Tito 3 - Bulu Ntam Pɔpwɛ mʋ́a Israel Ɩlʋ

Okristoyin Tsiatɔ

¹ Tsia kaɩn amʋ́ abʋba ɩwɩasɩ ha ɔmá akpapʋ, abʋgyi ahandɛ mblasʋ, abʋbu amʋ́. Bʋkɩá bɔ́bwɛ tɔá igyi yile bregyibrɛ.

² Bʋmáblɩ ɔhaa ɩwɩ asʋn lalahɛ, bʋmágyi nwɛn ɛ. Mboun bʋbwɛ aha ánɩ́ bolwii, abʋba ɩwɩasɩ ha ɔhagyiɔha.

³ Tsufɛ brɛ amʋ a, aha mimlahɛ anɩ ɛ anɩgyi. Asʋtɔ lɔwa anɩ ɔnlɩn. Anɩlɔfwɩ, mli nkpábi ha ɔwɔlɩ lalahɛ pʋ́ atɔá ɩtɔwa ɔha ansigyi. Anɩleyinta brɛ susu lalahɛ mʋ́a tɔá ɩdɛ anɩ ansɩ pɛ ɩwɩ. Aha bolu anɩ, anɩ ɛ anɩlolu amʋ́.

⁴ Tamɛ anɩ nkpa Ɔhɔpʋ Bulu lɛlɛ mʋ awɩtɔlɛ pʋ́ ɔdwɛá ɔbʋ ha anɩ ɔwan.

⁵ Ɔlɛlɛ anɩ, tamɛ megyi yile kʋkʋ anɩlɔbwɛ sʋ, mboun mʋ nwewun sʋ. Ɔlɔtsʋn Ɔŋɛ Wankɩhɛ amʋsʋ fwɩ anɩ lakpan lɛ anɩsʋ, ɔlɛlakwɩɩ anɩ, ha anɩ nkpa pɔpwɛ.

⁶ Ɔlɔtsʋn anɩ Ɔhɔpʋ Yesu Kristosʋ, tsɛɩ Ɔŋɛ Wankɩhɛ amʋ wʋlɩ anɩsʋ.

⁷ Ɔlɔbwɛ anɩ alɩ, mɛnɩ ɔbɔ́wa awɩtɔlɛ ha anɩ, tsu mʋ́á anɩ asʋn da ɔkpa. Fówun anɩ ɩbɩ bɛ́da nkpa ánɩ́ ɩtamata amʋʋ anɩdɛ mʋ́ ɔkpa kɩ amʋ.

⁸ Asʋn anfɩ bʋ mʋ́tɔ. Yɩrɩ ɩwɩ afʋsuna mʋ́ wanklaan, mɛnɩ aha amʋʋ amʋ́ ansɩ dɩn Bulusʋ amʋ bétsia bwɛ yile bregyibrɛ. Mʋ́gyi tɔá ɩbʋ alɛ, ɩbɔ́wa labi ha ɔhagyiɔha nɩ.

⁹ Mápʋ ɩwɩ wa mimla nwɛngyi, anain otuntufla kla pʋ mbla amʋ ɩwɩ ɩtrɛtɔ. Labi ma mʋ́tɔ kugyikʋtɔ.

¹⁰ Tɔɩ kpla ɔha ánɩ́ ɔtɛtɩ ɩtrɛ wa aha nsɩnɛ tse nyɔ pɛ. Mʋ́ ɔma a, si mʋ asʋn.

¹¹ Bɩá ɔha amʋ odu nwuntɔ bʋ oklun. Oyin ánɩ́ lalahɛ mʋdɛbwɛ. Alaha mʋ ɩwɩ pɔn dodo.

Paulo Asʋn Trahɛ

¹² Nenya wa Artema ntɛ Tihiko fʋ wa pɛ, bɔ mbɔdɩ afʋbɔtʋ mɩ Nikopoli wulutɔ, tsufɛ nabwɛ agywɩɩn ánɩ́ nétsia ɩnʋ atsalɩbɩ.

¹³ Bɔ mbɔdɩ afʋsi mbla osunapʋ Sena mʋa Apolo ɔkpa wanklaan. Tɔtɔ ɩmáhian amʋ́ ɔkpatɔ.

¹⁴ Ha anɩ pɩ amʋ ɛ abʋbɩ alɩá bʋtɔbʋa aba agyʋma yɔ wanklaan, mɛnɩ bɛ́talɩ kɩ aha ánɩ́ bʋma tɔtɔsʋ. Fówun bʋmɔ́ɔbwɛ aha ánɩ́ amʋ́ ɩwɩ mɔwa labi.

¹⁵ Aha amʋʋ bʋbʋ mɩ wa nfɩ amʋ fɛ́ɛ́ bɛha fʋ itsia. Aha ahogyipʋ amʋʋ bʋtɔdwɛ anɩ amʋ itsia. Bulu ogyi mlɩ fɛ́ɛ́ bʋalɛ.