Yohane 11 - Bulu Ntam Pɔpwɛ mʋ́a Israel Ɩlʋ

Lasaro Lowu

¹ Oyin ɔkʋá bʋtɛtɩ mʋ Lasaro mʋa mʋ apio tsɩhɛ Maria pʋ́ Marta betsia Betania wulutɔ. Oyin amʋ lɔlɔ.

² Maria anfɩ lɛtsɛɩ mʋ ofobi fanfaanfan wʋlɩ anɩ Wie Yesu ayabisʋ, pʋ mʋ imi tsitsi mʋ́ nɩ. Mʋ pio yinhɛ gyi Lasaro anfɩ ɔda ɔdɛlɔ a.

³ Mʋ́ sʋ mʋ apio tsɩhɛ anfɩ bɔwa abi sɩsɩ Yesu bɛɛ, “Owie, fʋ ɔdwɛpʋ dɛlɔ.”

⁴ Yesu lonu asʋn amʋ a, ɔlɛblɩ ɔbɛɛ, “Megyi ɩlɔ anfɩ ɔbɔ́mɔ mʋ, mboun ɩbɛ́lɛ Bulu numnyam ɔwan. Ɩbɔ́wa mɩ Bulu mʋ Bi anfɩ ɛ numnyam.”

⁵ Yesu tekle Marta mʋa Maria pʋ́ Lasaro fɛ́ɛ́ asʋn.

⁶ Tamɛ brɛá olonuá Lasaro dɛlɔ a, ɔlɛtra si tsia ɔtɩnɛá ɔbʋ nkenyɔ kɛkɛ.

⁷ Mʋ́ ɔma a, ɔlɛbla mʋ akasɩpʋ ɔbɛɛ, “Mlɩha ayinki yɔ Yudea.”

⁸ Mʋ akasɩpʋ amʋ bɛfɩtɛ mʋ bɛɛ, “Osunapʋ, nwɛn nfɩ Yudafɔ ahandɛ bakle abʋda fʋ abwi mɔ. Mʋ́ fɛɛ, fɛ́tra yinki yɔ ɩnʋ?”

⁹ Yesu lɔpʋ yebi lɛ mʋ́ ɔnɔ ɔbɛɛ, “Megyi dɔnhwɩrɩ duanyɔ bʋ ɛkɛwʋlɛtɔ? Nɩ ɔha na ɔyɩkɛhɛtɔ a, ɔtamasutin, tsufɛ nsaɩntɔ lɔwankɩ sʋ odewun.

¹⁰ Tamɛ nɩ ɔkʋ na okluntɔ a, otosuti, tsufɛ ɔmɛdɛ atɔ wun.”

¹¹ Asʋn anfɩ ɔma a, ɔlɛtra blɩ ɔbɛɛ, “Anɩ nyawie Lasaro ladɩdɩ, tamɛ nɔ́yɔ anyetsinki mʋ.”

¹² Akasɩpʋ amʋ bɛbla mʋ bɛɛ, “Anɩ Wie, nɩ ɔdɛdɩdɩ mʋ́ a, ɩwɩ bɔ́wa mʋ ɔnlɩn!”

¹³ Lasaro lowu ɩwɩ asʋn Yesu dɛblɩ, tamɛ akasɩpʋ amʋ mʋ́ bʋkɩ bɛɛ mʋ dɩdɩ kɛkɛ ɩwɩ asʋn ɔdɛblɩ.

¹⁴ Ɩnʋ Yesu lowuna kpa mʋ́ opulu ɔbɛɛ, “Lasaro lawu.

¹⁵ Mlɩ sʋ ɩlawa mɩ ansigyiá mma ɩnʋ asa olowu, mɛnɩ mlɔ́hɔ mɩ gyi. Mlɩba ayɛkɩ mʋ.”

