Yohane 20 - Bulu Ntam Pɔpwɛ mʋ́a Israel Ɩlʋ

Yesu Kʋsʋ Tsu Afulitɔ

¹ Ndawɔtswɩtɔ ɛkɛ gyankpapʋ, igyi Kwasieda bakɛ-bakɛ, brɛá nsaɩntɔ mɔkʋtɩtɩ a, Magdalayintse Maria lɔyɔ Yesu opulakpa ɩnʋ. Olenya wie ɩnʋ alɩ olowun ánɩ́ bamina ibwi amʋ lɛ ɔbɔ amʋ ɔnɔ.

² Mʋ́ sʋ oleyinki srɩ ba ɔkasɩpʋ amʋʋ Yesu tɛhɩɛ dwɛ mʋ amʋ mʋa Simon Petro wa, bɛbla amʋ́ ɔbɛɛ, “Balɛ Yesu ɔbɔ amʋtɔ. Anɩmeyin ɔtɩnɛá bapʋ mʋ yɛwa!”

³ Mʋʋ Petro mʋa mʋnyɔ bɔpʋ ɔkpa bɔyɔ opulakpa ɩnʋ.

⁴ Amʋ́ abanyɔ amʋ fɛ́ɛ́ betsii ɔsrɩ, tamɛ ɔlɛsrɩ si Petro gyankpa yowie opulakpa ɩnʋ.

⁵ Brɛá olobun kɩ ntsan amʋtɔ a, olowun ánɩ́ ɔhrada amʋ kpan ɩda, tamɛ omebitiwie mʋ́tɔ.

⁶ Simon Petro lɔbɔtʋ mʋ, ɔlɔtsʋn bitiwie ntsan amʋtɔ, olowun ɔhrada amʋ da.

⁷ Olowun ɔhrada amʋʋ bɔpʋtɔ mʋ nwun amʋ ɛ, ilokunta ɩda ɩfʋntɔ.

⁸ Ɔkasɩpʋ amʋʋ olegyankpa wie ɩnʋ amʋ ɛ lebitiwie mʋ́tɔ, wun ɔhrada amʋ pʋ́ mʋ́ amʋʋ bɔpʋtɔ mʋ nwun amʋ alɩ olohogyi.

⁹ Brɛ amʋtɔ a, Bulu asʋn wanlɩnhɛ amʋʋ ɩlɛblɩ ɔbɛɛ, ilehian ánɩ́ Yesu ɔbɔ́kʋsʋ tsu afulitɔ amʋ mɔkʋnya wankɩ amʋ́.

¹⁰ Beyinki yɔ woyi.

Yesu Ɩwɩɔwanlɛ Suna Magdalayintse Maria

¹¹ Tamɛ Maria lesi ɔlɩɩ opulakpa ɩnʋ odesu. Brɛá odesu a, olobun kɩ ɔbɔ amʋtɔ.

¹² Ɩnʋ olowun Bulu-abɔpʋ abanyɔá bɔwa atadɩɛ fututuutu, bʋtsie ɔtɩnɛ amʋʋ bɔpʋ Yesu fuli tswɩ amʋ. Ɔkʋlɛ tsie mʋ adɩanwun, ɔkʋlɛ tsie mʋ ayabiasɩ.

¹³ Bɛfɩtɛ mʋ bɛɛ, “Amʋ́ yin, nkalɩ igyi sʋ fʋdesu?” Ɔlɛlɛ mʋ́ ɔnɔ ɔbɛɛ, “Balɛ mɩ Wie natɩ. Mmeyin ɔtɩnɛá bapʋ mʋ yɔtswɩ!”

¹⁴ Ɔlɛblɩ ta a, ɔlɛdamli kɩ ɔma. Ɔkɩ a, Yesu lɩɩ mʋ ɔma, tamɛ ɔmɛbɩá Yesu nɩ.

¹⁵ Yesu lɛfɩtɛ mʋ ɔbɛɛ, “Amʋ́ yin, nkalɩ igyi sʋ fʋdesu? Ma fʋdedunka?” Mʋ mʋ́ ɔkɩá ndobi amʋtɔ agyʋma ɔyɔpʋ nɩ. Mʋ́ sʋ ɔlɛbla Yesu ɔbɛɛ, “Anɩ sɩ, nɩ fʋlatsu mʋ yɔtswɩ ɔtɩnɛkʋ a, suna mɩ, anyetsu mʋ natɩ.”

¹⁶ Yesu lokpoli mʋ ɔbɛɛ, “Maria.” Ɔlɛdamli kɩ, kpoli Yesu Hebri ɔblɩtɔ ɔbɛɛ, “Rabuni!” (Mʋ́ asɩ gyi, “Osunapʋ.”)

