Romafɔ 9 - Bulu Ntam Pɔpwɛ mʋ́a Israel Ɩlʋ

Aha Ánɩ́ Bulu Lalɛ

¹ Mɩa Kristonyɔ anɩlabwɛ kʋlɛ. Mʋ́ sʋ ɔnɔkwalɩ asʋn ndɛblɩ sei. Ɔŋɛ Wankɩhɛ dɛ mɩ kpa. Mʋ́ sʋ mɩ klʋn ɛ dɛ mɩ bla ánɩ́ mmɛdɛ afunu wa.

² Mɩ pɩ Israelfɔ sʋ asʋn ɩhɩɛ dɛ mɩ han. Ahʋmɩtɩá ɩmɛka itin dɛ mɩ.

³ Nɩ ɩbɔ́wa alɛá nénya ɩlwɩɩ, mɩa Kristonyɔ nsɩnɛ béyinta, mɛnɩ bénya nkpa ánɩ́ ɩtamata kʋraa a, tɛkɩ nɔ́pʋ ɩwɩ ha.

⁴ Mɩ pɩ Israelfɔ gyi aha ánɩ́ Bulu lɛlɛ pʋbwɛ mʋ abi. Amʋ́ ɔlɛlɛ mʋ numnyam suna. Ɔlɛka ntam ha amʋ́, pʋ mʋ mbla wa amʋ́ ɩbɩtɔ. Olosuna amʋ́ ɔkpa ánɩ́ bɔ́pʋtswɛ mʋ. Ɔlɛbla amʋ́ tɔá alahɩɛá ɔbɔ́pʋha amʋ́ fɛ́ɛ́.

⁵ Amʋ́lɛlɩn tsu Israelfɔ anain akpɔnkpɔntɩ amʋtɔ. Mʋ́a ɩdʋn kʋraa a, amʋ́tɔ Kristo amʋ lɛbɛlɩn ɔsʋlʋ anfɩsʋ. Ɩkanfʋ letsia Kristo, (ɔha amʋʋ Bulu lada mʋ ofuli amʋ), ogyi Bulu, atɔ fɛ́ɛ́sʋ ogyipʋ amʋ brɛ fɛ́ɛ́tɔ! Amen!

⁶ Ɩnɩ mosuna ánɩ́ Bulu asʋn amʋʋ ɔlɛblɩ tswɩ amʋ ɩmɛ́ɛba mʋ́tɔ. Tsufɛ megyi Israelfɔ amʋ fɛ́ɛ́ gyi Israelfɔ onutonuto.

⁷ Megyi Abraham abi fɛ́ɛ́ gyi mʋ abi onuto. Tsufɛ Bulu lɛbla Abraham ɔbɛɛ, “Isakɩtɔ fʋ abi-aná bɛ́dalɩ tsu.”

⁸ Ɩnɩ losuna ánɩ́ megyi aha ánɩ́ botsu Abraham abi fɛ́ɛ́tɔ gyi Bulu aha. Abraham abi-aná amʋʋ Bulu lɛhɩɛ ha mʋ amʋ nkʋlɛ gyi Bulu aha.

⁹ Tsufɛ tɔá Bulu lɛhɩɛ Abraham gyi, “Néyinki ba ofieba sɛsɛbrɛ. Nɛ́ba a, fʋ ka Sara lakwɩɩ obiyimbi.”

¹⁰ Megyi ɩnɩ wʋlɛ. Rebeka lɔkwɩɩ atabi ha anɩ nain Isakɩ.

¹¹ Tamɛ brɛá ɔmɔkʋnya kwɩɩ amʋ́, abʋdan bɩ yile ntɛ lalahɛbwɛ a, Bulu lɛbla Rebeka amʋ́ ɩwɩ asʋn. Bulu lɔbwɛ mʋ́ alɩ, mɛnɩ ibósuna anɩá ɔkpa amʋʋ ɔtɔtsʋn mʋ́sʋ hɔ aha amʋ ɩmɛna anɩ bwɛhɛsʋ. Mboun ɩna mʋ nkʋlɛ pɛ apɛ pʋ́ alɩá ɔtɛlɛ mʋ ahasʋ.