¹⁶ Ɩnʋ Toma ánɩ́ ogyi Tabi lɛbla mʋ aba amʋ ɔbɛɛ, “Mlɩha anɩa mʋnyɔ fɛ́ɛ́ ayɔ, mɛnɩ nɩ lowu igyi kʋraa a, anɩa mʋnyɔ awu!”

Ɔha Ánɩ́ Ɔtɔkʋsʋa Aha Tsu Afulitɔ, Ha Amʋ́ Nkpa

¹⁷ Yesu lowie Betania wulutɔ a, bɛbla mʋ bɛɛ bopula Lasaro ɩlagyi nkɛna.

¹⁸ Tsu Betania ya Yerusalem mɔfʋn maɩlɩ anyɔ.

¹⁹ Mʋ́ sʋ Yudafɔ tsɔtsɔɔtsɔ bɛba Maria mʋa Marta gyɔwɩ ɔhakpa, amʋ́ pio lowu sʋ.

²⁰ Benya bla Marta ánɩ́ Yesu ɔba alɩ, ɔlɔkʋsʋ yefia mʋ ɔkpa. Maria mʋ́ lesin woyitɔ.

²¹ Mʋʋ Marta lɛbla Yesu ɔbɛɛ, “Mɩ Wie, tɛkɩ nɩ fʋbʋ nfɩ a, tɛkɩ mɩ pio mowu si mɩ.

²² Tamɛ sei kʋraa nyin ánɩ́ togyitɔá fɔ́kʋlɩ Bulu a, ɔbɛ́ha fʋ.”

²³ Yesu lɛbla mʋ ɔbɛɛ, “Fʋ pio ɔbɛ́lakʋsʋ.”

²⁴ Marta lɛbla mʋ ɔbɛɛ, “Nyin ánɩ́ ɔbɔ́kʋsʋ ɛkɛ trahɛ amʋʋ afuli bɔ́kʋsʋ amʋ.”

²⁵ Yesu lɛbla mʋ ɔbɛɛ, “Mɩgyi ɔha ánɩ́ ntɔkʋsʋa aha tsu afulitɔ, ha amʋ́ nkpa. Ɔha ánɩ́ ɔlɔhɔ mɩ gyi owu kʋraa a, ɔbɛ́tra tsia nkpa.

²⁶ Ɔha ánɩ́ otsie nkpa, ɔlɔhɔ mɩ gyi ɛ móowu ɛkɛkɛɛkɛ. Fahɔ mʋ́sʋ gyi?”

²⁷ Marta lotsula mʋ́sʋ ɔbɛɛ, “Ee! Mɩ Wie, nahogyiá fʋgyi Kristo (ɔha amʋʋ Bulu lada mʋ ofuli). Bulu mʋ Bi amʋʋ bɛɛ, ɔbɛ́ba ɔyɩtɔ amʋ nɩ.”

Yesu Isu

²⁸ Brɛá Marta lɛblɩ alɩ ta a, oleyinki ba woyitɔ bɛtɩ Maria ya ɩtsɛtɔ, bla mʋ ɔbɛɛ, “Osunapʋ laba, ɔdɛ fʋ tɩ.”

²⁹ Maria lenya nu mʋ́ alɩ, ɔlɔkʋsʋ yɔ Yesu wa.

³⁰ (Alɩ brɛ amʋtɔ a, Yesu mɔkʋnya wie wulutɔ. Ɔlɩɩ ɔtɩnɛ amʋʋ Marta lɛyɛtʋ mʋ amʋ.)

³¹ Brɛá aha amʋʋ bʋtsie Maria wa woyitɔ, bʋdɛ mʋ klʋn yia amʋ bowun ánɩ́ alakʋsʋ ɔtsawʋlɛ pɛ ɔyɔ a, bɔkʋsʋ buo mʋ. Bʋkɩ bɛɛ ɔyɔ opulakpa ɩnʋ yesu.

³² Brɛá Maria lowie Yesu wa a, ɔlɛda akpawunu, bla Yesu ɔbɛɛ, “Mɩ Wie, nɩ fʋbʋ nfɩ a, tɛkɩ mɩ pio mowu si mɩ!”

