Romafɔ 16 - Bulu Ntam Pɔpwɛ mʋ́a Israel Ɩlʋ

Itsiaha

¹ Ndɛ opio tsɩhɛ Foibe lɛ suna mlɩ. Kenkrea wulutɔ ɔpasuatɔ ahandɛ ɔbʋapʋ ogyi.

² Mlɩhɔ mʋ anɩ Wie Yesu ɩdatɔ alɩá ɩlɛkana ánɩ́ Bulu aha bɔ́bwɛ, amlɩbʋa mʋ ɔkpagyiɔkpasʋ alɩá odekle. Tsufɛ mʋ onuto alabʋa aha tsɔtsɔɔtsɔ, alabʋa mɩ ɛ.

³ Nɛha Priska mʋa mʋ klu Akwila fɛ́ɛ́ tsia. Mɩa amʋ́nyɔ letsia bwɛ anɩ Wie Kristo Yesu agyʋma.

⁴ Bɔpʋ amʋ́ ɩwɩ ha ánɩ́ bówu mɩ sʋ kʋraa. Ndɛ amʋ́ ɩpan da wanklaan. Megyi mɩ nkʋlɛ. Akristofɔá bʋmegyi Yudafɔ ɔpasua fɛ́ɛ́ bʋdɛ amʋ́ ɩpan da.

⁵ Nɛha ɔpasua amʋʋ betsia fia amʋ́ woyitɔ amʋ ɛ fɛ́ɛ́ tsia. Nɛha mɩ ɔdwɛpʋ Epaineto tsia. Mʋlegyankpa hɔ Kristo Asia ɔmátɔ fɛ́ɛ́ nɩ.

⁶ Nɛha Maria amʋʋ olowun ipian mlɩ sʋ amʋ tsia.

⁷ Nɛha mɩ aba Yudafɔ Androniko mʋa Yunia tsia. Bawa mɩa amʋ́nyɔ obu kɩ. Bʋgyi Kristo sumbi ayɔpʋá obú bʋ amʋ́sʋ. Begyankpa hɔ Kristo asa nata bɔhɔ.

⁸ Nɛha mɩ pio ɔdwɛpʋ Kristotɔ Amplia tsia.

⁹ Nɛha anɩ Kristo agyʋma ɔyɔba Urbano mʋa mɩ nyawie klakla Staki tsia.

¹⁰ Nɛha Apele amʋʋ alalɛ suna wanklaan ánɩ́ alapʋ mʋ ɩwɩ ha Kristo amʋ mʋa Aristobulo abusuanfɔ fɛ́ɛ́ tsia.

¹¹ Nɛha mɩ ba Yudayin Herodion tsia. Nɛha Narkiso abusuanfɔ ánɩ́ bʋgyi Akristofɔ tsia.

¹² Nɛha Trifaina mʋa Trifosa, bʋgyi atsɩ amʋʋ bʋdɛ Kristo agyʋmatɔ kinkiinkin amʋ tsia. Nɛha mɩ ɔdwɛpʋ tsɩhɛ Persi, ɔdɛ Kristo agyʋma yɔ kinkiinkin amʋ ɛ tsia.

¹³ Nɛha Rufo mʋa mʋ yin amʋʋ mɩ ɛ ntɛtɩ mʋ mɩ yin amʋ tsia. Rufo gyi anɩ Wie agyʋma ɔyɔpʋá alahɔ ɩda agyʋma amʋtɔ.

¹⁴ Nɛha Asinkrito, Flegon, Herme, Patroba, Herma pʋ́ apio Akristofɔ amʋʋ bʋbʋ amʋ́ wa amʋ fɛ́ɛ́ tsia.

¹⁵ Nɛha Filologo, Yulia pʋ́ Nereo mʋa mʋ pio tsɩhɛ pʋ́ Olimpa mʋa Bulu aha amʋʋ bʋbʋ amʋ́ wa amʋ fɛ́ɛ́ tsia.

¹⁶ Mlɩlata aba puta Bulu ɔdwɛtɔ. Kristo ɔpasua amʋ fɛ́ɛ́ bʋdɛ mlɩ tsia ha.

