Romafɔ 11 - Bulu Ntam Pɔpwɛ mʋ́a Israel Ɩlʋ

Bulu Israelfɔ Nwewun

¹ Ndɛ mlɩ fɩtɛ mbɛɛ, mʋ́ sʋ Bulu lakina mʋ onuto aha lɛlɛ? O-o! Mɩ onuto anfɩ o Israelyin ngyi. Abraham abi-anátɔ notsu. Benyamin abusuantɔ obi ngyi.

² Megyi bɛɛ, Bulu lakina mʋ onuto aha amʋʋ ɔlɛlɛ amʋ́ yaɩ amʋ. Mlɩkaɩn alɩ amʋʋ Bulu asʋn wanlɩnhɛ amʋ lɛblɩ tswɩ ɔbɛɛ, Bulu ɔnɔsʋ ɔtɔɩpʋ Elia lɛkla Israelfɔ ɩwɩ asʋn suna Bulu amʋsʋ.

³ Ɔbɛɛ, “Mɩ Wie! Israelfɔ bamɔ fʋ ɔnɔsʋ atɔɩpʋ fɛ́ɛ́. Babwie fʋ afɔdɩɛ-ɩswɩ ɛ fɛ́ɛ́. Ɩlasi mɩ nkʋkʋnʋ nkʋlɛ. Bʋdekleá bɔ́mɔ mɩ ɛ.”

⁴ Bulu lɛha Elia mbuaɩ ɔbɛɛ, “O-o! Megyi fʋ nkʋlɛ ɩlasi. Tsufɛ nalɛ aha mpɩm-sienɔ (7,000) ánɩ́ bʋmɔkʋtswɛ ɔkpɩ Baal kɩ ha mɩ ɩwɩ.”

⁵ Alɩ igyi ndɛ nkɛ anfɩtɔ ɛ nɩ. Bulu lawa awɩtɔlɛ lɛ Israelfɔ kpalobi akʋ yaɩ.

⁶ Nɩ alawa awɩtɔlɛ lɛ akʋ a, mʋmʋ ɩtra megyi ɔha bwɛhɛ sʋ ɔbɛ́lɛ mʋ. Tsufɛ nɩ ɩna aha bwɛhɛsʋ mʋ́ a, tɛkɩ mʋ awɩtɔlɛ amʋ ilesian.

⁷ Mʋ́ nkalɩ ilegyi? Israelfɔ ɩbɩ mɛda ɩtɔ amʋʋ bɛpɛ ansɩ bʋdedunka amʋ. Amʋ́tɔ aha kpalobi akʋá Bulu lɛlɛ yaɩ nkʋlɛ ɩbɩ lɛda mʋ́. Ɔlɛha atrahɛ bɔwa asʋtɔ-ɔnlɩn brɛá ɔdɛ aha tɩ.

⁸ Bulu asʋn wanlɩnhɛ amʋ lɛblɩ ɔbɛɛ, “Bulu lɛha ɩlɛlɩn amʋ́ ɔwɔlɩ. Mʋ́ sʋ bɔtʋ ndɛ bʋmɛtalɩ pʋ amʋ́ ansibi wun atɔ, pʋ amʋ́ asʋ ɛ nu asʋn.”

⁹ Owie Dawid ɛ lɛblɩ ɔbɛɛ, “Amʋ́ ɔdwɛ ogyikpa ɩbwɛ mpʋsa, abʋda mʋ́tɔ. Ɩbwɛ agbla, ɩkpa kɩta amʋ́. Ɩbwɛ ɩma, abʋsrɛɩ dɩda mʋ́tɔ, ɩbwɛ ɩsʋbɩtɩ ha amʋ́.

¹⁰ Ansɩtɔ iklun amʋ́, mɛnɩ bʋmɛ́ɛtra wun atɔ. Ha abʋtsia ipiantɔ brɛ fɛ́ɛ́.”

¹¹ Mʋ́ sʋ ntra ndɛfɩtɛ mbɛɛ, Yudafɔ basrɛɩ dɩda, bʋmɛ́ɛtalɩ tra kʋsʋ? Ɛkɛkɛɛkɛ! Amʋ́ lakpan sʋ Bulu lɔhɔ aha ánɩ́ bʋmegyi Yudafɔ nkpa. Fówun ɩpɛ amʋ́ ansɩ.

¹² Sei a, anɩyin ánɩ́ Yudafɔ lakpan sʋ ɔmá fɛ́ɛ́ banya atɔ wanklaan. Amʋ́ dɩda lawa labi ha aha ánɩ́ bʋmegyi Yudafɔ. Nɩ bɛlanya nkpahɔ mʋ́ a, mʋmʋ labiá aha ánɩ́ bʋmegyi Yudafɔ bénya ɩma blɩtɔ.

