Yakobo 2 - Bulu Ntam Pɔpwɛ mʋ́a Israel Ɩlʋ

Fɩtatɔ Futi Kɩ

¹ Mɩ apio, nɩ mlɩlahɔ numnyam Owie Yesu Kristo gyi a, mlɩmáfuti fɩtatɔ kɩ.

^2-3 Nɩ ɩwɩ onyapʋá ɔdɩdɩ tatiá ɩbʋ ibia, ɔlɔwa sika atɔ pʋ́ ohianiá ɔdɩdɩ tatida bɛba mlɩ Bulu osumkpa a, mlɩmáha ɩwɩ onyapʋ amʋ otsiakpa, bla mʋ mlɩaa, obétsia oyilekpa nfɩ; bla ohiani amʋ mʋ́ mlɩaa, otsia asɩ ɔtɩnɛkʋ ɩnʋ, ntɛ odunka ɔtɩnɛkʋ lɩɩ.

⁴ Nɩ mlobu aha amʋ́ ɩwɩnya sʋ a, mlɩmɔkʋpʋ agywɩɩn lalahɛ gyi asʋn nɩ?

⁵ Apio adwɛpʋ, mlɩyaa asʋ amlɩnu. Bulu lɛlɛ ɔyɩ anfɩtɔ ahianfɔ ɔbɛɛ, bʋnya hogyiá mʋ́ ɔnɔ bʋ ɔnlɩn, abʋtsia mʋ iwiegyi amʋtɔ; fɛ alɩ amʋʋ ɔlɛhɩɛ yaɩ ɔbɛɛ, mɔ́pʋha aha amʋʋ bʋtɔdwɛ mʋ amʋ.

⁶ Tamɛ mlɩ mʋ́ a, mlɩtɔkpɔɩ ahianfɔ. Nfɩtɛ mlɩ, megyi ɩwɩ anyapʋ anfɩ tesisi mlɩ, tswɩ mlɩ mansʋ, sama mlɩ wulu ahandɛ wa nɩ?

⁷ Megyi amʋ́ dɛ Kristo ɩdayile amʋʋ ɩdɩn mlɩsʋ amʋ kpɔɩ nɩ?

⁸ Bulu mbla amʋ fɛ́ɛ́ nwun ánɩ́ bɔwanlɩn wa Bulu asʋn wanlɩnhɛ amʋtɔ gyi, “Dwɛ fʋ ba fɛ fʋ ɩwɩ.” Nɩ mlɩdɛ mʋ́sʋ gyi lɛlɛ a, mʋmʋ mlɩdɛ ɩtɔ wanklaan bwɛ.

⁹ Tamɛ nɩ mlofuti fɩtatɔ kɩ a, mlɩlabwɛ lakpan. Bulu mbla amʋ laha mlɩ ɩpɔn.

¹⁰ Tsufɛ fʋá fegyi mbla amʋ fɛ́ɛ́sʋ, tamɛ fɛpan kʋlɛ pɛ a, fagyi pɔn ánɩ́ fatʋn mbla amʋ fɛ́ɛ́.

¹¹ Tsufɛ Bulu lɛblɩ ɔbɛɛ, “Mátɔ mbʋa.” Mʋ kɛn lɛblɩ ɔbɛɛ, “Mámɔ ɔha” ɛ nɩ. Mʋ́ sʋ nɩ fʋmɔkʋtɔ mbʋa, tamɛ famɔ ɔha a, fʋmɔkʋkina Bulu mblasʋ gyi nɩ?

¹² Bulu ɔbɔ́pʋ mbla anfɩ ɩtɛha anɩtegyi ɩwɩ anfɩ gyi aha asʋn. Mʋ́ sʋ mlɩkɩ wanklaan mlɩ asʋn blɩhɛ pʋ́ mlɩ bwɛhɛtɔ.

¹³ Tsufɛ ɔha ánɩ́ ɔtamawun aha nwɛ a, Bulu omóowun mʋ nwɛ. Tamɛ nɩ fʋtowun aha nwɛ a, Bulu obówun fʋ nwɛ mʋ asʋn ogyikɛ.

