Yohane 19 - Bulu Ntam Pɔpwɛ mʋ́a Israel Ɩlʋ

¹ Ɩnʋ Pilato lɛha bɛkpa Yesu ya, yɛpɩtɩ mʋ atɔ wanklaan.

² Ɩsa akɔpʋ amʋ bɔlʋ obungyo-awu, bwɛ mʋ́ owiepa bun mʋ nwun, bɔwa mʋ liga pɛpɛ kʋ.

³ Ɩnʋ bɛnatɩ bwɛ mʋ ahinla bɛɛ, “Yudafɔ Owie, fʋ nkpasʋ ɔnlɩnsʋ!” Fówun bada mʋ ɩsʋtɔ kpa.

⁴ Pilato lɛtra dalɩ yɔ woyi-ɔnɔ ɩnʋ yɛbla amʋ́ ɔbɛɛ, “Nakpa mʋ nɛba mlɩ, amlɩwun ánɩ́ mmɔkʋwun lalahɛ kʋkʋ mʋ ɩwɩ.”

⁵ Brɛá Yesu lɛdalɩ ba a, obungyo-awu ɩpa amʋ bun mʋ nwun, ɔlɔwa liga pɛpɛ amʋ. Pilato lɛbla amʋ́ ɔbɛɛ, “Mʋ nɩ!”

⁶ Bulu igyi ahapʋ dɛhɛn pʋ́ Bulu ɔtswɛkpa agyopʋ amʋ benya wun mʋ pɛ, bɔsʋra okitikiti blɩ bɛɛ, “Da mʋ manta oyikpalihɛsʋ! Da mʋ manta oyikpalihɛsʋ!” Pilato lɛbla amʋ́ ɔbɛɛ, “Mlɩ onuto mlɩkpa mʋ ya, amlɩyɛda mʋ manta oyikpalihɛsʋ. Mɩ mʋ́ mmɔkʋwun lalahɛ kʋkʋ mʋ ɩwɩá nɔ́pʋha mʋ ɩpɔn.”

⁷ Yudafɔ amʋ bɛbla mʋ bɛɛ, “Anɩ mbla ɔnɔ a, ilehian ánɩ́ obówu. Tsufɛ ɔlɛblɩ ɔbɛɛ, Bulu mʋ Bi mʋgyi.”

⁸ Brɛá Pilato lonu asʋn anfɩ a, ifu lɛtra kɩta mʋ tsɩa mʋ́tɔ.

⁹ Oleyinki yɔ mʋ woyitɔ yɛfɩtɛ Yesu ɔbɛɛ, “Nkʋnʋ fotsu?” Tamɛ Yesu mɛkpla mʋ.

¹⁰ Mʋ́ sʋ Pilato lɛfɩtɛ mʋ ɔbɛɛ, “Fʋmɛ́ɛkpla mɩ? Fʋmeyin ánɩ́ mbʋ tumiá nɛ́talɩ si fʋ ntɛ nɛ́talɩ ha bɛ́da fʋ manta oyikpalihɛsʋ mɔ fʋ?”

¹¹ Yesu lɛlɛ mʋ́ ɔnɔ ɔbɛɛ, “Nɩ megyi Bulu lɛha fʋ ɔkpa a, tɛkɩ fʋma tumi kʋkʋ mɩsʋ. Ɩnɩ sʋ ɔha amʋʋ ɔlɔpʋ mɩ wa fʋ ɩbɩtɔ amʋ lakpan dʋn fʋ klɛ.”

¹² Pilato lonu asʋn anfɩ a, olekle osi Yesu. Tamɛ Yudafɔ amʋ bɔsʋra okitikiti kʋklʋkʋʋ blɩ bɛɛ, “Nɩ fesi ɔha anfɩ a, mʋmʋ megyi Roma owie dɛhɛn mʋ nyawie fʋgyi. Tsufɛ ɔhagyiɔha ánɩ́ ɔblɩ ɔbɛɛ owie mʋgyi lakʋsʋ lɩɩ Roma owie dɛhɛnsʋ!”

¹³ Brɛá Pilato lonu asʋn anfɩ a, ɔlɛkpa Yesu dalɩ ba kpankpa, tsia mʋ asʋngyi obia ánɩ́ itsie ɔtɩnɛkʋá bɔpʋ abwi bwɛ ɩnʋ, bʋtɛtɩ ɩnʋ “Abwitɔ” sʋ. (Bʋtɛtɩ ɩnʋ “Gabata” Hebri ɔblɩtɔ.)

¹⁴ Ɛkɛ amʋ igyi ogya ɔdʋdakɛ ha Israelfɔsʋ Katsʋn Nkɛ. Ɩbɔ́bwɛ fɛ ɔpa doduanyɔtɔ a, Pilato lɛbla Yudafɔ amʋ ɔbɛɛ, “Mlɩ Owie amʋ nɩ!”