Aha Ánɩ́ Bʋmegyi Yudafɔ Nkpahɔ

¹³ Aha ánɩ́ mlɩmegyi Yudafɔ, mlɩ ndɛ asʋn anfɩ bla ngya a. Kristo sumbi ɔyɔpʋ ngyi. Ɔlɔwa mɩ sumbi mlɩ wa. Mɩ gyumagyihɛ legyi mɩ ansɩ.

¹⁴ Fialɩ nɛ́talɩ ha mɩ aha Yudafɔ ansɩ bɛ́pɛ, fówun Bulu obénya ɔkpa hɔ amʋ́tɔ akʋ nkpa.

¹⁵ Brɛá Bulu lɛdamli ɔma ha Yudafɔ a, ɩlɛha ɔmá atrahɛ fɛ́ɛ́ bɔbwɛ Bulu anyawie. Nɩ igyi alɩ mʋ́ a, bregyibrɛá Bulu ɔbɔ́hɔ amʋ́ ɛ a, ɩbɔ́bwɛ fɛ afuli fɛ́ɛ́ bakʋsʋ tsu afulitɔ.

¹⁶ Nɩ bɛlɛ tɔkʋtɔ gyankpapʋ ha Bulu igyi a, mʋmʋ ɩtɔ amʋ fɛ́ɛ́ igyi mʋ klɛ. Nɩ Bulu bʋ oyi nlin a, idesuna ánɩ́ oyi amʋ abambi ɛ igyi mʋ klɛ.

¹⁷ Bɛkpalɩ oyi bambi pʋ bamba tsa mʋ́sʋ. Yudafɔ gyi oyi amʋ. Mlɩ aha ánɩ́ mlɩmegyi Yudafɔ gyi bambi bamba amʋʋ bapʋtsa mʋ́sʋ amʋ, mɛnɩ mlénya oyi amʋtɔ ntsu wanklaan amʋ kʋ.

¹⁸ Mʋ́ alɩ sʋ a, mlɩmákɩ mlɩaa, mlɩdʋn oyi amʋ onuto abambi amʋʋ Bulu lɛkpalɩ lɛ amʋ. Mlɩmátsu ɩwɩ amʋ́ ansɩtɔ, tsufɛ oyi amʋ nlin tamanun ntsu lɛ mlɩtɔ. Mlɩ mboun tonun ntsu lɛ mʋ́tɔ pʋdan.

¹⁹ Fialɩ mlɩ akʋ mlɛ́blɩ mlɩaa, “Bɛkpalɩ abambi amʋ, mɛnɩ anɩ ɛ abénya oyikpa.”

²⁰ Ɩbʋ mʋ́tɔ alɩ. Itsu alɩá Israelfɔ bʋmohogyi sʋ Bulu lɛkpalɩ amʋ́ tsitsa. Mlɩ ɛ mlɩ hogyi sʋ Bulu lapʋ mlɩ tsa mʋ́sʋ. Mʋ́ sʋ mlɩmáha nwuntɔ ɩwa mlɩ ɔdwɛ. Mlɩha ifu ɩkɩta mlɩ.

²¹ Tsufɛ Israelfɔ amʋʋ bʋgyi oyi amʋ onuto abambi kʋraa bɔbwɛ lakpan, Bulu lɛbɩtɩ amʋ́ ɩsʋ, mʋ́ mlɩ?

²² Sei a, mlɩlawun ánɩ́ Bulu bʋ awɩtɔlɛ, tamɛ mʋ asʋn bʋ ɔnlɩn. Ɔbʋ ɔnlɩn aha ánɩ́ badɩda hogyitɔsʋ. Tamɛ alawa awɩtɔlɛ ha mlɩ. Ɔbɔ́wa awɩtɔlɛ ha mlɩ nɩ mlɩ ansɩ dɩn mʋsʋ. Nɩ megyi alɩ a, ɔbɛ́bɩtɩ mlɩ ɩsʋ mlɩ ɛ.

²³ Tamɛ nɩ Yudafɔ amʋʋ besi mʋ hogyi amʋ beyinki bɔhɔ mʋ gyi a, Bulu ɔbɛ́lapʋ amʋ́ tsa oyi amʋsʋ. Tsufɛ ɔbʋ tumiá obéyinkia amʋ́ tsa.