¹² Asa Rebeka ɔbɔ́kwɩɩ nyebi amʋ a, Bulu lɛbla mʋ ɔbɛɛ, “Ɔdɛhɛn obósum ɔkʋsʋ.”

¹³ Fɛ alɩá bɔwanlɩn wa Bulu asʋn wanlɩnhɛ amʋtɔ bɛɛ, “Ntɔdwɛ Yakob dʋn Esau.”

¹⁴ Sei a, nkalɩ abɛ́blɩ? Abɛ́blɩ anɩaa, Bulu asʋn mɛda ɔkpa loo? Ɛkɛkɛɛkɛ!

¹⁵ Tsufɛ Bulu lɛbla Mose ɔbɛɛ, “Aha ánɩ́ nówun amʋ́ nwɛ a, amʋ́ nówun nwɛ. Amʋ́á nahɩɛá négyi bʋalɛ a, amʋ́ négyi bʋalɛ.”

¹⁶ Mʋ́ sʋ megyi ɔha apɛ ntɛ mʋ nsiwa Bulu tɛkɩ. Mboun mʋ onuto nwewun igyi.

¹⁷ Bɔwanlɩn wa Bulu asʋn wanlɩnhɛ amʋtɔ bɛɛ, Bulu lɛbla Egyipte owie Farao ɔbɛɛ, “Atoku anyɔ anfɩ sʋ nɛyaɩ fʋ iwie, alɩá nɔ́tsʋn fʋsʋ lɛ mɩ tumi suna, pʋ́ alɩá ɔyɩtɔ aha fɛ́ɛ́ bónu mɩ ɩda, kanfʋ mɩ.”

¹⁸ Ɩnɩ sʋ nɩ Bulu ɔhɩɛá obówun ɔkʋ nwɛ a, otowun mʋ nwɛ. Nɩ ɔhɩɛá ɔbɛ́ha ɔkʋ ɔbɔ́wa klʋntɔ odwin ɛ a, ɔtɛha mʋ ɔtɔwa klʋntɔ odwin.

Bulu Ɔblɔnya Pʋ́ Mʋ Aha Nwewun

¹⁹ Mlɩtɔ ɔkʋ ɔbɛ́fɩtɛ ɔbɛɛ, “Nɩ alɩ igyi nɩ mʋ́ a, ntogyi sʋ Bulu dɛ nyankpʋsa ɩpɔn ha? Ma ɔbɛ́talɩ tin Bulu ɔkpa?”

²⁰ Tamɛ ndɛ mlɩ fɩtɛ mbɛɛ, fʋgyi ma ánɩ́ fɛ́lɛ Bulu ɩla? Ɔlɔ ɔbɛ́talɩ fɩtɛ mʋ ɔpwɛpʋ ɔbɛɛ, “Ntogyi sʋ fapwɛ mɩ alɩ?”

²¹ Alɩágyialɩá igyi a, atɔ ɔpwɛpʋ tɔpʋ obon pwɛ tɔá odekle. Ɔbɛ́talɩ pʋ obon ipin kʋlɛ pwɛ nlonyɔ. Ɔbɔ́pʋ kʋlɛ bwɛ ɔlɔ́ nun-ntsu, kpa nsuo wa ɩkʋlɛtɔ.

²² Alɩ kɛn igyi ha Bulu nɩ. Ɔbʋ ɔkpa lɛ mʋ ɔblɔ suna, mɛnɩ aha bówun mʋ tumi. Tamɛ ɔlɛhɩɛ nya klʋn ha aha amʋʋ olenya ɔblɔ amʋ́sʋ amʋ. Tɛkɩ ɩlɔfʋn ánɩ́ ɔbɛ́hɩ amʋ́.

