Yohane 4 - Bulu Ntam Pɔpwɛ mʋ́a Israel Ɩlʋ

Yesu Mʋa Samariayintse Ɔkʋ

¹ Farisifɔ bonuá Yesu dɛ abuopʋ nya, bɔ amʋ́ asu dʋn Yohane.

² (Tamɛ megyi Yesu onuto dɛ amʋ́ bɔ. Mʋ akasɩpʋ dɛ amʋ́ bɔ.)

³ Brɛá Yesu lɛbɩá Farisifɔ amʋ banu asʋn anfɩ a, ɔlɛdalɩ Yudea ɔmátɔ yinki yɔ Galilea ɔmátɔ.

⁴ Tamɛ ilehian ánɩ́ ɔbɔ́tsʋn Samariafɔ ɔsʋlʋsʋ.

⁵ Yesu loyowie Sikar ánɩ́ igyi Samaria wulu ɩkʋtɔ. Wulu anfɩ bʋ manta ɔsʋlʋ kʋá Yakob lɔpʋha mʋ bi Yosef bɩmbɩ amʋ.

⁶ Ɩnʋ Yakob ibun bʋ nɩ. Ɔkpa amʋ bʋ ɩfɔ. Mʋ́ sʋ Yesu lotsutsua obowie ɩnʋ a, ɩlapian mʋ. Mʋ́ sʋ oletsia ibun amʋ asɩ. Alɩ brɛ amʋtɔ a, ɩlabwɛ fɛ ɔpawisʋ.

⁷ Ɩnʋ a, Samariayintse ɔkʋ lɛba ntsu ɔsakpa. Yesu lɔkʋlɩ mʋ ɔbɛɛ, “Nobwii ɩpa, ha mɩ ntsu annun.”

⁸ Alɩ brɛ amʋtɔ a, Yesu akasɩpʋ bɔyɔ wulutɔ yɛhɔ atogyihɛ.

⁹ Yudafɔ bʋtamapʋ ɩbɩ da Samariafɔ nwɛ nun ntsu. Mʋ́ sʋ ɔtsɩ amʋ lɛfɩtɛ Yesu ɔbɛɛ, “Yudayin fʋgyi, mɩ ɛ Samariayintse ngyi. Nkalɩ igyi sʋ fʋdɛ mɩ ntsu kʋlɩ?”

¹⁰ Yesu lɛlɛ mʋ́ ɔnɔ ɔbɛɛ, “Nɩ fʋyin Bulu atokiehɛ pʋ́ ɔha ánɩ́ ɔdɛ fʋ ntsu kʋlɩ a, tɛkɩ fɔ́kʋlɩ mʋ, ɔbɛ́ha fʋ ntsuá ɩtɛha nkpa.”

¹¹ Ɔtsɩ amʋ lɛbla mʋ ɔbɛɛ, “Anɩ sɩ, fʋmɛdɛ ɔfɛ, ibun anfɩtɔ ɛ bʋ oklu. Nkʋnʋ fénya ntsuá ɩtɛha nkpa?

¹² Fʋdʋn anɩ nain Yakob ánɩ́ olokwi ibun anfɩ ha anɩ, mʋa mʋ abi pʋ́ amʋ́ mbwɩ bonun ntsu mʋ́tɔ?”

¹³ Yesu lɛlɛ mʋ́ ɔnɔ ɔbɛɛ, “Ɔmɛwʋlɩ bɛ́lakɩta ɔhagyiɔha ánɩ́ otonun ibun anfɩtɔ ntsu.

¹⁴ Tamɛ ɔhagyiɔha ánɩ́ obónun ntsuá nɛ́ha mʋ a, ɔmɛwʋlɩ mɛ́ɛtra kɩta mʋ ɛkɛkɛɛkɛ. Ntsu amʋʋ nɛ́ha mʋ amʋ ɩbɛ́damli ntsu ɔwɩkpa mʋtɔá ɩbɛ́lɩn ha nkpa ánɩ́ ɩtamata.”

¹⁵ Ɔtsɩ amʋ lɛbla mʋ ɔbɛɛ, “Anɩ sɩ, ha mɩ ntsu anfɩ kʋ, mɛnɩ ɔmɛwʋlɩ mɛ́ɛtra kɩta mɩ, mmɛ́ɛtra ba nfɩ ɛ bɛsa ntsu.”

¹⁶ Yesu lɛbla mʋ ɔbɛɛ, “Yɛtɩ fʋ klu amlɩba.”

¹⁷ Ɔtsɩ amʋ lɛlɛ mʋ́ ɔnɔ ɔbɛɛ, “Mma oklu.” Yesu lɛbla mʋ ɔbɛɛ, “Ɔnɔkwalɩ igyi fablɩ ánɩ́ fʋma oklu.

¹⁸ Tsufɛ fatsia aklu tse nu kɩ. Megyi fʋ klu gyi oyin amʋʋ fʋa mʋnyɔ mlɩna sei amʋ ɛ. Fawa ɔnɔkwalɩ.”

¹⁹ Mʋʋ ɔtsɩ amʋ lɛbla mʋ ɔbɛɛ, “Anɩ sɩ, nawun ánɩ́ Bulu ɔnɔsʋ ɔtɔɩpʋ fʋgyi.