²⁴ Mlɩ aha amʋʋ mlɩmegyi Yudafɔ amʋ mʋ́ a, oyi lalahɛ bambi mlɩgyi, bɔpʋ mlɩ tsa oyi amʋsʋ. Tɛkɩ ɩma ɩnʋ alɩ. Israelfɔ mʋ́ a, oyi wanklaan amʋ onuto abambi bʋgyi, bɛkpalɩ amʋ́ tsitsa. Mʋ́ sʋ amʋ́ yinkia yi mʋ́ yintisʋ mɔ́ɔwa ɔnlɩn ha Bulu.

Bulu Towun Aha Fɛ́ɛ́ Nwɛ

²⁵ Mɩ apio, asʋn ŋainhɛ kʋ bʋ ɩnʋá ndekleá mlɩbɩ, mɛnɩ mlɩmɛ́ɛkɩ mlɩ ɩwɩá mlɩlɛtɩn ansɩ dʋbɩ. Asʋn amʋ gyi, Yudafɔ amʋ akʋ bʋbʋ asʋtɔ-ɔnlɩn. Bɔ́wa asʋtɔ-ɔnlɩn alɩɩ bɔfʋn brɛá Bulu laha aha ánɩ́ bʋmegyi Yudafɔ fɛ́ɛ́ baba mʋ wa.

²⁶ Mʋ́ ɔma a, Bulu ɔbɔ́hɔ amʋ́ fɛ́ɛ́ nkpa. Bulu asʋn amʋ lɛblɩ ɔbɛɛ, “Sion wulutɔ Nkpa Ɔhɔpʋ amʋ ɔbɛ́lɩn tsu. Ɔbɛ́ba bɛha Yakob abi-aná fɛ́ɛ́ bési lalahɛ bwɛ.

²⁷ Ɩnɩgyi ntam ánɩ́ nɛ́ka ha amʋ́ brɛá nɛ́lɛ amʋ́ tsu amʋ́ lakpantɔ nɩ.”

²⁸ Ɩnɩá Yudafɔ amʋ bʋmɔhɔ asʋn wanklaan amʋsʋ gyi sʋ a, bemli Bulu alupʋ, mɛnɩ ɩbɔ́wa labi ha mlɩ amʋʋ mlɩmegyi Yudafɔ amʋ. Tamɛ ɩnɩá bʋgyi aha ánɩ́ Bulu lɛlɛ sʋ a, amʋ́ anain sʋ otekle amʋ́ asʋn.

²⁹ Nɩ Bulu ɔlɛ ɔkʋ ntɛ ɔpʋ mʋ atokiehɛ ha ɔkʋ a, ɔtamatra tsɛ mʋ agywɩɩn.

³⁰ Brɛ kʋtɔ a, mlɩ anfɩ mlɩmegyi Yudafɔ anfɩ mlɩmobu Bulu. Tamɛ sei a, Yudafɔ bʋmɛdɛ Bulu bu. Mʋ́ sʋ Bulu lawun mlɩ nwɛ.

³¹ Alɩ kɛn Bulu ɔbɛ́ba bowun Yudafɔ amʋʋ bʋmɛdɛ mʋ bu amʋ ɛ nwɛ, fɛ alɩá alawun mlɩ nwɛ nɩ.

³² Tsufɛ Bulu lotsu mʋ́á aha fɛ́ɛ́ bʋbʋ asʋtɔ-ɔnlɩn, alɩá ɩbɔ́bwɛ obówun amʋ́ fɛ́ɛ́ nwɛ sʋ.

Mlɩha Akanfʋ Bulu

³³ Oo, mlɩkɩ Bulu awɩtɔlɛ wʋlɛ! Mʋ nyansa pʋ́ mʋ asʋnbɩ ma ɔka! Ma ɔbɛ́talɩ bɩ mʋ ɔkpa pʋ́ mʋ asʋngyitɔ?

³⁴ Bɔwanlɩn wa Bulu asʋn wanlɩnhɛ amʋtɔ bɛɛ, “Ma yin anɩ Wie nwuntɔ? Ma ɔbɛ́talɩ suna mʋ asʋn? Ɔhaa má ɩnʋ.

³⁵ Ma lapʋ tɔkʋ ha mʋ, ɔdɛ ɔkpa kɩá ɔbɛ́laka mʋ ɩkɔ?”

³⁶ Bulu lɔbwɛ togyitɔ. Mʋbʋ togyitɔ. Togyitɔ bʋ ɩnʋ ha mʋ. Kanfʋ ɩbwɛ mʋ klɛ brɛ fɛ́ɛ́tɔ. Amen!