Romafɔ 14 - Bulu Ntam Pɔpwɛ mʋ́a Israel Ɩlʋ

Akristofɔ Ɩlalɛ Ɔkpa Lalahɛsʋ

¹ Mlɩhɔ mlɩ aba Akristofɔá bʋma ɔwʋnlɩn hogyitɔ wa mlɩtɔ. Nɩ bɛɛ, tɔkʋ bʋ alɛ ntɛ ɩma alɛ a, mlɩmágyi amʋ́ nwɛn.

² Ɔkʋ lohogyiá ɔbʋ ɔkpa gyi togyitɔ, tamɛ ɔkʋ ɛ hogyi ɔnɔ ɩma ɔnlɩn. Mʋ́ sʋ ɔtamagyi iye.

³ Ɔkpa má ɩnʋá ɔha ánɩ́ otegyi togyitɔ ɔbɛ́lɛ ɔha ánɩ́ ɔtamagyi tɔkʋ ɩla. Alɩ kɛn ɔha ánɩ́ ɔtamagyi tɔkʋ ɛ ɔmálɛ ɔha ánɩ́ otegyi togyitɔ ɩla nɩ. Tsufɛ Bulu lahɔ amʋ́.

⁴ Fʋgyi ma ánɩ́ fɛ́ha ɔkʋ osumbi pɔn? Mʋ wie nkʋlɛ pɛ bʋ ɔkpa blɩ ɔbɛɛ, otsie wanklaan ntɛ ometsie wanklaan. Ɔbɛ́talɩ tsia wanklaan, tsufɛ Bulu ɔbɛ́talɩ ha mʋ obétsia wanklaan.

⁵ Ɔkʋ ɔbɛ́talɩ blɩ ɔbɛɛ, ɛkɛ kʋ dʋn mʋ́ aba, ɔkʋ ɛ ɔbɛ́blɩ ɔbɛɛ, nkɛ amʋ fɛ́ɛ́ igyi kʋlɛ. Ɔhagyiɔha ɔyɔ mʋ klʋntɔ wanklaan, otsu mʋ́á ɩbʋ alɛ.

⁶ Nɩ ɔkʋ ɔlɛ ɛkɛ ɔkʋ ɔbɛɛ igyi ɛkɛ yile a, ɔdɛ mʋ́sʋ gyi pʋtsu Bulu fʋa. Nɩ ɔkʋ ɛ tegyi togyitɔ a, ɔdɛ mʋ́ gyi pʋtsu anɩ Wie fʋa. Nɩ ɔkʋ ɛ tamagyi iye a, mʋ ɛ ɔdɛ mʋ́ kisi pʋtsu anɩ Wie fʋa. Tsufɛ amʋ́ fɛ́ɛ́ bʋtɛda Bulu ɩpan mʋ́sʋ.

⁷ Anɩtɔ ɔhaa metsie nkpa ha mʋ ɩwɩ, anɩtɔ ɔkʋkʋ ɛ móowu ha mʋ ɩwɩ.

⁸ Nɩ anɩtsie nkpa a, anɩtsie ha anɩ Wie. Awu ɛ a, anɩlawu ha mʋ. Mʋ́ sʋ nɩ anɩlawu o, anɩtsie nkpa o, anɩ Wie bʋ anɩ.

⁹ Tsufɛ Kristo lowu, yinki kʋsʋ ba nkpatɔ, mɛnɩ ɔbɔ́bwɛ akɩankpapʋ pʋ́ awupʋ fɛ́ɛ́ Owie.

¹⁰ Ɩnɩ sʋ imehian ánɩ́ fɛ́ha fʋ ba ɩpɔn ntɛ fɛ́kɩ fʋ ba ansɩtɔ kotikoti. Tsufɛ anɩ fɛ́ɛ́ abɛ́yɛlɩɩ Bulu ansɩtɔ, obégyi anɩtɔ okugyiɔkʋ asʋn.

