Romafɔ 5 - Bulu Ntam Pɔpwɛ mʋ́a Israel Ɩlʋ

Ɩsʋgyi Bulu Ansɩtɔ

¹ Anɩ hogyi sʋ Bulu latsu mʋ́á anɩ asʋn da ɔkpa. Mʋ́ sʋ anɩ Wie Yesu Kristo lala anɩa Bulunyɔ nsɩnɛ.

² Hogyi sʋ ɔkpa lafinki ha anɩ ngya. Ɩnɩá anɩ Wie Yesu sʋ Bulu awɩtɔlɛ anfɩ laba anɩsʋ, anɩlapʋ hogyi nya ɔlɩɩkpa ngya a, ɩhɩɛ bʋ anɩ ɔdwɛ. Tsufɛ anɩdɩn ansɩá abébenya mʋ numnyam amʋ kʋ.

³ Ansɩ ɩtra dɛ anɩ gyiá anɩdɛ ipian wun. Tsufɛ ipian tɛha anɩtɔwa nsi.

⁴ Nsiwa tɛha anɩtɛbɩ tsia alɩá ilegyi Bulu ansɩ. Nɩ abɩ tsia alɩá ilegyi mʋ ansɩ a, abɛ́dɩnka ansɩ mʋsʋ.

⁵ Ansɩ pʋdɩnka Bulusʋ ɩmɛ́ɛha pɛlɩ mɛ́ɛkɩta anɩ. Tsufɛ Bulu lɔtsʋn Ɔŋɛ Wankɩhɛ amʋʋ ɔlɔpʋha anɩ amʋsʋ pʋ́ mʋ ɔdwɛ wa anɩ klʋntɔ.

⁶ Brɛá anɩtra anɩgyi lakpan abwɛpʋ, anɩmá ɔwʋnlɩn a, Kristo lobowu ha anɩ lalahɛ abwɛpʋ brɛá Bulu onuto lɛhɩɛtɔ.

⁷ Nɩ ɔkʋ asʋn da ɔkpa kʋraa a, ɩbɔ́wa ɔnlɩn asa ɔkʋ obótsula wu ha mʋ. Fialɩ ɔha yile mʋ́ a, ɔkʋ ɔbɔ́wa klʋn wu ha mʋ.

⁸ Tamɛ tɔá ilosuna ánɩ́ Bulu tɛhɩɛ dwɛ anɩ gyi, brɛá anɩgyi lakpan abwɛpʋ a, ɔlɛha Kristo lobowu ha anɩ.

⁹ Ɩna Yesu Kristo obugya amʋʋ ɩlɔwʋlɩ asɩ amʋsʋ Bulu lesi anɩ lakpan kie anɩ, tsu anɩ ánɩ́ anɩ asʋn da ɔkpa. Kristo sʋ ɔbɛ́lɛ anɩ kokooko. Ɔmɛ́ɛbɩtɩ anɩ ɩsʋ lakpan abwɛpʋ ɩsʋ-ɔbɩtɩkɛ amʋ.

¹⁰ Tɛkɩ Bulu alupʋ anɩgyi. Tamɛ tsʋn mʋ Bi amʋ lowusʋ a, alabwɛ anɩ mʋ anyawie klakla. Ɩnɩá anɩlabwɛ mʋ anyawie sʋ a, ɔbɔ́hɔ anɩ nkpa kokooko. Tsufɛ Kristo ɛ bʋ nkpa.

¹¹ Megyi mʋ́ wʋlɛ. Mʋ́a ɩtra dʋn kʋraa gyi, anɩdɛ ɔdwɛ gyi. Tsufɛ anɩ Wie Yesu Kristo lala anɩa Bulunyɔ nsɩnɛ. Mʋ́ sʋ anɩlabwɛ Bulu anyawie.

Adam Mʋa Kristo

¹² Adam nkʋlɛ bwɛhɛ sʋ lakpan lɛba ɔyɩtɔ. Mʋ lakpan amʋ sʋ lowu lɛba ɔyɩtɔ. Ɩnɩ sʋ lowu lenya tumi ɔhagyiɔhasʋ, tsufɛ aha fɛ́ɛ́ babwɛ lakpan.