¹⁷ Yesu lɛbla mʋ ɔbɛɛ, “Mápʋ ɩbɩ da mɩ, tsufɛ mmɔkʋnya yɔ ɔsʋsʋ mɩ Sɩ wa. Mboun natɩ yɛbla mɩ apio amʋ fɛɛ, nɔyɔ mɩ Sɩá ogyi mlɩ Sɩ wa. Nɔyɔ mɩ Buluá ogyi mlɩ Bulu wa.”

¹⁸ Magdalayintse Maria lɛyɛbla akasɩpʋ amʋ ɔbɛɛ, “Nawun anɩ Wie!” Ɔlɛbla amʋ́ asʋn ánɩ́ Yesu lɛbla mʋ.

Yesu Ɩwɩɔwanlɛ Suna Mʋ Akasɩpʋ

¹⁹ Kwasieda amʋ ntʋpwɛsʋ a, akasɩpʋ amʋ befia. Befin obu wa ɩwɩ, tsufɛ bʋdɛ Yudafɔ ahandɛ amʋ ifu nya. Ɩnʋ Yesu lɛbɛlɩɩ amʋ́ nsɩnɛ, ɔlɛbla amʋ́ ɔbɛɛ, “Ɩwɩ ilwii mlɩ.”

²⁰ Ɔlɛbla amʋ́ alɩ ta a, ɔlɔpʋ mʋ ɩbɩtɔ pʋ́ mʋ abɩntɔ suna amʋ́. Ansɩ legyi amʋ́, tsufɛ bawun amʋ́ Wie.

²¹ Yesu lɛtra bla amʋ́ ɔbɛɛ, “Ɩwɩ ilwii mlɩ. Alɩ amʋʋ mɩ Sɩ lawa mɩ amʋ a, alɩ ndɛ mlɩ wa nɩ.”

²² Ɩnʋ ɔlɔlʋn ɔŋɛ fʋ wʋlɩ amʋ́sʋ, bla amʋ́ ɔbɛɛ, “Mlɩhɔ Ɔŋɛ Wankɩhɛ amʋ.

²³ Nɩ mlesi aha lakpan kie amʋ́ a, Bulu lasikie amʋ́. Tamɛ nɩ mlɩmesikie amʋ́ a, Bulu méesikie amʋ́.”

Yesu Ɩwɩɔwanlɛ Suna Toma

²⁴ Brɛá Yesu lɛba a, amʋ́tɔ ɔkʋlɛá bʋtɛtɩ mʋ Toma, bʋtɛlatɩ mʋ Tabi má ɩnʋ.

²⁵ Mʋ́ sʋ akasɩpʋ atrahɛ amʋ bɛbla mʋ bɛɛ, “Anɩlawun anɩ Wie!” Tamɛ Toma lɛbla amʋ́ ɔbɛɛ, “Nɩ mmɔkʋwun mʋ ɩbɩtɔ ndatobi nlɔ amʋ, kpie osrebi wa mʋ́tɔ, kpie ɩbɩ wa mʋ abɩntɔ ɔlɔ amʋtɔ a, mmóohogyi ɛkɛkɛɛkɛ.”

²⁶ Nkekwe ɔma a, akasɩpʋ amʋ bɛtra fia obu amʋtɔ. Alɩ ɛkɛ amʋ mʋ́ a, Toma bʋ amʋ́tɔ. Befin obu amʋ, tamɛ Yesu lɛbɛlɩɩ amʋ́ nsɩnɛ, bla amʋ́ ɔbɛɛ, “Ɩwɩ ilwii mlɩ.”

²⁷ Mʋʋ ɔlɛbla Toma ɔbɛɛ, “Kɩ mɩ ɩbɩtɔ, kpie osrebi wa nfɩ. Kpie fʋ ɩbɩ wa mɩ abɩntɔ. Si nwɛn gyi, afʋhogyi!”

²⁸ Toma lɛlɛ mʋ́ ɔnɔ ɔbɛɛ, “Mɩ Wie pʋ́ mɩ Bulu!”

²⁹ Yesu lɛbla mʋ ɔbɛɛ, “Alɩ amʋʋ fawun mɩ amʋ sʋ fahogyi loo? Ansɩ bégyi aha amʋʋ bʋmɔpʋ amʋ́ ansibi wun, asa bohogyi amʋ!”

Tɔá Sʋá Bɔwanlɩn Ɔwʋlʋ Anfɩ

³⁰ Yesu lɛtra bwɛ osuna tsɔtsɔɔtsɔ mʋ akasɩpʋ amʋ ansɩtɔá bʋmɔwanlɩn wa ɔwʋlʋ anfɩtɔ.

³¹ Tamɛ bawanlɩn ɩnɩ, mɛnɩ mlóhogyiá Yesu gyi Bulu mʋ Bi Kristo amʋ. Asʋn anfɩsʋ hogyi ɔbɛ́ha mlénya nkpa ánɩ́ ɩtamata mʋ ɩdatɔ nɩ.