Tito 2 - Bulu Ntam Pɔpwɛ mʋ́a Israel Ɩlʋ

Atosunahɛ Wanklaan

¹ Tamɛ fʋ mʋ́ a, suna amʋ́ tɔá ɩlɛkana atosunahɛ wanklaan amʋ.

² Suna ayin dɛhɛn amʋ abʋgyi ɩwɩsʋ, abʋbwɛ aha ánɩ́ obú bʋ amʋ́sʋ, bʋtegyi ɩwɩsʋ. Bʋhɩɛ kɩta amʋ́ hogyitɔ kinkiinkin. Bʋdwɛ aha wanklaan, abʋhɩɛ tomi.

³ Suna atsɩ dɛhɛn ɛ abʋtsia tsiatɔá ɩlɛkana Bulu osumpʋ. Bʋmábwɛ aha ɩwɩ asʋn ablɩpʋ, ntɛ ntakpan anunpʋ. Mboun bʋsuna tɔá ɩbʋ alɛ.

⁴ Amʋ́ atosunahɛ ɩha mbitebi amʋ abʋdwɛ amʋ́ aklu pʋ́ amʋ́ abi.

⁵ Bʋgyi ɩwɩsʋ, abʋha amʋ́ ɩwɩ ɩtɩn. Bʋbwɛ atsɩá bʋtɛkɩ amʋ́ woyisʋ wanklaan, bʋtɔbwɛ yile, bʋtobu amʋ́ aklu, mɛnɩ ɔhaa mɔ́ɔkpɔɩ Bulu asʋn amʋ.

⁶ Tɔɩ kpla nyasubi ɛ abʋgyi ɩwɩsʋ togyitɔá bɔ́bwɛtɔ.

⁷ Fʋ onuto ɛ bɔ mbɔdɩ afʋlɛ tsiatɔ wanklaan suna, fʋ bwɛhɛ kugyikʋtɔ. Ha fʋ ansɩ ɩpɛ, afʋsuna ɔnɔkwalɩ asʋn amʋ tsu fʋ klʋntɔ.

⁸ Suna ɔnɔkwalɩ amʋ, mɛnɩ ɔhaa mɛ́ɛtalɩ kʋsʋ lɩɩ fʋ atosunahɛsʋ. Fówun pɛlɩ bɛ́kɩta fʋ alupʋ, nɩ bʋmenya ɔlala blɩ tsu anɩ ɩwɩ.

⁹ Suna nkpábi ɛ abʋbu amʋ́ awie ɔkpagyiɔkpasʋ. Bʋbwɛ togyitɔ igyi amʋ́ awie amʋ ansɩ. Bʋmátsia lɛ amʋ́ asʋn ɔnɔ.

¹⁰ Bʋmáwi amʋ́ awie, mboun bʋwa ɔnɔkwalɩ ha amʋ́ togyitɔtɔ, mɛnɩ amʋ́ bwɛhɛ bɛ́ha aha ansɩ bégyi anɩ nkpa Ɔhɔpʋ Bulu atosunahɛ amʋ ɩwɩ.

¹¹ Tsufɛ Bulu lalɛ mʋ awɩtɔlɛ ɔwan. Mʋ́gyi, odekleá ɔbɔ́hɔ anyankpʋsa fɛ́ɛ́ nkpa.

¹² Mʋ awɩtɔlɛ amʋ ɩlasuna ánɩ́ ilehian ánɩ́ abési lalahɛ bwɛ, si anɩ ɔwɔlɩ lalahɛ ɔmagya, gyi ɩwɩsʋ, bwɛ yile, anɩ asʋn igyi mʋ ansɩ ɔyɩ anfɩtɔ.

¹³ Brɛ anfɩ anɩdɛ ɔkpa kɩ ha ɛkɛ yile amʋʋ Bulu Ɔkpɔnkpɔntɩ, ogyi anɩ Ɔhɔpʋ Yesu Kristo ɔbɛ́lɛ mʋ numnyam ɔwan anfɩ.

¹⁴ Mʋlotsula bɔmɔ mʋ anɩ sʋ, mɛnɩ ɔbɛ́lɛ anɩ tsu lakpan kugyikʋtɔ. Ɔtɩn anɩ ɩwɩ, pʋ anɩ bwɛ mʋ onuto aha, anɩ ansɩ ɩpɛ yilebwɛsʋ.

¹⁵ Suna ɩnɩ aná, afʋtɔɩ kpla amʋ́ abʋgyi mʋ́sʋ. Fʋbʋ ɔkpa wa ɩyɩn wa amʋ́, nɩ bʋmɛdɛbɩ bwɛ. Máha ɔhaa ɔkɩ fʋ ansɩtɔ kotikoti.