Yakobo 3 - Bulu Ntam Pɔpwɛ mʋ́a Israel Ɩlʋ

Ɔdandʋ

¹ Mɩ apio, mlɩ fɛ́ɛ́ mlɩmábwɛ ɩwɩ atɔ asunapʋ. Tsufɛ Bulu obégyi anɩ atɔ asunapʋ anfɩ asʋn kinkiinkin.

² Anɩ fɛ́ɛ́ anɩtɛpan bregyibrɛ, tamɛ nɩ ɔkʋ tamapan mʋ tɔɩtɔ a, mʋmʋ ɔlɔfʋn. Ɔbɛ́talɩ gyi mʋ ɩwɩsʋ ɔkpagyiɔkpasʋ.

³ Apʋkɩ, datɔbi kʋ pɛ bʋtɔpʋwa ɔpɔnkɔ ɔnɔ, pʋdamli mʋ, suna mʋ ɔkpa pʋ́ tɔá ɔbwɛ. Ɩtɛha otobu anɩ.

⁴ Mlɩkɩ ntsusʋ-yibiá ɩdɩn ntsu ansɩtɔ. Ilomoni, afu kpɔnkpɔntɩ tɔpʋ mʋ́ natɩ. Tamɛ ɔtabʋ pataplabi kʋ tɛdamli mʋ́, suna ɔtɩnɛá ɩyɔ.

⁵ Alɩ anɩ ɔdandʋ ɛ igyi nɩ. Igyi anɩ ɩwɩ ɩtɔ tukuriibi kʋ. Tamɛ ɩtɛtalɩ blɩ asʋn akpɔnkpɔntɩ pʋtsu ɩwɩ. Igyi fɛ ogya plɛnplɛnbiá ɩtɔwa ɩpʋ yile ogya.

⁶ Igyi ɩtɔ lalahɛá iteyinta atɔ fɛ́ɛ́ anɩ ɩwɩ. Ɩtɔkpɔɩ nyankpʋsa, yinta mʋ nkpatsiatɔ fɛ́ɛ́. Ɩsʋbɩtɩ ogya ánɩ́ ɩtamaduntɔ ɔdandʋ ogya anfɩ tɛtsankɩ tsu.

⁷ Nyankpʋsa tɛtalɩ bwɛ pututɔ-mbwɩ, mbubwi, awɔ pʋ́ ntsutso mbwɩ akugyiakʋ bʋtɛmanta.

⁸ Tamɛ ɔhaa mɔkʋtalɩ bwɛ ɔdandʋ ɔmanta kɩ. Ɩtɔ lalahɛ ɔdandʋ gyi. Ɔtamatsia diin. Elin ánɩ́ ɩtɔmɔ sɔɔn bɔ mʋ́.

⁹ Anɩtɔpʋ anɩ ɔdandʋ kanfʋ anɩ Wie pʋ́ anɩ Sɩ Bulu. Mʋ́ kɛn anɩtɔpʋlwɩɩ aha nɩ. Tamɛ Bulu onuto lɔbwɛ nyankpʋsa fɛ mʋ ɩwɩ.

¹⁰ Ɔnɔ kʋlɛ pɛ amʋtɔ ɩkanfʋ mʋ́a ɩlwɩɩ tɛdalɩ tsu. Mɩ apio, ɩma alɛá ɩbɛ́ba alɩ.

¹¹ Ntsuá ɩbʋ anunlɛ pʋ́ ntsuá ɩma anunlɛ bɛ́talɩ lɩn tsu ɔbʋn kʋlɛtɔ?

¹² Mango oyi bɛ́talɩ swie kankaba? Ntɛ baflɛ oyi bɛ́talɩ swie mango? Ɛkɛkɛɛkɛ! Alɩ ntsuá ɩbʋ anunlɛ mɛ́ɛtalɩ lɩn tsu ɔbʋn ánɩ́ mʋ́tɔ ntsu ma anunlɛtɔ nɩ.

Nyansa Ánɩ́ Itsu Bulu Wa

¹³ Nɩ ɔkʋ bʋ nyansa mʋ́a asʋn-asɩnu mlɩtɔ a, mʋmʋ ɔpʋ mʋ tsiatɔ wanklaan lɛ mʋ́ suna tsʋn mʋ bwɛhɛ pʋ́ mʋ ɩwɩasɩba ánɩ́ itsu mʋ nyansatɔ.

¹⁴ Tamɛ nɩ olu pʋ́ ɔnsɩpɛ tsiatɔ bʋ mʋtɔ a, mʋmʋ ɔmápʋ ɩbɩ si kantɔ, blɩ ɔbɛɛ mʋbʋ nyansa. Nɩ ɔblɩ alɩ a, alawa afunu dɩnka ɔnɔkwalɩ amʋsʋ.

¹⁵ Nyansa anfɩ odu motsu ɔsʋsʋ. Itsu ɔyɩtɔ atɔ ɔmagya, tsiatɔ lalahɛ pʋ́ ɔŋɛ lalahɛ wa.

¹⁶ Tsufɛ ɔtɩnɛgyiɔtɩnɛá olu pʋ́ ɔnsɩpɛ bʋ a, aba-asɩmanu pʋ́ lalahɛbwɛ tetsia ɩnʋ.

¹⁷ Tamɛ ɔha ánɩ́ mʋ nyansa itsu ɔsʋsʋ a, gyankpapʋ, mʋ ɩwɩ lɛtɩn. Ololwii, ɔtɔdwɛ aha, ɔtɛba ɩwɩasɩ. Otowun aha nwɛ, ɔtɔbwɛ yile. Ɔtamafuti fɩtatɔ kɩ, ɔtɔbwɛ atɔ tsu mʋ klʋntɔ.

¹⁸ Aha nsɩnɛ ɔlapʋ todu iwilwiiá ɩtɔpʋ yilebwɛ ba.