Hogyi Pʋ́ Bwɛhɛ

¹⁴ Apio aba, nɩ ɔkʋ ɔbɛɛ, mɔhɔ Bulu gyi, tamɛ mʋ bwɛhɛ mosuna alɩ a, labi mɔmʋ mʋ hogyi amʋ bʋ? Mʋ́ odu ɩbɛ́talɩ ha mʋ ɔkla obénya nkpa?

^15-16 Nɩ fowun fʋ aba akʋ bʋma atɔ dɩdahɛ pʋ́ ɔyɩkɛhɛtɔ atogyihɛ, tamɛ fʋmɛha amʋ́, fɛbla amʋ́ fɛɛ, “Nɛha mlɩ itsia. Mlɩtsia wanklaan. Bulu ɔkpa mlɩ, ɔha mlɩ tɔá ɩdɛ mlɩ hian” a, labi mɔmʋ fʋ asʋn blɩhɛ amʋ ɩlɔwa?

¹⁷ Alɩ hogyi igyi nɩ. Hogyi oduá yilebwɛ ha fʋ ba ɩma mʋ́tɔ a, igyi hogyi wuhɛ.

¹⁸ Ɔkʋ ɔbɛ́talɩ blɩ ɔbɛɛ “Fʋbʋ hogyi. Mɩ ɛ ntɔbwɛ yile.” Nɛ́lɛ bla mʋ mbɛɛ, “Suna mɩ fʋ hogyi amʋʋ yilebwɛ ɩma mʋ́tɔ amʋ. Mɩ ɛ nósuna fʋ mɩ hogyi tsu mɩ yilebwɛtɔ.”

¹⁹ Fʋ hogyi desuna ánɩ́ Bulu ɔkʋlɛ pɛ bʋ ɩnʋ? Ɩbʋ alɛ! Tamɛ bɩá ɔŋɛ lalahɛ fɛ́ɛ́ bohogyi alɩ. Mʋ́ sʋ bʋtenya mʋ ifu, kpɩnkɩ kpakpakpakpa.

²⁰ Fʋ ɔha mimlahɛ, fʋdekleá fówun ánɩ́ hogyiá ɩtamabwɛ yile igyi hogyi kpaalɩ?

²¹ Anɩ nain Abraham lɔbwɛ yile Bulu ansɩtɔ, tsufɛ olotsula kpa mʋ bi Isakɩ ya pututɔ, tɛkɩ ɔyɔmɔ mʋ bɔ afɔdɩɛ ha Bulu.

²² Mlɩlawun alɩá nanain Abraham hogyi pʋ́ mʋ bwɛhɛ lɛnatɩ? Mʋ bwɛhɛ sʋ mʋ hogyi lɔfʋn.

²³ Alɩ Bulu asʋn wanlɩnhɛ anfɩ ɩlɛba mʋ́tɔ nɩ. Ɔbɛɛ, “Abraham lɔhɔ Bulu gyi. Mʋ́ sʋ Bulu lobu mʋ yile ɔbwɛpʋ” tɩ mʋ mʋ nyawie nɩ.

²⁴ Ɩnɩ sʋ sei a, mlɩbɩá yilebwɛ tɛha Bulu totsu ɔha ánɩ́ mʋ asʋn da ɔkpa mʋ ansɩtɔ, megyi mʋ hogyi pɛ.

²⁵ Alɩ ɩlɛba ha obu-ɔnɔ otsiapʋ Rahab ɛ nɩ. Bulu lotsu mʋá mʋ asʋn da ɔkpa, tsu tɔá ɔlɔbwɛ sʋ. Ɔlɔpʋ Yudafɔ akʋá bɛba bʋdɛ ansɩ wa kɩ mʋ ɔmátɔ ŋain, ɔlɛha amʋ́ bɛtsɛ ɔkpa srɩ.

²⁶ Alɩ amʋʋ ɔŋɛ ɩma ɔhatɔ ogyi itowuhɛ amʋ a, alɩ nɩ yilebwɛ mɛmá hogyisʋ ɛ igyi hogyi wuhɛ nɩ.