¹⁵ Bɔsʋra okitikiti bɛɛ, “Kpa mʋ ya, kpa mʋ ya, afʋyɛda mʋ manta oyikpalihɛsʋ.” Pilato lɛfɩtɛ amʋ́ ɔbɛɛ, “Nda mlɩ owie manta oyikpalihɛsʋ?” Bulu igyi ahapʋ dɛhɛn amʋ bɛbla mʋ bɛɛ, “Anɩmá owie ɔkʋkʋ dʋn Roma owie dɛhɛn!”

¹⁶ Ɩnʋ Pilato lesi Yesu ha amʋ́ ɔbɛɛ, bʋyɛda mʋ manta oyikpalihɛsʋ. Ɩsa akɔpʋ amʋ bɛkpa Yesu natɩ.

Yesu Da Manta Oyikpalihɛsʋ

¹⁷ Mʋ onuto olotsu mʋ oyikpalihɛ dɩnka mʋ nkanta alɩɩ yowie ɔtɩnɛkʋá bʋtɛtɩ ɩnʋ “Nwun Okokobi Otsiakpa.” (Bʋtɛtɩ ɩnʋ “Golgota” Hebri ɔblɩtɔ.)

¹⁸ Bɛda Yesu manta oyikpalihɛsʋ ɩnʋ, bɛda ayin abanyɔ akʋ ɛ manta nyikpalihɛsʋ mʋ wa ɩnʋ. Ɔkʋlɛ bʋ Yesu bɩnasʋ, ɔkʋlɛ ɛ bʋ mʋ gyɔpɩsʋ, Yesu bʋ amʋ́ nsɩnɛ.

¹⁹ Pilato lɔwanlɩn asʋn manta oyikpalihɛ amʋ awunsʋ. Asʋn amʋ gyi, “Yesu Nasaretyin, Yudafɔ Owie.”

²⁰ Yudafɔ tsɔtsɔɔtsɔ bɛkla asʋn wanlɩnhɛ anfɩ. Tsufɛ ɔtɩnɛ amʋʋ bɛda Yesu manta oyikpalihɛsʋ amʋ ɩbʋ manta Yerusalem. Ɔlɛha bɔwanlɩn asʋn amʋ Hebri ɔblɩ, Roma ɔblɩ pʋ́ Griki ɔblɩtɔ.

²¹ Bulu igyi ahapʋ dɛhɛn amʋ bɛbla Pilato bɛɛ, “Máwanlɩn fɛɛ, ‘Yudafɔ Owie.> Mboun wanlɩn fɛɛ, ‘Oyin anfɩ ɔbɛɛ, mɩgyi Yudafɔ Owie.> ”

²² Pilato lɛbla amʋ́ ɔbɛɛ, “Mʋ́á nawanlɩn a, nawanlɩn mʋ́ dodo.”

²³ Ɩsa akɔpʋ amʋ bɛda Yesu manta oyikpalihɛ amʋsʋ ta a, botsu mʋ atadɩɛ, beye mʋ́tɔ aku-ana. Okugyiɔkʋ klɛ kʋlɛ. Botsu mʋ atadɩɛ tɩntɩn ánɩ́ bɔlʋ mʋ́ tsu ɔsʋsʋ beyi asɩ ɛ.

²⁴ Ɩnʋ bɛbla aba bɛɛ, “Mlɩmáha abalɩ atadɩɛ anfɩ mʋ́tɔ. Mlɩha atswɩ abi kɩ bɛɛ, ma obénya mʋ́.” Asʋn anfɩ lɛba, mɛnɩ Bulu asʋn amʋʋ bɔwanlɩn tswɩ bɛɛ, “Beye mɩ atadɩɛtɔ, bɔtswɩ abi mɩ tɩntɩnsʋ” amʋ ɩbɛ́ba mʋ́tɔ. Ɩsa akɔpʋ amʋ bɔbwɛ dɩnka mʋ́sʋ.

²⁵ Yesu mʋ yin, mʋ yin mʋ pio tsɩhɛ Maria, ogyi Klopa mʋ ka pʋ́ Magdalayintse Maria bʋlɩɩ oyikpalihɛ amʋ asɩ.

²⁶ Brɛá Yesu lowun mʋ yin pʋ́ mʋ ɔkasɩpʋ amʋʋ ɔtɛhɩɛ dwɛ amʋ, bʋlɩɩ manta ɩnʋ a, ɔlɛbla mʋ yin ɔbɛɛ, “Amʋ́ yin, fʋ bi nɩ.”

²⁷ Mʋʋ ɔlɛbla ɔkasɩpʋ amʋ ɛ ɔbɛɛ, “Fʋ yin nɩ.” Tsu ɛkɛ amʋ a, ɔkasɩpʋ amʋ lɛkpa mʋ ya mʋ woyitɔ.

