalɩ gyi asʋn.”

Yesu Ɩwɩ Nwɛngyi

²⁵ Yerusalemfɔ akʋ bɛfɩtɛ amʋ́ ɩwɩ bɛɛ, “Megyi oyin anfɩ Yudafɔ ahandɛ bʋdedunka abʋmɔ nɩ?

²⁶ Megyi mʋ lɩɩ ahatɔ ɔdɛtɔɩ, amʋ́tɔ ɔkʋkʋ mɛkpla mʋ a? Ntɛ ɩlawankɩ amʋ́ ánɩ́ mʋgyi Kristo, (ɔha amʋʋ Bulu lada mʋ ofuli amʋ) nɩ?

²⁷ Oyin anfɩ mʋ́ a, anɩ fɛ́ɛ́ anɩyin ɔtɩnɛá otsu, tamɛ nɩ Kristo amʋ ɔba a, ɔhaa mɛ́ɛbɩ ɔtɩnɛá otsu.”

²⁸ Brɛá Yesu bʋ mʋ́sʋ ɔdɛ atɔ amʋ suna Bulu ɔtswɛkpa wunsɩnɛsʋ ɩnʋ a, olotsu ɔnɔ fʋa blɩ ɔbɛɛ, “Mlɩyin mɩ, mlɩyin ɔtɩnɛá notsu, tamɛ megyi mɩ onuto tumisʋ nɛba. Ɔnɔkwalɩpʋ ɔha amʋʋ ɔlɔwa mɩ sɩsɩ amʋ gyi. Mlɩmeyin mʋ.

²⁹ Tamɛ mɩ mʋ́ nyin mʋ, tsufɛ mʋlɔwa mɩ sɩsɩ. Mʋ wa notsu ba.”

³⁰ Ɩnʋ bekle abʋkɩta mʋ, tamɛ bʋmɔpʋ ɩbɩ da mʋ, tsufɛ mʋ brɛ mɔkʋfʋn.

³¹ Tamɛ amʋ́tɔ aha tsɔtsɔɔtsɔ bɔhɔ mʋ gyi. Mʋ́ sʋ bɛfɩtɛ bɛɛ “Nɩ Kristo amʋ ɔba a, ɔbɛ́talɩ bwɛ osuna dʋn mʋ́ anfɩ oyin anfɩ dɛbwɛ?”

Bɔwa Bɛɛ Bʋkɩta Yesu

³² Brɛá Farisifɔ amʋ bonuá ɔdɔm amʋ bʋdɛ Yesu ɩwɩ asʋn blɩ nklobitɔ a, amʋ́a Bulu igyi ahapʋ dɛhɛn amʋ bɔwa Bulu ɔtswɛkpa agyopʋ bɛɛ bʋkɩta Yesu.

³³ Ɩnɩ sʋ Yesu lɛbla amʋ́ ɔbɛɛ, “Ɩlasi nkɛ kpalobi pɛ nétsia mlɩ wa. Mʋ́ ɔma a, néyinki yɔ ɔha amʋʋ ɔlɔwa mɩ sɩsɩ amʋ wa.

³⁴ Mlódunka mɩ, tamɛ mlɩmóowun mɩ. Mlɩmɛ́ɛtalɩ ba ɔtɩnɛá mbʋ ɛ ɛkɛkɛɛkɛ.”

³⁵ Yudafɔ ahandɛ amʋ bɛfɩtɛ aba bɛɛ, “Nkʋnʋ oyin anfɩ obótu ɔkpa yɔ, sʋ abódunka mʋ anɩmóowun mʋ? Ntɛ odekleá ɔbɔ́yɔ Grikifɔ awulu amʋʋ anɩ pɩ badasaɩn yɔ mʋ́sʋ amʋsʋ, ntɛ obóyesuna Grikifɔ amʋ atɔ?

³⁶ Asʋn anfɩ ɔdɛblɩ ɛ asɩ mɛ? Ɔbɛɛ, ‘Mlódunka mɩ, tamɛ mlɩmóowun mɩ. Mlɩmɛ́ɛtalɩ ba ɔtɩnɛá mbʋ ɛ.> ”

Nkpa Ntsu

³⁷ Nkɛ amʋ ɛkɛ trahɛá igyi ɛkɛ titriu a, Yesu lɔkʋsʋ lɩɩ kplʋn blɩ ɔbɛɛ, “Nɩ ɔmɛwʋlɩ dɛ ɔkʋ a, ɔba mɩ wa obónun ntsu.

