Romafɔ 2 - Bulu Ntam Pɔpwɛ mʋ́a Israel Ɩlʋ

Bulu Tamakɩ Ɔha Ansɩtɔ

¹ Ɩnɩ sʋ fʋá fʋtsie fʋdɛ fʋ aba ɩla lɛ, fʋma ɔnɔ kʋkʋ lɛ Bulu ansɩtɔ. Tsufɛ fʋdɛ akʋ ɩla lɛ, tamɛ fʋdɛ mʋ́ odu kɛn bwɛ. Mʋ́ sʋ nɩ fʋdɛ amʋ́ ɩla lɛ a, ɩwɩ ɩpɔn fʋdɛha.

² Anɩyin ánɩ́ Bulu ɔbɛ́ha aha ánɩ́ bʋdɛ ɩnɩ odu bwɛ ɩpɔn. Anɩyin ɛ ánɩ́ mʋ asʋn da ɔkpa.

³ Mʋ́ sʋ nɩ fʋdɛ aha ɩla lɛ lakpan ánɩ́ fʋ onuto fʋdɛbwɛ sʋ a, bɩá Bulu ɛ ɔbɛ́ha fʋ ɩpɔn. Fʋmɛ́ɛtalɩ kɔlɩ dalɩ mʋ ɩbɩ. Ntɛ fʋmeyin alɩ?

⁴ Bulu lalɛ mʋ yile pʋ́ mʋ awɩtɔlɛ ɔwan suna fʋ. Alanya klʋn ha fʋ; tamɛ fʋmobu mʋ. Ntɛ fʋmeyin ánɩ́ alɩá fɛ́damli klʋntɔ yinki ba mʋ wa sʋ alalɛ mʋ awɩtɔlɛ suna fʋ?

⁵ Tamɛ klʋntɔ bʋ fʋ odwin, asʋtɔ bʋ fʋ ɔnlɩn. Mʋ́ sʋ ɩsʋtɔbɩtɩá ɩda gyo fʋ ɛkɛá Bulu Ɔnɔkwalɩpʋ obégyi asʋn ɩtra demoni tsɩa.

⁶ Bulu ɔbɛ́ka ɔhagyiɔha ɩkɔ mʋ bwɛhɛ ɔnɔ.

⁷ Akʋ bapʋ ansɩ dɩnka ánɩ́ bénya numnyam, ɩdayile pʋ́ nkpa ánɩ́ ɩtamata. Mʋ́ sʋ banya klʋn bʋdɛ yile bwɛ ekekegyiɛkɛ. Amʋ́ Bulu ɔbɛ́ha nkpa ánɩ́ ɩtamata nɩ.

⁸ Tamɛ akʋá bʋbʋ ɔnsɩpɛ, bakina ɔnɔkwalɩ amʋ pʋ́ yilebwɛ, bʋbuo lalahɛ mʋ́ a, Bulu ɔbɔ́pʋ ɔblɔ gyi amʋ́ asʋn, bɩtɩ amʋ́ ɩsʋ wanklaan.

⁹ Asʋn wunhɛ mʋ́a ɩwɩɔsɩn bɛ́ba lalahɛ abwɛpʋ fɛ́ɛ́sʋ. Ibégyankpa tʋ Yudafɔ, asa ɩbɔ́tʋ aha ánɩ́ bʋmegyi Yudafɔ.

¹⁰ Tamɛ Bulu ɔbɔ́wa yile abwɛpʋ numnyam, ha amʋ́ iwilwii, tra ha amʋ́ ayɛ. Obégyankpa ha Yudafɔ, asa ɩbɔ́tʋ aha ánɩ́ bʋmegyi Yudafɔ.

¹¹ Tsufɛ Bulu tegyi asʋn ɔnɔkwalɩsʋ, ɔtamakɩ ɔhaa ansɩtɔ.

¹² Aha amʋʋ bʋmeyin Mose Mbla amʋ, bʋdɛ lakpan bwɛ amʋ o bɔ́fwɩ. Tamɛ Bulu mɔ́ɔpʋ mbla amʋ gyi amʋ́ asʋn. Aha amʋʋ bʋyin mbla amʋ asa bʋdɛ lakpan bwɛ amʋ mʋ́ a, Bulu ɔbɛ́lɩɩ mbla amʋsʋ ha amʋ́ ɩpɔn.

¹³ Tsufɛ megyi aha ánɩ́ bʋyin Mose Mbla amʋ asʋn da ɔkpa Bulu ansɩtɔ. Mboun aha ánɩ́ bʋtegyi mʋ́sʋ.

¹⁴ Ɩbʋ mʋ́tɔá aha amʋʋ bʋmegyi Yudafɔ bʋmeyin Mose Mbla amʋ. Tamɛ nɩ amʋ́ onuto bʋdɛ mbla amʋsʋ gyi a, bʋdesuna ánɩ́ bʋyin yile mʋ́a lalahɛ amʋ́ klʋntɔ.

