Yohane 21 - Bulu Ntam Pɔpwɛ mʋ́a Israel Ɩlʋ

Yesu Ɩwɩɔwanlɛ Suna Akasɩpʋ Abasienɔ

¹ Ɩnɩ ɔma a, Yesu lɛtra lɛ ɩwɩ ɔwan suna mʋ akasɩpʋ Tiberia ɔpʋ ɔnɔ tsʋn ɔkpa anfɩsʋ.

² Simon Petro mʋa Toma ánɩ́ bʋtɛlatɩ mʋ Tabi, Nataniel, otsu Kana wuluá ɩbʋ Galilea ɔmátɔ, Sebedeo abi amʋ pʋ́ akasɩpʋ abanyɔ ɛ befia.

³ Simon Petro lɛkla amʋ́ ɔbɛɛ, “Nɔyɔ ɔpʋsʋ yɛlɛ aye.” Bɛbla mʋ bɛɛ, “Anɩ ɛ abóbuo fʋ yɔ.” Ɩnɩ sʋ boyowie ɔklʋntɔ natɩ. Tamɛ betsia ntsusʋ onye amʋ fɛ́ɛ́, bʋmenya tɔtɔ.

⁴ Brɛá ɔyɩ ɩba bɛkɛ a, bowun ɔkʋ lɩɩ ɔpʋ amʋ ɔnɔ. Bʋmɛbɩá Yesu nɩ.

⁵ Mʋʋ Yesu lɛfɩtɛ amʋ́ ɔbɛɛ, “Mɩ anyawie, mlɩmenya tɔtɔ?” Bɛlɛ mʋ́ ɔnɔ bɛɛ, “Ee!”

⁶ Yesu lɛbla amʋ́ ɔbɛɛ, “Mlɩtswɩ asawu amʋ wa gyɔpɩsʋ fʋn, mlɛ́lɛ aye.” Mʋ́ sʋ bɔtswɩ wa ɩnʋ. Aye lɔbʋla asawu amʋ, bʋmɛtalɩ bɩtɩ mʋ́ lɛ.

⁷ Mʋʋ ɔkasɩpʋ amʋʋ Yesu tɛhɩɛ dwɛ amʋ lɛbla Petro ɔbɛɛ, “Anɩ Wie Yesu nɩ!” Brɛá Petro lonuá anɩ Wie Yesu nɩ a, olotsu mʋ atadɩɛ mla ɩwɩ. (Tsufɛ ɔlɔwɔɩ mʋ atadɩɛ tswɩ), olotu wie ntsu amʋtɔ gyuaa, ɔdɛpɩtɩ ɔyɔ Yesu wa.

⁸ Tamɛ akasɩpʋ atrahɛ amʋʋ bʋbʋ ɔklʋntɔ amʋ bɛbɩtɩa asawu amʋʋ aklɛmɛtɩ bʋbɔ mʋ́ amʋ ba otsubunɔ, tsufɛ bʋma ɩfɔ ɔpʋ ɔnɔ ɩnʋ. Mʋ́ ɩfɔtɔ bɔ́bwɛ fɛ ayabi lafasa (300).

⁹ Brɛá bowie ɔpʋ ɔnɔ a, bowun ánɩ́ bawa agyawunu ogya, bʋdɛ iye tɔ mʋ́sʋ, bodobodo ɛ da mʋ́ asɩ.

¹⁰ Mʋʋ Yesu lɛbla amʋ́ ɔbɛɛ, “Mlɩlɛ aklɛmɛtɩ amʋʋ mlɩlalɛ amʋ kʋ ba.”

¹¹ Mʋ́ sʋ Simon Petro leyinki dʋ wie ɔklʋn amʋtɔ, ɔlɛyɛbɩtɩa asawu amʋʋ aklɛmɛtɩ akpɔnkpɔntɩ bʋbɔ mʋ́ amʋ bɔtswɩ ɔpʋ ɔnɔ. Aklɛmɛtɩ amʋ bʋgyi lafakʋlɛ aduenu-sa (153). Ɩnɩá bʋtsɔ o a, asawu amʋ ɩmɛtɩtɩ.

¹² Yesu lɛtɩ amʋ́ ɔbɛɛ, “Mlɩbegyi atɔ.” Amʋ́tɔ ɔkʋkʋ mɛtalɩ wa klʋn fɩtɛ mʋ ɔbɛɛ, “Ma fʋgyi?” Tsufɛ bɛbɩá amʋ́ Wie nɩ.

¹³ Yesu lotsu bodobodo amʋ ha amʋ́, olotsu aye amʋ ɛ ha amʋ́.

¹⁴ Bulu lɔkʋsʋa Yesu tsu afulitɔ ɔma a, ɩnɩgyi otse sasɩá ɔlɛlɛ ɩwɩ ɔwan suna mʋ akasɩpʋ amʋ nɩ.

