Yakobo 5 - Bulu Ntam Pɔpwɛ mʋ́a Israel Ɩlʋ

Ɩwɩ Anyapʋ Asʋn

¹ Ɩwɩ anyapʋ, mlɩsu amlɩsʋra okitikiti, tsufɛ ipian kpɔnkpɔntɩ ɩba mlɩsʋ.

² Sei anfɩ a, mlɩ atonyahɛ fɛ́ɛ́ laplɔ. Atɛplɛ bawɩ mlɩ atati.

³ Mlɩ sika atɔ ɛ ɩlakpɔɩ, wɩ nkanʋ. Mʋ́ nkanʋ amʋ obégyi mlɩ ɩwɩ adansɩɛ, yinta mlɩ ɔyʋlʋ fɛ alɩá ogya teyinta atɔ. Mlɩlakle atɔ tsɔtsɔɔtsɔ yaɩ kpaalɩ, brɛ anfɩ ɔyɩ ɩba bɔmɔ ɔnɔ anfɩ.

⁴ Mlɩkaɩn ánɩ́ aha amʋʋ mlɩlɔbɔ ɩpa, bɔyɔ agyʋma mlɩ ndɔtɔ, tamɛ mlɩlekina amʋ́ ɩkɔ ka amʋ isu latʋ Bulu, tumi fɛ́ɛ́ Owie amʋ.

⁵ Mlɩlatsia ɔsʋlʋ anfɩsʋ, gyi nkpa mʋ́a ɔdwɛ pʋwa nfɔ fɛ nnantswie ha mlɩ ɔmɔkɛ.

⁶ Mlɩlaha ɔha ánɩ́ mʋ asʋn da ɔkpa ɩpɔn, mɔ mʋ, ɔmɛprɩ ɩwɩ.

Ɩklʋnya Mʋ́a Mpaɩbɔ

⁷ Apio aba, mlɩnya klʋn tsia gyo anɩ Wie Yesu Kristo ɩba. Mlɩkɩ alɩá ɔdɔtɔpʋ tenya klʋn tsia gyo nyankpʋ gyankpapʋ mʋ́a trahɛ, pʋ́ alɩá otetsia gyo brɛá ɔsʋlʋ amʋ ɩbɛ́ha atɔ pɔpwɛ bówie woyi.

^8-9 Mlɩ ɛ mlɩnya klʋn amlɩlɩɩ kinkin, tsufɛ anɩ Wie, ogyi asʋn ogyipʋ amʋ ɩba lafʋn. Mʋ́ sʋ mlɩmátsia tɔɩ mlɩ abasʋ, mɛnɩ ɔmɛ́ɛha mlɩ ɩpɔn.

¹⁰ Apio, mlɩpʋ Bulu ɔnɔsʋ atɔɩpʋ amʋʋ bɛblɩ Bulu asʋn amʋ bwɛ mlɩ atosuanhɛ. Bowun asʋn tsɔtsɔɔtsɔ, tamɛ benya klʋn.

¹¹ Mlɩkɩ alɩá anɩtobu amʋ́. Itsu alɩá botomi amʋ́ asʋn wunhɛtɔ sʋ. Mlɩkaɩn Hiob ɛ ɩwɩ asʋnsʋ. Alɩá olotomi mʋ asʋn wunhɛtɔ. Ɩnɩ sʋ Bulu loyula mʋ mʋ́ ɔma. Lɛlɛ, Bulu bʋ awɩtɔlɛ, otowun aha nwɛ.

¹² Mɩ apio, ndekle mbɛɛ mlɩbɩ wanklaan ánɩ́ mlɩmátanʋ ɔsʋsʋ ntɛ ɔsʋlʋ, ntɛ ka tɔtɔɔtɔ. Mlɩ “Ee!” ɩbwɛ “Ee!” mlɩ “O-o!” ɛ ɩbwɛ “O-o!” mɛnɩ Bulu mɛ́ɛha mlɩ pɔn.

¹³ Nɩ ɔkʋ dɛ ipian wun mlɩtɔ a, okokoli Bulu. Nɩ ansɩ dɛ ɔkʋ gyi ɛ a, ɔwa ɩlʋ kanfʋ Bulu.

¹⁴ Nɩ ɔkʋ dɛlɔ mlɩtɔ a, ɔtɩ ɔpasua ahandɛ abʋba bokokoli Bulu, abʋkpa mʋ ofobi anɩ Wie ɩdatɔ.

¹⁵ Nɩ bokokoli anɩ Wie hogyitɔ a, ɔbɛ́tsa mʋ ɩlɔ, ɔbɔ́kʋsʋ. Nɩ alabwɛ lakpan kʋ a, Bulu obési mʋ́ fɛ́ɛ́ kie mʋ.

¹⁶ Mʋ́ alɩ sʋ mlɩlɛ mlɩ lakpan blɩ, amlɩkokoli Bulu ha aba, mɛnɩ ɔbɛ́tsa mlɩ ɩlɔ. Ɔha ánɩ́ mʋ asʋn da ɔkpa mpaɩ tɔwa ogya, ɩtɔyɔ agyʋma wanklaan.

¹⁷ Nyankpʋsa Elia ɛ gyi fɛ mɩa fʋnyɔ. Olokokoli Bulu kinkiinkin ánɩ́ nyankpʋ mátswie. Lɛlɛ imotswie nfinsa mʋ́a ɩfʋn.

¹⁸ Ɔlɛlakʋlɩ mʋ ánɩ́ itswie. Lɛlɛ nyankpʋ letii, ɩlɛha atɔ lɛlawa alɛ ɔsʋlʋsʋ.

¹⁹ Mɩ apio, nɩ mlɩtɔ ɔkʋ ɔdɩda hogyitɔ a, ɔkʋ ɔsankia mʋ ba.

²⁰ Mlɩbɩá ɔha amʋ lalɛ ɔkla tsu lowuá tɛkɩ obówutɔ. Mʋ́ sʋ Bulu obési mʋ lakpan tsɔtsɔɔtsɔ kie mʋ.