Tɔá Roma Ahogyipʋ Amʋ Bʋbwɛ

¹⁷ Apio, nokokoli mlɩ, mlɩkɩ wanklaan, mɛnɩ mlɛ́talɩ wun aha ánɩ́ bʋbʋ mlɩtɔ, bʋdɛ mlɩ dasaɩn. Alɩ aha amʋ bʋtɛha aha bʋtɛdɩda hogyitɔ. Amʋ́ atosunahɛ tɛda mʋ́ amʋʋ nosuna mlɩ amʋ mɔ. Mlɩkʋla ɩwɩ lɛ amʋ́sʋ.

¹⁸ Tsufɛ aha amʋ odu a, megyi anɩ Wie Yesu Kristo bʋdesum. Amʋ́ ɔwɔlɩ lalahɛ bʋdesum. Bapʋ amʋ́ ɔnɔwankɩ pʋ́ ahakanfʋ bʋna bʋdɛ aha ánɩ́ bʋmeyin ɔlala mlɛ.

¹⁹ Tamɛ mlɩ mʋ́ a, ɔhagyiɔha lanu alɩá mlɩlapʋ mlɩ ɩwɩ ha Kristo. Mʋ́ sʋ ɩbʋ mɩ ɔdwɛ, ansɩ dɛ mɩ gyi wanklaan mlɩ sʋ. Tamɛ ndekleá mlɩtɩn ansɩ, amlɩbɩ tɔá ɩbʋ alɛ. Mlɩmáwa ɩbɩ lalahɛtɔ.

²⁰ Bulu tɛha anɩ iwilwii. Ɩmɔ́ɔwa ɔpá a, ɔbɛ́tsa Satansʋ manta ɔsʋlʋ tantaantan, mlɛ́lɩɩ mʋsʋ. Anɩ Wie Yesu Kristo ogyi mlɩ bʋalɛ, ɔlɩɩ mlɩ ɔma.

²¹ Mɩ ba agyʋma ɔyɔpʋ Timoteo dɛ mlɩ tsia ha. Alɩ mɩ aba Yudafɔ Lukio mʋa Yason pʋ́ Sosipatro ɛ bʋdɛ mlɩ tsia ha nɩ.

²² Mɩ mlɩ pio Okristoyin Tertioá nɔwanlɩn ɔwʋlʋ anfɩ ha Paulo, ndɛ mlɩ tsia ha.

^23-24 Mɩ woyi mʋ wie Gaio amʋʋ ɔpasua amʋʋ bʋtefia mʋ woyitɔ amʋ dɛ mlɩ tsia ha. Erasto, ogyi wulu kɔbasʋ ɔkɩpʋ mʋa anɩ pio Kwarto ɛ bɛha mlɩ tsia.

Paulo Bulu Kanfʋ

²⁵ Mlɩha akanfʋ anɩ Bulu! Mʋ ɔbɛ́talɩ tsʋn Yesu Kristo asʋn amʋʋ nablɩ amʋsʋ ha mlɛ́lɩɩ kinkiinkin hogyitɔ. Ɔlɔpʋ ɔnɔkwalɩ anfɩ ŋain tsu ɔyɩ ɔpá.

²⁶ Sei mʋ́ a, alatsʋn mʋ ɔnɔsʋ atɔɩpʋ amʋ atɔ wanlɩnhɛsʋ lɛ mʋ́ ɔwan; fɛ alɩá Buluá ɔbʋ ɩnʋ brɛ fɛ́ɛ́ laha ɔmá-ɔmá babɩ mʋ́, mɛnɩ aha fɛ́ɛ́ bɔ́hɔ mʋ gyi, bu mʋ.

²⁷ Bulu nkʋlɛ gyi Bulu. Mʋ nkʋlɛ bʋ nyansa. Numnyam ánɩ́ ɩlɛkana ɩtsʋn anɩ Wie Yesusʋ ɩtʋ mʋ brɛ fɛ́ɛ́. Amen!