²⁰ Anɩ anain Samariafɔ bosum Bulu ɩbʋ anfɩsʋ, tamɛ mlɩ Yudafɔ mʋ́ mlɩaa, Yerusalem koun lehian ánɩ́ ɔhagyiɔha obósum Bulu.”

²¹ Yesu lɛbla mʋ ɔbɛɛ, “Ɔtsɩ, hɔ mɩ asʋn anfɩsʋ gyi. Brɛ kʋ ɩbɛ́ba ánɩ́ aha bʋmɛ́ɛtra sum Ɔsɩ amʋ ɩbʋ anfɩsʋ ntɛ Yerusalem.

²² Mlɩ Samariafɔ mlɩmeyin ɔha ánɩ́ mlɩdesum. Anɩ Yudafɔ mʋ́ anɩyin ɔha ánɩ́ anɩdesum, tsufɛ Yudafɔsʋ ɩna nkpahɔ lɛba ɔyɩtɔ.

²³ Brɛ ɩba, ɩlafʋn ta ánɩ́ Bulu asumpʋ anɔkwalɩpʋ bósum Ɔsɩ amʋ ɔŋɛtɔ pʋ́ ɔnɔkwalɩsʋ. Tsufɛ aha anfɩ odu Ɔsɩ amʋ dedunka ɔbɛɛ, bʋsum mʋ nɩ.

²⁴ Ɔŋɛ Bulu gyi. Mʋ́ sʋ ilehian ánɩ́ aha ánɩ́ bʋtosum mʋ bósum mʋ ɔŋɛtɔ pʋ́ ɔnɔkwalɩsʋ.”

²⁵ Ɔtsɩ amʋ lɛbla mʋ ɔbɛɛ, “Nyin ánɩ́ Mesia, (ɔha amʋʋ Bulu lada mʋ ofuli amʋ) ɔbɛ́ba. Nɩ ɔba a, ɔbɛ́lɛ asʋngyiasʋn asɩ suna anɩ.”

²⁶ Mʋʋ Yesu lɛbla mʋ ɔbɛɛ, “Mɩ anfɩ ndɛ fʋ asʋn bla anfɩ gyi Kristo amʋ nɩ.”

²⁷ Ɩnʋ akasɩpʋ amʋ bɛsanki tsu wulutɔ ba bɔtʋ amʋ́. Ɩlɔwa amʋ́ wanwan ánɩ́ bawun Yesu mʋa ɔtsɩ bʋlɩɩ bʋdɛtɔɩ. Tamɛ amʋ́tɔ ɔkʋkʋ mɛtalɩ fɩtɛ ɔbɛɛ, “Ntɔ fʋdedunka tsu mʋ wa, ntɛ ntogyi sʋ fʋa ɔtsɩ amʋ mlɩdɛtɔɩ?”

²⁸ Ɔtsɩ amʋ lesi mʋ ɔlɔ yaɩ ɩnʋ, yinki yɔ wulutɔ yɛbla aha ɔbɛɛ,

²⁹ “Mlɩba amlɩbɛkɩ oyin ɔkʋá alabla mɩ tɔá nabwɛ kɩ fɛ́ɛ́. Mlɩlahogyi mlɩaa, megyi Kristo amʋ nɩ?”

³⁰ Mʋ́ sʋ aha bɛdalɩ tsu wulu amʋtɔ bɛkɩ Yesu.

³¹ Alɩ brɛ amʋtɔ a, mʋ akasɩpʋ amʋ bʋdɛ mʋ kokoli bɛɛ, ogyi atɔ.

³² Tamɛ ɔlɛbla amʋ́ ɔbɛɛ, “Mbʋ tɔá négyi, mlɩmeyin mʋ́ ɩwɩ kʋkʋʋkʋ.”

³³ Mʋ́ sʋ akasɩpʋ amʋ bɛfɩtɛ aba bɛɛ, “Ntɛ ɔkʋ labɛha mʋ tɔkʋ alagyi?”

³⁴ Yesu lɛbla amʋ́ ɔbɛɛ, “Mɩ atogyihɛ gyi ánɩ́ nɔ́bwɛ tɔá ɔha amʋʋ ɔlɔwa mɩ sɩsɩ amʋ ɔbɛɛ mbwɛ, ammɔ mʋ́ ɔnɔ.

³⁵ Yɛ mlɩtɛblɩ mlɩaa, ‘Tsra ana pɛ ɩlasi ayo tɩnbɩ bɔ́fʋn?> Tamɛ ndɛ mlɩ bla mbɛɛ, mlɩtsu ansɩ kɩ adɔbʋ amʋtɔ, ayo amʋ ɩlablɩ fʋn tɩn.

³⁶ Bʋdɛ mʋ atɩnpʋ akɔ ka dodo. Bʋdɛ mʋ́ tɩn yaɩ ha nkpa ánɩ́ ɩtamata. Mʋ́ sʋ ansɩ bégyi adupʋ mʋ́a atɩnpʋ amʋ fɛ́ɛ́ ɛkɛwʋlɛ.