³⁸ Ɔhagyiɔha ánɩ́ ɔlɔhɔ mɩ gyi a, ‘Nkpa ntsu bɔ́wɩ dalɩ mʋtɔ.> Alɩ bɔwanlɩn wa Bulu asʋn amʋtɔ nɩ.”

³⁹ (Ɔŋɛ Wankɩhɛ amʋʋ Bulu ɔbɛ́ha aha ánɩ́ bɔ́hɔ mʋ gyi amʋ ɩwɩ asʋn ɔdɛblɩ. Alɩ brɛ amʋtɔ a, Ɔŋɛ Wankɩhɛ amʋ mɔkʋnya ba, tsufɛ Bulu mɔkʋnya wa Yesu numnyam.)

Aha Amʋtɔ Leye

⁴⁰ Brɛá ɔdɔm amʋ bonu Yesu asʋn blɩhɛ anfɩ a, amʋ́tɔ akʋ bɛblɩ bɛɛ, “Lɛlɛ, Bulu ɔnɔsʋ ɔtɔɩpʋ amʋʋ anɩdɛ mʋ ɔkpa kɩ amʋ nɩ.”

⁴¹ Akʋ ɛ bɛɛ, “Kristo amʋ nɩ!” Tamɛ amʋ́tɔ akʋ ɛ bɛblɩ bɛɛ, “Yɛ megyi Galilea ɔmátɔ Kristo amʋ obótsu o.

⁴² Bɔwanlɩn wa Bulu asʋn amʋtɔ bɛɛ, Owie Dawid abusuantɔ Kristo amʋ ɔbɛ́dalɩ tsu. Bɔ́kwɩɩ mʋ Betlehem, Dawid wulutɔ.”

⁴³ Ɩna Yesu ɩwɩ asʋn anfɩ sʋ ɩkʋlɛbwɛ metsia amʋ́tɔ.

⁴⁴ Amʋ́tɔ akʋ bekle abʋkɩta Yesu, tamɛ ɔhaa mɔpʋ ɩbɩ da mʋ.

Yesu Máhogyi

⁴⁵ Ɔma-ɔma a, Bulu ɔtswɛkpa agyopʋ amʋʋ bɔwa sumbi amʋ bɛsanki ba Bulu igyi ahapʋ dɛhɛn pʋ́ Farisifɔ amʋ wa. Bɛfɩtɛ agyopʋ amʋ bɛɛ, “Ntogyi sʋ mlɩmɛkɩta mʋ ba?”

⁴⁶ Bɛlɛ mʋ́ ɔnɔ bɛɛ, “Ɔhaa mɔkʋtɔɩ fɛ oyin anfɩ kɩ!”

⁴⁷ Farisifɔ amʋ bɛfɩtɛ amʋ́ bɛɛ, “Mʋ́ sʋ oyin amʋ lamlɛ mlɩ ɛ.

⁴⁸ Mlɩlawun ɔhandɛ ntɛ Farisiyin ɔkʋ lahɔ mʋ gyi kɩ?

⁴⁹ Ɛkɛkɛɛkɛ! Ɔdɔm anfɩ bʋmeyin Mose mbla amʋ ɩwɩ tɔtɔ. Mʋ́ sʋ Bulu ɔlwɩɩ amʋ́.”

⁵⁰ Ɩnʋ Farisifɔ amʋtɔ ɔkʋlɛ, ogyi Nikodemo amʋʋ ɔlɔyɔ Yesu wa onye amʋ lɛfɩtɛ amʋ́ ɔbɛɛ,

⁵¹ “Anɩ mbla lɛha ɔkpa ánɩ́ abɛ́ha ɔkʋ ɩpɔn asa abɛ́fɩtɛ mʋ ɔnɔtɔ asʋn nu?”

⁵² Bɛfɩtɛ mʋ bɛɛ, “Galileayin fʋ ɛ fʋgyi? Kɩ Bulu asʋn amʋtɔ wanklaan. Fówun ánɩ́ Bulu ɔnɔsʋ ɔtɔɩpʋ ɔkʋkʋʋkʋ móotsu Galilea ɔmátɔ.”

⁵³ [Ɩnʋ amʋ́ fɛ́ɛ́ bɛnatɩ yɔ woyitɔ.