Romafɔ 10 - Bulu Ntam Pɔpwɛ mʋ́a Israel Ɩlʋ

¹ Mɩ apio, tɔá ntekle mɩ klʋntɔ, pʋ́ mpaɩá ndɛbɔ gyi, Bulu ɔbɔ́hɔ mɩ aha Israelfɔ.

² Nɛ́talɩ gyi amʋ́ ɩwɩ adansɩɛ mbɛɛ, amʋ́ ansɩ lahɩɛ pɛ Bulusum ɩwɩ, tamɛ bʋmeyin ɔkpa ánɩ́ bɔ́tsʋn mʋ́sʋ sum mʋ wanklaan.

³ Tsufɛ bʋmeyin ɔkpa ánɩ́ Bulu tɔtsʋn mʋ́sʋ ha aha asʋ. Mʋ́ sʋ bɛyɩrɩ ɩwɩ bʋdɛ amʋ́ ɔkpa dunka, mɛnɩ bégyi asʋ Bulu ansɩtɔ. Mʋ́ alɩ sʋ bʋmɛba ɩwɩasɩ ha ɔkpa amʋʋ Bulu tɔtsʋn mʋ́sʋ ha aha asʋ amʋ.

⁴ Ɔnɔkwalɩ amʋ gyi, Kristo lɔmɔ Mose Mbla amʋ fɛ́ɛ́ ɔnɔ. Mʋ́ sʋ ɔhagyiɔha ánɩ́ ɔlɔhɔ mʋ gyi obégyi asʋ Bulu ansɩtɔ.

Nkpahɔ Bʋ Ɩnʋ Ha Ɔhagyiɔha

⁵ Mose lɔwanlɩn tsu ɔhagyiɔha ánɩ́ ɔtɛkɩ mbla amʋ ánɩ́ mʋ́sʋ Bulu ɔbɔ́tsʋn tsu mʋá mʋ asʋn da ɔkpa ɩwɩ ɔbɛɛ, “Ɔhagyiɔha ánɩ́ otegyi mbla amʋsʋ ɔbɔ́tsʋn mʋ́sʋ nya nkpa.”

⁶ Tamɛ hogyisʋ bʋtɔtsʋn gyi asʋ Bulu ansɩtɔ. Bulu asʋn wanlɩnhɛ amʋ lɛblɩ ɔbɛɛ, “Máfɩtɛ ɩwɩ fɛɛ, ‘Ma ɔbɔ́dʋ yɔ ɔsʋsʋ?> ” (Fɛfɩtɛ alɩ a, ilosuna ánɩ́ fɔ́yɔpʋ Kristo tsua ɔsʋsʋ ba.)

⁷ Ntɛ fɩtɛ ɩwɩ fɛɛ, “Ma ɔbɛ́kplɩ yɔ ɔsʋlʋ ayasɩ?” (Fɛfɩtɛ alɩ a, ilosuna ánɩ́ fɔ́yɔpʋ Kristo tsua afulitɔ ba.)

⁸ Mboun asʋn ánɩ́ Bulu asʋn wanlɩnhɛ amʋ lɛblɩ gyi, “Bulu asʋn amʋ ɩma ɩfɔ fʋ wa. Ɩbʋ fʋ ɔnɔtɔ, ɩbʋ fʋ klʋntɔ dodo.” Asʋn amʋ gyi hogyi asʋn amʋʋ anɩdɛblɩ amʋ nɩ.

⁹ Nɩ fobwii ɔnɔ blɩ fɛɛ, “Yesu gyi anɩ Wie,” fɔpʋ fʋ klʋn fɛ́ɛ́ hogyiá Bulu lɔkʋsʋa mʋ tsu afulitɔ a, Bulu ɔbɔ́hɔ fʋ nkpa.

¹⁰ Tsufɛ ɩklʋn ɔha tɔpʋhɔ Kristo gyi. Fówun Bulu obótsu mʋ ánɩ́ mʋ asʋn da ɔkpa. Ɔnɔ ɛ ɔha tɔpʋblɩ ɔbɛɛ, Yesu gyi mʋ wie, mɛnɩ Bulu ɔbɔ́hɔ mʋ nkpa.