³⁷ Mʋ́ sʋ ɔnɔkwalɩ igyi bʋtɛblɩ bɛɛ, ‘Ɔkʋ todu, ɔkʋ ɛ tɛtɩn.>

³⁸ Nɔwa mlɩ mbɛɛ, mlɩyɛtɩn ayoá mlɩmɔyɔ mʋ́ odukpa. Aha bamba lɔyɔ mʋ́ ɩwɩ agyʋma, ɩlawa labi ha mlɩ.”

³⁹ Samariafɔá bʋbʋ wulu amʋtɔ tsɔtsɔɔtsɔ bɔhɔ Yesu gyi, adansɩɛ amʋʋ ɔtsɩ amʋ legyi suna amʋ́ ɔbɛɛ, “Alabla mɩ togyitɔá nabwɛ mɩ nkpatɔ fɛ́ɛ́” amʋ sʋ.

⁴⁰ Ɩnɩ sʋ brɛá bɛba Yesu wa a, bokokoli mʋ bɛɛ, otsia amʋ́ wa. Yesu letsia ɩnʋ nkenyɔ.

⁴¹ Yesu asʋn blɩhɛ sʋ Samariafɔ amʋ tsɔtsɔɔtsɔ ɛ bɛlahɔ mʋ gyi.

⁴² Bɛbla ɔtsɩ amʋ bɛɛ, “Megyi fʋ asʋn amʋ sʋ anɩlɛtra hɔ mʋ gyi ngya o. Anɩ onuto anɩlanu, anɩlawun ánɩ́ lɛlɛ oyin anfɩ gyi ɔyɩtɔ Nkpa Ɔhɔpʋ amʋ nɩ.”

Ɔhandɛ Ɔkʋ Mʋ Bi Ɩlɔ Tsa

⁴³ Nkenyɔ amʋ ɔma a, Yesu lɛnatɩ yɔ Galilea ɔmátɔ.

⁴⁴ (Tsufɛ mʋ onuto olowun blɩ ɔbɛɛ, “Bʋtamabu Bulu ɔnɔsʋ ɔtɔɩpʋ mʋ onuto ɔmátɔ.”)

⁴⁵ Brɛá olowie Galilea a, ɩnʋfɔ bɔhɔ mʋ atuu, tsufɛ amʋ́ onuto bɔyɔ Yerusalem Yudafɔsʋ Katsʋn Nkɛ amʋ ogyikpa. Mʋ́ sʋ bowun tɔá ɔlɔbwɛ ɩnʋ fɛ́ɛ́.

⁴⁶ Yesu lɛtra yinki yɔ Galilea ɔmátɔ, Kana wulutɔ. Ɔtɩnɛ amʋʋ ɔlɛdamli ntsu bwɛ nta amʋ. Ɔmá ɔhandɛ ɔkʋ tsie Kapernaum wulutɔ. Ɔbʋ obi yinhɛ ɔkʋá ɔda ɔdɛlɔ.

⁴⁷ Brɛá ɔhandɛ amʋ lonuá Yesu latsu Yudea ba Galilea a, olegya mʋ ɔkpa yokokoli mʋ ɔbɛɛ, mʋ bi yinhɛ lawu ta, ɔkplɩ ba Kapernaum, ɔbɛ́tsa mʋ ɩlɔ ha mʋ.

⁴⁸ Yesu lɛbla mʋ ɔbɛɛ, “Mʋ́ sʋ nɩ mlɩmɔkʋwun osuna a, mlɩmɔ́ɔhɔ mɩ gyi ɛkɛkɛɛkɛ?”

⁴⁹ Ɔmá ɔhandɛ amʋ lɛbla mʋ ɔbɛɛ, “Owie! Nɩ anɩ ayabi mɔwa ɔsa a, kebi amʋ obówu.”

⁵⁰ Yesu lɛbla mʋ ɔbɛɛ, “Yɔ! Fʋ bi amʋ obénya nkpa!” Oyin amʋ lɔhɔ asʋn amʋʋ Yesu lɛbla mʋ amʋsʋ gyi, oleyinki ɔyɔ woyi.

⁵¹ Brɛá ɔyɔ a, mʋ asumpʋ bɛba befia mʋ, bla mʋ bɛɛ, “Fʋ bi amʋ lanya nkpa.”

⁵² Ɩnʋ ɔlɛfɩtɛ amʋ́ brɛá ɩwɩ lɔwa mʋ ɔnlɩn. Bɛbla mʋ bɛɛ, “Owisʋ amʋ lesi mʋ igye ɔpa ɔdɔ-kʋlɛtɔ.”

⁵³ Ɩnʋ a, ɔlɛkaɩn ánɩ́ alɩ brɛ amʋtɔ kɛn Yesu lɛbla mʋ ɔbɛɛ, mʋ bi amʋ obénya nkpa nɩ. Ɩnɩ sʋ mʋa mʋ woyitɔfɔ fɛ́ɛ́ bɔhɔ Yesu gyi.

⁵⁴ Ɩnɩgyi osuna nyɔsɩá Yesu lɔbwɛ brɛá olotsu Yudea ba Galilea nɩ.