Yohane 15 - Bulu Ntam Pɔpwɛ mʋ́a Israel Ɩlʋ

Waɩn Oyi Onuto

¹ Yesu lɛblɩ ɔbɛɛ, “Mɩgyi waɩn ɩfla onuto. Mɩ Sɩ gyi mʋ́ ɔdɔpʋ.

² Bambigyibambiá ɩbʋ mɩ ɩwɩ, ɩtamaswie a, ɔtɛkpalɩ mʋ́ tsitsa. Tamɛ kugyikʋá itoswie a, ɔtɛla mʋ́ wanklaan, mɛnɩ ibóswie tsɔtsɔɔtsɔ dʋn.

³ Mɩ atosunahɛ anfɩ mlɩlanu anfɩ sʋ mlɩ ɩwɩ latɩn dodo.

⁴ Mlɩtsia mɩtɔ, mɩ ɛ antsia mlɩtɔ. Bambi kʋkʋʋkʋ mɛ́ɛtalɩ swie abi, nkɛtɩ ɩtsa mʋ́ oyisʋ bregyibrɛ. Alɩ kɛn mlɩ ɛ mlɩmɛ́ɛtalɩ swie abi, nkɛtɩ mlɩbʋ mɩtɔ nɩ.

⁵ “Mɩgyi waɩn-ɩfla amʋ. Mlɩgyi mʋ́ abambi. Ɔha ánɩ́ ɔbʋ mɩtɔ, mɩ ɛ mbʋ mʋtɔ obóswie abi tsɔtsɔɔtsɔ, tsufɛ mlɩmɛ́ɛtalɩ bwɛ tɔtɔɔtɔ tsʋn mɩ ɔma.

⁶ Ɔhagyiɔha ánɩ́ ometsie mɩtɔ gyi fɛ bambiá bakpalɩ mʋ́ bun. Ɩbɔ́wʋlɩ, bɛ́kpa mʋ́ wa ogya.

⁷ Nɩ mlɩtsie mɩtɔ, mɩ asʋn ɛ ɩbʋ mlɩtɔ a, mlɛ́fɩtɛ mɩ Sɩ togyitɔá mlɩdekle, ɔbɛ́ha mlɩ.

⁸ Nɩ mloswie abi tsɔtsɔɔtsɔ a, ɩbɔ́wa mɩ Sɩ numnyam. Mʋ́ obósuna ánɩ́ mɩ akasɩpʋ mlɩgyi nɩ.

⁹ Alɩ amʋʋ mɩ Sɩ tɔdwɛ mɩ amʋ a, alɩ kɛn mɩ ɛ ntɔdwɛ mlɩ nɩ. Mlɩtsia mɩtɔ, mɛnɩ nɔ́dwɛ mlɩ yɔ.

¹⁰ Nɩ mlegyi mɩ mblasʋ a, nɔ́dwɛ mlɩ yɔ, fɛ alɩ amʋʋ mɩ ɛ ntegyi mɩ Sɩ mblasʋ, ɔtɔdwɛ mɩ yɔ amʋ.

¹¹ “Nabla mlɩ asʋn anfɩ fɛ́ɛ́, mɛnɩ ansigyi amʋʋ ɩbʋ mɩtɔ amʋ bétsia mlɩtɔ. Fówun ansɩ bégyi mlɩ wanklaan.

¹² Mbla ánɩ́ ndɛpʋha mlɩ gyi; mlɩdwɛ aba fɛ alɩá ntɔdwɛ mlɩ.

¹³ Ɔdwɛ kʋkʋ mɔdʋn ánɩ́ ɔkʋ obówu mʋ nyawie nwunsʋ.

¹⁴ Nɩ mlegyi mɩ mblasʋ a, mɩ anyawie mlɩgyi.

¹⁵ Mmɛ́ɛtra tɩ mlɩ mɩ asumpʋ. Tsufɛ osumpʋ meyin tɔá mʋ wie dɛbwɛ. Ndɛ mlɩtɩ mɩ anyawie, tsufɛ nabla mlɩ togyitɔá nonu tsu mɩ Sɩ wa.

¹⁶ Megyi mlɩ lɛlɛ mɩ. Mɩlɛlɛ mlɩ yaɩ mbɛɛ, mlɩyɔ amlɩyoswie abiá ibétsia brɛ fɛ́ɛ́, mɛnɩ mɩ Sɩ ɔbɛ́ha mlɩ togyitɔá mlɔ́kʋlɩ mʋ mɩ ɩdatɔ.

¹⁷ Mbla ánɩ́ ndɛwa ha mlɩ gyi, ‘Mlɩdwɛ aba.>

Aha Bólu Mlɩ

¹⁸ “Nɩ ɔyɩtɔ aha bʋdɛ mlɩ lu a, mlɩkaɩn ánɩ́ mɩ begyankpa lu.

¹⁹ Nɩ ɔyɩtɔ aha mlɩgyi a, tɛkɩ ɔyɩtɔ aha bɔ́dwɛ mlɩ fɛ amʋ́ abi. Tamɛ nalɛ mlɩ tsu ɔyɩtɔfɔtɔ, sʋ mlɩmá amʋ́tɔ. Ɩnɩ sʋ ɔyɩtɔfɔ bʋtolu mlɩ nɩ.

²⁰ Mlɩkaɩn asʋn amʋʋ nɛbla mlɩ mbɛɛ, ‘Osumpʋ ɔkʋkʋ mɔdʋn mʋ wie> amʋsʋ. Nɩ aha bʋdɩn mɩsʋ a, mlɩ ɛ bɛ́dɩnka mlɩsʋ. Nɩ begyi mɩ asʋnsʋ a, mlɩ ɛ bégyi mlɩ asʋnsʋ.

²¹ Tamɛ mɩbʋ mlɩ, sʋ bɔ́pʋ ɩnɩ fɛ́ɛ́ gyi mlɩ, tsufɛ bʋmeyin ɔha amʋʋ ɔlɔwa mɩ amʋ.

²² Nɩ mmɔkʋbla amʋ́ asʋansʋ a, tɛkɩ bʋma ɩpɔn kʋkʋ gyi. Tamɛ sei anfɩ mʋ́ bʋma ɔnɔ lɛ.

²³ Ɔhagyiɔha ánɩ́ otolu mɩ tolu mɩ Sɩ ɛ.

²⁴ Nabɔbwɛ agyʋma ánɩ́ ɔhaa mɔkʋbwɛ mʋ́ odu kɩ amʋ́tɔ. Nɩ bʋmɔpʋ amʋ́ ansibi wun mʋ́ a, tɛkɩ Bulu mɛ́ɛha amʋ́ ɩpɔn. Bowun tɔá nɔbwɛ asa bʋdɛ mɩa mɩ Sɩ lu.

²⁵ Ilehian ánɩ́ ɩbɛ́ba alɩ, mɛnɩ asʋn amʋʋ bɔwanlɩn wa amʋ́ Mblatɔ bɛɛ, ‘Bolu mɩ kpaalɩ> amʋ ɩbɛ́ba mʋ́tɔ.

²⁶ “Nɔ́wa Ɔma Ɔlɩɩpʋ obótsu mɩ Sɩ wa ba. Mʋgyi Ɔŋɛ Wankɩhɛ amʋ. Mʋtosuna ɔnɔkwalɩá ɩbʋ Bulutɔ. Obégyi mɩ ɩwɩ adansɩɛ.

²⁷ Mlɩ ɛ mlégyi mɩ ɩwɩ adansɩɛ, tsufɛ mlɩlatsia mɩ wa tsu brɛá nefi atɔ suna asɩ.