Yesu Lowu

²⁸ Ɩnɩ ɔma a, Yesu lowun ánɩ́ mʋ agyʋma lamɔ ɔnɔ. Mʋʋ ɔlɛblɩ ɔbɛɛ, “Ɔmɛwʋlɩ dɛ mɩ.” Ɩnɩ lɛha Bulu asʋn amʋʋ bɔwanlɩn tswɩ amʋ ɩlɛba mʋ́tɔ.

²⁹ Onunwe kʋ tsie ɩnʋ, nta ɔdaɩ ɩbɔ mʋ́. Ɩsa akɔpʋ amʋ bɔpʋ ɔsapɔ da nta amʋtɔ pʋsian ɔtsandɩ oyisʋ, tsu mʋ́ fʋa yetin mʋ ɔnɔ.

³⁰ Yesu lɛkpɩkpɩ mʋ́ mɛ. Ɩnʋ ɔlɛblɩ ɔbɛɛ, “Ɩlata!” Mʋʋ oloko nwuntɔ wa, ɔlɛlɛ ɔŋɛ a.

Yesu Abɩntɔ Atɔ Wɔ

³¹ Ɛkɛ amʋ igyi Fieda. Mʋ́ ɔyɩkɛhɛ igyi ɔkpʋnʋ ɔdakɛ kpɔnkpɔntɩ ha Yudafɔ. Mʋ́ sʋ bʋmekleá aha amʋ bʋsian nyikpalihɛ amʋsʋ yɔfʋn owi tahɛ. Mʋ́ sʋ bɔkʋlɩ Pilato ɔkpa bɛɛ, ɔha mʋ ɩsa akɔpʋ abʋyebiabia amʋ́ ayabi, mɛnɩ bɔ́kɔsɩ wu, fówun bɛ́lɛ amʋ́ tsu nyikpalihɛ amʋsʋ asa owi ɔta.

³² Mʋ́ sʋ bɔyɔ yebiabia ayin abanyɔ amʋ ayabi.

³³ Tamɛ brɛá bowie Yesu wa a, bowun ánɩ́ alawu dodo. Mʋ́ sʋ bumebia mʋ ayabi.

³⁴ Tamɛ ɩsa akɔpʋ amʋtɔ ɔkʋlɛ lɔpʋ mʋ pɩa wɔ Yesu abɩntɔ, ntsu mʋa obugya lɛfɛn dalɩ.

³⁵ (Ɔha amʋʋ olowun mʋ́ amʋ legyi mʋ́ ɩwɩ adansɩɛ, fówun mlɩ ɛ mlóhogyi. Megyi afunu igyi. Oyin ánɩ́ ɔnɔkwalɩ asʋn mʋdɛblɩ.)

³⁶ Ɩnɩ fɛ́ɛ́ lɛba mʋ́tɔ, mɛnɩ Bulu asʋn amʋʋ bɔwanlɩn tswɩ bɛɛ, “Bʋméebia mʋ iwu kʋkʋʋkʋ” amʋ ɩbɛ́ba mʋ́tɔ.

³⁷ Bulu asʋn wanlɩnhɛ amʋ kɛn lɛblɩ ɔbɛɛ, “Bɛ́kɩ ɔha amʋʋ bɔwɔ mʋ abɩntɔ pɩa amʋ.”

Yesu Pula

³⁸ Ɩnɩ fɛ́ɛ́ ɔma a, Arimateayin Yosef lɛba bokokoli Pilato ɔbɛɛ, ɔpʋ Yesu fuli amʋ ha mʋ. (Yosef anfɩ buo Yesu ŋaintɔ, tsufɛ ɔdɛ Yudafɔ ahandɛ amʋ ifu nya.) Pilato lɛha mʋ ɔkpa. Mʋ́ sʋ Yosef lɛyɛlɛ Yesu fuli amʋ oyopula.

³⁹ Nikodemo amʋʋ ɔlɛba Yesu wa ɛkɛ ɔkʋ onye amʋ ɛ lɛba. Ɔlɔpʋ afa fanfaanfan aku anyɔ ánɩ́ bɔkwɛ mʋ́ wa abatɔ tsɔtsɔɔtsɔ ba. Mʋ́ odwin bɔ́bwɛ kilo adʋasa (30).

⁴⁰ Ayin anfɩ bɔpʋ ɔhrada kɩklɩ afa amʋ manta fuli amʋ ɩwɩ fɛ alɩá Yudafɔ bʋtɔbwɛ amʋ́ afuli asa bʋtopula amʋ́.

⁴¹ Ndobi kʋ ɩbʋ manta ɔtɩnɛ amʋʋ bɛda Yesu manta oyikpalihɛsʋ amʋ. Boloti bʋtatɔ bwɛ mʋ́ fuli-ɔbɔ ɩnʋ. Bʋmɔkʋpula ɔhaa mʋ́tɔ kɩ.

⁴² Ɩnɩá ɛkɛ amʋ igyi ogya ɔdʋdakɛ, fuli ɔbɔ amʋ ɛ ɩbʋ manta ɩnʋ sʋ a, bopula Yesu mʋ́tɔ.