³³ Brɛá Yesu lowun ánɩ́ Maria mʋa aha amʋʋ bʋbuo mʋ amʋ fɛ́ɛ́ bʋdesu a, ɩlɛhɩɛ han mʋ. Mʋ́ sʋ mʋ ansɩ lɛpɛ.

³⁴ Ɔlɛfɩtɛ amʋ́ ɔbɛɛ, “Nkʋnʋ mlɩlopula mʋ.” Ɩnʋ bɛbla mʋ bɛɛ, “Anɩ Wie, bɛkɩ.”

³⁵ Ɩnʋ Yesu losu.

³⁶ Mʋ́ sʋ Yudafɔ amʋ bɛblɩ bɛɛ, “Kɩ alɩá ɔtɛhɩɛ dwɛ Lasaro!”

³⁷ Tamɛ amʋ́tɔ akʋ bɛblɩ bɛɛ, “Megyi oyin anfɩ lobwii ansibi obwiepʋ amʋ ansibi nɩ. Ntogyi sʋ ɔmɛtalɩ kɩta Lasaro yaɩ, alawu?”

Lasaro Kʋsʋa

³⁸ Yesu ansɩ lɛtra pɛ, ɔlɛnatɩ yɔ opulakpa ɩnʋ. Ibwi-alatɔ ɔbɔtɔ bopula mʋ, bemina ibwi tin mʋ́ ɔnɔ.

³⁹ Ɩnʋ ɔlɛbla amʋ́ ɔbɛɛ, “Mlɩmina ibwi amʋ lɛ ɔbɔ amʋ ɔnɔ.” Tamɛ owupʋ amʋ mʋ pio tsɩhɛ Marta lɛbla mʋ ɔbɛɛ, “Mɩ Wie, ndɛ aná mʋ́ a, alayinta. Ndɛ ɛkɛ nasɩ ɔpá bopula mʋ.”

⁴⁰ Yesu lɛbla mʋ ɔbɛɛ, “Mmɛbla fʋ mbɛɛ nɩ fohogyi a, fówun alɩá Bulu ɩwɩ bʋ ifu?”

⁴¹ Ɩnʋ bemina ibwi amʋ lɛ ɔbɔ amʋ ɔnɔ. Yesu lotsu ansɩ fʋa kɩ ɔsʋsʋ, blɩ ɔbɛɛ, “Mɩ Sɩ, nɛda fʋ ɩpan ánɩ́ fanu mɩ ɔmɛ.

⁴² Nyin ánɩ́ fʋtonu mɩ mpaɩ ekekegyiɛkɛ. Tamɛ aha anfɩ bʋlɩɩ nfɩ anfɩ sʋ nablɩ alɩ, mɛnɩ bóhogyiá fʋlɔwa mɩ.”

⁴³ Brɛá ɔlɔbɔ mpaɩ anfɩ ta a, ɔlɔkplʋn blɩ ɔbɛɛ, “Lasaro, dalɩ ba!”

⁴⁴ Lasaro lɛdalɩ a, tati klɩ mʋ ɩbɩ pʋ́ mʋ ayabi. Duku ɛ klɩ mʋ ansɩtɔ. Yesu lɛbla amʋ́ ɔbɛɛ, “Mlɩsankɩ mʋ ɔnatɩ.”

Yesu Nwunsʋ Kɩklɩ

⁴⁵ Yudafɔ amʋʋ bobuo Maria ba ɩnʋ amʋ bowun tɔá Yesu labwɛ. Mʋ́ sʋ amʋ́ tsɔtsɔɔtsɔ bɔhɔ mʋ gyi.

⁴⁶ Tamɛ amʋ́tɔ akʋ bɔyɔ yɛbla Farisifɔ amʋ tɔá Yesu labwɛ.

