Atɔ Lɛsunahɛ 8 - Bulu Ntam Pɔpwɛ mʋ́a Israel Ɩlʋ

Okpin Sienɔsɩ Amʋ Maɩn

¹ Brɛá Okufabi amʋ lɛmaɩn atɔ sienɔsɩá bɔpʋtan ɔwʋlʋ amʋ ɔnɔ a, ɔsʋsʋ lɔlʋa fɛ dɔnhwɩrɩ-fʋn.

² Ɩnʋ nowun Bulu-abɔpʋ asienɔ amʋʋ bʋlɩɩ mʋ ansɩtɔ amʋ. Bɛha amʋ́tɔ okugyiɔkʋ ɔkpɛ.

³ Bulu-ɔbɔpʋ bamba lɛba bɛlɩɩ afɔdɩɛ-ɔswɩ amʋ ansɩtɔ. Ɔdɛ sika pɛpɛ blanwebiá bʋtɔwa ɔhɩɛn ogya mʋ́tɔ. Bɛha mʋ ɔhɩɛn tsɔtsɔɔtsɔ, ɔlɔpʋtsɩa Bulu aha mpaɩtɔ, pʋyɛdɩnka sika pɛpɛ afɔdɩɛ-ɔswɩ amʋʋ iyi owie obia amʋ ansɩtɔ amʋsʋ.

⁴ Mʋ ɔhɩɛn amʋ ogyasi lɛtsɩa Bulu aha amʋ mpaɩtɔ, kʋsʋ tsu afɔdɩɛ-ɔswɩ amʋsʋ yɔ Bulu ansɩtɔ.

⁵ Ɩnʋ Bulu-ɔbɔpʋ amʋ lotsu ɔhɩɛn blanwebi amʋ, ɔlɛlɛ ogya afɔdɩɛ-ɔswɩ amʋsʋ wa mʋ́tɔ, fɩn mʋ́ da ɔsʋlʋsʋ. Ɩnʋ nyankpʋ lɔwa ɩbɩ fwɩ bɩ. Odekpie, ɔprada dɛpʋtɩ, ɔmɛ ɔtsan-ɔtsan dɛlɩn kʋklʋkʋʋ, ɔsʋlʋ ɛ dɛkpɩnkɩ kpakpakpakpa.

Ɩkpɛ Asienɔ Amʋ

⁶ Bulu-abɔpʋ asienɔ amʋʋ bʋdɛ ɩkpɛ asienɔ amʋ ɛ bɛda ɩwɩsʋ ha mʋ́ fʋlɩ.

⁷ Bulu-ɔbɔpʋ gyankpapʋ lɔfʋlɩ mʋ ɔkpɛ. Mʋʋ botsu atsufolibi mʋ́a ogya ánɩ́ obugya lɛfra mʋ́, tswɩ mʋ́ wʋlɩ ɔsʋlʋsʋ. Nɩ beye ɔsʋlʋtɔ asa a, mʋ́tɔ iku-kʋlɛ mʋ́a mʋ́sʋ nyi pʋ́ mʋ́sʋ ɩfa fɛ́ɛ́ lɔhɔ plɩplɩplɩplɩ.

⁸ Bulu-ɔbɔpʋ nyɔsɩ lɔfʋlɩ mʋ ɔkpɛ. Ɩnʋ bɔtswɩ tɔkʋ fɛ ɩbʋ kpɔnkpɔntɩá ɩdɛhɔ wa ɔpʋtɔ, ɔpʋtɔye asatɔ ɩkʋlɛ lɛdamli obugya.

⁹ Ɔpʋtɔ mbwɩá bʋkɩ nkpa fɛ́ɛ́tɔ ye asatɔ iku-kʋlɛ bowu. Ntsusʋ ayibitɔye asatɔ iku-kʋlɛ ɛ lobwiebwie.

¹⁰ Ɩnʋ Bulu-ɔbɔpʋ sasɩ lɔfʋlɩ mʋ ɔkpɛ. Ɔtsrakpabi kpɔnkpɔɔnkpɔntɩ kʋá ɩdɛ ogya tsii fɛ obia lɛkpa tsu ɔsʋsʋ bɛda ntsu tsʋnhɛá ɩbʋ ɔyɩtɔ fɛ́ɛ́tɔ ye asatɔ iku-kʋlɛsʋ.

¹¹ Ɔtsrakpabi amʋ ɩda gyi “Ɔkɩta.” Ɩnʋ ntsu tsʋnhɛ amʋtɔye asatɔ iku-kʋlɛ lɔwa ɔkɩta dʋn ɔkpɩn. Mʋ́ ɔkɩta sʋ aha tsɔtsɔɔtsɔá bonu mʋ́ bowu.

¹² Ɔbɔpʋ nasɩ lɔfʋlɩ mʋ klɛ. Ɩlɔwɔ owi mʋ́a ɔtsra pʋ́ ntsrakpabitɔye asatɔ iku-kʋlɛ. Mʋ́ fɛ́ɛ́ lodun. Ɩnɩ sʋ ɔyɩkɛhɛ mʋ́a owi tahɛtɔye asatɔ iku-kʋlɛ ɛ loklun.

¹³ Nɛkɩ a, oyitsu ɔkʋ defuli, odesu kʋklʋkʋʋ ɔbɛɛ, “Aha ánɩ́ bétsia ɔsʋlʋ anfɩsʋ asa Bulu-abɔpʋ asa atrahɛ amʋ bɔ́fʋlɩ amʋ́ nkpɛ bʋgyɔwɩ tsenyɔ-tsesa!”