Yohane 17 - Bulu Ntam Pɔpwɛ mʋ́a Israel Ɩlʋ

Yesu Mpaɩ Bɔ Mʋ Akasɩpʋ Nwunsʋ

¹ Yesu lɛblɩ asʋn anfɩ ta, olotsu ansɩ fʋa kɩ ɔsʋsʋ bɔ mpaɩ ɔbɛɛ, “Oo mɩ Sɩ, brɛ lafʋn. Wa mɩ numnyam, mɛnɩ mɩ ɛ nɔ́wa fʋ numnyam.

² Tsufɛ fɛha mɩ tumi aha fɛ́ɛ́sʋ, ánɩ́ nha aha ánɩ́ fɛha mɩ fɛ́ɛ́ nkpa ánɩ́ ɩtamata.

³ Nkpa ánɩ́ ɩtamata amʋ gyi, bʋbɩ fʋ Bulu Ɔnɔkwalɩpʋ ɔkʋkʋnʋ ɔkʋlɛ pɛ anfɩ, abʋbɩ mɩ Yesu Kristo anfɩ fɔpʋsɩsɩ ɔyɩtɔ anfɩ.

⁴ Nawa fʋ numnyam ɔsʋlʋ anfɩsʋ, tsufɛ namɔ agyʋma amʋʋ fɔpʋha mɩ amʋ fɛ́ɛ́ ɔnɔ.

⁵ Mɩ Sɩ! Wa mɩ numnyam fʋ ansɩtɔ ngya, fɛ alɩ amʋʋ mbʋ mʋ́ fʋ wa yaɩ asa fɔbwɛ ɔyɩ amʋ.

⁶ “Nalɛ fʋ suna aha amʋʋ fɛlɛ ɔyɩtɔ ha mɩ amʋ. Fʋbʋ amʋ́, fɔpʋ amʋ́ ha mɩ, bagyi fʋ asʋnsʋ.

⁷ Sei babɩá togyitɔá mbʋ itsu fʋ wa.

⁸ Tsufɛ nabla amʋ́ asʋn ánɩ́ fɔpʋha mɩ fɛ́ɛ́, banu. Babɩá lɛlɛ fʋ wa notsu, bahogyi ánɩ́ fʋlɔwa mɩ.

⁹ “Ndɛ fʋ kokoli ha amʋ́. Megyi ɔyɩtɔ aha fɛ́ɛ́ ndɛ mpaɩ bɔ ha. Mboun aha amʋʋ fɔpʋha mɩ amʋ, tsufɛ fʋbʋ amʋ́.

¹⁰ Mɩ klɛ igyi fʋ klɛ, fʋ klɛ ɛ igyi mɩ klɛ. Fatsʋn amʋ́sʋ lɛ mɩ numnyam ɔwan.

¹¹ Nɛba fʋ wa sei. Mmɛ́ɛtra tsia ɔyɩtɔ, tamɛ amʋ́ mʋ́ bʋbʋ ɔyɩtɔ. Mɩ Sɩ Wankɩhɛ, pʋ fʋ ɩda amʋʋ fɔpʋha mɩ amʋ tumi kɩ amʋ́sʋ, mɛnɩ bɔ́bwɛ kʋlɛ fɛ alɩ amʋʋ mɩa fʋnyɔ anɩgyi kʋlɛ amʋ.

¹² Brɛá mbʋ amʋ́ wa a, nɛkɩta amʋ́ wanklaan, ɩda amʋʋ fɔpʋha mɩ amʋ tumitɔ. Nɛlɛ ansɩ kɩta amʋ́ wanklaan. Mmɛha amʋ́tɔ ɔkʋkʋ mɔfwɩ, dʋn ɔmʋamʋʋ ɩda yaɩ ánɩ́ ɔbɛ́hɩ amʋ. Fɛkɩ Bulu asʋn wanlɩnhɛ amʋ ɩbɛ́ba mʋ́tɔ.

¹³ Nɛba fʋ wa sei. Tamɛ brɛ anfɩ ntra mbʋ ɔyɩtɔ nfɩ ndɛ asʋn anfɩ blɩ, mɛnɩ bénya ansigyi fɛ alɩ amʋʋ mɩ ɛ mbʋ ansigyitɔ amʋ.