¹¹ Bɔwanlɩn wa Bulu asʋn amʋtɔ bɛɛ, “Anɩ Wie Bulu ɔbɛɛ, ‘Nanya mbʋ nkpa anfɩ a, ɔhagyiɔha ɔbɛ́da akpawunu mɩ ansɩtɔ; ɔhagyiɔha ɔbɛ́lɛ blɩ ɔbɛɛ, Bulu ngyi.> ”

¹² Mʋ́ sʋ anɩtɔ okugyiɔkʋ ɔbɛ́lɛ mʋ asʋn ɔnɔ Bulu ansɩtɔ.

Máha Fʋ Ba Ɔdɩda Mʋ Hogyitɔ

¹³ Mʋ́ sʋ mlɩha asi aba ɩla lɛ. Mboun abwɛ agywɩɩn ánɩ́ anɩmɔ́ɔbwɛ tɔtɔá ɩbɛ́ha anɩ ba ɔkʋkʋ mɛ́ɛsrɛɩ ntɛ dɩda.

¹⁴ Sei ɩnɩá namli Okristoyin sʋ nabɩá atogyihɛ kʋkʋ má ɩnʋá mʋ́ ɩwɩ mɛtɩn. Tamɛ nɩ Kristoyin ɔkʋ lohogyiá tɔkʋ ɩwɩ mɛtɩn a, mʋmʋ mʋ wa mʋ́ ɩwɩ mɛtɩn.

¹⁵ Nɩ fʋtegyi tɔkʋ, ɩdɛ fʋ ba han a, mʋmʋ fʋ bwɛhɛ mɛdɛ ɔdwɛ suna. Máha fʋ atogyihɛ ɩha fʋ ba ánɩ́ Kristo lowu ha mʋ ɔfwɩ.

¹⁶ Mʋ́ sʋ máha tɔá fʋyin ánɩ́ ɩbʋ alɛ ɩbwɛ tsitsa aha ansɩtɔ.

¹⁷ Tsufɛ Bulu iwiegyi amʋ imegyi atogyihɛ ntɛ atonunhɛ asʋn, mboun yilebwɛ, iwilwii pʋ́ ansigyi ánɩ́ itsu Ɔŋɛ Wankɩhɛ amʋtɔ asʋn igyi.

¹⁸ Ɔhagyiɔha ánɩ́ otosum Kristo ɔkpa anfɩsʋ a, mʋ asʋn tegyi Bulu ansɩ. Aha ɛ bʋtobu mʋ.

¹⁹ Ɩnɩ sʋ mlɩha anɩ ansɩ ɩpɛ tɔá ɩbɔ́pʋ iwilwii ba, ɩbɔ́wa apio aba ɔwʋnlɩn hogyitɔsʋ bregyibrɛ.

²⁰ Máyinta Bulu gyumagyihɛ fʋ atogyihɛ sʋ. Ɔkpa bʋ ɩnʋá abɛ́talɩ gyi togyitɔ, tamɛ nɩ ɔkʋ dɛ tɔá ɩbɛ́ha mʋ ba ɔbɔ́bwɛ lakpan bwɛ mʋ́ a, ɩma alɛ.

²¹ Nɩ ɔkʋ tamagyi iye kʋ, ntɛ nun nta ntɛ bwɛ tɔá ɩbɛ́ha mʋ ba ɔbɛ́dɩda a, ɩbʋ alɛ.

²² Mʋ́ sʋ togyitɔá fohogyi tsu ntobi anfɩ ɩwɩ a, ha mʋ́ ɩbwɛ fʋa fʋ Bulunyɔ nsɩnɛ asʋn. Nɩ ɔkʋ opuni mɛdɛ mʋ tsii mʋ bwɛhɛsʋ a, mʋmʋ ɔkla lawa mʋ ogya.

²³ Tamɛ nɩ mʋ klʋn mɛdɩ mʋ asɩ mʋ atogyihɛ kʋ gyi sʋ, ogyi mʋ́ a, Bulu laha mʋ ɩpɔn dodoodo. Tsufɛ mʋ atɔ amʋ gyi mɛlɩɩ hogyisʋ. Togyitɔá ɔha mɔpʋ hogyi bwɛ igyi lakpan.