¹¹ Alɩ kɛn Bulu asʋn wanlɩnhɛ amʋ lɛblɩ ɔbɛɛ, “Pɛlɩ mɛ́ɛkɩta ɔhagyiɔha ánɩ́ ɔlɔhɔ mʋ gyi ɛkɛkɛɛkɛ” nɩ.

¹² Ɩnɩ sʋ ɩmɛfahʋn ánɩ́ Yudayin fʋgyi, ntɛ fʋmegyi Yudayin. Tsufɛ owie ɔkʋlɛ pɛ asɩ amʋ́ fɛ́ɛ́ bʋbʋ. Ɔbɔ́pʋ mʋ yilebwɛ gyi aha ánɩ́ bosu kpoli mʋ fɛ́ɛ́ bʋalɛ.

¹³ Alɩ kɛn Bulu asʋn wanlɩnhɛ amʋ lɛblɩ ɔbɛɛ, “Ɔhagyiɔha ánɩ́ otosu kpoli anɩ Wie obénya nkpa” nɩ.

¹⁴ Tamɛ nkalɩ bɛ́talɩ su kpoli ɔha ánɩ́ bʋmɔhɔ mʋ gyi? Nkalɩ bɛ́talɩ hɔ ɔha ánɩ́ bʋmɔkʋnu mʋ ɩwɩ asʋn gyi? Nkalɩ bónu mʋ ɩwɩ asʋn nɩ ɔhaa mɛda mʋ́ ɔkan suna amʋ́?

¹⁵ Nkalɩ bɛ́talɩ da mʋ́ ɔkan suna amʋ́, nɩ bʋmɔkʋwa amʋ́? Bulu asʋn wanlɩnhɛ amʋ lɛblɩ ɔbɛɛ, “Ɩhɩɛ bʋ akɩlɛá fówun ánɩ́ ɔha ɔba bɛda Bulu asʋn wanklaan ɔkan!”

¹⁶ Tamɛ megyi Israelfɔ fɛ́ɛ́ lɔhɔ Bulu asʋn wanklaan amʋ. Tsufɛ Bulu ɔnɔsʋ ɔtɔɩpʋ Yesaia lɔwanlɩn wa mʋ ɔwʋlʋtɔ ɔbɛɛ, “Mɩ Wie, ɔhaa mɔhɔ anɩ asʋn blɩhɛ amʋsʋ gyi.”

¹⁷ Tamɛ asʋn wanklaan amʋ tɛha bʋtohogyi. Ɩna Kristo asʋn anfɩ blɩ sʋ aha bʋtonu mʋ asʋn. Mʋ́ nu sʋ aha bʋtɔhɔ mʋ gyi.

¹⁸ Mbɛɛ, bɛɛ nu bʋmonu asʋn amʋ? Bonu! Tsufɛ Bulu asʋn wanlɩnhɛ amʋ lɛblɩ ɔbɛɛ, “Amʋ́ ɔmɛ lawie ɔyɩtɔ fɛ́ɛ́, amʋ́ asʋn ɛ lawie tsutsuutsu.”

¹⁹ Ntra fɩtɛ. Israelfɔ bʋmonu mʋ asʋn asɩ? Mʋ́á Mose lɛbla amʋ́ gyankpapʋ gyi, “Bulu ɔbɛɛ, ‘Nɔ́pʋ ɔmá ánɩ́ bʋmegyi Israelfɔ wa mlɩ ansɩpɛpɛ. Nóyula ɔmá mimlahɛ pʋwa mlɩ ɔblɔ.> ”

²⁰ Brɛ bambatɔ a, Yesaia lɔwa klʋn bla amʋ́ ɔbɛɛ, “Bulu ɔbɛɛ, ‘Aha ánɩ́ bʋmɛdɛ mɩ dunka lɛmɛntɩ mɩ. Aha ánɩ́ bʋmɛfɩtɛ mɩsʋ nɛlɛ ɩwɩ ɔwan suna.> ”

²¹ Tamɛ Israelfɔ amʋ mʋ́ a, Bulu lɛblɩ amʋ́ ɩwɩ asʋn ɔbɛɛ, “Ɩnɩá natɛɩ ɩbɩtɔ brɛ fɛ́ɛ́á nɔ́hɔ amʋ́ atuu o a, bʋtra bʋdɛ asʋtɔ-ɔnlɩn wa. Bʋmɛdɛ mɩ bu.”