¹⁴ Nabla amʋ́ asʋn amʋʋ fɛbla mɩ amʋ. Mʋ́ sʋ ɔyɩtɔ aha bʋdɛ amʋ́ lu, tsufɛ bʋtra bʋmegyi ɔyɩtɔfɔ, fɛ alɩ amʋʋ mɩ ɛ mmegyi ɔyɩtɔyin amʋ.

¹⁵ Mmɛdɛblɩ mbɛɛ, fʋlɛ amʋ́ lɛ ɔyɩtɔ. Mboun mbɛɛ fʋkɩ amʋ́sʋ wanklaan, mɛnɩ bʋmóowie lalahɛ ɔbwɛpʋ amʋ ɩbɩtɔ.

¹⁶ Alɩ amʋʋ mmegyi ɔyɩtɔyin ngyi amʋ a, alɩ amʋ́ ɛ bʋmegyi ɔyɩtɔfɔ nɩ.

¹⁷ Fʋ asʋn amʋ gyi ɔnɔkwalɩ. Tsʋn mʋ́sʋ afʋpʋ amʋ́ bwɛ fʋ klɛ.

¹⁸ Alɩ amʋʋ fɔwa mɩ sɩsɩ ɔyɩtɔ amʋ a, alɩ mɩ ɛ nawa amʋ́ sɩsɩ nɩ.

¹⁹ Amʋ́ sʋ nɔpʋ ɩwɩ ha fʋ, mɛnɩ amʋ́ ɛ bɔ́tsʋn ɔnɔkwalɩ amʋsʋ mli fʋ klɛ.

²⁰ “Megyi mɩ akasɩpʋ amʋ nkʋlɛ ndɛ mpaɩ bɔ ha. Mboun aha ánɩ́ bɔ́tsʋn amʋ́ atosunahɛsʋ hɔ mɩ gyi fɛ́ɛ́ ɛ ndɛbɔ ha.

²¹ Ndɛ mpaɩ bɔ mbɛɛ, amʋ́ fɛ́ɛ́ bʋbwɛ kʋlɛ. Mɩ Sɩ, alɩ amʋʋ fʋbʋ mɩtɔ, mɩ ɛ mbʋ fʋtɔ amʋ a, ha amʋ́ ɛ abʋtsia anɩtɔ alɩ kɛn, fówun ɔyɩtɔ aha bóhogyi ánɩ́ fʋlɔwa mɩ sɩsɩ ɔyɩtɔ.

²² Nawa aha anfɩ numnyam amʋʋ fɔwa mɩ amʋ, mɛnɩ bɔ́bwɛ kʋlɛ fɛ alɩá ntsu tamatsʋn mɩa fʋnyɔ nsɩnɛ.

²³ Mbʋ amʋ́tɔ fɛ alɩá fʋbʋ mɩtɔ, mɛnɩ bɔ́bwɛ kʋlɛ, ntsu mɔ́ɔtsʋn amʋ́ nsɩnɛ. Nɩ ɩba alɩ a, ɔyɩtɔ aha bɛ́bɩá fʋlɔwa mɩ, fʋtɔdwɛ amʋ́ fɛ alɩ amʋʋ fʋtɔdwɛ mɩ amʋ.

²⁴ “Mɩ Sɩ! Ndekle mbɛɛ, aha amʋʋ fɔpʋha mɩ amʋ bétsia mɩ wa ɔtɩnɛ amʋʋ mbʋ amʋ. Fówun bówun numnyam amʋʋ fɔwa mɩ amʋ, tsufɛ fʋtɔdwɛ mɩ asa fɔbwɛ ɔyɩ.

²⁵ Mɩ Sɩ Yile ɔbwɛpʋ! Ɔyɩtɔfɔ bʋmɛbɩ fʋ, tamɛ mɩ mʋ nyin fʋ. Aha anfɩ ɛ bʋyin ánɩ́ fʋlɔwa mɩ sɩsɩ ɔyɩtɔ.

²⁶ Nɛlɛ fʋ suna amʋ́. Nɛ́tra lɛ fʋ suna amʋ́. Fówun ɔdwɛ amʋʋ fʋtɔdwɛ mɩ amʋ itsia amʋ́tɔ, mɛnɩ mɩ ɛ nétsia amʋ́tɔ.”