¹³ Lakpan bʋ ɔyɩtɔ asa Bulu lɔpʋ mʋ mbla ba Mose. Tamɛ brɛá Bulu mɔkʋpʋ mbla amʋ ba mʋ a, olobun ansibi lakpansʋ.

¹⁴ Tsu Adam brɛsʋ bɔtʋ Mose brɛsʋ a, lowu legyi iwie anyankpʋsa fɛ́ɛ́sʋ. Ɩbʋ mʋ́tɔá bʋmɔtʋn mbla kʋkʋ fɛ Adam, tamɛ amʋ́ ɛ bowu. Akɩ alɩá Adam lekle ɔlɩan ɔmapʋ amʋ.

¹⁵ Adam na ɔtsan ha Yesu Kristo. Tsufɛ Bulu awɩtɔlɛ amʋ megyi fɛ Adam lakpan amʋ. Adam nkʋlɛ lakpan sʋ aha fɛ́ɛ́ bówu. Tamɛ Yesu Kristo nkʋlɛ awɩtɔlɛwa sʋ Bulu lalawa awɩtɔlɛ, pʋ mʋ atokiehɛ ha aha tsɔtsɔɔtsɔ. Mʋ atokiehɛ amʋ ɩbʋ bia dʋn lowu amʋ.

¹⁶ Tɔá anyankpʋsa benya tsu Bulu atokiehɛ amʋtɔ ɩna ɔtsan ha tɔá benya tsu Adam lakpan amʋtɔ. Mʋ lakpan kʋlɛ pɛ amʋ lɛha ɔhagyiɔha legyi pɔn Bulu ansɩtɔ. Mʋ́lɔpʋ lowu ba, tamɛ lakpan tsɔtsɔɔtsɔ ɔma a, Bulu atokiehɛ kʋlɛ pɛ lɛha Bulu lotsu aha fɛ́ɛ́á amʋ́ asʋn da ɔkpa mʋ ansɩtɔ.

¹⁷ Ɔbakʋlɛ lakpan sʋ lowu legyi iwie ahasʋ. Tamɛ alɩá Bulu lahɩɛ wa awɩtɔlɛ ha aha ɩbʋ wanwan. Alatsʋn Yesu Kristo nkʋlɛsʋ tsu anɩ ánɩ́ anɩ asʋn da ɔkpa, anɩa mʋnyɔ abégyi iwie anɩ nkpatɔ fɛ́ɛ́.

¹⁸ Ɩnɩ sʋ alɩ amʋʋ ɔbakʋlɛ lakpan sʋ Bulu lɛha aha fɛ́ɛ́ ɩpɔn amʋ a, alɩ kɛn ɔbakʋlɛ yilebwɛ sʋ Bulu laha aha fɛ́ɛ́ bagyi asʋ mʋ ansɩtɔ, alaha amʋ́ nkpa ánɩ́ ɩtamata ɛ nɩ.

¹⁹ Alɩ amʋʋ ɩna ɔbakʋlɛ asʋtɔ-ɔnlɩn sʋ aha fɛ́ɛ́ bemli lakpan abwɛpʋ amʋ a, alɩ kɛn ɩna ɔbakʋlɛ obú sʋ Bulu obótsu aha tsɔtsɔɔtsɔ ánɩ́ amʋ́ asʋn da ɔkpa nɩ.

²⁰ Bulu lɔpʋ mbla amʋ ba, mɛnɩ aha bówun lakpan ánɩ́ bʋdɛbwɛ wanklaan. Tamɛ brɛá lakpan dɛklɛɩ a, Bulu awɩtɔlɛ ɛ ɩdɛklɛɩ tsɩa.

²¹ Lakpan legyi ahasʋ, ɩlɛha aha bowu. Alɩ kɛn Bulu lawa awɩtɔlɛ tsu aha ánɩ́ amʋ́ asʋn da ɔkpa mʋ ansɩtɔ nɩ. Ɩnɩ laha aha batsʋn anɩ Wie Yesu Kristosʋ nya nkpa ánɩ́ ɩtamata.