¹⁵ Amʋ́ bwɛhɛ anfɩ desuna ánɩ́ Bulu lɔwanlɩn mbla amʋ dɩnka amʋ́ klʋnsʋ. Amʋ́ klʋn dɛ adansɩɛ gyiá lɛlɛ bʋyin mʋ́. Tsufɛ brɛ kʋtɔ a, amʋ́ agywɩɩn tɛha amʋ́ ɩpɔn, brɛ kʋtɔ ɛ a, ɩtɛha amʋ́ asʋ.

¹⁶ Alɩ kɛn ɩbɛ́ba ɛkɛ amʋʋ Bulu ɔbɔ́tsʋn Yesu Kristosʋ gyi tɔá aha babwɛ ŋaintɔ ɩwɩ asʋn nɩ. Alɩ Kristo ɩwɩ asʋn wanklaan amʋʋ ndɛ mʋ́ ɔkan da amʋ idesuna nɩ.

Yudafɔ Pʋ́ Mose Mbla

¹⁷ Fʋ fɛɛ Yudayin fʋgyi, fʋ ansɩ dɩn Mose Mbla amʋsʋ. Fʋdɛpʋ ɩbɩ si kantɔ fɛɛ, Bulu mʋ bi fʋgyi.

¹⁸ Fʋyin Bulu apɛ, tsufɛ fakasɩ Mose Mbla amʋ. Mʋ́ sʋ fʋyin tɔá ɩbʋ alɛ.

¹⁹ Fʋtɛkɩ fʋ ɩwɩ ansibi abwiepʋ ɔkpapʋ, fʋgyi fɛ ɔkandɩɛ ha aha ánɩ́ bʋmeyin Bulu, basin okluntɔ.

²⁰ Fʋ fɛɛ, fʋgyi aha mimlahɛ ansɩ ɔtɩnpʋ. Fɛ́talɩ suna aha ánɩ́ bʋmeyin ɔlala, tɔá ɩbʋ alɛ. Tsufɛ fatsula fɛɛ, Mose Mbla amʋ sʋ fabɩ togyitɔ. Fabɩ ɔnɔkwalɩ kugyikʋ ɛ.

²¹ Tamɛ ɩnɩá fʋdɛ aha yile suna a, ntogyi sʋ fʋmóosuna fʋ ɩwɩ mʋ́? Fʋdɛ ɔkan da bla aha fɛɛ, bʋmáwi atɔ, tamɛ fʋ onuto fʋdewi?

²² Fɛɛ bʋmátɔ mbʋa, tamɛ fʋdɛ mbʋa tɔ? Fɛɛ bʋmásum ɩkpɩ, tamɛ fʋtowi ɔkpɩasɩ atɔ.

²³ Fʋtotsu ɩwɩ Mose Mbla amʋ sʋ, tamɛ fʋtɛpan mʋ́sʋ. Ɩnɩ sʋ fʋdɛ Bulu kpɔɩ.

²⁴ Bulu asʋn wanlɩnhɛ amʋ lɛblɩ ɔbɛɛ, “Mlɩ Yudafɔ bwɛhɛ sʋ aha ánɩ́ bʋmegyi Yudafɔ bʋdɛ Bulu ɩwɩ asʋn lalahɛ blɩ.”

²⁵ Nɩ mlɩdɛ Bulu mbla amʋsʋ gyi a, mlɩ ketetɩn bʋ labi. Tamɛ nɩ mlɩtamagyi mʋ́sʋ a, mlɩgyi fɛ aha ánɩ́ bʋmɛtɩn kete.

²⁶ Nɩ ɔkʋ mɛtɩn kete, ɔdɛ Mose Mbla amʋsʋ gyi a, ogyi fɛ kete ɔtɩnpʋ Bulu ansɩtɔ.

²⁷ Mlɩ Yudafɔ mlɩyin mbla amʋ, tsufɛ bɔwanlɩn mʋ́ tswɩ mlɩ. Bɛtɩn mlɩ kete ɛ, tamɛ mlɩtɛpan Mose Mbla amʋsʋ. Mʋ́ sʋ ɔha ánɩ́ ɔmɛtɩn kete kʋraa, tamɛ ɔdɛ mbla amʋsʋ gyi ɔbɛ́lɛ mlɩ ɩla.

²⁸ Tsufɛ megyi kete ɔtɩnpʋ gyi Yudayin onuto. Ketetɩn onutonuto bʋ ɩnʋ. Megyi ɔyʋlʋsʋ ketetɩn kɛkɛ.

²⁹ Nɩ ɔkʋ gyi Yudayin onutonuto a, mʋ klʋntɔ tosuna. Ketetɩn onuto itsu klʋntɔ. Bulu Ɔŋɛ amʋ tɔbwɛ mʋ́, megyi mbla amʋʋ bɔwanlɩn tswɩ amʋsʋ gyi. Ɔha ánɩ́ Bulu Ɔŋɛ amʋ ɩlɛtɩn mʋ kete a, Bulu onuto tɛkanfʋ mʋ, megyi nyankpʋsa.