²³ Bulu bʋ ɔkpa lɛ mʋ numnyam kpɔnkpɔntɩ amʋ ɔwan aha amʋʋ ɔlɛlɛ yaɩ ánɩ́ obówun amʋ́ nwɛ, ɔwa amʋ́ numnyam amʋsʋ.

²⁴ Anɩgyi aha amʋʋ ɔlɛlɛ yaɩ amʋ nɩ. Megyi Yudafɔ nkʋlɛtɔ ɔlɛlɛ aha. Ɔlɛlɛ aha ánɩ́ bʋmegyi Yudafɔ akʋ ɛ.

²⁵ Bulu lɛblɩ mʋ ɔnɔsʋ ɔtɔɩpʋ Hosea ɔwʋlʋtɔ ɔbɛɛ, “Nɛ́tɩ aha amʋʋ tɛkɩ bʋmegyi mɩ aha amʋ mɩ aha. Aha amʋʋ tɛkɩ ntamakle amʋ́ asʋn amʋ ɔbɔ́bwɛ mɩ adwɛpʋ.

²⁶ Ɔtɩnɛ amʋʋ tɛkɩ nɛbla amʋ́ mbɛɛ, ‘Megyi mɩ aha mlɩgyi> amʋ a, ɩnʋfɔ nɛ́tɩ mbɛɛ, ‘Bulu Ɔkɩankpapʋ abi> nɩ.”

²⁷ Bulu ɔnɔsʋ ɔtɔɩpʋ Yesaia lɔkplʋn bla Israelfɔ ɔbɛɛ, “Nɩ Israelfɔ bɛklɛɩ fɛ ɔpʋ ɔnɔ ɩsɩ kʋraa a, amʋ́tɔ aha kpalobi pɛ nɔ́hɔ nkpa.

²⁸ Tsufɛ ɔbɩsasʋ anɩ Wie obégyi ɔyɩtɔ aha fɛ́ɛ́ asʋn, bua mʋ́ wanklaan.”

²⁹ Tsufɛ Bulu ɔnɔsʋ ɔtɔɩpʋ Yesaia legyankpa wanlɩn wa Bulu asʋn wanlɩnhɛ amʋtɔ ɔbɛɛ, “Nɩ mɩ Wie Bulu, tumi fɛ́ɛ́ Owie mesi anɩ abi-aná akʋ yaɩ a, tɛkɩ anɩ fɛ́ɛ́ abɛ́ta fɛ Sodom mʋ́a Gomorafɔ.”

Israelfɔ Bulu Máhogyi

³⁰ Nkalɩ anɩdɛblɩ ngya? Anɩdɛblɩ anɩaa, aha amʋʋ bʋmegyi Yudafɔ amʋ bʋmɔbɔ mbɔdɩ kʋkʋ, asa Bulu lɛha amʋ́ asʋ! Hogyi sʋ benya mʋ́.

³¹ Tamɛ Israelfɔ amʋʋ amʋ́ ansɩ lɛpɛ, bʋdɛ mbla amʋsʋ gyi, Bulu ɔha amʋ́ asʋ amʋ bʋmɛtalɩ.

³² Ntogyi sʋ? Tsufɛ bʋmɛpɛ ansɩ pʋ hogyi dunka mʋ́. Ɩlɔbwɛ amʋ́ fɛ mbla amʋsʋ gyisʋ Bulu ɔbɔ́tsʋn ha amʋ́ asʋ. Ɩnɩ sʋ bosutin “Ibwi amʋʋ ɩtɛlɛ aha da” amʋsʋ dɩda kpla.

³³ Ibwi anfɩ ɩwɩ asʋn bɔwanlɩn wa Bulu asʋn wanlɩnhɛ amʋtɔ bɛɛ, “Bulu ɔbɛɛ, ‘Mlɩkɩ! Ndɛpʋ Ibwi tswɩ Sion wulutɔ. Aha bósutin ibwi amʋsʋ dɩda. Pɛlɩ mɛ́ɛkɩta ɔhagyiɔha ánɩ́ ɔlɔhɔ mʋ gyi.> ”