Yesu Mʋa Petro

¹⁵ Brɛá begyi nyankɩ atogyihɛ amʋ ta a, Yesu lɛfɩtɛ Simon Petro ɔbɛɛ, “Yohane mʋ bi Simon, fʋtɔdwɛ mɩ dʋn fʋ aba anfɩ loo?” Petro lɛlɛ mʋ́ ɔnɔ ɔbɛɛ, “Ee, mɩ Wie, fʋyin ánɩ́ ntɔdwɛ fʋ.” Yesu lɛbla mʋ ɔbɛɛ, “Kɩ mɩ akufabi amʋsʋ.”

¹⁶ Ɔlɛtra fɩtɛ Petro otse nyɔsɩ ɔbɛɛ, “Yohane mʋ bi Simon, fʋtɔdwɛ mɩ?” Petro lɛlɛ mʋ́ ɔnɔ ɔbɛɛ, “Ee, mɩ Wie, fʋyin ánɩ́ ntɔdwɛ fʋ.” Yesu lɛbla mʋ ɔbɛɛ, “Kpa mɩ akufa amʋ.”

¹⁷ Yesu lɛfɩtɛ mʋ otse sasɩ ɔbɛɛ, “Yohane mʋ bi Simon, fʋtɔdwɛ mɩ lɛlɛ?” Ɩlɛhan Petro, tsufɛ otse sasɩ Yesu lafɩtɛ mʋ ɔbɛɛ, “Fʋtɔdwɛ mɩ?” a. Mʋ́ sʋ ɔlɛlɛ mʋ́ ɔnɔ ɔbɛɛ, “Mɩ Wie, fʋ onuto fʋyin togyitɔ. Yɛ fʋyin ánɩ́ ntɛhɩɛ dwɛ fʋ o!” Yesu lɛbla mʋ ɔbɛɛ, “Kɩ mɩ akufa amʋsʋ.

¹⁸ Ɔnɔkwalɩ ndɛ mlɩ bla. Brɛá fʋgyi ɔyasubi a, fʋ onuto fʋtɛtalɩ tsu fʋ atadɩɛ hɩhɩɛ ɩwɩ, kʋsʋ yɔ ɔtɩnɛgyiɔtɩnɛá fʋdekle. Tamɛ nɩ fɔbwɛ oyin dɛhɛn a, fɛ́tɩnkɩ ɩbɩ, ha ɔkʋ ɔbɛ́dɩda fʋ atɔ, kpa fʋ ya ɔtɩnɛá fʋmedekle.”

¹⁹ (Yesu lɛblɩ asʋn anfɩ, pʋsuna ɔkpa ánɩ́ Petro ɔbɔ́tsʋn mʋ́sʋ wu pʋwa Bulu numnyam.) Ɩnʋ ɔlɛbla Petro ɔbɛɛ, “Buo mɩ!”

Yesu Mʋa Ɔkasɩpʋá Ɔtɛhɩɛ Dwɛ

²⁰ Petro lɛdamli kɩ a, Yesu ɔkasɩpʋ amʋʋ ɔtɛhɩɛ dwɛ amʋ buo amʋ́. (Mʋgyi ɔha amʋʋ oleyinki kpɩsa mʋsʋ ntʋpwɛ atɔ ogyikpa, fɩtɛ mʋ ɔbɛɛ, “Owie, ma ɔbɛ́lɛ fʋ ha?” amʋ nɩ.)

²¹ Brɛá Petro lowun mʋ a, ɔlɛfɩtɛ Yesu ɔbɛɛ, “Mɩ Wie, ntɔ ɔbɛ́ba oyin anfɩ ɛsʋ?”

²² Yesu lɛlɛ mʋ́ ɔnɔ ɔbɛɛ, “Nɩ ndekle mbɛɛ otsia nkpa yɔfʋn brɛá néyinki ba a, fʋ asʋn igyi? Fʋ mʋ́ buo mɩ wʋlɛ!”

²³ Asʋn anfɩ lɛklɛɩ wa Yesu abuopʋ amʋtɔá alɩ ɔkasɩpʋ amʋ mʋ́ móowu. Tamɛ Yesu mɛblɩ ɔbɛɛ, omóowu. Blɩ ɔlɛblɩ ɔbɛɛ, “Nɩ ndekle mbɛɛ, otsia nkpa yɔfʋn brɛá néyinki ba a, fʋ asʋn igyi?”

²⁴ Mʋgyi ɔkasɩpʋá olowun ɩnɩ fɛ́ɛ́, ɔlɔwanlɩn mʋ́ tswɩ nɩ. Anɩyin ánɩ́ mʋ asʋn blɩhɛ anfɩ igyi ɔnɔkwalɩ.

Ɔnɔmɔ

²⁵ Atɔ tsɔtsɔɔtsɔ ɩtra bʋ ɩnʋá Yesu lɔbwɛ tsɩa ɩnɩtɔ. Nɩ bɔwanlɩn mʋ́ fɛ́ɛ́ wa nwʋlʋtɔ ɩkʋlɛ-kʋlɛ a, tɛkɩ bʋméenya nwʋlʋ amʋ ɔyaɩkpa ɔsʋlʋ anfɩsʋ. Natɔɩ ta.