Yakobo 4 - Bulu Ntam Pɔpwɛ mʋ́a Israel Ɩlʋ

Ɔyɩtɔ Atɔ Dwɛ

¹ Ntɔ tɛtɩ ɩkɔ mʋ́a ɩtrɛ wa mlɩ nsɩnɛ? Megyi ɔwɔlɩ lalahɛá idekle igyi mlɩsʋ tɔpʋba?

² Mlɩlapʋ ɔnsɩpɛ mlɩdɛ atɔ kle, mlɩmɛdɛ mʋ́ nya. Ɩnɩ sʋ mlɩdɛ aha mɔ. Mlɩ ansɩ dɛpɛ aha atɔsʋ. Mʋ́ sʋ mlɩdɛtrɛ kɔ nɩ, tamɛ mlɩ ɩbɩ mɛ́ɛda mʋ́ kɩ. Tɔá sʋá mlɩmenya gyi, mlɩtamakʋlɩ Bulu ɔha mlɩ.

³ Nɩ mlɔkʋlɩ kʋraa a, ɔtamaha mlɩ, tsufɛ agywɩɩn lalahɛ mlɩtɔpʋkʋlɩ mʋ. Alɩá mlɔ́pʋwa ɩwɩ ansigyi sʋ mlɩdɛ mʋ kʋlɩ.

⁴ Mlɩladamli ɔma ha Bulu. Mlɩmeyin ánɩ́ nɩ mlɩdɛ ɔyɩtɔ atɔ dwɛ a, mlɩdɛ Bulu lu? Nɩ fʋdekle fɛɛ fɔ́dwɛ ɔyɩtɔ atɔ a, fʋtɔbwɛ Bulu olupʋ.

⁵ Ntɛ mlɩdɛkɩ mlɩaa, kpaalɩ Bulu asʋn wanlɩnhɛ amʋ ɩlɛblɩ ɔbɛɛ, “Bulu tamatsula Ɔŋɛ amʋʋ ɔlɔpʋwa anɩtɔ amʋsʋ?”

⁶ Ɩnɩ sʋ ɔtɔpʋ awɩtɔlɛ tsɔtsɔɔtsɔ kpa anɩ, fɛ alɩá Bulu asʋn wanlɩnhɛ amʋ ɩlɛblɩ nɩ. Ɔbɛɛ, “Ɔtɔkʋsʋ lɩɩ ɩwɩ atsupʋsʋ, tamɛ ɔtɔpʋ awɩtɔlɛ kpa ɩwɩasɩ abapʋ.”

⁷ Mʋ́ sʋ ndɛ mlɩ bla mbɛɛ, mlɩba ɩwɩasɩ ha Bulu. Mlɩkʋsʋ lɩɩ Ɔbʋnsamsʋ, ɔbɛ́srɩ natɩ mlɩ wa.

⁸ Mlɩkpʋkpɛ manta Bulu, Bulu ɛ ɔbɔ́kpʋkpɛ manta mlɩ. Lakpan abwɛpʋ, mlɩfwɩ ɩbɩ lɛ lakpanbwɛtɔ. Aha ánɩ́ mlɩ agywɩɩn igyi anyɔ, mlɩha mlɩ klʋntɔ ɩtɩn.

⁹ Mlɩsu, amlɩha mlɩ ɩwɩ ɩwa mlɩ nwɛ mlɩ lakpan sʋ. Mlɩ mɔsɩ ɩdamli isu, mlɩ ansigyi imli pɛlɩ.

¹⁰ Mlɩba ɩwɩasɩ Bulu ansɩtɔ, mɛnɩ obótsu mlɩ fʋa.

Aba Ɩwɩ Asʋn Blɩ

¹¹ Apio adwɛpʋ, mlɩmátra blɩ mlɩ aba ɩwɩ asʋn. Mlɩmátra tsii aba, kpɔɩ aba. Ɔhagyiɔha ánɩ́ ɔlɛlɛ mʋ ba ɩla ntɛ gyi mʋ asʋn a, ilosuna ánɩ́ ɔdɛblɩ ɔbɛɛ, Bulu mbla amʋ ɩma alɛ. Ɩnɩ desuna ánɩ́ alatsu mʋ ɩwɩá ɔdʋn mbla amʋ. Nɩ ɔdʋn mbla amʋ a, mʋmʋ ɔmɛdɛ Bulu mbla amʋ bu.

¹² Bulu lɔwa mbla amʋ. Mʋ pɛ ɔbɛ́talɩ pʋ mʋ́ gyi anɩ asʋn. Mʋ pɛ ɔbɛ́talɩ hɔ anɩ nkpa, ntɛ mɔ anɩ. Nɩ igyi alɩ mʋ́ a, fʋgyi ma ánɩ́ fégyi fʋ ba asʋn?

Ansɩ Pʋdɩnka Ɔkɛsʋ

¹³ Mlɩyaa asʋ amlɩnu. Mlɩ aha amʋʋ mlɩtɛblɩ mlɩaa, “Ndɛ ntɛ ɔkɛ abɔ́yɔ wulu yile kʋsʋ, yetsia ɩnʋ ofi ɔkʋlɛ gyi ibia nya ɩwɩ” amʋ.

¹⁴ Mbɛɛ, mlɩyin ɔkɛtɔ? Mlɩyin alɩá mlɩ nkpatsiatɔ bɔ́bwɛ? Mlɩgyi fɛ agyinde, ɩtɛdalɩ dɩnka, tamɛ ɩtamawa ɔpá kʋkʋ, ɩtɔfwɩ.

¹⁵ Mʋ́ sʋ tɔá ilehian ánɩ́ mlɛ́blɩ gyi, “Nɩ Bulu lotsula ha anɩ nkpa a, abɔ́bwɛ ɩnɩ ntɛ ɩnɩ.”

¹⁶ Nɩ imegyi alɩ a, ilosuna ánɩ́ mlɩdɛ ɩwɩ tsu, pʋ ɩbɩ si kantɔ. Lakpan ɩwɩtsu anfɩ odu gyi.

¹⁷ Mʋ́ sʋ ɔha ánɩ́ oyin ɩtɔ wanklaan, tamɛ ɔtamabwɛ a, ɔdɛ lakpan bwɛ.