⁴⁷ Ɩnʋnʋ Bulu igyi ahapʋ dɛhɛn pʋ́ Farisifɔ amʋ bɛtɩ aba asʋn agyipʋ fia. Mʋʋ bɛfɩtɛ aba bɛɛ, “Nkalɩ abɔ́bwɛ? Lɛlɛ mʋ́ a, oyin anfɩ dɛ osuna tsɔtsɔɔtsɔ bwɛ.

⁴⁸ Nɩ anɩmɛka mʋ itin a, ɔhagyiɔha ɔbɔ́hɔ mʋ gyi. Ɩbɛ́ha Romafɔ bɛ́ba bobwie anɩ Bulu ɔtswɛkpa amʋ, yinta anɩ ɔmá!”

⁴⁹ Tamɛ amʋ́tɔ ɔkʋlɛá bʋtɛtɩ mʋ Kaiafa, ogyi Bulu igyi ɔhapʋ dɛhɛn ofi amʋtɔ lɛbla amʋ́ ɔbɛɛ, “Mlɩ mʋ́ mlɩmeyin ɔlala!

⁵⁰ Mlɩmɔkʋbɩá ɩbʋ alɛá ɔbakʋlɛ obówu aha fɛ́ɛ́ nwunsʋ, dʋn ánɩ́ ɔmá amʋtɔ aha fɛ́ɛ́ bɛ́hɩ?”

⁵¹ Megyi Kaiafa onuto agywɩɩn ɔlɔpʋblɩ asʋn anfɩ. Tamɛ ɩnɩá ofi amʋtɔ mʋgyi Bulu igyi ɔhapʋ dɛhɛn sʋ a, igyi asʋn ánɩ́ ɔlɛblɩ tswɩ ánɩ́ ilehian ánɩ́ Yesu obówu ha Yudafɔ ɔmá.

⁵² Megyi bɛɛ ɔmá amʋ nkʋlɛ pɛ sʋ obówu. Mboun alɩá ɔbɛ́kpa Bulu aha ánɩ́ badasaɩn fɛ́ɛ́ bɔwa abatɔ, bɔ́bwɛ ɩkʋlɛ sʋ.

⁵³ Tsu ɛkɛ amʋ bɔwa agywɩɩn bwɛ ánɩ́ bɔ́mɔ Yesu bɩ.

⁵⁴ Ɩnɩ sʋ Yesu mɛtra tsia lɛ ɩwɩ ɔwan Yudafɔtɔ. Mboun ɔlɛnatɩ yɔ wulu kʋá bʋtɛtɩ mʋ́ Efraim, ánɩ́ ɩbʋ ɔsʋlʋkpansʋ; mʋa mʋ akasɩpʋ amʋ betsia ɩnʋ.

⁵⁵ Brɛ amʋtɔ a, Yudafɔ nkɛá bɔ́pʋgyi Israelfɔsʋ Katsʋn Nkɛ amʋ lawie woyi ta. Aha tsɔtsɔɔtsɔ botsu awulusʋ dʋ yɔ Yerusalem ánɩ́ bɔyɔgyʋra ɩwɩ asa nkɛ amʋ ɩfʋn.

⁵⁶ Brɛá bɔyɔ Bulu ɔtswɛkpa wunsɩnɛsʋ ɩnʋ a, bodunka ánɩ́ bówun Yesu. Mʋ́ sʋ bɛfɩtɛ aba bɛɛ, “Nkalɩ mlɩdɛkɩ? Mlɩlahogyi mlɩaa, ɔbɛ́ba nkɛ anfɩtɔ loo?”

⁵⁷ Tamɛ brɛ amʋtɔ a, Bulu igyi ahapʋ dɛhɛn pʋ́ Farisifɔ amʋ babla aha bɛɛ, nɩ ɔkʋ owun ɔtɩnɛá Yesu bʋ a, ɔha amʋ́ ɩbɩ, mɛnɩ bɛ́yɛkɩta mʋ.